පිළිකාවක හෝ ලාදුරුවල ලක්ෂණයක් විය හැකි අළුහම්

සමේ හට ගන්නා දිලීර ආසාදන හේතුවෙන් මෙම අළුහම් ඇතිවේ. ඇතැම්විට මෙම දිලීරය තම සමෙන් හෝ වෙනත් අයකුගේ සමෙන් වුවද ආසාදනය වීමට පුළුවන. මෙය සම තුළින්ම හට ගන්නා දලීරයකි. එහි ක්‍රියාකාරිත්වය අනුව මෙය සම මතුපිට විවිධ ආකාරයෙන් මතුවීමට හැකිය.

ස්වභාවය

මේ ආකාරයට හට ගන්නා අළුහම්වල ස්වභාවය හා වර්ණය අනුවත් විසමතා පෙන්වන අවස්ථා ඇත. අළුහම් බොහෝවිට අපට දැකගත හැකිවන්නේ සුදු පැහැයෙනි. අපේ සම තලෙළු පැහැයක් ගන්නා නිසා එම අළුහම් අපට දැකිය හැකි වන්නේ සුදු පැහැයට හුරු ළා වර්ණයකිනි. නමුත් පැහැපත් හෙවත් සුදු සමක් ඇති අයකුගේ සම මත ලා රතු හෝ අඳුරු පැහැ ස්වභාවයකින් වුවද මෙම පැල්ලම් දැක ගැනීමට හැකිය. මේ ආකාරයට අළුහම් විවිධ වර්ණයන්ගෙන්ද දැක ගැනීමටද පුළුවන. මෙහි ස්වභාවය ගත්විට බොහෝ විට රවුම් ආකාරයට පැතිර යෑමක් දැකිය හැකිය. නැත්නම් රවුම් කීපයක් එක් තැනකට එක්ව ඇති ස්වරූපයක් හා ඒ අවට සිහින් කුඩු සහිත බවක්ද වඩා විමසිල්ලෙන් පරීක්‍ෂා කළ විට දැකගත හැකිය. මෙම අළුහම් බෙල්ල අවට, යට, පිට කොන්ද පපුව ආදී ප්‍රදේශවල බොහෝ විට පැතිර පවතියි. මෙලෙස පැතිර පවතින අළුහම් ඇතැම් විට කැසීමට පවා ලක්විය හැකිය. දහදිය ස්පර්ශ වීමෙන් මේවා කැසීමට ලක්වන අවස්ථාද ඇත. නමුත් ඇතැම් අයට මෙම අළුහම් පැවැතුණද ඒවා කැසීමට ලක් නොවේ. එය සමට හානිකර නොවන අයුරින් පැතිර පවතින අවස්ථාද ඇත.

සමේ ඇතිවන දිලීර මඟින් හට ගන්නා තත්ත්වයන් ලෙස අළුහම් හඳුනා ගනියි. නමුත් මේ ආකාරයට ළා පැහැයෙන් මතුවන පැල්ලම් බොහෝවිට අළුහම් යැයි නිගමනය කළ නොහැකිය. එය වෙනත් සමේ රෝගයක් වීමට වුවද පුළුවන. සුදු කබර රෝගයත් මෙයට එක් නිදසුනකි. නමුත් මෙම කබර තද සුදු පැහැති ස්වභාවයක් ගනියි. එම නිසා මේ බව තහවුරු කරගැනීමට හැකි වන්නේ නිසි වෛද්‍ය පරීක්ෂණයකට යොමු වීමෙනි.

බෝවීම

අළුහම් දිලීරයක් මඟින් ආසාදනය වන්නක් නිසා බෝවීමට වුවද හැකිය. තුවා වැනි දේ වෙනම පරිහරණය නොකිරීම නිසාත් මෙම දිලීර බෝවීමට පුළුවන.

ප්‍රතිකාර

අළුහම් කැළැල් සම මතුපිට ඇති බව දැනගත් විට ඔබ වෛද්‍යවරයකු වෙත යොමුවිය යුතුය. විටින් විට මතුවෙමින් මැකී යන අළුහම් කැළැල් ඇතැම් අය නොසලකා හරින අවස්ථාද ඇත. නමුත් මෙවැනි කැළැල් දීර්ඝ කාලයක් තිබීම නම් එතරම් සුදුසු නොවන්නකි. මන්ද මේ ආකාරයට පිටේ ඇතිවන ඇතැම් කැළැල් ලාදුරු රෝගයේ පෙර නිමිත්තක් වීමටද ඉඩ ඇති බැවිනි. මෙනිසා ඒ බැව් තහවුරු කරගැනීමට නිසි වෛද්‍ය පරීක්‍ෂණයකට යොමුවීම වැදගත්ය. අළුහම් බවට තහවුරු කරගත් පසු එම දලීර මර්දනය කිරීමට විවිධ ඖෂධ ආලේප කිරීමටද ලබාදෙන අවස්ථා ඇත. මෙම ඖෂධ වෛද්‍ය නිර්දේශ මත සතියක දෙකක පමණ කාලයක් භාවිත කිරීමෙන් මෙම කැළැල් මර්දනය කර ගත හැකිය. ඖෂධ මඟින් දිලීරය මර්දනය කළද ඇතැම්විට එම කැළැල් ළා පැහැති ලෙස තිබෙන අවස්ථාද ඇත. ඔබ මෙවැනි කැළැල් පිළිබඳ සැලකිලිමත් වියයුතු වන්නේ සමේ ඇතිවන පිළිකාද නොදැනුවත්ව මෙලෙස හට ගැනීමට හැකි වන බැවිනි. එම නිසා පිට ප්‍රදේශයේ මෙවැනි කැළැල් දීර්ඝ කාලයක් තිස්සේ පවතින්නේ නම් වහාම වෛද්‍යවරයකු වෙත ගොස් ප්‍රතිකාර ලබාගත යුතුය.

නිසි චර්යා

අපේ දෛනික චර්යාවේ පවතින නොසැලකිලිමත් බවත් මෙවැනි සමේ රෝගවලට හේතු වන බව ඔබ දන්නවාද? මෙහිදී පිරිසුදුකමට මුල් තැන දිය යුතුය. අප නිතර භාවිත කරන තුවාය හා අනෙකුත් ඇඳුම් පැලඳුම් නිතර පිරිසුදුකර තබා ගැනීමටත්, යට ඇඳුම් ආදිය හොඳින් වියළා ගැනීමටත් ශරීරයද නිතර වියළිව තබා ගැනීමටත් අවධානය යොමු කරන්න. මන්ද දලීර වැඩි වශයෙන් ව්‍යාප්ත වන්නේ තෙත ස්වභාවය පවතින විටය. මේ ආකාරයට ඔබේ චර්යා හැඩගස්වා ගැනීමෙන් බොහොමයක් රෝගවලින් අත්මිඳීමට ඔබට හැකිවනු ඇත.

උපුටා ගැනීම මව්බිම