ලෙඩ ලෙඩ... හැමදාම ලෙඩ... නිරෝගීව ඉන්නෙ කොහොමද?

නිසඟ බලය

අප සියලු දෙනාටම ස්වභාව ධර්මයෙන් උරුම වූ සහජ (නිසඟ) බලයක් ඇත. ඒ ඔබ අපට හිමි කායික බලය, මානසික දරාගැනීමේ හැකියාව, අපගේ රූප ශෝභාව මෙන්ම නිරෝගී බව යන ඒවායේ ස්වභාවය හෙවත් තරම තීරණය වේ. මේ නිසඟ බලය සතු අය උපතින්ම කායිකව මෙන්ම මානසිකවද දුර්වලය. නිතර නිතර රෝගවලට බඳුන් වේ. එමෙන්ම අන් අයගේ ආකර්ෂණයට ලක්වීමද අඩුය. මේ අනුව අප කළ යුත්තේ මේවායින් මිදීමට අප තුළ ඇති සහජ බලය වර්ධනය කර ගැනීමයි. ඒ සඳහා ස්වභාවධර්මය තුළ ජීවත්වීමයි. අද වැනි ඉතා සංකීර්ණ මෙන්ම වේගවත් ජීවන රටාවක් සහිත යුගයකදී වුවද එය ඉතා පහසුවෙන් කළ හැකිය. ස්වභාව ධර්මය තුළත් සියල්ලටම විසඳුම් ඇත. රෝග යනු ස්වභාවධර්මය උල්ලංඝනය කිරීමේ ප්‍රතිඵලයයි. අපට ඇතිවන සියලු කායික, මානසික පීඩා, ලෙඩ රෝග සියල්ලටම හේතුව අප ස්වභාවධර්මයට එරෙහිව යෑමයි. ස්වභාවධර්මයේ නීති උල්ලංඝනය කළ විට ඒ බව අප ශරීරයේ ජීව විද්‍යාත්මක ක්‍රියාවලියේ වෙනස්වීමක් ලෙස විද්‍යමාන වේ. රෝගවලට ඔරොත්තු දීමේ ශක්තිය අඩුවේ. රුධිර සංසරණයේ වෙනස්කම් ඇතිවේ. විවිධ අපද්‍රව්‍ය සහ විස ද්‍රව්‍ය ශරීරය තුළ එක්රැස් වේ. මේ සියල්ලේම අවසාන ප්‍රතිඵලය වන්නේ අපගේ ශරීරයේ ආහාර මාර්ග පද්ධතිය, හෘදය, වකුගඩු සහ පෙණහලු ආශි්‍රතව අපද්‍රව්‍ය හා විස ද්‍රව්‍ය එක්රැස් වේ. එවිට එම ඉන්ද්‍රියයන් ආශි්‍රතව විවිධ රෝග ඇතිවේ.

ස්වභාව ධර්මයට අනුව රෝග ඇතිවීමේ මූලික ක්‍රම

අපට ඇතිවන කුදුමහත් සියලුම රෝගවලට බලපානු ලබන මූලික කරුණු තුනක් පවතී.

අපද්‍රව්‍ය එක්රැස්වීම.

සියලුම රෝගවලට පොදු කරුණක් වන්නේ ශරීරයේ නිපදවන විවිධ විස අපද්‍රව්‍ය ශරීරයේ සෛල හා පටක තුළ එක්රැස්වීමයි. මෙසේ එක්රැස්වන අපද්‍රව්‍ය අපගේ බහිස්‍රාවී ඉන්ද්‍රියයන් වන සම, වකුගඩු සහ පෙණහලු තුළින්ද ආහාර මාර්ගය තුළින්ද ඉවත් කරගන්නවා. එහෙත් වයසට යෑමත් සමඟ අපගේ නිසඟ බලය අඩුවීමෙන් මේවා නිසි පරිදි ඉවත් නොවීමෙන් සහ බහිස්‍රාවීය ඉන්ද්‍රියයන් මේවා සම්පූර්ණයෙන්ම ඉවත් කිරීමට අපොහොසත් වීමෙන් ශරීරයේ විවිධ පටක තුළ එක්රැස් වේ. මෙසේ අපද්‍රව්‍ය එක්රැස්වීමට හේතු කාරක වන්නේ අපගේ වැරැදි ආහාර, ජීවන පුරුදු හා අධික මානසික ආතතිය වැනි කරුණුය. විස අපද්‍රව්‍යය කාලයක් තිස්සේ එක්රැස්වීමෙන් ක්‍රමිකව විවිධ රෝග ඇතිවීමට පටන් ගනී. මේ නිසා මෙම රෝගවලින් මිදීමට ඇති එකම මඟ වන්නේ මෙසේ එක්රැස්වන අපද්‍රව්‍ය, විස ද්‍රව්‍ය ශරීරයෙන් ඉවත් කිරීමයි. මෙම ක්‍රියාව සඳහා භාවිත කරන ක්‍රමවලට පොදුවේ ‘ශෝධන කර්ම’ ලෙස ව්‍යවහාර කරනු ලබයි. ආයුර්වේදයේ සඳහන් ‘පංචකර්ම’ සහ යෝග ශාස්ත්‍රයේ සඳහන් ‘ෂට්කර්ම’ යනු මෙවැනි අපද්‍රව්‍ය ශරීරයෙන් පිටකරන ක්‍රමයන්ය. බොහෝමයක් රෝග ඇතිවන්නේ මෙම විස අපද්‍රව්‍ය ශරීරයෙන් පිට කිරීමට දරන උත්සාහයේ ප්‍රතිඵලයක් වශයෙනි. නිපදවී ඇති අධික විස ද්‍රව්‍ය හා අපද්‍රව්‍ය ශරීරයෙන් පිට කිරීමට ශරීරය නිරතුරුව උත්සාහ ගනී. මෙසේ ක්‍ෂණිකව එම විස ද්‍රව්‍ය බැහැර කිරීමේ උත්සාහයේ ප්‍රතිඵලයක් වශයෙන් සමහර ක්‍ෂණිකව ඇතිවන රෝග ඇතිවේ. උදාහරණ වශයෙන් උණ, සෙම් ප්‍රතිශ්‍යාව, හමේ ඇතිවන ආසාත්මිකතා, ආහාර මාර්ගය ආශි්‍රතව ඇතිවන අතීසාරය සහ වෙනත් ප්‍රදාහිත තත්ත්ව දැක්විය හැකිය. මෙවැනි රෝගවලදී ඒවා තාවකාලිකව යටපත් කිරීම නොකළ යුතුය. අදාළ රෝගයට හේතුවන හේතු මුලිනුපුටා දැමීමට උත්සාහ කළ යුතුය. කාලීන රෝග ඇතිවන්නේ ක්‍ෂණික රෝග තාවකාලිකව යටපත් කළ විටයි. උදාහරණයක් වශයෙන් හෘද රෝග, දියවැඩියාව, ඇදුම, සන්ධි රෝග සහ වකුගඩු රෝග වැනි කාලීන රෝග දැක්විය හැකිය.

රෝගවලින් මිදීමට හැකියාව තමා තුළම ඇත.

ඕනෑම රෝගයක් යමකුට ඇතිවූ විට එයින් සුවපත් වීමේ සහජ හැකියාවද තමා තුළම ගැබ්වී ඇත. මෙම නිසඟ හැකියාව තිබුණොත් නිතර නිතර රෝගාතුර නොවේ. ඔවුන් රෝගාතුර වන්නේ ඉතා කලාතුරකින්. අනෙක් අතට සමහර අය හැමදාම රෝගීන්ය. ඒ අය තුළ රෝගවලින් මිදීමේ සහජ බලය අඩුය. මේ රෝගවලට ඔරොත්තු දීමේ නැතහොත් රෝගවලින් මිදීමේ හැකියාව ආයුර්වේදයේ හැඳින්වෙන්නේ ‘ව්‍යාධි ක්‍ෂමතාව’ ලෙසයි. අප රෝගී වූ අවස්ථාවලදී ‘සුවවන්නේ’ අප තුළ ඇති මේ ‘සුවවීමේ බලය’ නිසාය. මේ අනුව ස්වභාව ධර්මය යනු රෝග නොවී සිටීම සඳහා මෙන්ම රෝගී වූ විට සුවය ලැබීම සඳහාද තිබෙන උතුම් ඔෟෂධයයි. මේ නිසා ස්වභාව ධර්මයේ ඇති බලය හඳුනාගන්න. ස්වභාව ධර්මය අනුව ජීවිත හැඩගසා ගන්න. අපේ ආහාරපාන, ජීවන පැවැත්ම ස්වභාව ධර්මයේ නීතිරීතිවලට පටහැනි නොවන සේ පවත්වා ගන්න. එවිට ඔබ සදා නිරෝගී වනු ඇත.

ආචාර්ය එස්.එම්.එස්. සමරකෝන් ජේ‍යෂ්ඨ කථිකාචාර්ය ගම්පහ වික්‍රමාරච්චි ආයුර්වේද විද්‍යායතනය

කැලණිය විශ්වවිද්‍යාලය 

උපුටා ගැනීම මව්බිම පුවත්පත