කරදරකාර ඉන්නන්

අප ඉන්නන් ලෙස හඳුනා ගන්නේ සමේ හා ශ්ලේශ්ම පටලවල ඇතිවන ආසාදන තත්ත්වයකි. මෙවැනි ඉන්නන් ඇතිවන්නේ බොහෝ විට කුඩා දරුවන්ටය. පාසල් වියේ පසුවන දරුවන් මේ අතරින් ප්‍රධානයි. නමුත් වැඩිහිටි වියේ පසුවන අයටද මෙම ඉන්නන් ඇතිවීමට පුළුවන.

මේ ආකාරයට ඉන්නන් ඇතිවීමට විවිධ හේතු සාධක බලපෑ හැකිය. ප්‍රතිශක්තිය අඩුයි නම් එවැනි අයගේ ශරීරයේ මෙවැනි ඉන්නන් ඇතිවීමට පුළුවන. උදාහරණයක් ලෙස ගතහොත් පිළිකා හෝ ඒඩ්ස් වැනි රෝගීන්ද ප්‍රතිශක්තියෙන් අඩු නිසා ඔවුන්ටද ඉන්නන් ඇතිවීමේ වැඩි අවදානමක් පවතින බව කිව හැකිය.

ඉන්නන් සමේ මතුපිටට පෙනෙන දෙයකි. නමුත් ඒවා හටගන්නා ශරීරයේ ස්ථාන අනුව විවිධ ස්වරූප පෙන්වන අවස්ථා ඇත. අපට බහුලවම දැකගත හැකි වන්නේ කටු වැනි රළු ස්වභාවයෙන් යුතුව සමෙන් මතුපිටට ආ ගැටිත්තක් හෝ ගෙඩියක් වශයෙනි. මෙම ගැටිත්ත සමේ පැහැයට සමාන පැහැයක් ගන්නා අතර එය සුව වීමේදී කළු පැහැයට හැරෙයි. ඉන්නන් ඇතිවන ස්ථාන ලෙස මුහුණ, අත, අල්ල, යටි පතුල, මුඛය හා ලිංගික ප්‍රදේශ හඳුනා ගත හැකිය. ඉන්නන්ගේ ස්වභාවය වෙනස් වන්නේ එම ස්ථානවල සමේ ස්වභාවය අනුවය. එනම්,

• සාමාන්‍යයෙන් අතේ සහ මුහුණේ ඇතිවන ඉන්නන් රළු ගැටිති ආකාරයෙන් පවතියි.
• මුහුණේ කුරුලෑ වැනි කුඩා ගෙඩි ආකාරයෙන් ඉන්නන් හට ගැනීම.
• යටි පත්ලේ සහ අල්ලේ සම රළු නිසා මෙය ගල් තැළුමක් ලෙස පවතියි.
• කට ඇතුළත, තොල්වල හෝ ලිංගික ප්‍රදේශ අවට ඇති ඉන්නන් සිනිඳු හා තෙත්ව ගැටිති ආකාරයෙන් තිබීමට පුළුවන.

මීට අමතරව සඳහන් කළහොත් ඇතැම් ඉන්නන් කීපයක් එක්වීමෙන් විශාල වී යටි පතුලේ ගල් තැළුමක් ආකාරයෙන් හට ගන්නා අවස්ථාද ඇත. මේ ආකාරයට හට ගන්නා බොහෝ ඉන්නන් වේදනාවක් ඇති නොකරයි. නමුත් ලිංගික ප්‍රදේශ ආශි්‍රතව ඉන්නන් ඇති වුවහොත් එය නම් තරමක් අපහසුතාවක් ඇති කරවීමට පුළුවන.

පැතිරීම :

ඛෙල්ලේ හෝ ශරීරයේ යම් තැනක ඉන්නන් ඇති වූවිට ඔබ එය නිතර නිතර ස්පර්ශ කිරීම නිසාත් ඒ අවට තව තවත් ඉන්නන් මතුවන අවස්ථා ඇත. බොහෝ විට කුඩා දරුවන්ට මේ ආකාරයෙන් ඉන්නන් පැතිරීමට හැකිය.

ලිංගික ඉන්නන් :

ශරීරයේ අනෙක් ස්ථානවලට වඩා ලිංගික ප්‍රදේශවල මෙවැනි ඉන්නන් හට ගතහොත් ඔබ වඩාත් සැලකිලිමත් විය යුතුය. එය අපහසුකාරී තත්ත්වයක් වීම එක් හේතුවකි. අනෙක් කරුණ නම් ලිංගික ඉන්නන් පිළිකා ඇතිවීමේ අවදානමක් පෙන්වන බැවිනි. බොහෝ විට මෙලෙස ලිංගික ඉන්නන් ඇති වන්නේද ලිංගික ඇසුරක් හේතු කරගෙනය. එම නිසා මෙවැනි අවස්ථාවක ඔබ වහාම සමාජ රෝග වෛද්‍ය සායන වෙත ගොස් දැනුම්වත් වී ප්‍රතිකාරවලට යොමුවීම වඩා වැදගත්ය.

සුව වීම : 

නිරෝගී පුද්ගලයන්ගේ නම් ඉන්නන් ඇති වුවත් එය කාලයත් සමඟම ඉබේ පහව යන අවස්ථා ඇත. නමුත් ප්‍රතිශක්තියෙන් අඩු පුද්ගලයන්ගේ නම් ඉන්නන් දිගු කාලයක් තිඛෙන අවස්ථා ඇත. මෙය වේදනාකාරී නිසා එයට ප්‍රතිකාර කිරීම නම් අත්‍යවශ්‍ය නොවේ. නමුත් එම ගැටිත්ත ඔබේ පෙනුමට බාධාවක් නම් නිසි ප්‍රතිකාර කරමින් ඉවත් කිරීමට ඔබට පුළුවන.

ඉවත් කිරීම : 

ඉන්නන් ඉවත් කරන විවිධ ක්‍රමවේද පවතියි. මෙය ඉන්නන් බොහෝ විට ඉවත් කරන්නේ පිලිස්සීමෙනි. අධික සිසිල් ගුණයෙන් යුක්ත නයිට්‍රජන් මඟින් මෙලෙස ඉන්නන් පිලිස්සීමට ලක් කරයි. අද බොහෝ විට වෛද්‍යවරු භාවිත කරන්නේ මෙම ක්‍රමයයි. මීට පෙර ඇසිඩ් මඟින් ඉන්නන් පුලුස්සන ක්‍රමයක්ද පැවිතිණි. නමුත් මෙයද සිදු කළ යුත්තේ සායනයක් වෙත යොමු වීමෙනි. මෙය තමාටම කිරීමට පහසු දෙයක් වුවද එය සම අවට ස්පර්ශ වුවහොත් සුදු පැහැ ගැන්විය හැකි නිසා සායනයක් වෙත ගොස් මෙය සිදුකර ගැනීම වඩාත් සුදුසුය. මුහුණේ ඇතිවන කුඩා ඉන්නන් පිලිස්සීම අපහසු නිසා එවැනි අවස්ථාවකදී සුදුසු ආලේපන වර්ග වෛද්‍යවරු නිර්දේශ කරති. වෙනත් රටවල නම් ලේසර් කිරණ මඟින් මේ සඳහා ප්‍රතිකාර කරන අවස්ථාද ඇත. නමුත් ලිංගික ඉන්නන් සඳහා ප්‍රතිකාර කිරීමට නම් ඔබ සමාජ රෝග සායන වෙත යොමුවිය යුතුමය.

නුසුදුසු ක්‍රම : 

එහෙත් ඇතැම් අය හිතුමතේට විවිධ නූල් වර්ග භාවිත කරමින්ද ඉන්නන් ඉවත් කරන අවස්ථා ඇත. එවිට එම ස්ථාන තුවාල වී ලේ වහනය වීමෙන් විසබීජ පවා ඇතුළුවීමට පුළුවන. එම නිසා මෙවැනි අනිසි ක්‍රියාවලින් වැළැකී සිටිය යුතුය.

වෛද්‍ය කේ.එන්.එල්. පතිරාජ, සමේ රෝග ඒකකය, මහනුවර

ශාලිකා රංගනී සමරදිවාකර

උපුටා ගැනීම මව්බිම පුවත් පත