වර්තමාන සමාජයේ පිළිකා රෝගීන් සංඛ්‍යාවේ වැඩිවීමක් ඒ ඇයි?
අද සමාජයේ පිළිකා රෝගීන් මෙතරම් බහුලව දක්නට ලැබෙන්නේ ඇයිද? යන්න බොහෝදෙනා විමසන කරුණකි. මේ සඳහා හේතු රාශියක් ඇත. පිළිකා ඇති වීම සඳහා බලපාන එක් හේතුවක් ලෙස වයස්ගත වීම සඳහන් කළ හැකිය. පෙර වසර කිහිපය හා සංසන්දනය කිරීමේදී වර්තමාන සමාජයේ වයස්ගත පුද්ගලයන්ගේ ප්‍රතිශතය ඉහළ ගොස් ඇත. ඉදිරි දශක කිහිපයේදී මෙම ප්‍රමාණය තවත් වැඩි වනු ඇත. ඒ සමඟ පිළිකාවලට ගොදුරු වන සංඛ්‍යාව ද නිරායාසයෙන්ම ඉහළ යයි. අතිධාවනකාරී සමාජ වටපිටාවක ජීවත් වන අපි දැන් දැන් විවිධ චර්යාත්මක වෙනස්කම්වලට(Life Style Changes) මුහුණ දෙමින් සිටිමු. ආහාර රටාවල වෙනස්කම් ඒ අතරින් ද ප්‍රධාන වේ. සෞඛ්‍ය සම්පන්න ආහාර ගැනීමේ පුරුද්ද අප අතරින් ක්‍රමයෙන් බැහැර වෙමින් පවතී. පිළිකා වළක්වාගැනීමේ ප්‍රධාන සාධකයන් ලෙස සැලකෙන එළවළු, පලාවර්ග, පලතුරු වැනි ආහාර වෙනුවට ක්ෂණික ආහාරවලට (Fast Food/Junk Food) අද සමාජයේ බොහෝදෙනා හුරු වී ඇත. මෙවැනි ආහාරවල බොහෝවිට මේදය අධිකව අඩංගු වේ. මාංස වර්ග සහ සත්ත්ව තෙල් අධික ආහාර වර්ග වැඩිපුර භාවිතය ද අද සමාජයේ පිළිකා රෝගීන් බහුලව දැකීමට හේතුවකි.
එසේම ආහාරවල අඩංගු සමහර වර්ණක, රසකාරක, කල් තබාගැනීමේ ද්‍රව්‍ය ආදී රසායනික ද්‍රව්‍ය ද පිළිකා කාරක ලෙස හඳුනාගත් අවස්ථා තිබේ. එවැනි සමහර රසායනිකයන් ආහාර සඳහා භාවිතා කිරීම නීති මාර්ගයෙන් තහනම් කර ඇති නමුත් ප්‍රායෝගිකව එවැනි ද්‍රව්‍ය භාවිත කරන්නේ දැයි සොයා බැලීම වැදගත්ය. එසේම බොහෝ රසායනික ද්‍රව්‍ය “අනුමත” රසායනිකයන් ලෙස ආහාර ඇසුරුම්වල සඳහන් කළ ද ඒවා නියමිත ප්‍රමිතියකින් සහ සාන්ද්‍රණවලින් භාවිතා නොකරන්නේ නම් එවැනි ද්‍රව්‍ය යෙදූ ආහාර මඟින් ද දීර්ඝකාලීන සංකූලතා ඇති වීමට ඉඩ තිබේ. තරබාරුකම සහ ක්‍රියාශීලි ජීවන රටාවකින් ඈත් වීමද වර්තමානයේ පිළිකා රෝගීන් බහුලව දැකීමට හේතු ලෙස සඳහන් කළ හැකිය. පියයුරු පිළිකා, ගර්භාෂ පිළිකා සහ මහාන්ත්‍ර පිළිකා ඒ සඳහා උදාහරණ වේ. කාර්මීකරණය සමඟ සිදු වන පරිසර දූෂණය පිළිකා රෝගය බහුල ලෙස සමාජය තුළ ඇති වීමට බලපාන තවත් සාධකයකි. ඇස්බැස්ටෝස්, ඊයම් වැනි ද්‍රව්‍යවලින් දූෂිත පරිසරවල ජිවත් වන්නන් පිළිකා රෝගවලට වැඩිපුර ගොදුරුවන බවට සාක්ෂි ඇත. එසේම රැකි රක්ෂා කටයුතුවලදී විශාල වශයෙන් රසායනික ද්‍රව්‍ය භාවිතය හා නිසිලෙස ආරක්ෂිත ක්‍රම භාවිතා නොකිරීම නිසා ඒවාට අනවශ්‍ය ලෙස නිරාවරණය වීම ද පිළිකා රෝගීන් බහුල ලෙස දක්නට ලැබීමට තවත් හේතුවක් ලෙස සඳහන් කළ හැකිය. පමා වී දරුවන් බිහි කරන කාන්තාවන් හට පියයුරු පිළිකා වැළඳීමට වැඩි අවදානමක් ඇත. වර්තමානයේ අප සමාජයේ බොහෝ කාන්තාවන් දරුවන් බිහි කරන විට වයස අවුරුදු 30 ඉක්මවා ඇත. ආර්ථික ගැටලු, අධ්‍යාපන සහ රැකි රක්ෂා කටයුතු ගැන වැඩි අවධානයක් දැක්වීම නිසා බොහෝ කාන්තාවන් පමාවී විවාහ වන නිසා මෙම තත්ත්වය ඇති වී තිබේ. ශ්‍රී ලාංකික කාන්තාවන් අතර බහුලවම දැකිය හැකි පිළිකාව ලෙස පියයුරු පිළිකාව පත් වීම සදහා, මෙම කරුණු යම් තරමකට බලපා ඇති බව සඳහන් කළ යුතුය. දියුණු වන වෛද්‍ය විද්‍යාවන් සමඟ මීට කලින් හඳුනාගත නොහැකි වූ සහ හඳුනාගැනීමට අපහසු වූ පිළිකා වර්ග හඳුනා ගැනීමට හැකි වීම ද වර්තමානයේදී පිළිකා බහුලව දැකීමට හේතුවකි. විකිරණශීලිතාව (Radiation) ද විටෙක පිළිකා කාරකයක් ලෙස ක්‍රියා කරයි. ඕසෝන් ස්ථරයට සිදුවන හානි නිසා අහිතකර කිරණ වර්ගවලට මුහුණ දීමට මිනිසාට සිදු වී තිබේ. අධික ලෙස පාරජම්බුල කිරණවලට (Ultraviolet Rays) නිරාවරණය වීම, සමේ පිළිකා ඇති වීම සඳහා බලපාන ප්‍රධාන හේතුව ලෙස සඳහන් කළ හැකිය. ඒඩ්ස්, හෙපටයිටීස් වැනි වෛරස ආසාදන වැළඳුණු සමහර පුද්ගලයන්ට පසුකාලීනව සංකූලතාවයන් ලෙස විවිධ පිළිකා හට ගැනීමට පුළුවන. වර්තමානයේ මෙවැනි ආසාදනවලට ලක්වන්නන්ගේ සංඛ්‍යාවේ වැඩි වීමක් දක්නට ලැබේ.
නවීන තාක්ෂණික උපකරණ අද සමාජයේ බහුලව භාවිතා කෙරේ. මෙවැනි සමහර උපකරණ මඟින් මිනිසාගේ සෞඛ්‍යයට හානි සිදු වේද යන්න පිළිබඳ විවිධ මත මේ වනවිට විවාදයට තුඩු දී ඇත. පසුගිය දශක දෙක තුළ ජංගම දුරකතන භාවිතය ඉතා ශීඝ්‍රයෙන් ව්‍යාප්ත විය. එමඟින් මොළයේ පිළිකා ඇති වේ දැයි විවිධ පර්යේෂණ රාශියක් සිදු කරමින් පවතී. වර්ධනය වන මොළයේ සෛලවලට විකිරණශීලීතාවේ බලපෑමක් ඇති බව තහවුරු වී ඇති නිසා ළමයින්ගෙන් ජංගම දුරකථන ඈත්ව තැබීම නුවණට හුරුය. එසේම ක්ෂුද්‍ර තරංග උඳුන් (Microwave Ovens භාවිතය සහ පිරිමින්ගේ වෘෂණ පිළිකා අතර සබඳතාවක් ඇත්දැයි සැකයක් පවතී. පිළිකා රෝගීන් බහුලවීම සඳහා මේවාට අමතරව මෙතෙක් හඳුනා නොගත් සාධක විශාල ගණනක් තිබිය හැකි බවද අප සිහි තබාගත යුතුය.
උපුටා ගැනීම දිනමිණ
