සෙංකොට්ටන් සහ නාමල් රේණු එකතුවී විප්ලවීය හිසරදය දූරීභූත කරයි
හිස ආශ්‍රිතව හට ගන්නා රෝගාබාධ පීඩාකාරීය. වසංගත රෝගයක් තරමට කරදර දෙන හිසරදය වගේම ඉස්හොරි වාගේ ආබාධත් මහ වධයක්. සිංහල තාලයට පිළියෙල කරගත හැකි බෙහෙතක සුවය මනසටත් සිසිලසක්. හිසරදය සමනය කරන්න ඉස්හොරි වධයට නැවතුම තියන්න මෙන්න සුවදායී අත්බෙහෙත් තීරුවක්.
කල්ගිය හිසරදයට
මුරුංගා ඇට ගෙන කරල් සැබෝ ඇට සමඟ අඹරා අවරිය කොළ යුෂ සහ තලතෙල් මුසුකර සාදාගත් තෛලය නස්න කරනු. පැසුණු අලුවතු ගෙඩි, සඳුන්, සීනි සම සමව ගෙන හොඳින් අඹරා ගිතෙල් සහ මී පැණි එක්කර නස්‍ය කරනු.
වරින්වර හටගන්නා හිසරදයට
පළමුව සුදු ලූනු හොඳින් අඹරා ගන්න. පසුව එය තලතෙල් ආශි්‍රතව උණු කොට උණුසුම මඳ වශයෙන් තිබියදීම හිසරදය තිබෙන පැත්තට නස්‍ය කරනු. හෙළවරා දණ්ඩෙහි දුම නාසයට උරන්න. නිතර සෑදෙන හිසරදය මෙන්ම අංශභාගයට එන හිසරදයද සුවවේ. සිහින්පිම්බ සහමුලින් දැවූ අළු, කලාඳුරු, කුරුඳු පොතු, කපු ඇට මද, වැලි කකාල කසාට මී පැණි ගෙන ගිතෙල් මිශ්‍රකර නස්‍ය කරන්න.
අලුත් හිසරදයට
නික දලු තල තෙලෙහි කකාරා ගෙන දැඩිකොට තෙල් මිරිකා එම තෙල් නස්‍ය කරන්න. අර්ධ කපාල, හිසරදය, ඉරුවාරදය නසයි. කොට්ටං, සඳුන්, අමු ඉඟුරු සමවගෙන එයට තනකිරි මුසුකර අඹරා සියලුම හිසරදවලදී නළලට පැලැස්තර දමන්න. ගැටතුඹ කොළ යුෂ ගෙන එයට අඹරාගත් ගම්මිරිස්, තිප්පිලි, ඉඟුරු ද කලවම්කර නස්‍ය කිරීම මැනවි.
විවිධාකාර හිසරදයන් සඳහා සුවදෙන හිස ගැල්වීම් වර්ගයන්
- නාමල් රේණු, සෙංකල කිරි කොට්ටං, එරඬු ඇට, වලඟසාල්, සූදුරු, කළුදුරු, සහිඳ ලුණු, අමු ඉඟුරු සමව ගෙන දෙහි ඇඹුලෙන් අඹරා මඳක් උණුගන්වා හිසට දමනු. පසුව පැය තුනක් පමණ පසුවූ තැන ඇල්දියෙන් නාගන්න.
- සෙංකල කිරි කොට්ටං කළං එකයි. කටු රෝසන කළං දෙකයි, උණුදියෙන් අඹරා හිස ගල්වා පැය තුනක් පමණ ගිය පසුව ස්නානය කිරීම මැනවි.
- අමු ඉඟුරු, රත් නෙටුල්, කෙළිඳ හාල්, ඇත් තිප්පිලි සමව ගෙන එළු මුත්‍ර මිශ්‍රකර අඹරා පසුව මඳ වශයෙන් රත්කර හිස ගල්වා පැය තුනක් පමණ හිද ස්නානය කරනු. සුදු ලූනු, සහිද ලුණු, තල සමව ගෙන මී පැණි මුසුකර අඹරා හිසට, නළලට ගල්වනු. පැය තුනක් පසුවූ තැන ස්නානය කරනු.
- වැල්මී, ඉරමුසු, ඉරිවේරිය, මානෙල් අල, වද සමව ගෙන දෙහි ඇඹුලෙන් අඹරා ඇල්දියෙන් කලතා නළලට දමනු.
- වැටකොළු මුල්, අමු කහ, කොහොඹ පොතු, දියමිත්ත, සුරදර, කොට්ටං සමව ගෙන උණු පැනින් අඹරා හිස ගැල්වීම මැනවි.
- වදකහ, මුරුංගා මුල්, කොට්ටං, අමුඉඟුරු, ගම්මිරිස් සමව ගෙන උණු දියෙන් අඹරා නළලට පැලැස්තර දැමීම කරනු.
- නෙල්ලි ගෙන (අමු නෙල්ලි තෝරා ගැනීම වඩා හොඳය) දෙහි යුෂ මිශ්‍රකර අඹරා හිසට ගාන්න.
- තිබ්බටු යුෂ සමඟ මී තෙල් මිශ්‍රකර තෙල් සිඳුවා ගන්න. දවසක් ඇර දවසක් හිස සේදීමෙන් අනතුරුව එය හිසට ගාන්න.
- දෙහි ඇඹුල් නැළියකට තලතෙල් නැළියක් සහ කල්කයට ගම්මිරිස් කලුදුරු කළං 24ක් අඹරා දමා පදමට කාකාරා පෙරා හිස ගැල්වීම මැනවි.
ආයුර්වේද වෛද්‍ය පොතපත ඇසුරින් සැකසුවේ දමයන්ති රේණුකා පුනාන්දු
උපුටා ගැනීම මව්බිම පුවත්පත
