හිස්හොරි මර්දනයට නවීන තාක්ෂණික ප්‍රතිකාරයක්
උපතින්ම ඔබ දිගු වරලසක හිමිකාරියක වුවත් එය නිරෝගී සුන්දර වරලසක් කර ගැනීමට නම් නිසි සත්කාර සිදුකළ යුතුමය. ඒ සඳහා හිස කෙස්වල ඇති රෝග හඳුනා ගනිමින් නිසි ප්‍රතිකාරවලට යොමුවීම වැදගත්ය. හිස්හොරි ලෙස හඳුනාගන්නේද එලෙස හිස කෙස්වල රෝග ඇති කරන තත්ත්වයකි. මෙම හිස්හොරිවල ස්වභාවය අනුව වර්ගීකරණය කෙරේ. වියළි හිස්හොරි තෙල් සහිත හිස්හොරි යනුවෙනි. හිසේ හිස්හොරි ඇතිවීමට විවිධ හේතූ බලපෑම් කරනු ලබයි. ඒවා අතර,
- හිසේ සමේ තෙල් සහිත බව.
- නිසි රුධිර ගමනාගමනයක් නොවීම.
- වෙනත් අයගෙන් බෝවීම.
- හිසේ සමේ වියළි ස්වභාවය.
- අපිරිසුදුකම
ආදී කරුණු වේ. ඉපැරැණි ක්‍රමවේද අනුව දෙහි යුෂ, ගොඩපර, නෙල්ලි තම්බා ආලේප කිරීමද හිසට මනා සත්කාරයකි. එමෙන්ම දෙහි හා උළුහාල් තම්බා ආලේප කිරීමත් මෙවැනිම සත්කාරයකි. මෙම සත්කාරය හිස් හොරි මර්දනය සඳහා වූ සුදුසුම ස්වාභාවික ප්‍රතිකාරයකි. නමුත් අද නගරබදව ජීවත්වන බොහෝ දෙනා කාර්යබහුල දිවියක් ගත කරන නිසාම මෙවන් සත්කාරවලින් ක්‍රමයෙන් ඈත්වන බවක් පෙනී යයි. මෙනිසාම අද ඇතැම් ප්‍රමිතිගත ආයතන මඟින් මේ සඳහාම විවිධ නිෂ්පාදන හඳුන්වා දී ඇත. එමෙන්ම නවීන තාක්ෂණය සමඟ හිස්හොරි මර්දනය කිරීමට ඉතාමත් සියුම් කිරණ සහිත යන්ත්‍රද භාවිත කරයි. එමඟින් හිසේ සමේ සිදුරුවල හට ගන්නා දිලීර වර්ග විනාශ කර ඒවා ආරක්ෂා කර දෙයි. මෙය හිස්හොරි ප්‍රතිකාර ලෙස හඳුනා ගැනේ.
නොසලකා හැරියොත්
හිස්හොරි කරදරයට ඔබත් මුහුණදී ඇත්නම් ඒ පිළිබඳ වැඩි අවධානයක් යොමු කළ යුතුමය. මන්ද මෙම තත්ත්වය නොසලකා හැරියහොත් එය භයානක විය හැකි බැවිනි. එහිද නොයෙක් දිලීර හෝ බැක්ටීරියා රෝග ඉක්මනින්ම ඇතිවීමට හැකියාව පවතියි. මේ සඳහා හිස ඉතාම පිරිසුදුව තබා ගැනීමත් ඒ සඳහා සුදුසු ප්‍රතිකාර නොකඩවා සුව වනතෙක්ම සිදුකිරීමත් වැදගත්ය. තවද ඒ සඳහා අවශ්‍ය ෂැම්පු වර්ග භාවිත කිරීමත්, තමාටම තුවායක් වෙන්කර පිරිසුදුව තබා ගැනීමත් මෙන්ම පනා වර්ග පිරිසුදුව සෝදා භාවිත කිරීමටත් හුරුවන්න. අන් අයගේ පනා භාවිත නොකිරීමට මෙන්ම තම කොට්ට උරයද නිතරම පිරිසුදුව තබා ගැනීමත් වැදගත්.
ප්‍රතිකාරය සිදුකරන ආකාරය :
01. පළමුව හිස හොඳින් Shampoo කර සෝදා ගතයුතුය. ඉන් පසුව හිස් හොරි මර්දන දියරය හා ඊට අදාළ Conditioner වර්ගය එකට මිශ්‍ර කර සාදා ගන්න. දැන් එම මිශ්‍රණය හොඳින් කලවම් කර ගන්න.
02. එය බුරුසුවක් මඟින් හිස කෙස් කොටස් වශයෙන් වෙන්කර ගනිමින් ආලේප කර ගත යුතුය. මෙම ආලේපනය හිසේ සමට මෙන්ම හිස කෙස්වලටද හොඳින් තවරා ගත යුතුය. ඉන් පසුව හිස හොඳින් ඇඟිලි තුඩුවලින් සම්බාහනය කරන්න.
03. හිසට හොඳින් තැවරීමට පනාවකින් හිස පිරීමට හැකිය.
04. පීරා ගත් කොණ්ඩය එකතු කර Clip එකකින් රඳවා ගන්න.
05. දැන් High Frequency යන්ත්‍රයෙන් නිකුත් වන සියුම් කිරණ ආධාරයෙන් හිසේ සම සඳහාම නිපදවා ඇති පනාවකින් විනාඩි 15ක් පමණ වේලාවක් හොඳින් හිස පීරා ගන්න. (මෙම කිරණ නිසා දිලීර තත්ත්වය නැතිවී හිසේ සම ආරක්ෂා කර සමේ සිදුරු හොඳින් වසා දමයි.)
06. දැන් Shower Cap එකකින් හිස ආවරණය කර විනාඩි 7ත් 10ත් පමණ කාලයක් හිස වාෂ්පීකරණයට භාජනය කළ හැකිය. (මෙය කැමැති නම් පමණක් සිදුකළ හැකිය)
07. අනතුරුව හිස කෙස් හොඳින් ලිහිල් කරගන්න.
08. අවසානයේ හිසකෙස් සාමාන්‍ය ජලයෙන් සෝදා හරින්න. (ෂැම්පු කිසිවක් නොදමන්න)
ඉන්පසුව රූපලාවණ්‍ය ශිල්පියා හෝ ශිල්පිනිය විසින් සේවාදායකයාට ගැළපෙන ෂැම්පු වර්ගය තෝරාදිය යුතුය. නිවෙසේදී කළයුතු දේ පිළිබඳ සේවාදායකයා දැනුම්වත් කර නිසි ප්‍රතිකාරවලට පැමිණිය යුතු දින ගැන සඳහන් කිරීමටද රූපලාවණ්‍ය ශිල්පීන් වගබලා ගැනීම වැදගත්ය.
රන්මලී ගුණවර්ධන ප්‍රවීණ රූපලාවණ්‍ය ශිල්පිනී, ජීවන ශූරී සිංහ
ශාලිකා රංගනී සමරදිවාකර
උපුටා ගැනීම මව්බිම පුවත් පත
