පිළිකා ඛෙහෙතින් සෛල වැනසුවත් ගැටලුවක්
පිළිකා රෝගීන්ට ලබා දෙන ඖෂධ මගින් පිළිකා සෛල විනාශ කළද එසේ විනාශ වන සෛල මගින් නිකුත් කරන රසායනික ද්‍රව්‍ය හේතුවෙන් එම ඖෂධ තවදුරටත් එම රෝගියාගේ පිළිකා සෛල විනාශ කිරීමට සමත් නොවනබව කරන ලද පර්යේෂණ වලින් තහවුරු වී ඇතැයි මහරගම පිළිකා රෝහ‍ලේ පිළිකා රෝග පිළිබඳ විශේෂඥ වෛද්‍ය යසන්ත ආරියරත්න මහතා සඳහන් කරයි. මේ හේතුවෙන් පැතිරී ගිය පිළිකාවකට ඖෂධ ප්‍රතිකාර කිරීමේදී විටින් විට ලබා දෙන ඖෂධ වෙනසකට ලක් කළ යුතු බවද හෙතෙම පෙන්වා දේ. ශරීරයේ එකම ස්ථානයක පිළිකාව වැලදුණ පුද්ගලයින් කීප දෙනෙකුට විවිධ ඖෂධ ලබා දෙන්නේ මෙම තත්ත්වය මත බව ද වෛද්‍යවරයා පවසයි. කෙසේ නමුත් පිළිකාව මුල් අවස්ථාවේදී හදුනා ගැනීමට හැකි වුවහොත් එය සුව කළ හැකි බවද විශේෂඥවරයා සඳහන් කළේය. විවිධ පිළිකාරෝග සඳහා මේ වන විට විශේෂිත නව ඖෂධ රෝගීන්ට ලබා දෙන අතර ඒවා අධික මිල ගණන් වලින් යුත්ත වනු ඇත. කෙසේ නමුත් වෛද්‍යවරයා රෝගියාව පරික්ෂා කිරීමෙන් අනතුරුව ඔහුට ලබා දිය යුතු හොඳම ඖෂධය මිල අධික වුවත් එය ලබා දීමෙන් රෝගියාට යම් සුවයක් ලබා ගත හැකි බවද වෛද්‍ය ආරියරත්න මහතා පෙන්වා දේ.
ශ්‍රියානි විජේසිංහ
උපුටා ගැනිම ලක්බිම පුවත්පත
