පැණි බීම පානයට ඇබ්බැහි වුණොත් ලෙඩ ගොඩක්

අපි අපේ ශරීරයට එකතු කරගන්නා ඕනෑම ආහාර වේලක පෝෂ්‍යදායී ගුණය කෙරෙහි වැඩි අවධානයක් යොමු කළ යුතුයි. ඇතැම් විට ඔඛෙ නොදැනුම්වත්කම නිසා ආහාරයට එක්කර ගන්නා විවිධ ආහාර පාන නිසා සෞඛ්‍යයට අහිතකර තත්ත්ව ඇතිවිය හැකියි. පැණි බීම (Soft drink) යනු එවැනි පානයකි. ඔබ සාමාන්‍යයෙන් දිනපතා පැණි බීම පානය කරනවා විය හැකියි. වර්තමානයේ තරුණ, වැඩිහිටියන් මෙන්ම ළමයින්ද බහුල වශයෙන් පැණි බීම පානය කිරීමට යොමු වී තිබේ. බොහෝ විට දරුවන් පැණි බීම ඉල්ලා සිටින නිසා මවුපියන්ද කිසිදු පැකිළීමකින් තොරව දරුවන්ගේ ඉල්ලීම ඉටුකරයි.

පැණි බීම සම්බන්ධයෙන් කතා කරන විට වැදගත් කරුණක් වන්නේ එය සකස් කරන ආකාරයයි. පොදුවේ පැණි බීම නිපදවන්නේ ජලය සහ සීනි මිශ්‍ර කොට එයට කලරින් (වර්ණකාරක) එකතු කිරීමෙනි. අනතුරුව පැණි බීම වර්ගය රස ගැන්වීමට ‍දොඩම් රස, අඹ රස ආදී රසැති සංයෝග එකතු කරයි. කෝලා වර්ගයේ පැණි බීම සඳහා කැෆෙන් සංයෝගය එකතු කරයි. කැෆෙන් යනු උත්තේජන කාරකයකි.

සීනි හැඳි 20ක්

මේ අනුව පැහැදිලි වන්නේ පැණි බීමවල සැලකිය යුතු සීනි ප්‍රමාණයක් අඩංගු වන බවයි. සාමාන්‍යයෙන් පැණි බීම බෝතලයක එනම් 500ml ක සීනි තේ හැඳි 20ක් තිබේ. සීනි තේ හැඳි 20ක් යනු ඉතා විශාල ප්‍රමාණයකි. සීනි (ග්ලූකෝස්) යනු අපගේ ශරීරයට පිටින් ලබාගත යුතු දෙයක් නොවේ. අපේ එදිනෙදා ආහාර වේලෙන් ශරීරයට අවශ්‍ය සීනි ප්‍රමාණය ලැඛෙයි. පැණි බීමවල සීනි හා වතුර හැර විටමින් වර්ග, ඛනිජ ලවණ හෝ ප්‍රෝටීන් හෝ කිසිදු පෝෂ්‍යපදාර්ථයක් අඩංගු නැත. පැණි බීම හඳුන්වන්නේ හිස් කැලරි ගොඩක් ලෙසය.

මහත් වෙනවා

ලෝකයේ විවිධ රටවල පැණි බීම සම්බන්ධයේ සිදුකර තිඛෙන පර්යේෂණවලින් තහවුරු කර ඇති ආකාරයට පැණි බීම අපගේ ශරීරයට අහිතකරයි. විශේෂයෙන් මෙහි සීනි ප්‍රමාණය අධික නිසා ස්ථුලතාව මෙන්ම අනවශ්‍ය ලෙස බර වැඩිවීම සිදුවෙයි. දිනපතා 250ml ප්‍රමාණයක් පැණි බීම පානය කරන්නේ නම් එම ශක්තිය දහනය නොකළ හොත් වසරක් ඇතුළත 7kg කින් බර වැඩිවන බවට පර්යේෂණවලින් තහවුරු කොට තිබේ. එමෙන්ම සීනි සාන්ද්‍රණය අධික වීම නිසා දියවැඩියා රෝගය වැලඳීමේ ප්‍රවණතාව ඉහළ අගයක් ගනී. ශරීරයේ බර වැඩිවීමත් දියවැඩියා රෝගයත් නිසා හෘදරෝග ඇතිවීමේ අවදානම ද වැඩියි.

දත් රෝග

පැණි බීමවල ඇසිඩ් තත්ත්වයක්ද හඳුනාගත හැකිය. එහි පෙණ නගිමින් බුබුළු දමන්නේ කාබන්ඩයොක්සයිඩ් වායුව අඩංගු නිසාය. සාමාන්‍යයෙන් පැණි බීම පානය කරන්නේ බීම බටයෙනි. ඇතැම් විට මුඛයේ වැඩි කාලයක් පැණි බීම රැඳීම නිසා පැණි බීමවල අඩංගු සීනි සාන්ද්‍රණය දත්වල වැඩි වේලාවක් රදා පවතී. එහිදී දත්වල බැක්ටීරියා වර්ධනය වීම වැඩි වශයෙන් සිදුවේ. බැක්ටීරියා නිසා ඇසිඩ් වර්ධනය සිදුවේ. එමෙන්ම දත්වල අඩංගු වන කැල්සියම් පැණි බීමවල තිඛෙන ඇසිඩ් ස්වභාවය සමග එක්වීමෙන්ද දත්වලට හානි කරයි. මේ නිසා දත් දියවීමක් හා දත් දිරා යෑමක්ද සිදුවෙයි.

අස්ථි ආබාධ

අධික ලෙස පැණි බීම පානයට යොමු වීම අපේ ශරීරයේ අස්ථිවලටද අහිතකර ලෙස බලපෑම් ඇතිකරයි. සාමාන්‍යයෙන් පැණි බීමවලට හුරු වී සිටින පිරිස කිරි සහ වෙනත් පෝෂ්‍යදායී ආහාර වර්ග පානය කරන්නේ ඉතා අඩුවෙනි. මෙහිදී කිරිවලින් ලැඛෙන කැල්සියම් ප්‍රමාණය අඩු වී අස්ථි සම්බන්ධ ගැටලුකාරී තත්ත්වයන් ඇතිවීමටද අවකාශ තිබේ.

පොස්පරස්

පැණි බීමවල පොස්පරස් සංයෝගය අඩංගුය. අපේ ශරීරයට පොස්පරස් හා කැල්සියම් ලබාගත යුත්තේ සමාන අනුපාතයකටය. වැඩි වශයෙන් පැණි බීම පානය කරන පුද්ගලයකුගේ මේ සමතුලිතතාව බිෙඳයි. එහිදී පොස්පරස් වැඩි ප්‍රමාණයක් ශරීරයට එකතු වෙයි. පොස්පරස් ඇසිඩ් තත්ත්වයක් සේ පවතින නිසා ශරීරයට ආම්ලික තත්ත්වයක් ඇතිකරයි. එමෙන්ම කැල්සියම් අවශෝෂණයේ ගැටලු මතුවිය හැකියි.

පැණි බීමවල බුබුළු සහිත පෙණ නැගීම නිසා දිවේ යම්කිසි සංවේදීතාවක් ඇතිකරයි. යම්තාක් දුරට ආහාර රුචිය වර්ධනය කිරීමකි. එම නිසා වැඩිපුර ආහාර ගන්නා ප්‍රමාණය අවශ්‍ය වෙයි. එහි අවසාන ප්‍රතිඵලය වන්නේ අධික තරබාරුකම ඇති වීමයි. වර්තමානයේ වෙළෙඳ ප්‍රචාරණ මගින් ඉස්මතු කරන ආකාරයට ෆ්‍රයිඩ්රයිස්, කොත්තු, පීසා සමග පැණි බීම පානය කිරීමට පුරුද්දක් ඇතිකර තිබේ. මෙය අපේ ශරීරයට අහිතකරය. මන්ද පැණි බීම පානය කරන්නේ අධික මේදය සහිත ආහාර සමග නිසා ඉන් අපගේ ශරීරයට ලැඛෙන පෝෂ්‍යදායී බවක් නැත. තව තවත් අනවශ්‍ය ප්‍රමාණයට ශක්තියක් වැඩිවීමක් සිදුවෙයි. මේදය ශරීරයේ තැන්පත්වීම ද සිදුවෙයි.

පලතුරු බීම බෝතල් කළ පලතුරු බීම කෙරෙහි අවධානය යොමු කිරීමේදී පෙර පරිදිම ජලය, සීනි, වර්ණකාරකවලට පලතුරු සුළු ප්‍රමාණයක් එකතු කරයි. මෙහිදී අධික සීනි ප්‍රමාණයක් අඩංගුය. අනික් අතින් පැණි බීම සහ මෙවැනි වර්ගයේ පලතුරු බීමවල අහිතකර තත්ත්වයක් ඇතිවිය හැකිය.

කෝඩියල්

කෝඩියල් බීමවලටත් ඔබේ අවධානය වැඩි වශයෙන් යොමු වී තිබේ. ඒවා අධික සීනි සහිතය. නියම පලතුරුවල පෝෂණය ලබා ගැනීමට නොහැකි වෙයි. කෝඩියල් මගින් පාරිභෝගිකයන් බලාපොරොත්තු වන්නේ වැඩි වීදුරු ප්‍රමාණයක් සකස් කර ගැනීමයි. එහෙත් කෝඩියල්වල සැලකිය යුතු සීනි ප්‍රමාණයක් අඩංගු වේ. ඔබ නැවත එය සකස් කිරීමේදීද සීනි එක්කරයි. මෙය අපේ ශරීරයට අහිතකරය. කෝඩියල් පානයද බහුලව පානය කිරීමේදී පෙර සඳහන් ගැටලුවලට ඔබට මුහුණ දීමට සිදුවේ.

නැවුම් පලතුරු බීම

වර්තමානයේ බොහෝ විට ස්වාභාවික පලතුරු මගින් පලතුරු යුෂ සකස් කර පානය කරයි. මෙහිදී ද පැනනගින ගැටලුකාරී තත්ත්ව පවතී. • පලතුරු කෑම සහ පලතුරු යුෂ පානය කිරීමෙ වෙනසක් ඇත. පලතුරු කෑමෙහි ඇති වාසිය වන්නේ එහි පෝෂ්‍යදායී ගුණය 100%ක්ම ලැබීමයි. පලතුරු තන්තුවලින් රෝග වළක්වා ගත හැකිය. පලතුරු කෑමෙන් ආහාර පාලනය කරගත හැකිය. • යුෂ ලෙස සකස් කිරීමේදී සීනි හා ලුණු එක් කිරීමේ සෞඛ්‍යට අහිතකර තත්ත්වයක් ඇති කරයි. එමෙන්ම ආහාර ගැනීමේදී තෘප්තිමත් භාවයක් ළගා කරගත නොහැකිය. • පලතුරු ආහාරයට ගැනීමෙන් එහි අඩංගු සීනි පාලනයකින් යුතුව ශරීරයට අවශෝෂණය කරගන්නා අතර පලතුරු යුෂවල අඩංගු සීනි වඩාත් ඉක්මනින් ශරීරයට අවශෝෂණය කර ගනී. • ඔබ පලතුරු යුෂ පානය කරන්නේ නම් සීනි නොදමා පානය කරන්න. • පලතුරු ආහාරයට ගැනීමෙන් එහි අඩංගු විටමින් සී ප්‍රතිඔක්සිකාරකයක් ලෙස ක්‍රියා කරයි. එය දත්වල හා සමේ නිරෝගී භාවය ඇති කරන අතරම පිළිකා වළක්වා ගැනීමටද උදවු වෙයි.

වර්තමානයේ සුපිරි වෙළෙඳසල්වල පලතුරු මිලදී ගැනීමට තිබේ. එහි ලේබලයේ "සීනි එකතු කර ඇත" හෝ "සීනි එකතු කර නැත" යනුවෙන් සඳහන් කර ඇත. මෙහි සීනි එකතු නොකළ පලතුරුවලට යොමු වනවා නම් හිතකරය.

ශක්තිජනක පාන

ශක්ති ජනක පානයක්ද (Energy drink) මේ අතර තිබේ. මේවා ශක්තිය ලබාදෙන පානයන්ය. මේවා සුදුසු වන්නේ ක්‍රීඩකයන්ටය. කය නොවෙහෙසවා වැඩ කරන්නන්ට මේවා සුදුසු නැත. වෙළෙඳ පොළේ diet (ඩයට්) නමින් හඳුන්වන පැණි බීම වර්ගවල කෘත්‍රිම රසකාරක එක්කර තිබේ. සීනි ප්‍රමාණය අඩු වුවත් දිගුකාලීනව මේවාට යොමුවීමෙන් ස්ථුලතාව ඇතිකරයි. එයට හේතුව වන්නේ මේවා ආහාර රුචිය වැඩි කරන බැවිනි.

මෙවැනි අපේ ශරීරයට අහිතකර පානයන් වෙනුවට සෞඛ්‍ය සම්පන්න ජීවිතයක් ගොඩනගා ගැනීමට යොදාගත හැකි වෙනත් පානයන්ද පවතී. • හොඳම විකල්පය වන්නේ ජලයයි. • ජලය වැඩිපුර පානය කිරීමට නම් දෙහි යුෂ කිහිපයක් දමා පානය කරන්න. • තේ හා කෝපි හොඳ පානයකි. එහෙත් සීනි එක්කර ගැනීමෙන් වළකින්න. • විවිධ වර්ගයේ කැඳ වර්ග හා දේශීය පාන පානයට යොමුවන්නේ නම් විවිධ පෝෂණ ගුණ ලැබේ. මේ නිසා හැකිතරම් ඔබේ පෝෂ්‍ය ගුණය ගැන උනන්දු වන්න. කලාතුරකින් පැණි බීම පානය කිරීමේ වරදක් නැත. එහෙත් අනවශ්‍ය ලෙස ඊට ඇබ්බැහි වීමෙන් වළකින්න. වර්තමානයේ මෙගා බෝතල් ප්‍රමාණයට පැණි බීම අසුරා ඇති හෙයින් පැණි බීම පානය කිරීමේ වැඩි ප්‍රවණතාවක් හඳුනාගත හැකිය. මෙවැනි විශාල අසුරනවල තිඛෙන පැණි බීම වැඩිපුර පානය කිරීමට පෙලඹෙයි. එළඹෙන අවුරුදු සමයේ ඔබ තෝරාගන්නේ පැණි බීමද එසේත් නැතිනම් පෝෂ්‍යදායී දේශීය පානයක්ද යන්න ඔබම තීරණය කරන්න.

උපුටා ගැනීම මව්බිම පුවත් පතඇසුරෙනි