රහස් පුරුද්දක් නිසා වැලෙඳන රෝගයක්
මෙම රෝග තත්ත්වය හඳුන්වන්නේ සෝම රෝගය කියන නමින්. බොහෝදෙනා එතරම් මේ රෝගය ගැන දැනුම්වත් නොවෙන්න පුළුවන්. නමුත් මේ රෝගය දැනටමත් වැලඳිලා ඉන් පීඩා විඳිනවා වෙන්නත් පුළුවන්.
සෝම රෝගය
මෙම රෝගයේ ප්‍රධානම විශේෂත්වය වන්නේ මෙය වැළඳෙන්නෙ කාන්තාවන්ට පමණක්ම වීමයි. මෙහිදීත් අනෙක් රෝගවල වගේම වා, පිත්, සෙම් නමැති ත්‍රිදෝෂ කෝපවීමක් තමයි සිදුවෙන්නේ.
වැළඳෙන ආකාරය
ජලය ශරීර වර්ධනයට අවශ්‍ය ප්‍රධාන සාධකයක්. ජලය කියන්නෙ ශරීරයේ තියෙන ධාතුවලින් එකක්. මේ අනුව ජලය ශරීරයෙන් අධිකව පිට වී ජලය හීන වීම තමයි එහෙම නැත්නම් ශරීරයට අත්‍යවශ්‍ය එක් ධාතුවක් හීන වීම තමයි සිදු වෙන්නේ.
ප්‍රධාන ලක්‍ෂණ
සෝම රෝගයත් ලිංගාශ්‍රිතව සෑදෙන රෝග තත්ත්වයක්. සුද යෑමට වඩා මෙය වෙනස්. මුත්‍රා මාර්ගය හරහා මුත්‍රා පිටවීමක් විදියට තමයි සෝම රෝගයේදී මෙම ජල ධාතුව පිටවෙන්නේ. කිසිම මහන්සියක් නැතිව, ගඳක් නැතිව නොදැනීම පිටවෙනවා.නමුත් රෝගය වැඩිම වුණාම මුත්‍රා බැහැර කිරීමේ අවශ්‍යතාව වළක්වාගෙන ඉන්න බැහැ. අධික මුත්‍රා පිටවෙමින් අත්‍යවශ්‍ය පෝෂක කොටස් සමඟ ජලීය පදාර්ථ පිට වෙනවා.
රෝග ලක්‍ෂණ
මූලිකවම ශරීර ශක්තිය හීන වෙනවා. ඒ වගේ ජලය අධිකව පිටවන නිසා තොල් වියළීම සිදුවෙනවා. නිතරම ඈනුම් යන්න ගන්නවා. කම්මැළිකමින් නිතරම ඉන්නවා දකින්න පුළුවන්. සිහි කල්පනාවේ මදිකමක්, එක්කෝ නිතර තේරුමක් නැති දේ දෙඩවීම හෝ නිශ්ශබ්දව සිටීමත් දකින්න පුළුවන්.මෙම රෝගයෙන් පෙළෙන අය ආහාරපානවලින් සෑහීමකට පත්වෙන්නෙ නැහැ. නිතරම කන්න හොයනවා. ජලය වගේ පාන වර්ග නිතරම ගන්න උත්සාහ කරනවා. පිපාසය අධික වන අතර නිතර පිපාසයෙන් පෙළෙනවා.
ප්‍රධාන හේතු
කාන්තාව කියන්නෙ අධික සහ ඕනෑවටත් වඩා සියුමැලි කෙනෙක්. නමුත් කාන්තාවගේ ජීවිතය තුළදී අභියෝග රැසක් තියෙනවා. මේ විදියට සියුමැලි වුණාම කාන්තාවට මේ අභියෝගවලට මූණ දෙන්න බැරි වෙනවා. එහෙම වුණාම ඇය ඉන් මානසික කම්පනයට පත් වෙනවා. මේ මානසික කම්පනය එක් හේතුවක් සෝම රෝගයට. දරුවකු බිහිකරන අම්මා කෙනෙක්ට ඒ මොහොතේ ඇතිවන අධික කම්පනය හා බිය දරුවා බිහිකිරීමෙන් පසුත් කාලයක් යනතුරු පවතිනවා. අන්න ඒ හේතුව නිසාම විවිධ මානසික රෝග පවා ඇතිවනවා. ඒ වගේම තමයි එවැනි මානසික ආතති අවස්ථාවක් නිසා විශේෂයෙන් දරු උපතකින් පසු මව මුහුණ දෙන මානසික ආතතිය නිසා සෝම රෝගය ඇති වෙනවා. ඒ වගේම විවාහක කාන්තාවක් පමණට වඩා අධික සංසර්ගයේ යෙදීම සෝම රෝගය ඇතිවීමට හේතු වෙනවා.ඒ වගේම තරුණ යුවතියන් ස්වයං වින්දනයේ යෙදීම නිසාද සෝම රෝගය ඇතිවෙනවා. ස්වයං වින්දනයේදී යොදා ගන්නා යම් යම් ද්‍රව්‍ය නිසා විසබීජ පවා ශරීරගත වීමක් සිදුවෙනවා. මේවාට අමතරව අධික ලෙස ශරීරය වෙහෙසට පත් කිරීම, ශරීරයේ ත්‍රිදෝෂ තත්ත්වය කුපිත වීම, යම් යම් ප්‍රශ්න පිළිබඳ අධික ලෙස කල්පනා කිරීම ආදී ගැටලු නිසා සෝම රෝගය ඇතිවෙනවා.
සුව කළ හැකිද?
සෝම රෝගය සුව කළ හැකි රෝගයක්. ඒ වගේම එය ගැන හොඳ සැලකිල්ලක් දක්වන එක අවශ්‍යයි. මන්ද රෝගය අධික වුණාම එය මුත්‍ර අතීසාරය දක්වා එන්න පුළුවන් නිසා.මුලින්ම ශරීරයේ වා, පිත්, සෙම් ත්‍රිදෝෂ සහ සෞම්‍ය ධාතු කුපිත කරවන හේතු සියල්ල සමනය කළ යුතුයි.ග්‍රාහී ඖෂධ ලෙස හඳුන්වන ශරීරය සිසිල් කරන ඖෂධ ලබාදීම කළ යුතුයි. මේ අනුව ද්‍රව්‍ය කැටිකරන ඖෂධ ලබාදීම කළ යුතුයි. එවිට අධික ලෙස ජල ධාතු පිටවන එක වළක්වන්න පුළුවන්. නමුත් එකවිටම රෝගයට ටික කාලයක් ප්‍රතිකාර කිරීම අවශ්‍යයි.
මේ රෝගය වැළඳෙන විශේෂ අය ඉන්නවද?
විශේෂයෙන්ම දරුවන් බිහිකළ අම්මලාට, අධික සංසර්ගයේ යෙදෙන ස්ත්‍රීන්ට සහ ස්වයං වින්දනයේ යෙදෙන අයට වැළඳෙනවා.අත් ඛෙහෙත්වලින් කවදාවත් මේ රෝගය සුව කරන්න බැහැ. රසායන ඖෂධ දීලා රස ධාතුව යථා තත්ත්වයට පත්කරන්න අවශ්‍යයි. ලිංගික අවයව නිරන්තරයෙන් පිරිසුදුව තියාගෙන ඉන්න ඕන. නැත්නම් අපිරිසුදුකම නිසාම මුත්‍ර අතීසාරයට පවා එන්න ඉඩ තිඛෙනවා. මන්ද සෝම රෝගය නිසා නිතරම මුත්‍රාශය අපිරිසුදු වෙනවා. ඒ නිසා ලිංගාශ්‍රිත පිරිසුදුකම ගැන සැලකිලිමත් වීම බොහෙවින්ම වැදගත්.ඒ වගේම අනෙකුත් ඉහත සඳහන් කළ කරුණු ගැන සැලකිලිමත් වුණාම සෝම රෝගය සුවකර ගත හැකියි.
හංසි ආටිගල
උපුටා ගැනීම මව්බිම පුවත් පත
