දුක් සංඛා සිත් තැවුල් වේදනා පීඩාකාරි ගැටලු සිර කරගෙන ඉන්න එපා ඔබට අඝාතය වැළඳිය හැකියි
මානසික පීඩනයකට ගොදුරු නොවූවකු සොයා ගැනීමට නොහැකි තරමටම මානසික පීඩන තත්ත්වයන් වර්තමානයේ වර්ධනය වෙමින් පවතී. කුඩා ළමුන් පවා අධ්‍යාපනික කටයුතු හා පවුලේ ඇතිවන අඬ දබර නිසා මානසික පීඩාවන්ට පත් වේ. මානසික ආතතිය ලෙස හඳුන්වන මෙම පීඩාකාරී භාවයන් දිගින් දිගටම පැවතීම හේතුවෙන් නොයෙක් රෝගී තත්ත්වයන් හටගන්නා බව වෛද්‍ය මතයයි. මේ නිසාම මානසික උපදේශන සේවාවන් කෙරෙහිද සමාජ අවදානය වැඩි වශයෙන් යොමුව ඇත. ආඝාත රෝගී තත්ත්වයට ද මානසික පීඩනය හෙවත් මානසික ආතතිය කෙළින්ම බලපෑම් නොකළද වක්‍රාකාරව බලපෑම් ඇති කරන බව ජාතික රෝහලේ ආඝාත ඒකකයේ උපදේශන නිලධාරීනී (සමාජ සේවා අමාත්‍යංශය) රේණු ශිරෝමාලා කරුණාමුනි මහත්මිය පැවසුවේ මෙසේයි.
එක් එක් පුද්ගලයා විසින් තම දෛනික ජිවිතයේදී මුහුණපාන ගැටලු විවිධාකාරය. සිත් තැවුල්, කලකිරීම්, නොසන්සුන්තාවයන්, වේදනාවන් වැනි සිද්ධින් අපට නොයෙක් විට ඇති වේ. මෙම ගැටලු සඳහා පුද්ගලයා මුහුණ දෙන ආකාරයන් විවිධ වේ. කෙනෙකු ගැටලු හමුවේ සාර්ථකව ඊට මුහුණ දෙන අතර තවත් කෙනෙකු ඊට මුහුණ දිය නොහැකිව චිත්ත පීඩා ඇතිකර ගනී. මානසික ආතතියෙන් දැඩිලෙස පීඩාවිදින පුද්ගලයින්ගේ කායික හා මානසික නිරෝගීතාවට දැඩි බලපෑමක් එල්ල කරයි. මේ බලපෑම නිසා පුද්ගලයකුගේ ශරීරය තුළ සිදුවන විපර්යාසය, ඔහුගේ ඉන්ද්‍රිය පද්ධතියේ ක්‍රියාකාරීත්වය අඩාල කිරීමට සමත්වෙයි. මානසික ආතතිය පවතින විට ශරීරයේ ඉන්ද්‍රිය පද්ධතිය වේගවත්ව ක්‍රියාකරයි. මේ සඳහා වැඩිපුර ශක්තියක් අවශ්‍ය වේ. වැඩිපුර ශක්තිය යෙදවීම නිසා රුධිරයේ සීනි සහ මේද මට්ටම ඉහළ නගී. සීනි සහ මේද දහනය සඳහා ඔක්සිජන් වැඩිපුර අවශ්‍ය වේ. මේ නිසා ස්වසන වේගයද වැඩිවේ. මෙවැනි අසමතුළිතතාවයන් නිසා ශරීරයේ හෝමෝනවල අසමතුළිතතාවක් හටගනී. හෝමෝන අසමතුළිතතාව නිසා ශරීර පද්ධතියේ ක්‍රියාකාරීත්වයට අහිතකර බලපෑම් එල්ල වේ. මෙමඟින් ප්‍රතිශක්තිකරණය පහළ බසී.
ප්‍රතිශක්ති කරණ පද්ධතියේ ඇතිවන අඩුපාඩු නිසා ආඝාත රෝගී තත්ත්වයට හේතුකාරකවන තත්ත්වයන් නිර්මාණය වේ. හෘදයාබාධ, අධිරුධිර පීඩනය, දියවැඩියාව, ඇදුම, සමේරෝග, ආමාෂයේ රෝග, අධිකතරබාරුව, හිසරදය, පිළිකා, රුමැටික් ආතරයිටීස් වැනි රෝගාබාධ ඇති වීමට මෙන්ම ආඝාතයටද මානසික ආතතිය බලපෑම් ඇති කරයි. කෙනෙකුගේ ජීවිතයේ එක්වරම සිදුවන කඩා වැටීමක් ආඝාත රෝගී තත්ත්වයකට බලපෑම් ඇති කරනුයේ සිරුර තුළ සිදුවන ක්‍රියාදාමයේ ඇතිවන අසමතුලිතතාවක් නිසා විය හැකි ය. මේ නිසා ඕනෑම මානසික පීඩාකාරී තත්ත්වයක් පිටකර හැරීමේ ක්‍රමවේදයක් තමා විසින් සකසාගත යුතුය. මානසික පීඩනයෙන් අත්මිදීම සඳහා සුදුසුම ක්‍රමවේදය වන්නේ උපදේශන සේවාවක සහාය පැතීමයි. එමෙන්ම ඕනෑම කෙනෙකුගේ සිතේ පවතින දුක්සංකා සහ වේදනාවක් ගලායමට ඉඩසලසාදීම මඟින්ද මානසික ආතතියෙන් වැළකීමට හැකියාව ලැබේ.
ඉතා කුඩා සිදුවීමක් නිසා ඇතිවන මානසික ආතතිමය තත්ත්වයන් පවා ඔබ නොදැනුවත්වම ඔබව අඝාත රෝගයේ ගොදුරක් බවට පත්කරනු ඇත. මේ සඳහා හොඳම උදාරහරණයක් කොළඹ ජාතික රෝහලේ 16 වාට්ටුවේ ප්‍රතිකාර ගනු ලැබූ තිස් දෙහැවිරිදි තරුණයකු ඇසුරෙන් සනාථ කළ හැක. ඔහු පෞද්ගලික ආයතනයක රැකියාවක් කළ රුපියල් තිස් දහසක පමණ වැටුපක් ලැබූ හොඳ සමාජ ආශ්‍රයක් ඇතිව ප්‍රදේශයේ නමක් දිනාගත් අයෙකි. මිතුරෙකු මාර්ගයෙන් දැන හඳුනාගත් ගැහැණු ළමයෙකු සමඟ මාස 03 පමණ ප්‍රේම සබඳතාවයක් පවත්වා ඇති අතර ගැහුණු ළමයාගේ ඉල්ලීම මත ඇයගේ දෙමාපියන්ට නොදන්වා ඔවුන් විවාහ වී පසුව, එම තරුණියව මොහුගේ නිවසට ගෙන්වාගෙන ඇත. දින 04 ක් පමණ නිවෙසේ සිටි තරුණිය දික්කසාද වීමට අවශ්‍ය බව පවසා නිවසින් පිටව ගොස් ඇත. තරුණයා, තරුණියගේ නිවෙසට දුරකථන ඇමතුමක් දී ඇය ගැන විමසූවිට තරුණියගේ දෙමාපියන් පවසා ඇත්තේ ඇයව පවුලෙන් ඉවත්කර ඇති බවයි. මේ නිසා සිත් තැවුලට පත් තරුණයා සමාජයටත් යහළුවන්ටත් මුහුණ දිය නොහැකිව නිවෙසේ කාමරයකටවී දොර වසාගෙන සිට ඇති අතර ත්‍රීවිල් රියදුරකු මාර්ගයෙන් මත්වතුර ගෙන්වා ගෙන දින 09 කට ආසන්න කාලයක් අධිකලෙස මත්වතුර පානය කර ඇත. ඔහුට ඇතිවූ මානසික ආතතියට ඔහු ප්‍රතිචාර දැක්වූ ආකාරය නිසාම දැඩි මානසික පීඩනයත් මත්වතුරත් එකට එකතුවීමෙන් ඔහු ආඝාතයේ ගොදුරක් බවට පත්කළේ ය. මෙවැනි සමාජමය ගැටලු විදවීමට යාම නිසාම බොහෝ දෙනකු ආඝාත රෝගී තත්ත්වයට පත්වන බවට ඕනෑතරම් උදාහරණයන් සොයා ගත හැක. මේ නිසා ඕනෑම මානසික ආතති තත්ත්වයකදීම ආත්ම ශක්තිය ලබාගැනීමෙන් මානසික ආතතියෙන් මිදීමේ මඟ උදාකරගත හැකි ය. මානසික ආතතිය ආඝාතය ඇතිකරයි. එය වැළැක්වීම, එයට ගොදුරු නොවීම අපසතු වගකිමකි. අප සතු කාර්යයකි. සැබෑලෙසම ඔබම උපකාර කළ හැක්කේ ඔබටම ය. ඔබේ ජීවිතය අයිති ඔබට ය. තමාගේ මානසික පීඩනය එහි ස්වාභවය එයට බලපාන හේතු සාධක නිවැරදිව අවබෝධ කරගන්න. එවිට ඔබගේ ජීවිතය නැවුම්, සතුටුදායක, සුන්දර වූ තැනක්වීම නොඅනුමාන ය. අලුතින් යමක් සිතන්න පෙළඹෙන්න.
උපුටා ගැනීම දිනමිණ
.jpg "චොක්ලට් ෆජ්")
