කාමරංගා අධිකව ආහාරයට ගැනීම මුත්‍රා රෝගීන්ට අගුණයි
ජීවත් වෙන්න හැමෝම කැමතියි. ඒ නිසාම ගුණදායක කෑමක් බීමක් ගැන කවුරුහරි කොහෙන්හරි හොයාගෙන ඇවිත් කිව්වොත්, අපි ඒ කෑම ඕනෑවටත් වඩා කනවා. හොයාගෙනත් කනවා. අපි හිතන්නේ ඒ හැම වෙලාවෙම අපේ ඇඟට ගුණදායක යමක් එකතු වේවි යන්නයි. නමුත්, සිද්ධ වන්නේ මීට වඩා වෙනස් දෙයක්. අපි කන කෑමවලින් ශරීරයට විටමින්, ප්‍රෝටීන් ඇතුලු සියලුම පෝෂක කොටස් ශරීරයට අවශෝෂණය වෙනවා තමයි. නමුත්, කිසියම් ආහාරයක් පමණ ඉක්මවා කෑ විට සිරුරට අහිතකර තත්ත්වයක් ඇතිවිය හැකියි. මේ ගැන තොරතුරු සාක්ෂි සහිතව ගෙන පැහැදිලි කරන්නේ, මහනුවර ශික්ෂණ රොහලේ වකුගඩු ඒකකයේ වකුගඩු රෝග පිළිබඳ විශේෂඥ වෛද්‍ය නිශාන්ත නානායක්කාර මහතායි.
"ඉකුත් කාලයේ (සති කිහිපයකට පෙර) මහනුවර වකුගඩු සායනකට පැමිණි බොහොමයක් රෝගීන් හිටි හැටියේ හදිසියේ වකුගඩු අක්‍රිය වීමක් හෝ වකුගඩු අක්‍රමවත්ව ක්‍රියාකළ අය. මේ අයට මුත්‍රා පිටවීමේ දුර්වලතා, මුත්‍රා ආසාදන වැනි තත්ත්වයන් ඇති වෙලා. අපි හැමෝම එකතු වෙලා මේවාට හේතු හෙව්වා. බොහෝදෙනා දියවැඩියාව අඩුවන බව හොයාගෙන විිවිධ කොළ ජාති පොතු ජාති තම්බා බොනවා. පලතුරු ජාති හොයාගෙන කනවා. මේ අතරේ බොහෝදෙනා "කාමරංගා" වැනි පලතුරු අසීමති ප්‍රමාණයක් ආහාරයට ගෙන තිඛෙනවා. කාමරංගාවලින් සිරුර අභ්‍යන්තරයේදී නිපදව ඔක්සලේට් මුත්‍රා සමඟ එකතු වෙලා වකුගඩු අකර්මන්‍ය කරනවා. තාවකාලිකව ඇතිවන වකුගඩු අකර්මන්‍යවීම් බොහොමයකට හේතු මේවායි. මෙහි බරපතළ තත්ත්වය හදිසියේ ඇතිවන තාවකාලික වකුගඩු අකර්මන්‍ය වීම සඳහා කඩිනමින් ප්‍රතිකාර කළ යුතුයි. මෙවැනි අවස්ථාවකදී ඇතිවන රෝග ලක්ෂණ ලෙස ප්‍රධාන තැනක් ගන්නේ මුත්‍රා මාර්ගයේ ආසාදන ඇතිවීමයි. උදාහරණයක් වශයෙන්, මුත්‍රා පිටකළද ඉතිරිව ඇති බව යළි යළි දැනීම, කැස්ස සමඟ මුත්‍රා පිටවීම, නිතර නිතර මුත්‍රා පිටකිරීමේ අවශ්‍යතාව ඇතිවීම වැනි තත්ත්වයන් ඇතිවිය හැකියි. මෙවැනි රෝග ලක්ෂණ ඇතිවන විටක වහාම මුත්‍රාවල පටක පරීක්ෂාවක් සිදුකළ යුතුයි. අනතුරුව වෛද්‍යරයෙකු ලවා හොඳින් පරීක්ෂා කරවා ගැනීම ඉක්මන් ප්‍රතිකාර ලබා ගැනීමට සහායක්. කාමරංගා ගෙඩි 10ක් 15ක් කෑමෙන් හෝ සියඹලා බීම වැනි ආහාරවලින්, වකුගඩු දුර්වල කරයි. වකුගඩු ශල්‍යකර්ම සිදුකළ පුද්ගලයන්ටත් හෘද රෝග සඳහා ප්‍රතිකාර ලබා ගන්නා උදවියටත්, වලිප්පුව ඇති අයටත් කාමරංගා අධික ප්‍රමාණයක් ආහාරයට ගැනීම සුදුසු නෑ. සාමාන්‍ය ජීවිතයේ තමන්ග් අභිමතය අනුව, සාමාන්‍ය ආහාර රටාවකට හුරුව සිටීම නිරෝගී ජිවිතයට මහත් රුකුලක්.
සමන්ති වීරසේකර
උපුටා ගැනීම දිනමිණ පුවත් පත
