නිදි දෙව්දුවට ඔබ අතහැර යන්නට ඉඩදෙන්න එපා`
ලොව උපන් ඕනෑම පුද්ගලයකු තම ජීවිත කාලයෙන් තුනෙන් එකක් ගත කරන්නේ නින්දේය. අප ගෙවන ජීවිත කාලයෙන් තුනෙන් එකක් නින්දට ගත කිරීමෙන් සෙසු වැඩකටයුතු කරගෙන යාමට එය බාධාවක් යැයි විටෙක ඇතැමෙකු සිතන්නට පුළුවන. නිදි නොලබා එම කාලයත් වඩාත් ඵලදායි කාර්යක නියැලෙන්නට ඇත්නම් එය කොතරම් ප්‍රයෝජනවත්ද? සත්තකින්ම ජීවිතයේ ඵලදායිතාවයක් ලබා ගැනීමට නින්ද දිව ඔසුවක් බව ලිපිය කියවන ඔබට වැටහේවි.
දිවා කාලයේ මැෂිමක් ලෙස වැඩ කරන්නට වලිකන අපි දවසේ පැය 15-16-17ක් නොනිදා සිටීමට නම් ඉතිරි පැය ගණනට අවම වශයෙන් පැය 6-7-8 වත් නාදා ගැනීම අත්‍යවශ්‍යය. අපගේ සිරුර වෙහෙසීමට ලක් වූ සියල්ල නැවත ප්‍ර‍්‍රකෘති තත්ත්වයට පත් කරන්නේ සුව නින්දකිනි. හරියාකාරව නින්දක් නොලද හොත් පසුදින අපට අවදි වීමටවත් නොහැකි තත්ත්වයේ සිරුර කෙඩෙත්තු වී පවතී. සෞඛ්‍ය සම්පන්නව ජීවත් වීමට යම්කිසි පුද්ගලයකු දිනකට පැය 6-7වත් අඩු තරමේ නිදාගත යුතුමය. එසේ නොවුණහොත් ඔබ රෝගියෙකු වන දවස වැඩි ඈතක නොවේ. බිළිඳු දරුවන් දිනකට පැය 12-16 අතරත් වයෝවෘද්ධ අය පැය 6කට අඩු සුළු කාලයක් නින්දේ ගත කරයි. නමුත් ඇතැමෙකුට කරුමයට වාගේ නිදි දෙව්දුව අහලකටවත් පැමිණෙන්නේ නැත. එයට හේතු කිහිපයක් ඇත. දහවල් කාලයේ නිදා ගැනීම රාත්‍රියේ නින්දට අකුල් හෙලයි. බොහෝ වැඩිහිටියන්ට උදාවන්නේ මේ තත්ත්වයයි. දවල්වරුවේ අතිශයින් කලබලකාරි ලෙස විවේකයක් නොලබා වැඩ කර වැඩ නිමවූ විගස නින්දට යාම එතරම් යෝග්‍ය නොමැත. නින්දට යාමට පෙර විවේකයෙන් සිටීම හෝ පවුලේ අය සමඟ සතුටු සාමීචියේ යෙදීම වඩාත් ඵලදායකය. භාවනා කිරීමද, ගීතවලට සවන් දීම වඩාත් යෝග්‍යය. නිතිපතා ව්‍යායාමයේ යෙදෙන හෝ ක්‍රීඩා කරන අය සැප නින්දක් ලැඛෙන බව අමුතුවෙන් කිවයුතු වන්නේ නැත. නිතිපතා ව්‍යායාම් කිරීම සුව නින්දකට මං සලසයි. ආහාර ගත් විගස නින්දට යාම නුවණට හුරු නැත. විශාල ප්‍රමාණයක් ආහාරයට ගත් පසු සිරුරේ රත්වීම වැඩි කරන බැවින් හෘදයේ ක්‍රියාකාරීත්වය වැඩි කරයි. ආහාර දිරවීම අපහසු වන අතර ගැස්ට්‍රයිටීස් රෝගයට මුල පුරයි. එබැවින් ආහාර ගත යුත්තේ නින්දට පැය 2කට පමණ පෙරාතුවය.
මද රස්න වතුරෙන් ඇඟපත සෝදා ගැනීමට ද නින්දට රුකුලකි. තේ හෝ කෝපි නොයෙදු කිරි වීදුරුවක් පානය කිරීමද වඩා යෝග්‍යය. නිදිමතට වැට බඳින ආහාර පාන ලෙස ගැනෙන්නේ කැෆෙන් අඩංගු තේ සහ කෝපිය. කෝලා පාන වර්ග, රෙඩ් වයින් වර්ග, චොකලට්, චීස් වර්ග ද නිදිමත නැති කරයි. ඔබ නිදාගන්නා ඇඳ මෙට්ටය සුව පහසු නොමැති නම් ඔබට කොන්දේ අමාරුව හන්දිපත් රුදාව, නිදි උලුක්කුව ඇතිවන්ට පුළුවන. ඔබ සමඟ යහන්ගත වන්නාගේ ගෙරවීමද, තද ආලෝකය, වාහන ශබ්දය නින්දට බාධාවකි. සුව පැහැති නින්දකට ඔක්සිජන් සහිත පිරිසිදු වාතය අත්‍යවශ්‍යය. ඔබ නිදාගන්නා මෙට්ටය මෙන්ම කොට්ටයද සුව පහසු එකක් විය යුතුය. මධ්‍යසාරය යනු අපේ ජීවිතයේ පරම හතුරෙකි. විවිධ වූ ආකාරයෙන් අපව රෝගීන් බවට පත් කරන මධ්‍යසාරය සහ දුම්වැටිය නින්දේ ද හතුරෙකි. මත්පැනින් මත් වූ විට නින්ද ඔබ කරා පැමිණියද සැපවත් නින්දක් ලබා නොදී වේලාසනින් ඔබ අවදි කරයි. දුම්වැටිය ද ඔබ අවදි කරවීමට සමත්ය. ඇතැම් අසනීප තත්ත්වලදී නින්ද නොයෑම ස්වභාවිකය. නොයෙකුත් රෝග නිසා හට ගන්නා වේදනාව ඔබගේ නින්දට බාධාවකි. කොටින්ම කිව්වොත් දැඩි ලෙස වැළඬෙන සෙම්ප්‍රතිශ්‍යාව නිසා ඔබ නින්දෙන් අවදි කරවයි. නාසය හිරවීමකට ලක් වී ඔබ දැඩි අපහසුතාවයකට පත් කරයි. ඇතැම් මානසික රෝග නිසාද නින්ද අහලකටවත් පැමිණෙන්නේ නැත. තම සිතුවිලි ජාලය තුළ තෙරපෙමින් කල්පනා සයුරේ ගිලිමින් සිටින ඔවුන්ට නිදිමතක් දැනෙන්නේවත් නැත. සුව නින්දක් ලබා ගැනීම සඳහා ඇතැමුන් නිදිපෙති භාවිතයට ඇබ්බැහි වී ඇත. මෙය ඉතාමත් නරක පුරුද්දකි. නිදිපෙති ලබාගෙන නින්දට යාමේදී සිදුවන්නේ සිහින තරංග නැති කර දමා සිතුම් තරංග වැඩි කිරීමයි. නිදිපෙති නවතා දැම්මොත් සිහින තරංග වැඩිපුර නිපදවීමෙන් භයානක සිහින පෙනීමටත්, නින්දෙන් බිය වී අවදි වීමටත් පටන් ගනී. නිදිපෙතිවලට ඇබ්බැහි වූවෙකු එයින් මිදීමට නම් ක්‍රමයෙන් තමා ගන්නා නිදිපෙති ප්‍රමාණය අඩු කර සම්පූර්ණයෙන්ම නවතා දැමිය යුතුයි. එසේත් නොමැති නම් අමාරුවේ වැටෙන්නේද ඔවුන්මය. පැය 7-8ක් එක දිගට සුව නින්දක පසු වී පසුදින ඔබ අවදි වූ විට දවසේ දින චර්යාව ඉතාමත් සාර්ථකව කර ගැනීමට ලැඛෙන ප්‍රබෝධයෙන් ඔබට ජවයක් ශක්තියක් ලැඛෙන බව අත්දැකීමෙන්ම විඳගන්න.
උපුටා ගැනීම දිනමිණ පුවත් පත
