හිතේ වේදනාවට මෝහනයේ පිහිට
මැදි වියේ පසු වූ යුවළක් අප වෙත පැමිණියේ ඔවුන්ගේ එකම දියණිය වූ තරුෂිගේ මානසික තත්ත්වයට යම් උපදේශනයක් ලබා ගැනීම පිණිසයි. මවුපියන් හා තරුෂි සමඟ කතාබහ කිරීමේදී මේ තොරතුරු හෙළි කර ගන්නා ලදී. මහනුවර ප්‍රදේශයේ පදිංචි තරමක් හොඳ ආර්ථික හා සමාජයීය පසුබිමකින් හෙබි මෙම පවුලේ එකම දරුවා තරුෂි වූ අතර ඇය ඉගෙනීමට ඉතා දක්ෂ දරුවෙක් ද වූවාය. පාසල් සමයේ සාමාන්‍ය පෙළ පන්තිවල ඉගෙනුම ලබමින් සිටියදී ඇය එම පාසල අසල පිහිටි පිරිමි ළමයින් ඉගෙනුම ලබන වෙනත් පාසලක ඉහළ පන්තියක සිටි ශිෂ්‍යයෙකු සමඟ ප්‍රේම සම්බන්ධයක් පවත්වාගෙන ගොස් ඇත. දෙදෙනා මුලදී රහසිගතව ආදරය කළ ද පසුව එය හෙළි වී ඇත. සාමාන්‍ය පෙළ විභාගය තරුෂි ඉතා ඉහළින් සමත් වූවාය. මේ අතර අධ්‍යාපනය නිම කළ එම තරුණයා කොළඹ ප්‍රදේශයේ පෞද්ගලික ආයතනයක රැකියාවකට ගොස් තිබිණි. දුරස් වීමත් සමඟ දෙදෙනාගේ ආදරයේ ද ප්‍රශ්න පැන නැ‍ඟෙන්නට ද විය. කොළඹ දී හමු වූ තවත් මිතුරියක නිසා තරුණයා ක්‍රම ක්‍රමයෙන් තරුෂිව මඟහරින්නට විය. මේ වන විට පාසලේ උසස් පෙළ විෂයන් හදාරමින් සිටි තරුෂිට මෙම තත්ත්වය මහත් වදයක් විය. ටිකෙන් ටික ඇගේ අධ්‍යාපන කටයුතු අඩාළ වන්නට විය. මවුපියන් හට ද ඇයගේ මෙම තත්ත්වය වටහා ගැනීමට හැකි වූ අතර තරුණයා හා තම දියණිය නැවත සුහද කිරීමට උත්සාහ කළහ. නමුත් ඒ උත්සාහයන් අසාර්ථක වූ අතර තරුෂි එන්න එන්නම මහත් කලකිරුණු තත්ත්වයකට පත් වූවාය. ඇය යහළු යෙහෙළියන්ගෙන් ද ඈත් වූවාය. නිවසේ කිසිම කෙනෙක් සමඟ කතාබහ කළේ නැත. කෑම බීම පවා අක්‍රමවත් විය. රාත්‍රියේදී නිදි වර්ජිතව හඬමින් කාලය ගත කළාය. අවසානයේදී උසස් පෙළ විභාගය පෙනි පෙනී ඇය පාසල් ගමන නතර කළාය. මවුපියෝ තම එකම දරුවා හට සිදු වන දේ පිළිබඳව කම්පාවට පත් වූහ. දියණියගේ හැසිරීම් රටාව ටිකෙන් ටික වෙනස් වීම පිළිබඳව මවුපියෝ මහත් කලකිරීමට පත් වූහ. කෙසේ හෝ දියණිය බේරා ගැනීම සඳහා මවුපියන් ඇය සමඟ එක් වී තරුණයාට වශී ගුරු කමක් කර හෝ ගෙන්වා ගැනීමට දිවයිනේ ප්‍රසිද්ධ ගුරුන් වෙත ගොස් කාලය හා මුදල් නාස්ති කරගෙන ඇත. කිසිඳු වශී ගුරුකමකින් තරුණයා නැවත පැමිණියේ නැත. ඉන් පසු ටික කාලයක් බලාපොරොත්තු සහිතව ඇස් දල්වාගෙන සිටි තරුෂි නැවතත් පෙර සිටි තත්ත්වයටම පත් වූවාය. ක්‍රම ක්‍රමයෙන් ඇය ගැඹුරු ලෙස මානසික පීඩනයකට ලක්වූවාය. දැන් ඇය නිවසෙන් එළියට එන්නේ ද නැත. දැන් ඇයට යහළු යෙහෙළියන් ද නැත. මවුපියන් සමඟ කතාබහ කරන්නේ ද ඉතා අඩුවෙනි. පිළිවෙළ පිරිසුදුකම හා ඇඳුම් පැලඳුම් පවිත්‍රතාව පිළිබඳ වැඩි අවදානයක් නැත. සියල්ලම එපා වී ජීවිතය ද එපා වී ඇති බව පවසයි.
ඇගේ මේ කතාව අසා සිටි අපට ද හැඟී ගියේ කිසිඳු සොයා බැලීමකින් තොරව කිසිඳු අවබෝධයකින් තොරව ප්‍රේම සබඳතා පටන් ගත් විට එය බිඳ වැටීමෙන් ඇති වන විරහ වේදනාව නිසා මානසික කඩා වැටීමකට කලකිරීමකට ආතතියකට පත්ව ඇති බවයි. තරුණ වියේදී ඇති වන එවැනි ප්‍රේම සම්බන්ධතා බිඳ වැටීමෙන් ඇති වන විරහ වේදනාව දරා ගත නොහැකිව එයට සාර්ථකව මුහුණ දීමේ ක්‍රමවේදයන් නොදැන ජීවිතය අවුල් කරගෙන ජීවිතයෙන් සමු ගන්නා තරුණ තරුණියෝ අප සමාජයේ බොහෝ සිටිති. සමස්තයක් වශයෙන් ගත් කල ශ්‍රී ලංකාවේ සිය දිවි නසා ගැනීමේ ප්‍රතිශතය ඉතා ඉහළය. තරුණ පිරිස් මෙයට පෙලඹෙනවා වැඩි බව පෙනී යයි. එසේ සිදු වන්නේ මෙවැනි විරහ වේදනාවන් වලට මුහුණ දීමට නොහැකි නිසාත් ඒ පිළිබඳව පුළුල් දැනුමක් නොමැති නිසාත් ජීවිතයේ යථාර්ථය පිළිබඳව නිසි අවබෝධයක් නොමැති නිසාත් නිසි මඟ පෙන්වීමක් නොමැති නිසාත් බව පෙනී යනු ඇත. තත්ත්වයට හෝ ඉන් ඔබ්බට ගොස් එක් එක් වයස් මට්ටම්වල දරුවන්ට ඇති වන මානසික හා කායික වෙනස්වීම් හඳුනා ගැනීමට එම කාලය තුළදී ඔවුන්ගේ සිතුම් පැතුම් හා හැසිරීම් රටා හඳුනා ගැනීමටත් දෙමාපියන් හා ගුරුවරුන් විසින් කළ යුතු වන්නේ ජීවිතයේ එක් එක් කාල පරාසයන්වලදී තම වගකීම් හා ප්‍රමුඛතාව දරුවාට නිසි පරිදි අවබෝධ කර දී ඔවුන්ව නිසි මගට යොමු කොට ඔවුන්ගේ කායික හා මානසික ශක්තිය ඇති කිරීමට වග බලා ගැනීමයි. එසේ නිසි දැනුමක් හා මඟ පෙන්වීමකින් තොරව ජීවිතයේ ආදරය අත්විඳින සමහර යෞවන යෞවනියන් තරුෂිගේ තත්ත්වයට හෝ ඉන් ඔබ්බට ගොස් උග්‍ර මානසික රෝගීන් වීම හා අවසානයේ ජීවිතයෙන් සමු ගන්නා තත්ත්වයට පත් වීමේ ඉඩකඩ ඇත. තරුෂි හා සම්බන්ධව මූලිකවම භෞතික චිකිත්සක ක්‍රම හා මනෝ විද්‍යාත්මක උපදේශන ක්‍රම උපයෝගී කරගනිමින් ඇයව ගැඹුරු සැහැල්ලුකරණයකට පත් කරමින් ඇය පත්ව තිබූ උග්‍ර මානසික තත්ත්වයෙන් මිදීමට උපකාර කරන ලදී. ඒ සමඟම මනෝ වෛද්‍යවරයෙකු හරහා තරුෂිගේ ශාරීරික වෙනස් වීම් සඳහා අවශ්‍ය ඖෂධ ප්‍රතිකාරවලට ද යොමු කරන ලදී. ඉන් පසු උපදේශන ක්‍රම හා මෝහන ප්‍රතිකාර මඟින් ඇයට ජීවිතයට මුහුණ දීම සඳහා අවශ්‍ය දැනීම හා ශක්තිය වඩවන ලදී. ඇය ක්‍රම ක්‍රමයෙන් තම මානසික හා කායික පීඩාවලින් මිදෙමින් සුවපත් වෙමින් සිටී. විරහ වේදනාව තමා හට පමණක් උරුම වූ දෙයක් නොවන බවත් එය තම ජීවිතය අවුල් කරගැනීමට හේතුවක් නොවන බවත් තරුෂි දැන් පවසයි. දැන් ඇය වෙනදාටත් වඩා ඉතා විශ්වාසයෙන් හා උනන්දුවෙන් තම ජීවිතයේ කඩඉම් පසු කරමින් සිටී. ඒ අනුව උසස් අධ්‍යාපනයට යොමු වී හොඳින් ඉගෙනීම් කටයුතු කරන තරුෂිව අපට දැකගත හැකිය.
මනෝ විද්‍යා උපදේශක මේජර් සුසන්ත ද සිල්වා (විශ්‍රාමික)
