රුධිර පීඩනය වැඩි රෝගීන්ටත් මුත්‍රා පරීක්ෂණයක්
අධි රුධිර පීඩනය වයස්ගත අයට හටගන්නා රෝගයක් ලෙස එදා හැඳින්වුවද අද ඒ තත්ත්වය බොහෝ වෙනස් වෙලා. තුරුණු වියේ පසුවන එනම් වයස 20 - 40 අතර වයස් සීමාවේ පසුවන අධික හිසරදය සහ කරකැවිල්ල, තද හද ගැස්ම, ඇති රෝගීන් බොහෝ දෙනෙක් ප්‍රතිකාර සඳහා විශේෂඥ වෛද්‍යවරුන් වෙත යොමු වෙති. එවැනි අවස්ථාවක වෛද්‍යවරයා රුධිරයේ සීනි ප්‍රමාණය, කොලෙස්ටරෝල් ප්‍රමාණය පරීක්ෂා කර බලන්නට නියම කරන අතර පැය විසිහතරක කාලයක් පුරාවට ශරීරයෙන් පිට කරන මුත්‍රා එකතු කොට සිදුකරන විශේෂ මුත්‍රා පරීක්ෂණයක් ද නියම කරනවා. වෛද්‍ය පරීක්ෂණාගාරයකින් සිදුකළ යුතු ඒ විශේෂ මුත්‍රා පරීක්ෂණය වෙනිල් මැන්ඩලික් ඇසිඩ් (VMA) යනුවෙන් හඳුන්වනවා. මේ පරීක්ෂණයේදී මුත්‍රා සමඟ පිටවන හෝමෝන පිළිබඳයි පරීක්ෂා කරන්නෙ. මේ පරීක්ෂණයේදී වෛද්‍යවරුන්ට බලාගන්න ඕනෙ වෙන්නෙ රෝගියාගේ මොළයේ කුඩා ගෙඩියක් වැනි තත්ත්වයක් පවතිනවා ද නැද්ද කියන එකයි. එවැනි ගෙඩියක් පිළිකා අවදානමක් ඇතිනම් කලින්ම දැනගෙන සුව කරන්න පුළුවන්. අධික රුධිර පීඩනය නිසා රෝහල්ගත කර සිටින රෝගියකුට මේ පරීක්ෂණය ජාතික රෝහලේදී, පිට පළාතක නම් ප්‍රදේශයේ ශික්ෂණ රෝහලේ හෝ මූලික රෝහලේදී සිදුකර ගත හැකිය.
එහෙත් රජයේ රෝහලක පහසුකම් නැතිනම් මේ පරීක්ෂණය පවත්වන්නට සිදුවන්නේ බොරැල්ල වෛද්‍ය පර්යේෂණායතනයේදීය. පැය විසි හතරක කාලයකට රෝගියා වෛද්‍ය පර්යේෂණායතනයේ රඳවා තැබිය නොහැකි නිසා මුත්‍රා පරීක්ෂණයට අදාළ මුත්‍රා පැය විසිහතරක කාලයක් එකතු කර ගැනීමට ප්‍රමාණවත් බෝතලයක් රෝගියාට ලබා දෙනු ඇත. බෝතලයට රසායනික ද්‍රව්‍යයක් එකතු කර තිබෙන නිසා එය ජලයෙන් නොසේදිය යුතුය. අධි රුධිර පීඩනය පවතින රෝගියකු රෝහල්ගත කර තිබෙන අවස්ථාවක මෙවැනි පරීක්ෂණයක් කරනවා නම් ඖෂධ ගැන වෛද්‍යවරයා තීරණය කරාවි. කෙසේ නමුත් පැය විසි හතරේ මුත්‍රා සාම්පල එකතු කිරීමට දින තුනකට පෙර හා මුත්‍රා එකතු කරන පැය විසිහතර තුළ රෝගියා පීනෝබාබිටෝන්, මීතයිල්ඩෝපා, කාබිඩෝපා, ලෙවෝඩෝපා, මාඕ ඉන්හිබිටර්ස් සහ බීටා බොලොකර්ස් වැනි ඖෂධ වර්ග ගන්නේ නම් ඒවා නතර කළ යුතුය. මීට අමතරව තේ, කෝපි, කෙසෙල් වර්ග, අයිස් ක්‍රීම්, වැනි ආහාරපාන අධික වශයෙන් ගැනීමෙන් ද වැළකිය යුතුය. ඉරිදා උදේ සිට සඳුදා උදේ දක්වා පැය විසිහතරක කාලයට මුත්‍රා එකතු කරනවා යයි සිතමු. එවිට ඉරිදා උදේ පළමුවරට පිටකරන මුත්‍රා බෝතලයට එකතු කිරීමෙන් වැළකී සිටිය යුතුය. ඉන්පසු දෙවන තුන්වන ආදි වශයෙන් එදින දවස පුරාවට පිටකරන මුත්‍රා බෝතලයට එකතු කර ගත යුතුය. සඳුදා උදේම පළමුවරට පිට කරන මුත්‍රා සාම්පලය ද බෝතලයට එකතු කර ගැනීමට අමතක නොකළ යුතුය. මේ කාල පරාසය තුළ ලබාදුන් බෝතලයට අමතර මුත්‍රා ප්‍රමාණයක් එකතු වුවහොත් එය වෙනත් බෝතලයකට එකතු කර ගන්න. කෙසේ නමුත් මේ අමතර බෝතලයේ මුත්‍රා විශේෂයෙන් ලබාදුන් මුත්‍රා එකතු කිරීමට ලබාදුන් බෝතලයේ මුත්‍රා සමඟ කලවම් කර පරීක්ෂණය සඳහා යොදා ගැනීමක් සිදු නොකරයි. එම අතිරේක බෝතලයේ මුත්‍රා රෝගියා අදාළ දින පිට කළ මුත්‍රා ප්‍රමාණය මැන බැලීමට පරිමාවක් ලෙස ගණනය කිරීමට පමණක් යොදා ගනියි. රෝගියකුට එම මුත්‍රා පරීක්ෂණය නියම කළ විට නිවැරැදිව සිදු කිරීමත් සැලකිලිමත්ව සිදුකිරීමත් රෝගියාගේ පැත්තෙන් ඉටුවිය යුතු වගකීමකි. රාජ්‍ය අංශයේ රෝහල්වල රෝගීන් වෙනුවෙන් මේ පරීක්ෂණය වෛද්‍ය පර්යේෂණායතනය නොමිලයේ සිදු කරනු ලබයි.එවැනි පරීක්ෂණයක් පෞද්ගලික අංශයේ රසායනාගාරයකින් සිදු කරනවා නම් රුපියල් හත්දහසක පමණ මුදලක් වැය වේවි.
බොරැල්ල රජයේ වෛද්‍ය පර්යේෂණායතනයේ වෛද්‍ය පර්යේෂණාගාර තාක්ෂණ විද්‍යාඥ කීර්ති වික්‍රමරත්න
උපුටා ගැනීම සිළුමිණ පුවත්පත
