හිස සහ ගෙල ආශි‍්‍රත පිළිකා හඳුනාගන්නා ආකාරය

හිස සහ ගෙල ආශි‍්‍රත පිළිකා සාමාන්‍යයෙන් වේගයෙන් වර්ධනය වන පිළිකා ලෙස සඳහන් කළ හැකිය. කාන්තාවන්ට වඩා පිරිමින් අතර මෙම පිළිකා වැඩිපුර දක්නට ලැබේ. හිස සහ ගෙල ප්‍රදේශයේ දැකිය හැකි ප්‍රධාන පිළිකා කාණ්ඩයක් වන මුඛ පිළිකාව පිළිබඳව මෙම පොතේ වෙනත් පරිච්ඡේදයකදී දීර්ඝ වශයෙන් සාකච්ඡා කර ඇත. තෛරොයිඩ් ග්‍රන්ථිය ගෙල ප්‍රදේශයේ පිහිටා තිබුණ ද එහි ඇති වන පිළිකාවල ස්වභාවය ඉහත සඳහන් කළ පිළිකාවලට වඩා හාත්පසින්ම වෙනස් ස්වභාවයක් ගන්නා බැවින් ඒ සම්බන්ධයෙන් ද මෙම ලිපියේ වෙනම සාකච්ඡා කර ඇත.

හිස සහ ගෙල ප්‍රදේශ ආශි‍්‍රත පිළිකා හඳුනාගන්නා ආකාරය

වෛද්‍යවරයා විසින් රෝගියා පරීක්ෂා කිරීමේදී සමහර පිළිකා හඳුනා ගැනීමට පුළුවන. කුඩා කැමරාවක් සහිත බටයක් නාසය තුළින් ඇතුළු කර පරික්ෂා කිරීම (Fibre Optic Endoscopy) මඟින් ද නාස් කුහරය අවට සහ උගුර ආශි‍්‍රත පිළිකා හඳුනා ගැනීමට පුළුවන. විටෙක රෝගියා සාර්ව නිර්වින්දනයට ලක් කර අදාළ ප්‍රදේශය පරීක්ෂා කරනු ලැබේ. ඉහත පරික්ෂණ අතරතුරදී සැක සහිත ප්‍රදේශවලින් පටක කොටස් ලබාගෙන අන්වීක්ෂණ පරීක්ෂණ සඳහා යොමු කරනු ලැබේ. පිළිකා හඳුනා ගැනීමට මෙන්ම එහි විශාලත්වය, පැතිරිම්, ප්‍රතිකාරවලට ප්‍රතිචාර දක්වන ආකාරය වැනි කරුණු පිළිබඳව අවබෝධයක් ලබා ගැනීම සඳහා එක්ස් කිරණ , CT සහ MRI ස්කෑන් වැනි පරීක්ෂා භාවිතා කෙරේ.

හිස සහ ගෙල ආශි‍්‍රත පිළිකා සඳහා අවදානම් සාධක

• දුම්පානය
• මත්පැන් (භාවිතා කරන මත්පැන් ප්‍රමාණය අනුව අවදානම ඉහළ යයි. එසේම මත්පැන් සමඟ දුම්පානය ද කරයි නම් අවදානම තවත් ඉහළ යයි)
• විවිධ රසායනික ද්‍රව්‍යවලින් දූෂිත වාතය ආඝ්‍රාණය කිරීම උදා. නිකල්.
• දිගුකල් පවතින සමහර ආසාදන තත්ව. උදාහරණ : හියුමන් පැපිලෝමා වෛරසය Human Papilloma Virus, එප්ස්ටයින් බාර් වෛරසය (Epstein - Barr Virus) HIV
• සම්, ලී භාණ්ඩ, ස්පී‍්‍රතු වර්ග ආශි‍්‍රත රැකියා.
• දුම්කුඩු නාසයට ඉරීම.
• විටමින් ඒ සහ ඛ් ඌනතාව.
• විකිරණයට නිරාවරණය වීම.

හිස සහ ගෙල ප්‍රදේශයේ දැකිය හැකි ප්‍රධාන පිළිකා වර්ග

• නාස් කුහරය ආශි‍්‍රත පිළිකා.
• හිස් කබල තුළ ඇති වායු කෝටරක ආශි‍්‍රත පිළිකා.
• ග්‍රසනිකාව ආශ්‍රිත පිළිකා.
• ස්වරාලය ආශි‍්‍රත පිළිකා.
• ඛේට ග්‍රන්ථි පිළිකා.

නාස් කුහරය ආශි‍්‍රත පිළිකා රෝග ලක්ෂණ

නාසය ඉදිමීම, නාසයේ වේදනාව, නාස් කුහරය තුළට වර්ධකය නෙරා ඒම, නාසය සිරවීම, හුස්ම ගැනීමේ අපහසුතා, නාසයෙන් ලේ ගැලීම, ගඳ සුවඳ දැනීමේ අපහසුතා.

ප්‍රතිකාර

මූලික අවස්ථාවේ හඳුනාගනු ලබන පිළිකා ශල්‍යකර්ම මඟින් ඉතා සාර්ථක ලෙස ඉවත් කිරීමට පුළුවන. ශල්‍යකර්ම මඟින් ඉවත් කිරීමට අපහසු පිළිකා සඳහා පිළිකා නාශක ඖෂධ සහ විකිරණ ප්‍රතිකාරය භාවිතා කෙරේ. 

උපුටා ගැනීම දිනමිණ