මහත අඩු කරගත් පසු හැම ලෙඩක්ම නැති වුණා...
විසිනව හැවිරිදි අනාමිකා සුරේකා මාලික් ජීවිතය ගත කළේ හරිම විනෝදයෙන්. ඒත් ඇයට තරබාරුකම නිසා සිත් තැවුලක් ඇති වුණා. සිරුරේ නිසි හැඩය වගේම වැරැදි ආහාර පුරුදුවලින් අෑත්වෙලා ව්‍යායාම රටාවකට හුරු වුණේ මේ නිසයි. 2012 වසරේ කිලෝ 72ක්ව තිබූ බර වසරකින් කිලෝ 59ක් තරමටම පාලනය කරගත් ඇයගේ ජීවිතයේ සැබෑ අත්දැකීමක තතු ගැනයි මේ විමසීම.
ඔබ තරබාරුකමින් පීඩා විඳින බව ඔබට වැටහුණේ කොහොමද?
මට මුල් කාලෙ ඉඳලම ඔසප් වීමේ ගැටලු ඇති වුණා. මගේ පළමු දරු ප්‍රසූතියත් සමඟම ශරීරය කිලෝ 15කින් වැඩි වෙලත් තිබුණා. මේ නිසාම මට මගේ ඇඳුම් පැලඳුම් තෝරා ගන්නත් අපහසු වුණා. මගේ පෙනුම ටිකෙන් ටික කැත වෙන බව තේරුණු නිසා ශරීරය බර පාලනය කරගන්න ඕන බව මට දැනුණා. මගේ දරුවාගේ වැඩත් එක්කම කාර්යබහුල වන විට ශක්තිමත් බව වැඩිකර ගන්නත් තරබාරුකම පාලනය කරගන්නත් ඕන බව මට වැටහුණා.
ඔබේ බර පාලනය කරන්න මුලින්ම කළේ මොනවද?
මගේ බබාට මාස 5ක් සම්පූර්ණ වන විට තමයි මම ජිම් එකකට ගියේ. මාස 2ක් 3ක් අතර කාලයකදී මගේ බර කිලෝ එකකින් අඩු කර ගන්න හැකි වුණෙත් මේ නිසයි. ඒත් මේ විදියට ව්‍යායාම කිරීමෙන් විතරක්ම බර අඩුකරගන්න අපහසු බව මට වැටහුණ නිසා ආහාර පාලනයටත් වැඩි අවධානයක් යොමු කළා. තෙල් සහිත චීන ආහාර වර්ග, ගිතෙල් ආහාර වෙනුවට රසවත් එළවළු සුප් පානයක්, සලාදයක් එක්කර ගන්නත් අමතක කළේ නැහැ. රාත්‍රියෙදි විටින් විට ගන්නා කෙටි ආහාරවලින් මම අෑත් වුණා.
මුලින්ම ව්‍යායාම රටාවට හුරු වන විට එය ඔබට අපහසුවක් වුණාද?
නැහැ. මම කොහොමත් ව්‍යායාම කරන්න කැමැති කෙනෙක්. ඒ නිසා ව්‍යායාම කරද්දි මට කිසිම අපහසුවක් දැනුනෙ නැහැ. ඒත් සතියකට දින 3ක් පැය 1 1/2 බැගින් ව්‍යායාම කළත් ඉක්මනින්ම මගේ බර අඩු නොවුණු එක නම් මට ගැටලුවක් වුණා.
ඔබේ ආහාර වේල වෙනස් වුණේ කොහොමද? ඒ ගැන ඔබෙ පවුලේ අය ඔබව උනන්දු කළාද?
මගේ ආහාරවල ලොකු වෙනසක් වුණේ ෆ්‍රයිඩ්රයිස්, චපාති කියන කෑම මගෙන් අෑත් කළාට පසුවයි. දැන් මගේ ආහාර වේල බොහෝ වෙලාවට සකස් වෙන්නේ ප්‍රෝටීන් බහුල ආහාරවලින්. කාබොහයිඩේ්‍රට් අඩංගු ආහාර හැකි තරම් ගැනීම අඩු කළා. මගේ සැමියා වගේම තාත්තත් බර පාලනය කරගන්න මට සහාය වෙනවා. ජිම් එකට යන්න මාව උනන්දු කරනවා වගේම හැම රාත්‍රි ආහාරයකටම පසුව දුවන ව්‍යායාම කරන්න මාව ගෙනියන්නෙ මගේ සැමියායි. මගේ තාත්තා නිතරම මට පෝෂ්‍යදායී එළවළු වර්ග හා කජු ගෙනත් දෙනවා.
ඔබ ගන්නේ මොන වගේ ආහාර වේලක්ද?
උදෑසන ආහාරය - මගේ උදෑසන ආහාරයට මම බොහෝ වෙලාවට බිත්තරයක් එකතු කරගන්නවා. නැත්නම් ඒ වෙනුවට අන්නාසි, කැරට්, බීට්, අල සමඟ බොකුටු ගෝවා පානයක් පිළියෙල කර ගන්න අවස්ථා තියෙනවා. මේ දේවල් එතරම් රසවත් නොවුණත් ශරීරයට ගුණදායකයි.
ව්‍යායාම කිරීමට පෙර
- බොහෝ වේලාවට මම අල්ලක විතර කජු ප්‍රමාණයක් තමයි ආහාරයට ගන්නෙ.
දිවා ආහාරය
- තෙල් දමා තෙම්පරාදු කරගත් නිවිති හා බිත්තර, මස් වැනි ප්‍රෝටීන් අඩංගු ආහාරයක් ගන්නවා.
සවස ආහාර
- ග්‍රීන් ටී එකක්.
රාත්‍රි ආහාරය
- සුප් එකක්, සලාදයක් හෝ ග්‍රිල් කරගත් එළවළු කිහිපයක්.
බර පාලනය කරගත් පසුව ඔබට දැනෙන්නේ මොන වගේ හැඟීමක්ද?
මගේ සිරුරේ බර පාලනය කරගත්තට පසුව මට කලින් තිබුණු ඔසප් ගැටලුවලටත් විසඳුම් ලැබුණා. ඒක තමයි මම ලබාගත්ත ලොකුම ජයග්‍රහණය. ඇඟේ බර අඩු වුණාට පස්සේ ක්‍රියාශීලී බවක් වගේම මම කැමැති ආකාරයේ විලාසිතාවලින් ඇඳුම් ගළපා ගන්නත් පුළුවන් වුණා. මම බර පාලනය කරගත් පසුව බ්ලොග් (blog) එකක් පටන් ගත්තා. මගේ ජීවිතේ අත්දැකීම් වගේම බර අඩු කරගන්න අයගේ ගැටලු ගැනත් අදහස් හුවමාරු කරගන්න තමයි මම ඒ වගේ දෙයක් නිර්මාණය කළේ.
ශාලිකා රංගනී සමරදිවාකර
උපුටා ගැනීම මව්බිම
