ඇස කසනවා කඳුළු එනවා - Ocular allergy (Allergic conjunctivitis)

ඇස පණ මෙන් රැකගන්නා ඉන්ද්‍රියයකි. එසේ වුවද ඕනෑම අවස්ථාවකදී ඇසටත් අනතුරක් හෝ රෝගයක් බලපෑ හැකියි. ඇසට බලපාන විවිධ අසාත්මිකතාවයන් ද එවැනිය. සුළු රෝගී තත්ත්වයක් ලෙස පෙනුණ ද එවන් ආබාධ නිසිලෙස හඳුනාගෙන ප්‍රතිකාර ලබා ගැනීම වැදගත්ය. විශේෂයෙන් ඊට අදාළ හේතු කාරක හඳුනාගෙන ඉන් ඈත් වීම අත්‍යවශ්‍ය කරුණකි. එහිදී ඇස්වලට බලපාන අසාත්මික තත්ත්ව කීපයක් ද අපට හඳුනාගත හැකි වේ.

ප්‍රතිකාර

ප්‍රතිකාර ලබා දීමේදී හේතුව හඳුනාගැනීම ඉතා වැදගත්ය. එහිදී රෝගියාගේ ඥාතීන් හෝ වැඩිහිටියන්ගෙන් අසා දැනගන්නා තොරතුරු වැදගත් වේ. එනම් මෙය ඇති වන්නේ, නිවසේ ඇති කරන සුරතල් සතුන් මාර්ගයෙන් ද, ආහාර මඟින් ද දුහුවිලි හේතුවෙන් ද ආදි තොරතුරු ඉදිරි ප්‍රතිකාර සඳහා ඉතා වැදගත් සාධකයක් වේ. නූතනයේ මේ සඳහා විශේෂ ප්‍රතිකාර පවතින බැවින් මෙවැනි තත්ත්වයකදී අක්ෂි වෛද්‍යවරයකු වෙත යොමු කිරීම වැදගත්ය.

වළක්වා ගැනීම

මෙහිදී ඉතාම වැදගත් වන්නේ රෝගය වළක්වා ගැනීමට හේතුªවන සාධක හඳුනා ගැනීමයි. ඒ සඳහා දෙමාපියන්ට ද විශාල කාර්යභාරයක් ඇත. එනම් රෝගයට මඟපාදන හේතු කාරක ඉවත් කර දැමීම හෝ ඉන් ඈත්ව සිටීමට උපකාර කිරීමයි. උදාහරණයක් ලෙස දරුවන්ව සුරතල් සතුන්ගේ ලෝම හා අනෙකුත් අපද්‍රව්‍ය ස්පර්ශ වීමෙන් වළක්වා ගැනීම, සතුන් අතපත ගෑම අවම කිරීම ,මෙන්ම සුරතල් සතුන්ව පුටු හෝ ඇඳන් මතට නංවා ගැනීම වැනි තත්ත්ව අවම කිරීම වැදගත්ෙවී. තවද නිවස දුවිිලි රහිතව තබාගැනීම හෝ අන් තැනක පවතින දුවිලි සහිත පරිසරයන් මඟහැර සිටීමට මෙවැනි රෝගීන් සැලකිලිමත්වීම වැදගත්ය.

Ocular allergy (Allergic conjunctivitis)

මෙය බොහෝදුරට දරුවන් කෙරෙන් දැකිය හැකි රෝගී තත්ත්වයකි. ඇස් කැසීම මූලික කරගෙන ඇතිවන මේ රෝගී තත්ත්වය අප බොහෝදෙනෙක් හඳුනන ඇස් රෝගයට යම් සමාන කමක් දැක්වුවත්, එම රෝගය නොවේ. ඇස් කැසීම, ඇසෙන් කඳුළු ගැලීම, ඇස් රතුවීම, ඇස් ඉදිමීම, ඇස කෙවීම වැනි අපහසුතා මේ රෝගයේදී අත්දකින්නට ලැබෙන රෝග ලක්ෂණයි. එනම් මෙය ඇස් කැසීම හා සම්බන්ධ අසාත්මික තත්ත්වයකි. තවද මෙය බෝ නොවන රෝගී තත්ත්වයකි. අප බොහෝ දෙනෙකු දන්නා ඇස් රෝගයේදී ඇස් රතු වීම කබ ගැලීම දක්නට ලැබෙන අතර, එය බෝවන රෝගී තත්ත්වයකි. Ocular allergy රෝගී තත්ත්වයේදී ඇසෙන් වැඩිපුර කඳුළු ගැලීම ද දැකිය හැකි වේ. නමුත් තවත් කෙනෙකුට බෝ නොවන තත්ත්වයක් නිසා මෙවැනි තත්ත්වයකදී දරුවන්ට පාසල් යාමේ ගැටලුවක් ඇති නොවේ.මෙවැනි තත්ත්වයකදී ප්‍රතිකාර සඳහා අක්ෂි වෛද්‍යවරයෙකු වෙත දරුවන් යොමුකිරිම වැදගත්ය.

හේතු

ඇදුම හා එක්සිමා වැනි සමේ රෝගී තත්ත්ව ඇති අය අතර මේ තත්ත්වය වඩා සුලබය. ඊට අමතරව දුම්, දුවිල්ල, මල්වල පරාග, පුළුන්, සතුන්ගේ ලොම් මෙන්ම සමහර ආහාර වර්ග මීට ප්‍රධාන හේතු කාරක වශයෙන් දැක්විය හැකිය. එමෙන්ම, සුවඳ විලවුන් වර්ග, රූපලාවන්‍ය ද්‍රව්‍ය ආදිය ද මීට හේතු වේ. තවද සමට භාවිතා කරන ඖෂධ වර්ග ද මේ රෝගී තත්ත්වය හට ගැනීමට හේතු වේ. ඊට අමතරව සිවිකාච පළඳින සමහර පුද්ගලයින්ට ද මේ තත්ත්වය බලපායි. නමුත් මේ තත්ත්වය ඇති කරන හේතු පුද්ගලයාගෙන් පුද්ගලයාට වෙනස් විය හැක. උදාහරණයක් ලෙස යම් දරුවෙකුට මල්වල පරාග අසාත්මික වන විට, තවත් දරුවෙකුට සතුන්ගේ ලොම් හෝ දුහුවිලි අසාත්මික විය හැකි වේ. ඒ නිසා එම හේතු කාරකය සොයා බලා හඳුනා ගැනීම වැදගත් වේ. මෙම අසාත්මිකතාව විවිධ ලෙස වර්ග වේ. මෙම ඇස් රෝග අතරින් පාසල් ළමයින් අතර සුලබව දකින අසාත්මික තත්ත්වයක් ඇත. (Vernal Kerato Conjutivitis) එහිදී ඇසෙන් කඳුළු ගැලීම, කැසීම, රතු වීම, ආලෝකය දෙස බැලීමට නොහැකි වීම ආදී ලක්ෂණ ඇතිවිය හැකි වේ. තවද මෙම රෝගී තත්ත්වය වරින් වර මතුවිය හැකි තත්ත්වයකි. මෙවැනි තත්ත්වයකදී අක්ෂි වෛද්‍යවරයෙකුගෙන් උපදෙස් පැතීම අත්‍යවශ්‍යය. මෙම දරුවන්ව රෝගී තත්ත්වයන් ඉවත් කර ගැනීම සඳහා ප්‍රතිකාරවලට අමතරව සැලකිලිමත් විය යුතු තත්ත්ව කීපයක් පවතී. එනම් හුරු පුරුදු ජිවන පුරුදුවල වෙනස්කම් ඇති කළ යුතු වේ. මීට අමතරව තරමක් දීර්ඝකාලීනව පැවතිය හැකි අසාත්මිකතාවන් ද හඳුනාගත හැකි වේ. එහිදී නිශ්චිත වෛද්‍ය ප්‍රතිකාර ලබා ගැනීම වැදගත් වේ. එසේ නොවුණහොත් මෙහිදී ඇසේ කළු ඉංගිරියාවට බලපෑමක් ඇති වී කාලයක් ගත වනවිට පෙනීමේ ගැටලු ඇතිවිය හැකි වේ.

මීට අමතරව ඇසට සිවිකාච පළඳින හෝ කෘත්‍රිම ඇස් පළඳන සමහර අයට ද මෙවැනි Ocular Allergy තත්ත්වයන් ඇතිවිය හැකි අතර එහිදී වෛද්‍ය උපදෙස් ලබා ගැනීම වැදගත්ය. 

ජාතික අක්ෂි රෝහලේ අක්ෂි ශල්‍ය වෛද්‍ය විශේෂඥ කුසුම් රත්නායක

උපුටා ගැනීම දිණමින