මිනිහගෙ ඔක්කොම හොඳයි, ඕක තමයි නරක
“මිනිහගෙ ඔක්කොම හොඳයි, ඕක තමයි නරක”
“මොකවත් කියන්න එපා. ඒක නං කරන්න බෑ..”
“හරි, හරි අද විතරනෙ”
“මොනවද මේ කතා කරන්නෙ, එදාට ඔක්කොම ලෑස්තියි.”
මෙවන් කතා මානව ඉතිහාසය පුරාම විහිදී නොතිබුණැයි සිතිය නොහැකිය. මන්ද, මද්‍යසාර හා උත්සව අතර ඇත්තේ නොබිඳෙන සුලු සබඳතාවක් බැවිනි. එබැවින් මේ උත්සව සමයේ අසීමිත සවුදිය පිරීමට මත්තෙන් මද්‍යසාර ගැන හඳුනා ගැනීම වටී.
මද්‍යසාර
මද්‍යසාර නැතිනම් ඇල්කොහොල් යනු ඖෂධයකි. නමුත් මාත්‍රාව වැඩි වූ විට ගැටලු ඇති වේ. තවත් විදිහකින් කියනවා නම් අධි මාත්‍රාවකින් භාවිත කිරීමෙන් ශරීරයේ සියලු අවයවවලට ඉන් හානි සිදුවෙයි. පුද්ගලයකු භාවිතා කරන එතනෝල් (මද්‍යසාර) බිඳ දැමීම සිදුකරන්නේ අක්මාවේදීයි. නමුත් අධික මාත්‍රාවක් අක්මාවට ගමන් කිරීමෙන් අක්මාවට හානිවිය හැකියි.
මද්‍යසාර අධික මාත්‍රාවෙන් ගැනීමෙන් මතුවිය හැකි ගැටලු
- මද්‍යසාර හේතුවෙන් ෆැටීලීවර් තත්ත්වය (අක්මාවේ තෙල් තැන්පත් වීම)ඇති විය හැකිය.
- මද්‍යසාර හේතුවෙන් ඇතිවන ඇල්කොහොලික් හෙපටයිටීස් නැමැති අක්මා ප්‍රදාහ තත්ත්වය ඇතිවිය හැකියි.
- එය තවදුරටත් බැරෑරුම් වූ විට ඇල්කොහොලික් සිරෝසීස් නම් තත්ත්වය ද ඇතිවිය හැකියි. එනම් අක්මාවේ පටක තන්තුමය ආකාරයට පත් වී එහි ක්‍රියාකාරීත්වය අඩාල වීමයි. මේ තත්ත්වයට තවත් හේතු ද බලපාන අතර මද්‍යසාර එක් හේතුවකි.
- මද්‍යසාර හෘදවස්තුවටත් විවිධ අන්දමින් බලපායි. ඉන් හෘද වස්තුවේ පේශිවලට බලපෑමක් ඇති වීමෙන් පෙශිවල ක්‍රියාකාරීත්වය අඩාල වේ. (Cardiomyopathy) ඊට අමතරව මද්‍යසාර හේතුවෙන් හෘදය වස්තුව ගැහෙන රිද්මයේ වෙනසක් ඇතිවිය හැකිය. (arrhythmia)
- අධික රුධිර පීඩනය ඇතිවිය හැකි වීම තවත් බරපතළ ගැටලුවකි.
- මද්‍යසාර භාවිතය නිසා ලේවල රක්තහීනතාවයක් එනම් හිමොග්ලොබින්වල අඩුවක් විය හැකියි. එමෙන්ම මද්‍යසාර ගන්නා අයෙකුගේ රුධිරයේ පට්ටිකාවල ද අඩුවක් විය හැකිය.
- ඊට අමතරව සිරෝසීස් සෑදීමෙන් ප්ලීහාව විශාල වීම නිසාද පුද්ගලයකුගේ රුධිර පට්ටිකාවල අඩුවක් විය හැකි වේ.
මද්‍යසාර මධ්‍ය ස්නායු පද්ධතියට බලපාන අන්දම
- මෙයින් පුද්ගලයෙකුගේ කල්පනාවේ වෙනස්කම් ඇතිවිය හැකියි. යමක් පිළිබඳ නිසි අවධානයක් දිය නොහැකි තත්ත්වයකට පුද්ගලයකු පත්විය හැකිය. මේ හේතුවෙන් ශාරීරික ගැටලු මෙන්ම සමාජ ගැටලු ද පැන නැගිය හැකිය. යම් දෙයක් විනිශ්චය කිරීමේ අසීරුතාව, පහසුවෙන් අනතුරුවලට ගොදුරු වීමේ හැකියාව ආදිය ඉන් ප්‍රධානය.
- මද්‍යසාර භාවිතය හේතුවෙන් මොළයට බලපෑමක් ඇති වී ෆිට් එක ඇතිවිය හැකිය. ඊට අමතරව මොළයේ කොටස් මිය යෑමට ද හැකියාවක් ඇත.
- සිරෝසීස් හෝ මද්‍යසාර හේතුවෙන් අක්මාව අක්‍රීය වීම නිසා හෙපටික්එන්කෙෆලොපති ලෙස හඳුන්වන රෝගී තත්ත්වය ද පැන නැඟිය හැකිය.
- පර්යන්ත ස්නායු පද්ධතියට බලපෑ විට අත් පාවල හිරියක් ඇතිවිය හැකිය.
- මද්‍යසාරවල ඇති එකම පෝෂ්‍ය පදාර්තය වන්නේ කැලරිය. එහි වෙනත් කිසිදු පෝෂ්‍ය පදාර්තයක් නැත. එබැවින් මද්‍යසාර ගන්නා පුද්ගලයකුට විටමින් ඌනතාවයක් පැන නැගී විවිධ රෝග ද ඇතිවිය හැකිය.
- විශේෂයෙන් තයමීන්, ෆෝලේට්, රයිබොෆ්ලේවින් වැනි විටමිනවල ඌනතාවක් මතු වී “බෙරි බෙරි” වැනි රෝගයක් වැළඳිය හැකිය.
- එමෙන්ම සිරුරේ යූරික් ඇසිඩ්වල වැඩිවීමෙන් “ගවුට්” ලෙස හැඳින්වෙන ආතරයිටීස් රෝගය ඇතිවිය හැකිය.
- මද්‍යසාර භාවිත කරන පුද්ගලයකුට ක්ෂණිකව සීනිවල අඩුවක් ඇතිවී ක්ලාන්තය ඇතිවිය හැකියි.
- මද්‍යසාර නිසා හෝර්මෝනවල වෙනස්කම් ද සිදු වේ. මෙයින් පුරුෂයින්ගේ වෘෂණ කෝෂවල වෙනස් වීමක් වී ලිංගික ක්‍රියාවලිය දුර්වල වීම සිදුවිය හැකිය. ස්ත්‍රීන්ගේ ඔසප් චක්‍රයේ වෙනස්කම් ඇතිවීමේ හැකියාව ද සහිතය.
- අස්ථිවලට බලපෑමෙන් අස්ථි සිහින් වීම හෙවත් ඔස්ටියෝපොරෝසීස් ඇතිවීමේ අවදානමක් ද වේ.
- එමෙන්ම මද්‍යසාර හේතුවෙන් බඩවැල්වල ගැටලු, අන්න‍ස්‍රෝතයේ ආසාදන, ගැස්ට්‍රයිටීස් තත්ත්ව, අගන්‍යාස ප්‍රදාහ ආදිය ඇතිවිය හැකිය.
- මෙවන් ගැටලු රැසකට අමතරව ගර්භනී කතුන්ගේ කලලවලටද විශාල ගැටලු ඇති වේ. කලලයේ වර්ධනයේ බාලවීම් හෝ කලලයේ විකෘතිතා ඇතිවිය හැකිය.
- එමෙන්ම මද්‍යසාර ඇබ්බැහිය හේතුවෙන් කෙනෙකු විවිධ වූ මානසික රෝග ලක්ෂණ ද පළ කළ හැකිය.
කොළඹ ජාතික රෝහලේ කායික රෝග පිලිබඳ විශේෂඥ වෛද්‍ය ප්‍රදීප් කුමාරසිංහ
සමුද්‍රිකා වර්ණකුල
උපුටා ගැනීම දිනමිණ
