කෙට්ටු වෙන්න වගේම මැරෙන්නත් පුළුවන්.....

ඇය මෙම අවාසනාවන්ත තත්ත්වයට ගොදුරු වූයේ වයස 19 දී තරබාරුව අඩුකර ගැනීම සඳහා භාවිතා කළ ඖෂධ වර්ගයක් හේතුවෙනි. අන්තර්ජාලය හරහා මිලදීගත් එම පවුලට අයත් ඖෂධ "ගේ‍රනේඩ් ෆැට් බර්නර්" යන ‍පොදු නමින් හඳුන්වා තිබුණි. ආහාර පාලනයෙන් හා ව්‍යායාම මගින් මෙන් නොව මේ ඖෂධය මගින් හොලීට ඉතා ඉක්මනින් හා පහසුවෙන් සිරුර සිහින් කර ගැනීමට හැකිවිය. එහෙත් ඒ වන විට හොලී නොදැන සිටි කරුණ වූයේ එම ඖෂධවල වකුගඩු හා හෘද රෝගවලට තුඩුදෙන උත්තේජන හා ආහාර රුචිය අඩුකරවන සංඝටක අඩංගු වී ඇති බවය. "හර්බල්" යන වචනය ඇසූ සැණින් අපට හැඟෙන්නේ එය අපේ සෞඛ්‍යයට හිතකර බවයි. එයින් ශරීරයේ මහත අඩුකර ගැනීම හැරුණු විට එහි අතුරු ආබාධ ගැන සෙවීමට අපට කල්පනා වන්නේ නැහැයි හොලී පවසයි. ඖෂධය ගැන විස්තර කර තිබූ ආකාරයෙන්ම හොලී ඉතා ඉක්මනින් කෙට්ටු විය. ඇයට කුසගිනි නෙැදැනුණි. ආහාර ගැනීමේදී පවා සුපුරුදු ප්‍රමාණයෙන් තුනෙන් එක් කොටසක් පමණක් ගැනීම ප්‍රමාණවත් විය. බලා‍පොරොත්තු ඉටු වූවද, හොලීට ඒ වෙනුවෙන් නොසිතූ විරූ වන්දියක් ගෙවීමට සිදුවිය. ඖෂධය ගැනීම පටන්ගෙන ඉතා සුළු කලකදීම ඇරඹී පසුගිය වසර 5 පුරා මුත්‍රාශය ආශ්‍රිත රෝගී තත්ත්වයක් හේතුවෙන් හොලී තදබද ලෙස වේදනා වින්දාය. ඇගේ හෘද ස්පන්දනය වේගවත් විය. නිරතුරුවම හිසරදය ඇයව පීඩාවට පත් කළේය. අන්තර්ජාලය හරහා විකිණෙන මේ වර්ගයේ ඖෂධ පාවිච්චිය නිසා ඇතැමුන් මුහුණ දෙන හෘද රෝගී තත්ත්වයන් හා අකල්මරණ පිළිබඳ සිතද්දී හොලී සැබැවින්ම වාසනාවන්තියකි. මේ වර්ගයේ ඖෂධ පාවිච්චිය හේතුකොටගෙන පසුගිය අප්‍රේල් මස මියගිය බ්‍රිතාන්‍යයේ ලීඩ්ස් විශ්වවිද්‍යාලයේ වෛද්‍ය ශිෂ්‍යාවක පිළිබඳව මේල් ඔන් ලයින් වාර්තා කළේය.

ඇය සාරා හූස්ටන්ය. ඇගේ පවු‍ලේ මව, පියා, සොහොයුරා හා සොයුරියද වෛද්‍යවරුන්ය. එහෙත් නිරෝගී සාරා ශරීරයේ මහත අඩුකර ගැනීමට ගත් බෙහෙත් වර්ගයක් හේතුවෙන් පසුගිය අප්‍රේල් මස මියගියාය. මෙබඳු ඖෂධ භාවිතය හේතුවෙන් මියගිය පළමු හෝ එකම තැනැත්තිය ඇය නොවේ. 2008 දී හෘදයාබාධයක් වැළඳීම හේතුවෙන් මියගිය 26 වියැති සෙලීනා වොල්රොන්ඩ් පසුගිය ඔක්තෝබර් මස මියගිය 28 වියැති ෂෝන් ක්ලීත්රෝ ඇතුළු ලොව පුරා 62 දෙනෙකු මෙම ඖෂධ වර්ග භාවිතය හේතුවෙන් මේ වන විට ජීවිත අහිමි කරගෙන තිබේ. මේ දැනට වාර්තාවී ඇති මරණ සංඛ්‍යාවය. සිරුර සිහින්කර ගැනීම සඳහා ඔවුන් භාවිතාකොට තිබූ පෙති වර්ගයේ අඩංගුව තිබූ රසායනික ද්‍රව්‍ය හැඳින්වෙන්නේ ඩී.එන්.පී. ලෙසය. ) එය මුල් කාලයේ භාවිතාකොට තිබුණේ විද්‍යාත්මක පර්යේෂණ හා යම් යම් රසායනික ද්‍රව්‍ය නිෂ්පාදනයන්ටය. කලක් එය ඩයි වර්ග නිපදවීමට, පැළ සඳහා රසායනිකයක් ලෙස හා දැව ආරක්ෂකයක් ලෙසද යොදාගෙන තිබුණි. එසේම වල්නාශක නිපදවීමේදීද ඡායාරූප වර්ධනය කිරීම සඳහාද තවත් විටෙක පුපුරණ ද්‍රව්‍ය නිපදවීමේදී අතරමැදි රසායනිකයන් ලෙසද ච්ව් යොදා ගැනිණි. 1930 වකවානුවේදී මුල් වරට ඇමෙරිකා එක්සත් ජනපදයේ මේ රසායනිකය, තරබාරුව අඩුකර ගැනීම සඳහා ඖෂධයක් ලෙස භාවිතා කිරීම ඇරඹුනද ඉන් හටගත් දරුණු අතුරු ආබාධ හේතුවෙන් 1938දී මිනිස් පරිභෝජනය සඳහා විකිණීම හා භාවිතය තහනම් කෙරුනි.

උපුටා ගැනීම ලක්බිම