ලස්සන අතුගා දමන පොතු කබර

ලියක් ලස්සන වන්නේ රූපයෙනි. රූපය ලස්සන වුණත් පසුව හැදෙන අවාසනාවන්ත ලෙඩ රෝගවලින් ඒ ලස්සන වැසී යන්නට ඉඩ තිබේ. ලස්සන සඟවා දමන තවත් එක් රෝගයකි පොතුකබර. කය මෙන්ම මානසිකත්වයද පීඩාවට පත් කරන, රුව අවලස්සන කරවන කබර රෝගයන් ගැන කතා කරන්නට පවා සමහර ඇය දක්වන්නේ මහා බයකි. ‘බය’ වෙනුවට එහි තිබෙන්නේ යම් අකැමැත්තකි. කෙතරම් අකැමැති වුවද අපි කතා කරන්නට අවශ්‍ය දේ ගැන කතා නොකරම බැරිය. එනිසා අද අප පොතුකබර රෝගය ගැන කතාබහ කරමු. වැලඳෙන්නට ආසන්න කාලයේදී පොතුකබර රෝගයෙහි ස්වභාවය කෙසේද? එය හඳුනාගන්නේ කෙසේද? ප්‍රතිකාර මොනවාද යන්න ගැන අඩංගු මේ සටහන ඔබට බෙහෙවින් වැදගත් යැයි සිතමු. පාරම්පරික හේතූන් මත වැඩි හරියකට වැලඳෙන මෙම රෝගය අද බහුලව දක්නට ඇත. එමෙන්ම උෟෂ්ණාධික සහ ආම්ලික ආහාර වැඩිවශයෙන් ගැනීමත්, විෂම උපචාර විධි නිසා වගේම මත්පැන් වැනි දෑ කෙරෙහි වැඩිවශයෙන් ඇබ්බැහි වී සිටීම නිසාත් පොතු කබර රෝගය වැලඳීමට ඉඩ ඇත.

රෝගයෙහි ස්වභාවය

මෙහිදී සිරුරෙහි නැමෙනසුලු ස්ථාන ලෙස හැඳින්විය හැකි සන්ධිවල කුඩාවට ඇතිවන කැසීමක් හෝ බිබිළි දැමීමකින් රෝගය ආරම්භ විය හැකිය. හිසෙහි නොනවත්වා ඇතිවන හිස්හොරි වැනි තත්ත්වයන්ද මීට බලපානු ඇත. හිස්හොරි නිසා හිස නිතර කැසීමෙන් පොතු ගැලවී යන ස්වභාවයකින් රෝගයට මුල් පියවර තබයි. තවද ඇඟෙහි තැන් තැන්වල හට ගන්නා රතුපාට පැල්ලම් වශයෙන්ද පොතුකබර රෝගය හට ගනියි. එමෙන්ම සිරුරෙහි තැන් තැන්වල ලොකුවට සුදු පැහැති පැල්ලම් හෝ පුස් වැනි පැල්ලම් ඇතිවීමද මෙහි තවත් එක් පියවරක් ලෙස හැඳින්විය හැකිය. තද කළු පාට හෝ දුඹුරු පැල්ලම් ද මෙහිදී දකින්නට ලැබීම ස්භාවිකය. එම පැල්ලම්වල නිතර කැසීමක් ඇතිවන අතර පොතු නොගැලවුණද හිස්හොරි වැනි කුඩු ගතියක් එතැනින් නික්මෙනු දැකිය හැකිය. කැසීම ගැන සැලකිල්ලට නොගෙන රුධිරය මතුවන තුරු කැසීම මෙතැනදී සුදුසු නොවේ. ඉක්මන් ප්‍රතිකාර කරා යෑමෙන් රෝගය පහසුවෙන් සුවකර ගත හැකිවන අතර පැල්ලම් ගැන ගණනකට නොගෙන සිටීමෙන් රෝගයෙහි තත්ත්වය භයානක විය හැකිය. හිස මුල්කර හට ගන්න පොතු කබර රෝගය නිසා යම් දුර්ගන්ධ ගතියක් නික්මෙන නිසා හිසෙහි ඇතිවන හිස්හොරි සහ කැසීම ගැන කල්පනාවෙන් සිටීම ඔබට යහපත් වේ. නිතර කසන ස්වභාවය ගණනකට නොගෙන ෂැම්පු වර්ග භාවිතාකිරීම වඩාත් අයහපත්ය. හිසෙහි හට ගන්නා පොතු කබර නිසා ඇතිවන යම් ආසාදන ගෙල මුහුණ හරහාද විහිද යා හැකි බැවින් ඒ ගැනද අවධානයෙන් සිටීම මැනවි. සිතෙහි සහ මනසෙහි හට ගන්නා යම් පීඩාවක් නිසාද පොතු කබර වැනි රෝග වැලැඳිය හැකිය. ඒ වගේම දරුවකු මවු කුස පිළිසිඳ ගත් කල එකී මව අනුගමනය කරන යම් පිළිවෙත් නිසාද මෙවැනි රෝග ඇතිවීම සාමාන්‍ය වේ. සරලව පහදන්නේ නම් අම්මා ඇඹුල් රසයට ඇති ඇල්ම නිසා ඇඹුල් අධික ආහාර නිතර අනුභව කරන්නීය. එවිට මවගෙන් පෝෂණය ලබන කළලයට එය බලපාන අතර මවගේ ලේ සමඟ දරු පැටියාගේ ලේ එකතු වී ඇතිවන යම් විසමතාවන් දරුවා මෙලොව එළිය දැකීමෙන් අනතුරුව මදින් මඳ වැඩෙන විට හෝ පසු කලෙක බලපානු ඇති බව කිවයුතුවේ.

වැදගත්ම කාරණයක් වන්නේ වත්මන් මවුවරු දරුවනට ‘රත කල්කය’ හෙවත් ‘දෙසදුන් කල්කය’ පෙවීම මෑතක සිට ප්‍රතික්‍ෂ්ප කර ඇති වීමයි.

කොල්ලු, වදකහ, වැල්මී, රත්හඳුන්, සුදු හඳුන්, සහිඳ ලුණු සහ දෙහි ඇඹුල්වලින් සැදුම්ලත් රත කල්කය අතර ඉහත කී විසමතාවන් දුරු කිරීම සඳහා යෝග්‍ය වේ. මෙහිදී දරුවාට හොඳින් මල සහ මුත්‍රා පිටවීම නිසාත් රුධිරය යහපත්ව පිරිසුදුවීම නිසාත් සම ආශ්‍රිත ආසාදන හට නොගනී. ඒනිසා පොතු කබර වැනි රෝගයන් හට ගැනීමට ඇති ඉඩකඩද බොහෝදුරට මඟහැරී යයි.

පොතු කබර රෝගය සඳහා වන ප්‍රතිකාර

පොතු කබර රෝගය සඳහා ප්‍රතිකාර කිරීමේදී පළමුව ශරීරික ශෝධනයන් කෙරෙහි යොමුවීම අනිවාර්යය වේ. පසුව පහත සඳහන් ආකාරයට ඔසු වර්ගයන් වෛද්‍ය උපදෙස් අනුව භාවිතයට ගැනීම මැනවි.

• ත්‍රිපාල ක්වාථය, නවකාර්ශක්වාථය පටෝලාදී ක්වාථය.
• ශරිබා ආසවය, චන්දන ආසවය, උෂිර ආසවය.
• කෛශෝර ගුළි, ගෝක්ෂුරාදි ගුළි ත්‍රිපලා ගුග්ගුළුව, පත්‍යාදි ගුග්ගුළුව.
• නිම්භාදී චූර්ණය, ධාත්‍රි චූර්ණය ත්‍රිපාල චූර්ණය, චන්දනාදි චූර්ණය, ආමලක්‍යාදි චූර්ණය.
• පිණ්ඩ තෛලය, විසර්පහර තෛලය, නීල්‍යාදී තෛලය, විසහරණාදී තෛලය, නිම්බාදී තෛලය, තල තෛලය, කොහොඹ තෛලය.
• කොහොඹ කොළ, වෙනිවැල් ගැට, අමුකහ, නිදිකුම්බා සිහින්ව කපා හොඳින් තම්බා එම වතුරෙන් ස්නානය කිරීම මැනවි.
• ඉරමුසු හෝ දෑ සමන් මිශ්‍රකර ගත් වතුරෙන් ඇඟපත සේදීමෙන් සුවයක් දැනේ.
• ගංසූරිය පොතු තම්බා බීමට ගන්න. ගංසූරිය කොළ, ගෙඩි, පොතු යන දෑ එක්කර තම්බා ගත් වතුරෙන් ඇඟ සේදීමෙන් කැසීම සමනය වී තුවාල සුවවේ.
• කොහොඹ පොතු සහ දුම්මැල්ල කෂායකර බොන්න.
• වෙනිවැල්ගැට චූර්ණය, කොකුම් කුඩු චූර්ණය එක්ව ගෙන යෝගට් හෝ මී කිරි සමඟ මිශ්‍රකර ආලේප කිරීමෙන් සමෙහි තද අවර්ණ ගතිය සමනය වේ.
• වෙනිවැල්ගැට චූර්ණය තල තෙල් සමඟ මුසුකර ගෑමෙන්ද සුව අත්වේ.

ප්‍රතිකාර කරන සමයේ වගේම එයින් අනතුරුවත් තක්කාලි, අන්නාසි, විනාකිරි මිශ්‍ර අච්චාරු වර්ග, අඹ, ඇඹරැල්ලා, කරල් මුරුංගා, ගවමස්, මත්පැන්, දුම්වැටි, ඉස්සන්, දැල්ලන් කකුළුවන් ආදී උෂ්ණාධික දෑවලින් වැළකී සිටීම මැනවි. නිතර වතුර බීම, කොළ කැඳ පානය සහ පැපොල්, අලි ගැටපේර, සව් කැඳ, ඉරමුසු, බෙලිමල්, නෙල්ලි, රසකිඳ, රණවරා යන දෑ පානයට ගැනීමද වඩා යහපත්ය. හිස ගැන සැලකිලිමත්වීමේදී නිතර ෂැම්පු වර්ග භාවිතය නුසුදුසුය. මේ සඳහා බේබි සබන් වර්ගයක් භාවිතයට ගැනීම වඩා හොඳය. ඒ වගේම උළුහාල්, දෙහි, බැබිල මුල් තම්බා හිස සේදීම සහ ඔෟෂධීය වූ සිසිල දනවන තෙලක් හිස ගැල්වීමද යහපත්ය.

වෛද්‍ය නිරංජලා වික්‍රමසිංහ - නිරංජලා වෛද්‍ය ආයතනය මහනුවර - 0775886265

උපුටා ගැනීම මව්බිම