විවාහ ජීවිතයට බලපෑම් කරන මනෝ ලිංගික රෝග
විවාහ දිවියට එළැඹෙන ඔබ නිතරම උත්සාහ කරන්නේ තමන්ගේ පවුල් ජීවිතය සාර්ථකව ගොඩනගා ගැනීමටයි. ජීවිතයේ කෙතරම් දුක්කම්කටොලු බාධක පැමිණියද ඒවා අභියෝගයක් ලෙස නොසලකා ජීවිතය ජයගැනීමට ඔබ කටයුතු කරනවා විය හැකිය. එහෙත් වර්තමානයේ විවාහ වන සංඛ්‍යාව ඉක්මවා දික්කසාද වීම් වර්ධනය වී තිබේ. මේ සඳහා හේතු සාධක විමසා බැලිය යුතුයි. මන්ද පවුල් ජීවිත අසාර්ථක වීමට බොහෝ දුරට බලපාන්නේ ඔබ මෙතෙක් හඳුනා නොගත් මානසික පීඩාකාරී තත්ත්වයක් විය හැකි බැවිනි.
විවාහ ජීවිතයක් ආරම්භ කළ පසු සමහර කාන්තාවන් සහ පුරුෂයන් අඩු වැඩි වශයෙන් විවිධ මානසික රෝගී තත්ත්වයන්ට ගොදුරු වී ඇති ආකාරය හඳුනාගත හැකිය. ඇතැම් මනෝ ලිංගික රෝගී තත්ත්වයන් නිසා බොහෝවිට විවාහ ජීවිත අවුල්වියවුල් වන අවස්ථා එමටය. එම නිසා සාර්ථක විවාහ ජීවිතයක් අපේක්‍ෂා කරන බිරියක් සැමියාගේත්, සැමියා බිරියගේත් මානසිකත්වය හොඳින් අවබෝධ කරගැනීම වටිනා කාරණයකි. එමෙන්ම දෙපාර්ශ්වයේම හැසිරීම් රටාවේ වෙනසක් පෙන්නුම් කරන්නේ නම් ඒ පිළිබඳවද මූලික අවධානයක් යොමු කළ යුතුය. ඔබ මේ මනෝ ලිංගික රෝගී ස්වභාවය නමින් හඳුනා නොගත්තත් පුද්ගලයන්ගේ විවිධ හැසිරීම් රටාවලින් මෙවැනි තත්ත්වයන් පෙන්නුම් කරන ආකාරය හඳුනාගෙන තිඛෙන්නට පුළුවන. පූජා ලාංඡන භක්තිය හෙවත් (estitishism) යනුවෙන් හැඳින්වෙන මනෝ මූලික ලිංගික රෝගී ස්වභාවය නිසා සාර්ථක විවාහ ජීවිතයක් ගතකිරීමට අවශ්‍ය ඉඩකඩ ඇහැරී යයි. මේ මනෝමූලික ලිංගික රෝගී ස්වභාවය නිදසුනක් මගින් පැහැදිලි කරගනිමු.
අමිලා සහ සුගත් විවාහ ජීවිතයට එළැඹුණේ විවාහ යෝජනාවකින්. දෙදෙනාම මහගෙදර ජීවත්වීමට තීරණය කළා. අමිලාත් සුගතුත් සාර්ථකව විවාහ ජීවිතයට මුහුණ දුන්නා. දෙදෙනාගේ ප්‍රශ්න දෙදෙනාම විසදාගත්තා. එහෙත් සුගත්ගේ හැසිරීම් රටාවෙන් අමිලා තරමක් කනස්සල්ලෙන් පසුවුණා. එයට හේතුව වූයේ මොවුන් දෙදෙනා ලිංගිකව එක්වීමකින් අනතුරුව සුගත් කාමරයෙන් පිටවී යෑම නිසාය. අමිලා, සුගත් මෙසේ යන්නේ නානකාමරයට යැයි සිතුවත් මෙය දිනපතා සිදුවීමෙන් ඇයට සැකයක් මතු වුණා. දිනක් සුගත් කාමරයෙන් පිටවී යන දෙස බලා අමිලා ඔහු පිටුපසින් ගියා. ඒ අවස්ථාවේ සුගත් ගියේ වෙනත් කාමරයකට. අමිලා තම සැමියාගේ අතේ යමක් තිඛෙන බව හොඳින්ම දැක්කා. සුගත් එය වහා සගවාගත්තා. අමිලා කිසිවක් නොදැක්කා සේ තමන්ගේ නිදන කාමරයට ගියා. දෙවැනි දවසේ අමිලා මෙලෙසම සුගත් පිටුපසින් ආවා. ඇය සුගත්ව දැකීමෙන් තිගැස්මකට පත්වුණා. එයට හේතුව වූයේ සුගත් අත තිබුණු කාන්තාවකගේ බඳ පටියකින් ලිංගික තෘප්තියක් ලබන බවයි. අමිලා සියල්ල දැනගත් බව සුගත් දැනගෙන සිටියේ නැහැ. මේ හේතුව නිසා අමිලා නිතර කනස්සල්ලෙන් පසුවුණා. ඇය එකවිට තීරණය කළේ සුගත් අනියම් සම්බන්ධතාවක පැටලී සිටින බවයි. එමෙන්ම තමන් සමග ලිංගික සම්බන්ධතා පැවැත්වීමෙන් පසු සැමියාට ඔහුගේ අනියම් බිරිය මතක් වී ඇයගේ බඳපටිය ස්පර්ශ කිරීමෙන් සතුටට පත්වනු ඇතැයි අමිලා තවදුරටත් සිතුවාය.
දින කිහිපයකට පසු අමිලා නොසිතූ පරිදි සුගත් පෙර කී බඳපටිය ඇයට තෑගි කළා. මෙහිදී අමිලා තරමක් කෝපයට පත්වුණා. එහෙත් සුගත්ට ඒ බව ඇගවූයේ නැහැ. සුගත්, අමිලාගෙන් ඉල්ලීමක් කළා. ලිංගික සබඳතා පවත්වන විට එය පලඳින ලෙසට. අමිලා අකැමැති වූ නිසා දෙදෙනා අතර ආරවුලක් ඇති වුණා. දින කිහිපයකින් මේ විවාහය දික්කසාදයකින් කෙළවර වන තැනට පත්වුණා. දිනක් අමිලා දික්කසාද වීමට තීරණය කර ඇති බව දැනගත් අමිලාගේ යෙහෙළියක් ඇයට කියා තිබුණේ දෙදෙනාට ප්‍රශ්න විසදාගත නොහැකි නම් මානසික උපදේශනයට යොමුවන ලෙසයි. මේ සිදුවීමට මූලික වශයෙන් පාදක වී තිඛෙන්නේ පූජා ලාංඡන භක්තිය යනුවෙන් හැඳින්වෙන මනෝ ලිංගිකමය රෝගී තත්ත්වයයි. මෙහි මූලික ලක්‍ෂණ කිහිපයක්ම හඳුනාගත හැකියි. ලිංගික සම්බන්ධතා පවත්වන විට ඒ සඳහා බඳපටිය, තොප්පිය, සපත්තු එපමණක් නොව දම්වැලක් පවා භාවිත කිරීමට පෙලඹීමයි. මෙහිදී තම සැමියාට හෝ බිරියට එවැනි ශරීර අංග නොවන දෙයක් භාවිත කරන ලෙසට බලකරයි. මේ මනෝලිංගික රෝගී තත්ත්ව ලක්‍ෂණ පෙන්නුම් කරන්නේ විවාහයෙන් පසුවය. එහෙත් පෙම්වතකු හෝ පෙම්වතියක සමග සමීප සම්බන්ධතා පවත්වන විට මෙහි මූලික ලක්‍ෂණයන් හඳුනාගැනීමට අපහසු නොවේ. විශේෂයෙන් එවැනි අවස්ථාවල ලිංගික සම්බන්ධතා පැවැත්වීමට අසාමාන්‍ය ක්‍රමෝපායන් භාවිත කරන්නේ නම් මේ රෝගයේ මූලික ලක්‍ෂණ හඳුනාගත හැකිය. මෙයාකාර මනෝ මූලික ලිංගික රෝගයන් ඇතිවීම කෙරෙහි බලපෑම් කරන කරුණු කිහිපයක් හඳුනාගත හැකිය. තරුණ වියේදී නිල් චිත්‍රපට හෝ අසභ්‍ය දර්ශනවල පෙන්නුම් කරන එයාකාර අසම්මත ලිංගික චර්යාවන් යටි හිතේ තැන්පත් වීම. එමෙන්ම තමන් ආදරය කරන තරුණියක් හෝ තරුණයකු විවාහ කර ගැනීමට නොහැකි වූ විට ඇය හෝ ඔහු නිතරම මතක්වීම නිසා ඇය හෝ ඔහු අඳින පලඳින හෝ භාවිත කරන දෙයකට (අත් බෑගය තොප්පිය වැනි) සමාන ද්‍රව්‍යයන් යොදා ගනිමින් තෘප්තිමත් වීමට උත්සාහ කරයි. මේ තත්ත්වයද යටිහිතේ තැන්පත් වූ ඒවාය. පෙර සඳහන් කළ නිදසුනට අනුව සුගත් එවැනි දෙයකට පෙලඹී තිබුණේ තරුණ අවධියේ ප්‍රථම වතාවට තමන් නැරැඹූ නිල් චිත්‍රපටයක තිබුණු දර්ශනයක් (පිරිමියෙක් තරුණ රූමත් කාන්තාවකගේ බඳපටියෙන් ලිංගිකමය තෘප්තියක් ලැබීම) යටිහිතේ තැන්පත් වීමෙනි. ඔබේ විවාහ ජීවිතයට මෙවැනි කාරණා බාධාවක් විය හැකිය. මෙවැනි හැසිරීම් රටාවන් පෙන්වන ඔබේ සැමියා හෝ බිරිය කිසිම විටෙක සැක කරන්න එපා. එමෙන්ම නිතර ආරවුල් ඇතිකර ගැනීමෙන්ද වළකින්න. විශේෂයෙන් මෙවැනි තත්ත්වයන් තමන්ගේ හිතවතුන් සමඟ පැවැසීමෙන්ද වළකින්න දෙදෙනා විසදාගැනීමට යෑමේදි ප්‍රශ්නකාරී තත්ත්වයක් ඇති වූයේ නම් මනෝ චිකිත්සකවරයකුට යොමුවීමට කටයුතු කරන්න.
