ඇඟ ඇතුළේ ලෙඩ ඉඟි කරන නිය රෝග
නියපොතු ආශ්‍රිත රෝග ගත් විට දුර්වර්ණ වීම, කැඩීම, බොල් වීම ආදිය වෙනත් අභ්‍යන්තරිකව ඇතිවන බරපතළ රෝගයක ලක්ෂණ විය හැකිය. හෘද රෝග, විටමින් ඌනතා, වකුගඩු රෝග ඉන් ප්‍රධාන වේ. ඒ හැර පෝෂණ ගැටලු, අපිරිසිදුකම, විටමින් හා ඛනිජ ලවණවල ඌනතා නිසාද නියපොතුවල රෝග ඇති වේ. අධික වේදනාව, නියපොතු දෙපස හා මැදින් එන අධික දැවිල්ල, පැසවීම ඇතිවේ. කැල්සියම් ඌනතාවද මෙයට ප්‍රධාන හේතුවකි. ඒ හැරුණු විට රබර් අත් වැසුම් පැලඳීම, රසායනික ද්‍රව්‍යවලට නිතර නිරාවරණය වීම, බතික්, පින්තාරු ආදිය නියවල තැවරීම ආදී හේතු නිසාද නිය රෝග ඇතිවෙයි.
මෙකී රෝග තත්ත්වවලින් පහසුවෙන් වැළකීමට හැකියාව පවතී. ඒ සඳහා අවශ්‍ය ප්‍රධානම කරුණ වන්නේ නියපොතුවල පිරිසිදුකමයි. නමුත් නියපොතු පිරිසුදු කිරීමට යොදන සැර සබන් වර්ග, රසායන ද්‍රව්‍ය නිසා නියපොතු තවත් රෝගී වේ. එසේම නියපොතු නිතර වතුරට තෙමේ නම් නිතර තෙත මාත්තු කරන්න. අත් වැසුම් පලඳින විට කපු අත්වැසුම් දමා අනතුරුව රබර් අත්වැසුම් පලඳින්න. එසේම නියපොතු කැපීමේදී අතේ නිය රවුමටත්, පාදයේ නිය දිගටත් කැපීම සුදුසු වේ. එසේ නොමැති විට නිය තුවාල වේ. නිය ආලේපන සහ නේල් පොලිෂ් භාවිතයේදී වඩාත් සැලකිලිමත් වීම වැදගත්ය. එක නිය ආලේපනයක් මත තවත් එකක් ගැල්වීම සුදුසු නැත. එසේම නියපොතුවල නිරෝගී භාවය සඳහා ගන්නා ආහාර ඉතාම වැදගත් වේ. කැල්සියම් බහුල පොඩිමාළු, කිරි ආහාර, සහ විටමින් බහුල පලාවර්ග, පලතුරු නිතිපතා ආහාරයට ගන්න. නියපොතු දුර්වර්ණනම් තලතෙල් හෝ පොල්තෙල් රත්කර නියපොතුවල මෘදුව අතුල්ලන්න. සැරව ගැලීම් හා තුවාල තිබේ නම් ඒ සඳහා වෛද්‍ය ප්‍රතිකාර ගැනීම ඉතාම වැදගත්ය. මුලින් කී පරිදි නියපොතු රෝග ඇති වන්නේ ශරීර අභ්‍යන්තරයේ පවතින රෝගයක් නිසාද යන්න සැකහැර දැනගන්න. ඉත් අනතුරුව අවශ්‍ය ප්‍රතිකාර ලබාගන්න.
උපුටා ගැනීම මව්බිම
