පියවි ඇසින් ඔබ්බට ගැන මනෝ වෛද්‍යවරයෙක් කතා කරයි

දිගුකාලීනව ප්‍රතිකාර ගත්ත ද සුව නොවන කායික රෝගී තත්ත්වයන් වේදනාවන් ඔබට හෝ ඔබ ගේ පවුලේ යම් අයකුට පැවැතිය හැකි ය. ඒ අසාමාන්‍ය රෝගී තත්ත්වයන් හා චර්යාවන් අතර නින්ද නොයාම, ආහාර අරුචිය ශරීරයේ වේදනා, ශරීරය කෙට්ටුවීම, සිහිනයෙන් බියවීම වැනි තත්ත්වයන් විය හැකි ය. ඊට අමතරව තරහ යෑම, විවිධ ශබ්ද ඇසීම, විවිධ රූප පෙනීම ද තිබිය හැකි ය. මේ රෝග තත්ත්වයන්ට හේතු කාරණා විමසමින් ඔබ වසර ගණනාවක් විශේෂඥ වෛද්‍යවරයා ගෙන් වෛද්‍යවරයාට මාරුවෙමින් ගොස් දේශීය වෛද්‍ය ක්‍රමයේද පිහිට පතා අසරණව සිටිනවා වන්නට ඇත. එවන් ‍රෝග තත්ව හා එම රෝග තත්ත්වයන් හේතු කාරණා වන සිද්ධීන් පිළිබඳ මානසික සෞඛ්‍ය ආයතනයේ අධ්‍යක්ෂ වෛද්‍ය ජයාන් මෙන්ඩිස් මහතා සමඟ සාකච්ඡා කළෙමු.

දිගුකාලීන සුව නොවන රෝග තත්ත්වයන්ට හේතු කාරක වන්නේ මොනවාද?

දිගුකාලීනව පවත්නා රෝග තත්ව බොහෝමයකට හේතු වන්නේ මානසික තත්ත්වය වෙනස්වීම, නින්ද නොයෑම, ශරීරයේ වේදනා, විවිධ ශබ්ද ඇසීම සහ මානසික රෝගී තත්ත්වය වැනි විවිධ අවස්ථායි. එම රෝගීන් සෝදිසි කර බලා ඔවුන්ගේ රෝග තත්ත්වය අනුව ඖෂධ ලබාදෙමින් මේ රෝග මැඬ පවත්වා ගත හැකි වෙනවා. නින්ද නොයෑම විශාදයේ හෝ වෙනත් මානසික රෝගී තත්ත්වයක රෝග ලක්ෂණයක් වෙන්න පුළුවන් බෙහෙත් නැති රෝගයන් නොවේ. එහෙයින් ඉක්මනින් වෛද්‍යවරයකු හමුවී ප්‍රතිකාර ගැනීම වැදගත්. ඉහත දක්වන ලද ඕනෑම රෝග තත්ත්වයක දී පළමුව කායික වෛද්‍යවරයෙකු වෙත යොමු වුව ද රෝග නිධානය පිළිබඳ පර්යේෂණ කර ඖෂධ ලබා දීමෙන් පසුව ද රෝගය සුව නොවේ නම් දිගින් දිගටම කායික වෛද්‍යවරුන් මාරු කරමින් නොසිට මේ රෝගය පිළිබඳ මානසික වෛද්‍යවරයකු හමුවී සාකච්ඡා කළ යුතුයි. ඇතැම් විට සාකච්ඡා කිරීමෙන් පමණක් හෝ ඖෂධ ලබාදීමෙන් රෝගය නිට්ටාවටම සුව කරගත හැකිවේ. එහෙත් කනගාටුදායක තත්ත්වය වන්නේ මෙවන් සුව නොවන අසාමාන්‍ය රෝග තත්ත්වයන් මානසික රෝගයේ මූලික අවස්ථා හෝ ‍රෝග ලක්ෂණ ලෙස සැලැකීමට රෝගීන් ද අකමැති වීමයි. 

නිතර නිතර වෛද්‍යවරුන් හමුවීමට කැමැති රෝගීන් හා ඖෂධ වරක් ගත්විට රෝගය සමනය වූව ද යළි රෝගය උත්සන්න රෝගීන් ඉන්නවා.

ඔව්. එවන් රෝගීන් ඉන්නවා. ඔවුන්ට නිතරම වෛද්‍යවරයකු වෙත යාමට අවශ්‍යයි. නිතර නිතර කායික රෝග සඳහා බෙහෙත් ගැනීමට යාම අසාමාන්‍ය තත්ත්වයක්. එය කායික වෛද්‍යවරයකු ගෙන් නොයෙක් වර්ගයේ ඖෂධ ලබා ගනිමින් සුව කර ගැනීමට හැකියාවක් නැහැ. කළ යුත්තේ මානසික වෛද්‍යවරයකු හමුවී සාකච්ඡා කොට ඖෂධ ප්‍රතිකාර සඳහා යොමුවීමයි.‍

භූතයන් භූතාත්මයන් ශරීරයට ඇතුළුවීම හේතු කොටගෙන පුද්ගලයන් පරලවීම ආරූඪවීම වැනි තත්ත්වයන් ඔබ දකින්නේ කෙසේ ද?

මේව සමාජයේ දීර්ඝ කාලීනව පවතින ක්‍රමයන්. එය තවදුරටත් ඉදිරියට ගෙන යනවා. ආරූඪ මාර්ගයෙන් මානසික රෝග හදන්න බැහැ. එය මතක තබාගත යුතුයි. ආරූඪය මානසික රෝගී තත්ත්වයක් ලෙස ප්‍රදර්ශනය වන අවස්ථා තිබෙනවා. එසේ වන්නේ තමාට ඇති පීඩනයක් සාකච්ඡා කර විසඳා ගැනීමට නොහැකි වූ විටයි. ඔහුට හෝ ඇයට ඇති පීඩනය සාකච්ඡා කොට විසඳා‍ ගැනීම අවස්ථාවක් සකසා උපදේශකයෙක් හෝ ‍මනෝ වෛද්‍ය උපදේශනයක් කරා යොමු කිරීම කළ යුතුයි.

ටෙක්ලා පද්මිණී කාරියවසම් 

උපුටා ගැනීම සිළුමිණ පුවත්පත