අසිරිමත් දිවියකට සරල මඟක්
කවදාවටත් වඩා අද වනවිට සෞඛ්‍යය හා පෝෂණය සම්බන්ධව කථා කිරීමට සිදු වී තිබේ. බෝ නොවන රෝග ව්‍යාප්තිය දිනෙන් දිනම ඉහළයාම හේතුවෙන් දිනකට අහිමිවන ජීවිත සංඛ්‍යාව වැඩිවෙමින් පැවතීම හා රෝගී වන සංඛ්‍යාව සීඝ්‍රයෙන් ඉහළ යමින් පැවතීම මීට හේතු වී තිබේ. මෙම ගැටලුකාරී තත්ත්වය අවම කර ගැනීමට සහ මර්දනය කර ගැනීමේ මූලික අඩිතාලම වශයෙන් ඒ පිළිබඳව මනා දැනුමකින් පසුවීම ඉතා අවශ්‍ය වේ. ලබාගත් දැනුම උපයෝගී කරගෙන ඒ අනුව කටයුතු කිරීම බෝ නොවන රෝග පාලනයෙහිලා බොහෝ සේ ඉවහල් වේ. මේ ඒ සඳහා ඔබට කළ හැකි සරල ක්‍රියා මාර්ගයයි.
ශරීර ස්කන්ධ දර්ශකය (BMI) යනු කුමක්ද?
අපගේ උස හා බර අනුව ශරීරයේ කෙට්ටු හෝ තරබාරුකම ගණනය කරන මිම්මයි.
වැඩිපුර ලුණු භාවිතය ශරීරයට අහිතකර ද?
ඔව්, වැඩිපුර ලුණු භාවිතය නිසා අධික රුධිර පීඩනය, පපුවේ අමාරුව, අංශභාගය සහ වකුගඩු රෝග සෑදිය හැකිය. එම නිසා බයිට්ස් වර්ග, සෝස්, චිලි පේස්ට්, අච්චාරු වැනි ආහාර ගැනීම සීමා කරන්න.
වැඩිපුර සීනි භාවිතය නිසා ඔබ ලෙඩ විය හැකිද?
ඔව්, වැඩිපුර සීනි භාවිතය නිසා පසුකාලීනව දියවැඩියාව වැනි රෝග ඇතිවිය හැක. ටොෆී වර්ග හා පැණි බීම වර්ග ගැනීම අඩු කරන්න.
ශරීරික අභ්‍යාසවල දිනපතා යෙදීම අත්‍යවශ්‍යද?
ඔව්, නිරෝගීව සිටීමට දරුවන් දිනපතා ක්‍රියාශීලි විය යුතුයි.
ඔබ දිනකට එළවලු/පලතුරු වර්ග කීයක් ආහාරයට ගත යුතුද?
දිනකට අඩුම තරමින් එළවළු / පලතුරු වර්ග 5ක් වත් ආහාරයට ගත යුතුයි.
චයිනීස් රෝල්ස්, අල චිප්ස්, පේස්ට්‍රි, කට්ලට් වර්ග දිනපතා ආහාරයට ගැනීම සුදුසුද?
නැත. මේවායේ තෙල් මෙන්ම ලුණු ද විශාල ප්‍රමාණයක් අඩංගු වෙයි. මෙවැනි ආහාර ගැනීම පුළුවන් තරම් අඩු කළ යුතුය.
දුම්පානය හා මධ්‍යසාර ගැනීම සෞඛ්‍යයට බලපානවාද?
ඔව්, දුම්පානය හා මධ්‍යසාර භාවිතය පිළිකා ඇතුළු ලෙඩ රැසකට හේතු වෙයි.
ඔබගේ දෙමාපියන් නිරෝගීව සිටීමට වසරකට වරක් වත් රුධිර පීඩනය (ප්‍රෙෂර් එක) බැලිය යුතුද?
ඔව්, අවුරුද්දකට වරක් වත් රුධිර පීඩනය පරීක්ෂා කරවා ගත යුතුය.
නෙත් අඳ අයෙකුට ලොව දකින්නට ඉඩදෙන්න. . .
ලෝක ජනගහනයෙන් මිලියන 39 කට වඩා වැඩි පිරිසක් අන්ධභාවයෙනුත් මිලියන 285ක් පමණ පිරිසක් ඇස් පෙනීමේ දුර්වලතා වලිනුත් පීඩා විඳිනු ලබයි. මේ අතරින් 80%ක් පමණම සුවකළ හැකි තත්ත්වයේ පවතී. අන්ධභාවයට පත්වූ සහ ඇස් පෙනීමේ දුර්වලතාවලින් පෙළෙන වැඩි පිරිසක් ජීවත් වනුයේ තුන්වන ලෝකයේ රටවලය. මේ අතුරින් 50%ක ගේ පමණ අන්ධභාවය සඳහා හේතුවන ප්‍රධානතම සාධකය වන්නේ ඇසේ සුද ඇතිවීමයි. මෙරට තුළ ලක්ෂ 2කට වඩා වැඩි ළමා හා වැඩිහිටියන් ප්‍රමාණයක් අන්ධභාවය නිසා පීඩා විදිනු ලබයි. මේ අතරින් 70%ක් පමණ ඇසේ සුද නිසා අන්ධභාවයට පත්ව සිටී.
ඇසේ සුද යනු කුමක්ද?
ඇසේ සුද යනු වයස්ගතභාවයත් සමඟ ඇසේ ස්වභාවික කාචයේ ඇතිවන දුර්වර්ණ වීමයි. ඇසේ සුද හේතුවෙන් ක්‍රමයෙන් අන්ධභාවයට පත්වීම සිදු වේ. වයස අවුරුදු 60ට වැඩි පුද්ගලයන් අතර මෙම තත්ත්වය බහුලය. ඇසේ සුද සඳහා වන ශල්‍යකර්මය ඉතා ඉක්මන් වේදනාවකින් තොර සරල ශල්‍යකර්මයකි. ඕනෑම ප්‍රධාන රජයේ රෝහලක අක්ෂි ඒකකයක් තුළදී මෙම ශල්‍යකර්මය සිදු කරවා ගත හැක.
ගැටලුව කොතැනද?
ඇසේ සුද ශල්‍යකර්මය සඳහා කෘතිම අක්ෂි කාචයක් අවශ්‍ය වේ. මෙම කාචය ඉහළ මිල ගණන් වලින් යුක්ත වන අතර එය රජයේ රෝහල්වලින් නොමිලයේ ලබා නොදෙයි. එබැවින් එය රෝගියා විසින් පිටස්තර වෙළඳ ආයතනයකින් මිළදී ගත යුතු වේ. ඒ සඳහා රුපියල් 20000/-ක් 30000/- අතර මුදලක් දැරිමට රෝගියාට සිදු වේ. ඇසේ සුද හේතුවෙන් අන්ධභාවයට පත් වූ බොහෝ දුප්පත් රෝගීන් මුදල් අපහසුතාවය නිසාවෙන් ඇසේ සුද සඳහා වන ශල්‍යකර්මයට යොමු නොවී අන්ධ පුද්ගලයන් ලෙසම මිය යයි. අන්ධභාවයට පත් වූ පුද්ගලයෙකු යනු පවුල තුළ බලවත් ගැටලුවකි. එවැනි පුද්ගලයෙකු රැකබලා ගැනීම සඳහා තවත් පුද්ගලයෙකු කැප විය යුතුය. එය එම පුද්ගලයාගෙන් රටට ලැබිය යුතු ශ්‍රම සම්පතෙහි අහිමි වීමකි. මේ ආකාරයෙන් අන්ධ පුද්ගලයෙකු යනු පවුලට, රටට බරකි.
ඔබට කළ හැක්කේ කුමක්ද?
ඇසේ සුද නිසා අන්ධභාවයට පත් වූ අහිංසක දුප්පත් රෝගීන් හට ඔවුන්ගේ ශල්‍යකර්ම කර ගැනීම සඳහා ඔබට උදව් විය හැක. ඔබේ උපකාරයෙන් ඔහු හෝ ඇය හෙට සිට ලොව දකිනු ඇත. තවෙකෙකුගේ සහායක් නොමැතිව ඔවුනගේ කටයුතු කරගනු ඇත. නැවතත් මුනුබුරු මිනිබිරියන් රැකබලා ගැනීමට පටන් ගනු ඇත. ඔවුන් තවදුරටත් පවුල තුළ ගැටලුවක් නොවනු ඇත. රටට බරක් නොවනු ඇත. අප විසින් මෙරට අවම පහසුකම් සහිත දුෂ්කර පළාත් තුළ ඇසේ සුද සඳහා වන අක්ෂි ශල්‍යකර්ම වැඩසටහන් සංවිධිනය කරනු ලබයි. එවැනි එක් වැඩසටහනකදී 100කට අධික අක්ෂි ශල්‍යකර්ම ප්‍රමාණයක් සිදු කරනු ලැබේ. සංවිධානයක් ලෙස හෝ කිහිප දෙනෙකුගේ සහයෝගයෙන් සිය ගණනකගේ පෙනීම නැවත ලබා ගැනීමට ඔබට දායක විය හැක. ඇසේ සුද ශල්‍යකර්මය සඳහා අවශ්‍ය වන්නේ, කෘත්‍රිම අක්ෂි කාචයක්, උපකරණ සහ බෙහෙත් වර්ග කිහිපයක් පමණි. පුද්ගලික අංශයේදී රුපියල් 20000/- කට අධික මුදලක් මේ සඳහා වැය වේ. නමුත් සෞඛ්‍ය අමාත්‍යංශයේ විෂන් 2020 වැඩසටහනට ඒ සඳහා වැය වන්නේ රුපියල් 3500 සිට 5000 අතර සුළු මුදලකි. අවශ්‍ය රෝගීන් සඳහා එම කාච නොමිලයේ ලබාදෙන අතර රජයේ රෝහලක් තුළදී එම ශල්‍යකර්මය සිදු කරවා ගත හැක. මඳක් සිතන්න.... අන්ධභාවය නිසා අසරණ වූ රෝගියෙකු පිළිබඳව.... ඔබේ සොඳුරු මොහොතක් වෙනුවෙන් ඔබ දරණ පිරිවැය වඩාත් අර්ථවත් කර ගැනීමට, එම සොඳුරු මතකයන් වඩාත් සුවිශේෂි කරගැනීමට අපට උදව් විය හැක. අමතන්න අප............ ධරිද්‍රතාවය නිසා අන්ධභාවයෙන් පීඩා විඳින අහිංසක රෝගියෙකුට ලොව දකින්නට ඔබත් දායක වන්න. සුළු මුදලක් වැය කර මහා පුන්‍යකර්මයකට දායක වන්න.
විශන් 2020 ලේකම් කාර්යාලය, සෞඛ්‍ය අමාත්‍යංශය - 011-2693744උපුටා ගැනීම දිනමිණ
