පණු බෙහෙත් නොදීම නිසා පණුවන් හැදී මියගිය දරු පැටියා

පැටි වයසේ දරුවන් කෑමට හොරකරන විට අපේ අම්මලා කියන්නේ ‘පණු අමාරුව‘ යනුවෙනි. එසේ පණු අමාරුව වැළඳුණු විට ඉස්සර අම්මලා නම් දරුවන්ට සිංහල බෙහෙත් දුන්නෝය. එනමුත් දැන් කාලයේ දරුවන්ට පණු අමාරුවට දීමට බෙහෙත් ඇත්තේය. ඖෂධ නාම කෙසේ වුවත් පණු බෙහෙත් යනු ‍පොදු නමින් හඳුන්වන එම බෙහෙත් දරුවන්ට දිය යුතු බව මළ ‍පොතේ අකුරක්වත් නොදන්නා දෙමාපියන් පවා දන්නේය. ඒ හිසේ කැක්කුමට පැරසිටමෝල් පෙත්තක් ගැනීම සේ දරුවන්ට පණු බෙහෙත් දීම ඉතා සරල කාරණාවක් බැවිනි. කෙසේ නමුදු ඒ සරල කාරණාව හේවාහැට හෝප් වත්තේ සෙල්වරාජන් රාජේෂ්වරී හා කදිරේෂන් පෙරියසෙල්වම් යුවළට තේරී තිබුණේ නැත. එසේ නැතිනම් එය තේරුණත් ඔවුන් එම කාරණාව සුළුකොට තැකීය. එහි ප්‍රතිපලය වූයේ ඔවුන්ගේ දරුවා අකාලයේ මරුවාට බිලි වීමටය.

නම පෙරියසෙල්වම් ගයුමියි. ඇගේ දෙමාපියෝ වතුකම්කරුවෝය. තම වයසේම වෙනත් දරුවන් කෙළිදෙළෙන් දුව පනිමින් ගත කරන විට ඈ නිවසේ මුල්ලකට වී බලා සිටියාය. ඒ තම උදරයේ ඇති වේදනාව නිසාය. ඊට හේතුවක් කිසිවෙකු දැන සිටියේ නැත. ඇය නිතරම අසනීපයෙන් සිටියාය. කනබොනදේට ප්‍රිය නොකළාය. එහෙත් මසකට වරක් වත්තේ සෞඛ්‍ය සායනයේ සෞඛ්‍ය සේවිකාව ගයුමි දැරිය පරීක්ෂා කර දරුවාගේ වයසට දරුවා හැදී වැඩී නොවීම, බර ප්‍රමාණය නොමැතිකම මෙන්ම නිතර අසනීපයෙන් සිටීම පිළිබඳ ගතයුතු අවශ්‍ය උපදෙස් සැමවිටම දෙමව්පියන් හට දැන්වුවද දෙමාපියන්ට ඒ වගක් නොවීය. පසුගිය 1 වෙනි දින ගයුමි දුවට හොඳටම අසනීප විය. මේ නිසා දෙමව්පියන් ඇය වත්තේ රෝහලට රැගෙන ගියහ. එහිදී වෛද්‍යවරයා කීවේ ඇය එදිනම හඟුරන්කෙත දිසා රෝහලට ඇතුළත් කරන ලෙසය. ඒ අනුව හඟුරන්කෙත රෝහලට ගෙන ගිය ඇය 2 වන දින පාන්දර මිය ගියාය. ඇගේ හදිසි මරණයට හේතුව සොයන්නට හේවාහැට, ගන්නෑව බටහිර හදිසි මරණ පරීක්ෂක ඩබ්.එම්. වික්‍රමසිංහ බණ්ඩාර මරණ පරීක්ෂණ කටයුතු ආරම්භ කිරීමට සූදානම් වෙද්දී දැරියගේ පියාවූ කදිරේෂන් පෙරියසෙල්වම් කීවේ තම සිඟිති දියණිය මිය ගියේ පෙරදින රෝහලෙන් දුන් බෙහෙත් විෂ වීමකින් බවය. එම චෝදනාව ගැන රෝහල් බලධාරීන් කීවේ මේ සිද්ධිය හඟුරන්කෙත ‍පොලීසිය වෙත පැමිණිලි කරන ලෙසයි. එම පැමිණිල්ල මත වලපනේ මහේස්ත්‍රාත් අධිකරණයේ නියෝගය අනුව දැරියගේ මෘත දේහය පිළිබඳ පශ්චාත් මරණ පරීක්ෂණයක් පැවැත්වීට නියම කෙරුණි. එය කරනු ලැබුවේ නුවරඑළිය අධිකරණ වෛද්‍ය මුදිත කුඩාගම මහතාය. මෙම මරණ පරීක්ෂණයේදී හෙළි වූයේ අදහා ගත නොහැකි සිද්ධියකි. දරුවාගේ කුඩා බඩ වැල නරක්වී ඉදිමී ආසාදනය වී තිබුණි. එය කපා බැලීමේදී අඟල් 8, 6 සහ 5ක පමණ ප්‍රමාණයේ පණුවන් 56 දෙනෙකුගෙන් සැදුම්ලත් ගුලියක් ගයුමිගේ උදරයේ තිබුණි. සැබැවින්ම මේ තරම් පණුවන් තොගයක් ගයුමිගේ උදරයේ සිටියේ කෙසේද? අධිකරණ වෛද්‍ය නිලධාරියා කියන්නේ ඇයට පණු බෙහෙත් නොදීම මීට හේතුව බවය. අවසානයේදී ගයුමිගේ මරණයට හේතුව ලෙස නිගමනය කෙරුණේ ඇගේ කුඩා බඩවැල අවහිරවී නරක්වීමෙන් ඇතිවූ ආසාදනය නිසා වූ බවය.

මේ සම්බන්ධයෙන් නුවරඑළිය අධිකරණ වෛද්‍ය නිලධාරී දිමුතු කුඩාගම මහතා පවසන්නේ මෙසේය. “සාමාන්‍යයෙන් ඕනම වයස් තරාතිරමක අයෙකුගේ පවා බඩවැ‍ලේ පණුවන් සිටිනවා. එහෙත් මෙහි ප්‍රමාණය වැඩිවීම හානිදායකයි. මාස තුනකට වරක් හෝ අඩුම තරමින් මාස හයකට වරක් වත් පණු බෙහෙත් දෙන්නට කියන්නේ මේ නිසයි. මෙම දරුවාගේ කුඩා බඩවැ‍ලේ පණුවන් 56ක් සිටීම නිසයි දරුවා මරණයට පත්වුණේ. අපි මාපියන්ගෙන් ඉල්ලා සිටින දෙයක් තමයි තම තමන්ගේ දරුවන් ගැන වැඩි අවධානයකින් සෞඛ්‍ය පැත්තෙනුයි හැම අංශයකිනුයි සැලකිලිමත් වන්න කියා. එසේ නොවන්නට මෙවන් ළදරු මරණ අප රටේ තව තවත් වැඩිවෙන්න පුළුවනි. ඒ වගේම මම මාපියන්ගෙන් ඉල්ලීමක් කරනවා. සතිපතා දරුවන්ගේ නිය‍පොතු නිසි පරිදි කපා දරුවන් නිතර පිරිසිදු කර තබන්න කියා. කුමන දෙයක් හෝ දරුවා ආහාර වශයෙන් ලබා දෙන විට අත් සබන් ගා සේදීමට හුරු පුරුදු කරන්නත් වැසිකිළි යාමෙන් පසු අත් සබන් ගා සෝදා ගන්නත් පලතුරු ලබාදීමේදී එය හොඳින් සෝදා පිරිසිදු කර ලබාදීමටත් වඩාත් සැලකිලිමත් වන ලෙසට උපදෙස් දෙනවා.” වෛද්‍යවරයා කීවේය.

උපුටා ගැනීම ලක්බිම