කෙතරම් කණ්ණාඩි මාරු කළත් අක්ෂි දෝෂ හඳුනා ගන්න බැරි වුණාද?

"සෝමදාසට මේ ළඟදී ඉඳලා එයාගේ යාළුවන්ව, පාට, නාමපුවරු ආදී කිසිවක් පැහැදිලිව දකින්න අපහසු වුණා. හැබැයි පුදුමෙට වගේ එයා මේ ළඟදී තමයි කණ්ණාඩි කුට්ටම අලුත් කළේ. මේ හින්දම ගමේ බොහෝ දෙනෙක් හිතුවේ සෝමදාසට ටිකක් පිස්සු හැදීගෙන එනවා කියලා." ඔබටත් මේ වැනි අත්දැකීම්වලට බොහෝවිට මුහුණ දීමට සිදු වී ඇති. නමුත් ඇස්වල තිඛෙන ආබාධවලට තිඛෙන එකම සහ අවසන් විසඳුම ඇස් කණ්ණාඩි ලෙස සිතා සිටින අපට මෙවැනි ගැටලුවකට මුල ඇස් කණ්ණාඩියේ විසඳුමෙන් ඔබ්බට ගිය තත්ත්වයක් බව පැවසුවොත් ඇතැම් විට ඔබට තරමක් පුදුම හිතෙයි. ඇත්තෙන්ම මේ වන විටත් ඔබත් ඇස් කණ්ණාඩියක් භාවිතා කරන අයෙක්ද? නමුත් පාරේ තොටේ ගමන් කරන විට වර්ණ, පුද්ගලයන්, අකුරු නිවැරදිව හඳුනා ගැනීමට නොහැකිද එසේ නම් එය අල්ප දෘෂ්ටිකතාව විය හැකියි.

අල්ප දෘෂ්ටිකතාව එදිනෙදා ජිවිතයේදී ඔබට පහසුවෙන් හඳුනාගත හැකි වේ. දැනටමත් ඇස් කණ්ණාඩි පළඳින ඔබ එදිනෙදා වැඩ කටයුතු කරන විට යම් යම් දෘෂ්ටිය සම්බන්ධ ගැටලුවලට මුහුණ දී ඇති. එය ඔබගේ කණ්ණාඩියේ වරදක් යැයි සිතා කිහිපවරක් එය මාරුකළා විය හැකියි. නමුත් අල්ප දෘෂ්ටිකත්වය ඔබගේ කණ්ණාඩි කුට්ටමෙන් ඔබ්බට ගිය රෝග තත්ත්තවයක් බව අවබෝධ කර ගත යුතුයි. අල්ප දෘෂ්ටිකත්වය යනු යම් අයෙකුගේ පෙනුම විධිමත් ක්‍රම වලින් එනම් කණ්ණාඩි පැළඳීම, ශල්‍යකර්ම මඟින් වැඩිකර ගැනීමට නොහැකි වීමය. ඒ නිසා මෙවැනි තත්ත්ව පිළිබඳ අල්ප අවබෝධය නිසා නැවත නැවතත් ශල්‍යකර්ම කිරීම හා උපැස් යුවළ මාරු කිරීම හා අනවශ්‍ය වෛද්‍ය උපදෙස් හා ප්‍රතිකාර කරා යොමු වීමක් ද සිදු වේ. එය ඔබගේ කාලය පමණක් නොව මුදල් ද ශ්‍රමය ද අනවශ්‍ය ලෙස වියදම් කරවීමකි. යම් අයෙකුට අල්ප දෘෂ්ටිකත්වය ඇති විට බස් පුවරු, මාර්ග සළකුණු වර්ණ තෝරා ගැනීම, කියවීම ආහාර පිසීම, මැසීම හා අසල පවතින විවිධ දේ හඳුනා ගැනීමට මෙන්ම අවම වශයෙන් යහළුවන් පවුල් සමීපතමයන් පවා හඳුනා ගැනීමට නොහැකි විය හැකියි. ඔබ මේ වනවිටත් කණ්ණාඩි එසේත් නැත්නම් උපැස් පළඳින අයෙක් නම් එදිනෙදා ජිවිතයේදී විවිධාකාර අපහසුතා රැසකට මුහුණ දීමට සිදු වී ඇති. නමුත් ඇස්වල අපහසුතා දුර්වලතා මඟහරවා ගැනීමට මේ වනවිටත් ඔබ පිළියම් යොදා තිඛෙන නිසා මේ පිළිබඳව කාහටවත් පවසන්නට නොහැකි ළතැවෙනවාත් ඇති. නමුත් අදම අක්ෂි වෛද්‍යරයෙකු වෙත ගොස් ඔබට මුහුණ දීමට සිදු වී ඇති අපහසුතාව පිළිබඳ පැවසීමට බියවන්න එපා. විශේෂයෙන් ඔබ පාරේ ගමන් කරන විට එහි උස පහත් තැන් හඳුනා ගැනීමටනොහැකිව වැටෙන්නට යන්නට ඇති. එසේත් නැත්නම් ඉතා හොඳින් හඳුනන තැනැත්තෙක් ඔබේ සමීපතමයෙක් හඳුනා ගැනීමට නොහැකිව ඔබ නොදුටුවා සේ සිටින්නට ඇති. ඔබගේ ඇදුම්වල වර්ණ ගැලපීමට නොහැකි වීමෙන් විවිධ අපහසුතාවලට මුහුණ දෙන්නටත් ඇති, ආලෝකය අඩු තැන්වල සාමාන්‍ය කටයුතු කරන්නට පවා ඔබට නොහැකි වූවා විය හැකියි. මේ සියලු ගැටලු අල්ප දෘෂ්ටිකතාවේ ප්‍රතිඵල බව ඔබ හොඳින් දැනගත යුතුයි. ඔබට ඇති වී තිඛෙන රෝග තත්ත්වය කල්තබා හඳුනා ගැනීමෙන් ඉදිරියේදී ඇතිවිය හැකි ගැටලු නිවැරදිව හඳුනා ගැනීමට වගබලා ගත යුතුයි. කෙසේ වෙතත් ඔබ මෙවැනි ගැටලුවකට පිළියම් ලබා ගැනීමට වෛද්‍ය සායනයකට ගියොත් ඊට පිළියම් ලෙස දෘෂ්ටිය සඳහා පුනුරුත්ථාපනයක් එහිදී ඔබට ලබා දේ. එමඟින් සිදුවන්නේ අදාළ තැනැත්තා සතු පෙනුමෙන් උපරිම ඵලයක් ලබා ගැනීමට අවශ්‍ය පුහුණුව මෙන්ම උපදෙස් ලබා දීමයි.

නුවන්ති කුලරත්න

උපුටා ගැනීම දිනමිණ පුවත් පත