දැඩි හිරු රශ්මිය නිසා හැදෙන ලෙඩ රෝග
මේ දිනවල පවත්නා අධික හිරු රශ්මියට මුහුණදීම සෑම දෙනාටම ඉතා අපහසු කටයුත්තක්. අපගේ රටට හිරු මුදුන්වීම සමඟ ගෝලීය උෂ්ණත්වය ඉහළ යෑම හේතුවෙන් මෙලෙස දැඩි අවු රශ්මියකට බඳුන්වීමට සිදුව තිබෙනවා. මේ සමඟ ඇතිවන උණුසුම් පාරිසරික තත්ත්වය මිනිසාට සහ සතුන්ට සෘජුවම බලපානු ලබන අතර විවිධ රෝගී තත්ත්වයන් පවා ඇතිවීමට ඉඩ තිබෙනවා. අධික හිරු රශ්මියෙන් ආරක්ෂා වන්නේ කෙසේද? ඔබගේ සම වියළී යෑම සහ සිරුර විජලනය වීම වළක්වාගන්නේ කෙසේද වැනි වැදගත් කරුණු රැසක් මෙම ලිපිය ඔස්සේ ඔබව දැනුවත් කිරීමට අප බලාපොරොත්තු වෙනවා.
අධික හිරු එළිය හේතුවෙන් අපගේ සම වියළීමට ලක්වෙනවා. බොහෝ දෙනා අධික හිරු රශ්මිය පිළිබඳ එතරම් අවධානයක් යොමු නොකරන තත්ත්වයක්ද දක්නට ලැබෙනවා. නමුත් හිරු එළියට අධික ලෙස නිරාවරණය වීම කෙසේවත් ඔබට හිතකර නොවන බව සඳහන් කළ යුතුයි. හිරු එළිය හේතුවෙන් එග්සීමා, පොතු කබර, සමේ ආසාත්මිකතා, සම පිලිස්සීම, කුරුලෑ ඇතිවීම, සම රැලි වැටීම වැනි තත්ත්වයන් මතුවෙනවා. එයට අමතරව අධික හිරු එළියට ඔබගේ දෑස්වලට විවිධ ගැටලු මතු කිරීමට හැකියාව තිබෙනවා. ඒ නිසාම අධික හිරු රශ්මිය වැටෙන කාල වකවානුවේදී එළිමහන් ක්‍රියාකාරකම් අවම කිරීමට උත්සාහ කළ යුතුයි. අව් රශ්මියට මුහුණදීම අත්‍යවශ්‍ය වන්නේ නම් ඒ සඳහා හොඳින් සූදානම් වීමට ඔබ මතක තබාගත යුතුයි. අව්වට බොහෝ වේලාවක් නිරාවරණය වූ පුද්ගලයන් ඒ සඳහා තරමක් අනුගත වනවා. නමුත් කලාතුරකින් අව්වට නිරාවරණය වන්නේ නම් එයට ඔරොත්තු දීමට ඔබට තිබෙන හැකියාව අඩු වෙනවා. එවිට ඔබ හිරු එළියට පිලිස්සීමට තිබෙන ඉඩ ප්‍රස්ථාව වැඩි වෙනවා. හිරු එළියෙන් ආරක්ෂාවීමට ඔබ අනුගමනය කළ යුතු උපදෙස් කිහිපයක් පිළිබඳ අප දැන් සලකා බලමු.
- සෑම දිනකම ස්නානය කිරීමට සහ ශරීරය සේදීමට යොමු වන්න. කුඩා දරුවකුගේ නම් දිනකට දෙවරක් ඇඟ සේදීම ප්‍රමාණවත් වෙනවා.
- වායුසමීකරණ, විදුලි පංකා හේතුවෙන් ඔබගේ ශරීරය විජලනයට ලක්වෙනවා. එසේම පාරිසරික උෂ්ණත්වය හේතුවෙන්ද සිරුරට වැඩිපුර ජලය අවශ්‍ය වෙනවා. දිනකට ජලය ලීටර් 3ක් පමණ පානය කළ යුතු වෙනවා. මෙහිදී ජලය පමණක්ම නොව කුරුම්බා, තැඹිලි, පලතුරු යුෂ වැනි විවිධ පානයන් භාවිත කිරීමට ඔබට හැකියාව තිබෙනවා. නමුත් කෘත්‍රිම පැණි බීම පානය කිරීමෙන් වැළකිය යුතුයි.
- සමේ තෙතමනය රැකගැනීම උදෙසා නිපදවා ඇති මොයිස්චරයිසින් ක්‍රීම් වර්ගයක් දිනකට දෙවරක් ආලේප කළ යුතු වෙනවා. ඒ සඳහා අධිකව මුදල් වැය කිරීමට අවශ්‍ය වන්නේ නැහැ. මොයිස්චරයිසින් ක්‍රීම් වෙනුවට ග්ලිසරින් සමඟ ජලය මිශ්‍ර කර ආලේප කිරීමද ඔබට හැකියාව තිබෙනවා.
- ඔබ ශරීරයේ සබන් ආලේප කිරීමෙන් සිරුර වියළී යනවා. සබන් ආලේප කරන්නේ නම් සම සඳහා යෝග්‍ය මෘදු සබන් වර්ග වෛද්‍ය නිර්දේශ මත ලබා ගැනීමට ඔබට හැකියාව තිබෙනවා.
- හිරු එළිය නිසා ඔබේ සමේ ආසාත්මිකතා ඇති වන පුද්ගලයන් සිටිනවා. එලෙස අසාත්මිකතා ඇතිවෙනවා යැයි ඔබ දැනුවත් නම් ඒ සඳහා අදාළ පියවර අනුගමනය කළ යුතුයි.
- හිරු එළියට නිරාවරණය වන සේ රැකියාවල නියුතු වන්නේ නම් හෝ පිහිනුම් ඇතුළු ක්‍රීඩාවල නිරත වන්නේ නම් SPF අගය 30ට වැඩි Suncreem එකක් භාවිත කළ යුතුයි. හිරු එළියට නිරාවරණය වීමට පැය භාගයකට පෙර Suncreem ආලේප කළ යුතුයි. එසේම පැය හතරෙන් හතරට නැවත Suncreem ආලේප කිරීමටත් අමතක නොකළ යුතු වෙනවා.
- අව්වට යන විට සෑම විටම කුඩයක්, තොප්පියක් වැනි ආවරණයක් තබාගත යුතුයි. එසේම අත්, කකුල් වැසෙන සේ ඇඳුම් ඇඳීමද යෝග්‍ය වෙනවා. හිරු එළියට යෝග්‍ය අව් කණ්ණාඩි පැලඳීමෙන් අව් රශ්මියෙන් ඔබගේ දෑස් ආරක්ෂා කරගැනීමට ඔබට හැකියාව ලැබේවි.
- අව් රශ්මියෙන් ඔබේ කුඩා දරුවන් ආරක්ෂා කරගැනීම පිළිබඳ සුවිශේෂී අවධානයක් යොමු කළ යුතුයි. ඔවුන්ට පහසුවෙන්ම දහදිය බිබිළි වැනි තත්ත්වයන් මතුවීමට ඉඩ තිබෙනවා. සෑම විටම ඔවුන්ට සිසිලස ලබාදීමට උත්සාහ කළ යුතු වෙනවා. අධික රස්නය සහිත අවස්ථාවල ඔවුන් වාහන තුළ දමා යෑමෙන් වැළකිය යුතු වෙනවා.
සෙව්වන්දි හෙට්ටිආරච්චිඋපුටා ගැනීම මවුබිම
