පරිගණක තිරය මතට පිටත ආලෝකය සෘජුව වැටීම සුදුසු නැහැ.
පරිගණකයක තිරය පමණක් නොව ඊට වඩා සැලකිලිමත් විය යුතු බොහෝ දේ පවතිනවා. ඒවා අතර විමර්ශන ද්‍රව්‍ය නිසිලෙස පිහිටුවා ගැනීම ද ඉතා වැදගත්. මෙහිදී විමර්ශන ද්‍රව්‍ය ලෙසින් හැඳින්වෙන්නේ පොත් පත්, කඩදාසි ආදියයි. මෙම විමර්ශන ද්‍රව්‍ය පරිගණකයට දත්ත ඇතුළත් කිරීමේදි ඉතා වැදගත් වේ. සාමාන්‍යයෙන් එවැනි කඩදාසි පොත් පත් ආදිය තබා ගැනීමට නිශ්චිත ස්ථානයක් නොමැති වුවද ඒවා තබා ගැනීමේ වඩාත් නිවැරදි පියවරක් ද පවතිනවා. ඒ අනුව එම ද්‍රව්‍යය ස්ථාන ගත කළ යුත්තේ යතුරු පුවරුවට එසේත් නැත්නම් Key Board එකට ඉහළිනි. ඒ වගේම මොනිටරය පිහිටන ස්ථානය අනුව ද මෙම විමර්ශන ද්‍රව්‍ය ස්ථාන ගත කරන ස්ථානය වෙනස් වේ. ඒ අනුව විමර්ශන ද්‍රව්‍ය පිහිටිය යුත්තේ මොනිටරයට පහළට වන්නටයි. මෙම ලිපි ද්‍රව්‍ය සාමාන්‍යයෙන් මේසයක් මත තබා ගැනීම මඟින් පරිගණක සමඟ කටයුතු කළ ද මේ සඳහා වඩාත් සුදුසු වන්නේ රැඳවුමක් (Document Holder) භාවිතා කිරීමයි. සාමාන්‍යයෙන් එම ලිපි ද්‍රව්‍ය කියවීම සඳහා ගෙල මෙන්ම ඇස් ද වෙහෙස වීමට සිදු වුවද මෙම Document Holder එකක් භාවිතා කිරීම මඟින් පෙරදී මෙන් හිස නැවත නැවතත් හරවා ආයාසයෙන් බැලීමට අවශ්‍ය විය නොහැකියි. එවැනි පිහිටීමක හිස හා ඇස තිඛෙන විට පරිගණකය ඉදිරිපිට සිටින ඔබට කායික අපහසුතා ඇති වීම අවම කෙරෙයි. මෙම නිවැරදි පිහිටීම මෙන්ම පරිගණකය භාවිතා කරන ස්ථානයේ ආලෝක තත්ත්වය ඉතා වැදගත් වේ. විශේෂයෙන්ම ඔබ වැඩ කරන පරිගණක මොනිටරය ජනේලයක් දොරක් අසල තිඛෙනවා නම් එමඟින් පරිගණකයේ තිරය වෙත පතිත වන ආලෝකය (විශේෂයෙන් දිවා කාලයේදී) නිසා එමඟින් ද ඔබගේ ඇසට බලපෑම් ඇතිවිය හැකියි.
ඒ නිසා ආලෝකය ඍජුව පරිගණක තිරය මත පතිත වන ආකාරයෙන් දොරවල් ජනෙල් අසල පරිගණක තැබීම ද නුසුදුසු වේ. ඒ වගේම ඇතැම් ආලෝකය නිකුත් වන ස්ථාන ඔබට මඟහරවා ගත නොහැකි නම් ඊට උපක්‍රමශීලීව කටයුතු කිරීම ද වැදගත්. කෙසේ වෙතත් මෙවැනි අවස්ථාවකදී කළ හැක්කේ මේස ලාම්පුවක් යොදා ගැනීම හා ඊට අඩු කාර්යක්ෂමතාවක් ඇති විදුලි පහනක් දැල්වීමයි. මෙම උපක්‍රමය මඟින් මේ පරාවර්තනය වීම එසේත් නැත්නම් දිලිසීම මඟහරවා ගත හැකියි. මෙමඟින්ද ඔබගේ ඇසට ඇති කරන්නේ යහපත් ප්‍රතිඵලයකි. තවද ඇසේ විඩාව අවම කරගත හැකි තවත් ක්‍රමවේදයක් ලෙස පරිගණක ලියවිලි සඳහා යොදා ගන්නා පාඨාංක ප්‍රමාණයද ඉතා වැදගත් වේ. සාමාන්‍යයෙන් ඔබගේ ඇස විඩාවට පත් නොකරන Text Size එකක් භාවිතා කර ලේඛනයක් කියවීමට හැකි නම් එය වඩාත් හොඳ ක්‍රමවේදයකි. මෙසේ යොදාගන්නා පරිගණක පාඨ අංක ප්‍රමාණය වනුයේ සාමාන්‍යයෙන් කියවිය හැකි කුඩාම අකුරක ප්‍රමාණය මෙන් තුන් ගුණයකි. ඒ වගේම මොනිටරයක් මත දිලිසීම වළක්වා ගැනීමට ඉහත පියවරවලට අමතරව තව දුරටත් අනුගමනය කළහැකි ක්‍රමවේද කිහිපයක් ද පවතිනවා. යම් අවස්ථාවකදී ඔබගේ පරිගණකයේ තිරය ඔබගේ සිතැඟි පරිදි සකසා ගන්නට බාධා එලඹේ නම් Anti Glare Screen එකක් ඊට සම්බන්ධ කිරීම වඩාත් ප්‍රතිඵලදායකය. මේ සියලු කාරණා මෙන්ම පරිගණකයක් ඉදිරිපිට වාඩි වීමේදී පැවතිය යුතු ගුණාංග කිහිපයක් ද පවතියි. ඒ අතර පරිගණක ඉදිරිපිට වාඩිවන පුටුවේ සුව පහසු බවද ඉතා වැදගත් වේ. ඒ වගේම එම පුටුව පැඩඩ් කළ එකක් විය යුතු අතර සිතැඟි පරිදි උස් පහත් කිරීමට ද හැකිවිය යුතුයි. ඒ වගේම දෙපස ඇඳි අත් පහසුවෙන් ස්ථාන ගත කිරීමේ හැකියාව තිබිය යුතුයි. ඒ වගේම යතුරු පුවරුව භාවිතයේදී ඔබගේ අත්වල මැණික් කටු ඒ මත නොතිබීමටද වගබලා ගත යුතුයි.
නුවන්ති කුලරත්න
උපුටා ගැනීම දිනමිණ පුවත් පත
