නිවස තුළින් භූතයකු පෙනී බෑණත් දියණියත් දබර වෙනවා

මීට වසර දෙකකට පමණ ඉහත සිට මගේ දියණිය සහ බෑණනුවන් අතර විවිධ ගැටුම් ඇති විය. එහෙත් ඒවාට පැහැදිලි හේතුවක් ද නොවීය. ඒ අනුව අපි පළමුව ඒ සම්බන්ධයෙන් අපේ දියණියගෙන් ඇසීමු. එවිට ඇය කීයේ තම සැමියා හිටි හැටියේ යක්ෂයකු මෙන් හැසිරෙන බවත් ඊට පැහැදිලි හේතුවක් තමන් නොදන්නා බවත්ය. පසුව අපි මේ සම්බන්ධයෙන් ඔහුගෙන් ද කරුණු විමසා සිටියෙමු. එවිට ඔහු කීයේ පුදුම කතාවකි. එනම් හිටිහැටියේ තමන්ට නිවස තුළින් භූතයකු දර්ශනය වන බවය. ඉන්පසුව පාලනය කර ගත නොහැකි කෝපයක් තමන් තුළ හට ගන්නා බවත් එම අවස්ථාවේ තමන් කරන කියන කිසිවක් තමන්ට නොවැටහෙන බවත් ඔහු කියයි. මුලදී බෑණාගේ මේ ප්‍රචණ්ඩ ක්‍රියා නිහඬව ඉවසා සිටි දියණිය මෑතක සිට ඔහු කෝප වන සෑම අවස්ථාවකම එක්වරම කෝප ගැන්වී ඔහු හා බරපතළ ගැටුම් ඇති කර ගැනීමට පටන් ගෙන ඇත. මේ ගැටුම් නිසා ඔවුන් ගෙන් එක් අයකුට හෝ දෙදෙනාටම තුවාල සිදුවන අවස්ථා ද තිබේ. ඉන් පසුව මේ පිළිබඳව දියණිය ගෙන් කළ විමසීමේ දී ඇය කියා සිටියේ ඔහුට නිවස තුළ දී දර්ශනය වූ භූතයා තමන්ට ද දර්ශනය වන බැවින් ඔහු මෙන් තමන් ද අසීමාන්තිකව කෝප ගැන්වෙන බවකි. මේ තත්ත්වය දුරලීම සඳහා අප නොකළ ගුරුකමක් ශාන්ති කර්මයක් නැත. නමුත් ඒ අඬ දබරකාරී තත්ත්වයේ කිසිදු වෙනසක් ද සිදුවී නොමැත. මේ තත්ත්වය පිටුදැකිය හැකිද? පිළිතුර විවිධ හේතු මත අඹුසැමියන් අතර ගැටුම් අඬදබර ඇතිවේ. එකිනෙකා කෙරෙහි අවබෝධය අඩුවීම, පාලනය කර ගත නොහැකි අධික කෝපය මෙයට බලපාන ප්‍රධාන හේතු අතරින් දෙකකි. නිවස තුළින් භූතයකු ගේ රුවක් පෙනීම විවිධ හේතු මත සිදුවිය හැකිය. සයිකෝසීය ගණයේ මානසික රෝගයක් වන භින්නොන්මාදය (Schizophrenia) ඇති විට කලාතුරකින් මෙබඳු රෝග ලක්ෂණ හටගත හැකිය. ග්‍රස්ති (O.C.D.) නම් මානසික රෝගයේ ලක්ෂණයක් ලෙස ද මෙවැනි දෘශ්‍යමය භ්‍රාන්ති පෙනීමට පුළුවන.

ග්‍රස්ති රෝගයට බහුලවම පදනම් වන්නේ නිතර නිතර අත් සේදීම, දොර ජනෙල් වසා තිබියදීත් එය නැවත නැවත පරීක්ෂා කිරීම වැනි දෑ වුවත් මෙවැනි විවිධ රූප නැවත නැවත මැවී පෙනීම ද එහි ලක්ෂණයක් ලෙස ඇති විය හැකිය. මෙහිදී බහුලවම මැවී පෙනෙන්නේ වාමන රූප, යක්ෂ රූප ආදියයි. එවැනි රූප සත්‍ය ඒවා නොවන බව එම පුද්ගලයා තුළ විශ්වාසයක් තිබුණත් තමාගේ පාලනයකින් තොරවම නැවත නැවත කරදරකාරී ලෙස එම රූප මැවී පෙනීම මේ රෝගයේදී සිදු වෙයි. එය යටපත් කිරීම උත්සාහ කළත් බොහෝ විට සිදු වන්නේ නැවත නැවත මැවී පෙනීමය. මෙම උත්සාහය රෝගියාට ඉතාම කරදරකාරී වන අතර ඒ නිසාම රෝගියා බොහෝ සෙයින් කෝපයට ද පත්වනු ඇත. මෙම දැඩි පීඩනය කෝපය ලෙසින් පිටවන්නේ තමන්ට ඉතාම සමීප පුද්ගලයා වෙතිනි. ඒ අනුව සැමියා, බිරිඳ වෙතින් නිතරම තම කෝපය පහ කරනු ඇත. මේ නිසා ගැටුම්කාරී තත්ත්වයක් ඇති වීම වැළැක්විය නොහැකිය. ඔබේ බෑණාට තිබෙන මෙම භූතයකු පෙනීමේ තත්ත්වය මෙකී හේතු දෙකෙන් එකක් වීමට බොහෝ සෙයින්ම ඉඩ තිබේ. ඊට අමතරව මොළයේ රූප පෙනීමට අදාළ කොටස්වල ඇතිවන රසායනික සංකූලතාවයන්ද මේ සඳහා බලපෑමට පුළුවන. මේ තත්ත්වය දෙවනුව බිරිඳට ඇති වී තිබේ. එය සැමියාගේ රෝග ලක්ෂණ නිසා හට ගත් මානසික ඇනවුමක් (Suggestion) මත ඇති වූ ව්‍යාජ දෘෂ්ටිමය භ්‍රාන්තියක් වීමට පුළුවන. නැතහොත් බිරිඳට සැමියාගේ ක්‍රියාකලාපය දැඩි පීඩාකාරී තත්ත්වයක් වන නිසා එයට ප්‍රතිරෝධයක් ලෙස මනසේ ඇති වූ මනඃකල්පිත රූපයක් වන්නටත් පුළුවන. නොඑසේ නම් බිරිඳ හිතාමතාම ගොතා කී කතාවක් වන්නට ද බැරිකමක් නැත. මින් ඔබේ දියණියට සහ බෑණාට තිබෙන ආබාධය කුමක්ද යන්න නිශ්චිතව හඳුනා ගත හැක්කේ මනෝ වෛද්‍ය විශේෂඥවරයකු විසින් සිදුකරනු ලබන රෝග පරීක්ෂාවක් මගිනි. ඒ අනුව මෙය ග්‍රස්තිමය රෝගී තත්ත්වයක් නම් ඖෂධ හා චිකිත්සක ප්‍රතිකාර මගින් සුව කළ හැකිය. වෙනත් මානසික රෝගයක් නම් ඒවාට ද ඖෂධ ප්‍රතිකාර ඇත. එසේම පවු‍ලේ යටගිය සාමය නැවත ඇති කිරීම සඳහා පවුල් චිකිත්සාව ද දෙදෙනාටම ලබා දීමෙන් යහපත් පවුල් සම්බන්ධතාවයක් ඇති කිරීමට අවශ්‍ය පසුබිම සැකසිය යුතු වේ.

ගාල්ල කරාපිටිය ශික්ෂණ රෝහ‍ලේ විශේෂඥ මනෝ වෛද්‍ය රුමි රූබන්

උපුටා ගැනීම ලක්බිම පුවත්පත