ඉසිවර
බඩ පුරවා දමනවාට
මඟුල් කරද මුලේ පොතු, කලාඳුරු අල සහ ඉඟුරු කළං හතර බැගින් ගෙන කතා නොකරම වතුර පත අට එකට සිඳුවා උදේ කාලයේ සීනි සමඟද, සවස් කාලයේ ලුණු සමඟද පානය කරන්න.
කෑම ජීර්ණය වෙන්නේ නැද්ද?
හීං නාරං ගහේ බඳ සූරා එය මඳ පවනේ වියළා ඉඟුරු, සුදුලූණු, වියළි මිදි යන සියල්ල මීපැණියෙන් අඹරා ගම්මිරිස් ඇටයක ප්‍රමාණයේ ගුළි දෙකක් සූදුරු තැම්බූ වතුරෙන් රාත්‍රි නින්දට පෙර හෝ උදේ කෑමෙන් පසු පානය කරන්න.
අධික ලෙස දහඩිය පිටවෙනවාට
අරළු, වියළි මිදි, ආඩතෝඩා මුල් කළං හතර බැගින්ද, සෙනෙහෙ කොළ කළඳක්ද එක්කර වතුර පත අට එකට සිඳුවා උදේ සවස සීනි, උක් හකුරු හෝ මීපැණි සමඟ දින දෙකක් පානය කරන්න.
අධික සෙම නිසා ඇතිවන හිසේ කැක්කුමට
ආඩතෝඩා මුල්, වියළි ඉඟුරු, කොත්තමල්ලි ඇට, බටු මුල්, කටුවැල් බටු මුල්, දේවදාර කළං දෙක බැගින් ගෙන වතුර පත අට එකට සිඳුවා සීනි, මීපැණි දමා දවසට දෙවතාවක් පානය කරන්න.
හිස තදින් රිදුම් දෙන විට
කුඹල් ගෙයක් කඩා දෙහි ඇඹුලෙන් අනා දෙහි ඇඹුල් හෝ විනාකිරිවල පෙඟවූ රෙදි කඩක එය ආලේප කොට නළල මත පැලැස්තර තබන්න.
ඇසේ උල්කටු ඇනීමකදී
ඉලතැල් කොළ අඹරා ඇස තුළ ලා බඳිනු. උල්කටු ඇදේ. (ඇහැලේපොළ අධිකාරම්තුමාගේ අත්වෙද පොතෙනි)
ඇස යම් දෙයකින් තැළුණොත්
කුඹුරු ඇට ලොඳ ගෙන පොට්ටනි බැඳ තවනු. (ඇහැලේපොළ අධිකාරම්තුමාගේ අත්වෙද පොතෙනි)
සියලු අක්‍ෂි රෝග සඳහා
වැල්මී, තිපල්, වැල් කහඹිලියා, සිද්ධි ගුරු යන මේවා කළං දෙක බැගින් ගෙන පත අට එකට සිඳ පෙරා ගිතෙලින් බොනු. (ඇහැලේපොළ අධිකාරම්තුමාගේ අත්වෙද පොතෙනි)
විදුරුමස් දියවෙනවාට සහ අකලට දත් සෙලවෙනවාට
තිප්පිලි, ලේවා ලුණු, කයිප්පු මේවා බරට හතර බරක් තුරිසි ගෙන සියල්ල සිනිදුවට අඹරා කිහිප දිනක් දත්වල ගානු.
කට ගඳ ගසනවාට
තල, සාදික්කා, පුවක් යන තුන් වගය අඹරා උදේට නෙල්ලි ගෙඩියක තරම් ප්‍රමාණයක් අනුභව කර කළං හයක් ඇල්දිය පානය කරනු.
මුඛය සුවඳවත් වීමට
ගස්කරල් හැබ පැළෑටි දවාගත් අළු, අඹ කොළ යුෂයේ ලා අව්වෙන් කකාරා වියළා බුලත් සමඟ ගැනීමෙන් මුඛය සුවඳවත් වේ. (අනංග රංග කාමෞෂධ සංග්‍රහයෙන්)
ඡන්ත ධවල පද්මය
සක් බෙල්ලෙක් දවාගත් අළු, සුදු හඳුන් පිටි, නෙල්ලි කොළ, මධිල මල් මේ හැම එක පමණ ගෙන උදේ හවස දත් මදිනු. සියලු දත් රෝග නසා මුතු දෙපළක් සේ දත් ශ්වේත වර්ණව ලක්‍ෂණ වේ.
දන්ත ශර්කරා (බදාම)
කැප්පිටියා ළාකඩ මීපැණියෙන් අඹරා ගානු. දත් සවිවී දත් මුල් දියවීම නවතී.
දත් පණුවන් කනවාට තෙලක්
කලාඳුරු අල, වැල්මී, නික මුල්, රත් කිහිරිය, සැවැන්දරා මුල්, දේවදාර, වළඟ සාල්, කල්ක යොදා තලතෙල් සමඟ පදමට සිඳ කපු පුළුන් සමඟ දත් මුල තබනු. දත් පණුවන් කෑම වහා නවතී.
දත් සවි වීමට
ත්‍රීපාල, දේවදාර, එරඬු මුල්, කටු කරඬු මුල් මේ හැම කකාරා දෙව්රුවේ කට සෝදනු දත් සවිවේ.
උපුටා ගැනීම මව්බිම පුවත්පත
