බෙහෙත් නැතිව ලෙඩ සුවකරන භෞතචිකිත්සාව
හතළිස් අට හැවිරිදි චන්ද්‍රසිරි අංශභාග රෝගයට ගොදුරු වුණේ හදිසියේමයි. මාසයක් පමණ රෝහල් ගත වී ප්‍රතිකාර කිරීමෙන් පසුව චන්ද්‍රසිරිට යම් පමණක සුවයක් ලැබුණා. නමුත් ඔහුගේ වම් අතත් කකුලත් පණ නැතිව ගියා. එම අතයි කකුලයි තරමක් දුරට හෝ යථා තත්ත්වයට පත්කර ගැනීම සඳහා භෞත චිකිත්සක ප්‍රතිකාරවලට යොමු විය යුතු බව වෛද්‍ය උපදේශය වුණා. සති කීපයක් යන විට චන්ද්‍රසිරිගේ පණ නැතිව තිබු වම් අතත් කකුලත් තරමක් දුරට සුවපත් වුණා. චන්ද්‍රසිරි සුවපත් වන ආකාරය දෙස බලා සිටි බොහෝ දෙනෙකුට භෞත චිකිත්සක ව්‍යායාමවල වටිනාකම පැහැදිලි වුණා. “පිසියොතෙරපි” (Physiotherapy) කිව්වාම බොහෝ දෙනෙක් ඒ ප්‍රතිකාර ක්‍රමය ගැන දැනගත්තත් මේ ප්‍රතිකාරවලින් ලද හැකි ප්‍රයෝජන ගැන දන්නේ බොහොම ටික දෙනයි. ඖෂධවලින් තොරව ශරීරය විසින් ම රෝග සුවකර ගැනීමේ හැකියාවක් අපගේ ශරීරය සතුව තිබෙනවා. භෞත චිකිත්සක ප්‍රතිකාරවලින් සිදුකරන්නේ එම හැකියාවට පහසුකම් සලසා දීමයි. මෙම ප්‍රතිකාර ක්‍රමයේදී තාපය, ධ්වනිය, ව්‍යායාම වැනි භෞතික ක්‍රම භාවිත කරනවා. සියයට පනහකටත් වැඩි ප්‍රමාණයක් යොදාගනු ලබන්නේ සම්බාහන ක්‍රමයි. යමෙකුට භෞත චිකිත්සක ව්‍යායාම සුදුසු බව වෛද්‍යවරයකු තීරණය කළත් එහිදී ලබා දෙන ප්‍රතිකාර ක්‍රමය පිළිබඳව තීරණය කරන්නේ භෞත චිකිත්සකවරයායි. ඒ සඳහා පළමුව භෞත චිකිත්සකවරයා පළමුව රෝගියාගේ තත්ත්වය පිළිබඳව කිසියම් අධ්‍යයනයක් තක්සේරුවක් කරනවා.
බිලි‍ඳෙකු මවුකුස තුළ සිටිනා තැන් පටන් ජීවිතයේ අවසන් හුස්ම හෙළන තැන දක්වාම භෞත චිකිත්සක ප්‍රතිකාර භාවිත කළ හැකියි. එසේම විවිධ රෝගාබාධ සඳහා ද භෞත චිකිත්සක ප්‍රතිකාර භාවිත කළ හැකියි. ඒ අතර ප්‍රමේහකරණ රෝග, ශ්වසන රෝග, ආතරයිටිස් වැනි සන්ධි ආශ්‍රිත රෝග බෙල්ලේ ඇතිවන විවිධ වේදනාවන් දෑත් දෙපාවල ඇතිවන විවිධ වේදනාවන් සඳහා භෞත චිකිත්සක ප්‍රතිකාර බහුලව යොදා ගන්නවා. ඊට අමතරව රෝගවලින් වැළකී සිටීමටද මෙම ප්‍රතිකාර යොදාගන්නවා. බොහෝ දෙනෙකුට සන්ධි ආශ්‍රිත වේදනාවන් ඇතිවන්නෙ එදිනෙදා වැඩ කටයුතුවලදී වැරැදි ඉරියව් භාවිත කිරීම නිසයි. එහිදී රෝගියාගේ රෝගය පිළිබඳව කෙරෙන විනිශ්චයේදී භෞත චිකිත්සක වරයාට රෝගයට හේතුව හඳුනාගත හැකි වෙනවා. එහිදී එම වැරැදි ඉරියව් නිවැරැදි කරගැනීමෙන් එම සන්ධි ආශ්‍රිත වේදනාවන් බොහොමයකගෙන් මිදීමේ හැකියාව තිබෙනවා. ඇතැමුන්ට තමන්ගේ රැකියාව අනුව පැය කීපයක්ම එක දිගට පරිගණකය ඉදිරිපිට ඉඳගෙන සිටීමට සිදු වෙනවා. එහි ප්‍රතිඵලය වන්නේ ගෙලේ ආබාධ, කොන්දේ ආබාධ, දෑස්වල ආබාධ ආදිය ඇතිවීමයි. විශේෂයෙන්ම පරිගණක යතුරුලියනය වැනි රැකියාවල යෙදී සිටින අයට එක දිගට එකම ඉරියව්වක පරිගණකය ඉදිරිපිට සිටින නිසා ඉහත රෝග ලක්ෂණ පෙන්නුම් කරනවා. එවැනි අවස්ථාවලදී භෞත චිකිත්සක වරයකුගේ උපදෙස් ලබාගත් විට පළමුව ඉරියව් වෙනස්කර ගැනීමට නියම කරනවා. එයින් ඵලයක් නොවුණොත් විවිධ ප්‍රතිකාර ක්‍රම ලබා දෙනවා. පරිගණකයක් ඉදිරියේ එක දිගට වැඩ කරන අයකු පැය 1/2 කට වරක්වත් පරිගණක තිරයෙන් පිටතට දෑස් යොමා තරමක් දුර වස්තුවක් දෙස විනාඩි දෙක තුනක් බලාගෙන සිටීම වැදගත්. එවිට දෑස්වලට සිදුවන ඇතැම් ආබාධවලින් වැළකී සිටිය හැකියි. එක දිගට බොහෝ වේලාවක් පරිගණකයක් ඉදිරියේ වැඩ කරන අයකුගේ පරිගණක මේසය ඉඳගන්නා පුටුව සැකසි තිබිය යුත්තේ ඒ ඒ පුද්ගලයාගේ දෑත් දෙපාවල මිමිවලට අනුවයි. පහසුවෙන් දෑත් දෙපා රඳවාගෙන සිටිය හැකි වන ලෙසයි. එසේ නොවූ විටයි කොන්දේ ආබාධ ආදිය බහුලව ඇතිවන්නේ. පරිගණකයක් ඉදිරියේ බොහෝ වේලාවක් ඉඳගෙන සිටින අයකු පැයකට වරක් සුළු වේලාවක් සිටගෙන සිටීම වැදගත්. එසේ නැතිනම් පුටුවේ ඉඳගෙන සිටින විටම කොන්ද ඇදීමේ ව්‍යායාමයක් කළ හැකියි. මෙලෙස එක දිගට පරිගණකය ඉදිරියේ ඉඳගෙන සිටින විට කොඳුඇට පෙළ දෙපස ඇති මාංශපේශීන් ඉතාම ඉක්මනින් ශක්තිමත් වෙනවා. එය, කොඳුඇට පෙළ ආරක්ෂා කරගැනීම සඳහා මොළය මඟින් සිදු කරනු ලබන කාර්යයක්. මෙහිදී අධික කොන්දේ වේදනාවක් ඇති වෙනවා. මෙම තත්ත්වයෙන් සහනයක් ලබා ගැනීමට භෞත චිකිත්සක ප්‍රතිකාර ක්‍රම යොදාගත හැකියි. පළමුව මාංශපේශීන් උණුසුම් කිරීමට ආලෝක ධාරාවක් උපයෝගී කරගත හැකියි. එසේම ගෙලෙහි සහ කොන්දේ මාංශපේශීන් සමබාහනය කර වේදනාවෙන් රෝගියා මුදාගත හැකියි. භෞත චිකිත්සාවේදී භාවිත වන රත් කිරීමේ ප්‍රතිකාරය සඳහා උපකරණ කීපයක්ම යොදා ගන්නවා. එහිදී ආලෝක තරංග භාවිත වෙනවා. බොහෝ විට රත් කිරීමේ ප්‍රතිකාරය භාවිත කරන්නේ සන්ධියක හෝ මාංශපේශියක වේදනාව අඩු කිරීම සඳහායි.
අදාළ ස්ථානයට ආලෝක ධාරාව එල්ල කළ විට එම මාංශපේෂිවල තද ගතිය අඩු වෙනවා. එහි ප්‍රතිඵලය වන්නේ එම ස්ථානයට හොඳින් රුධිරය ගමන් කිරීමයි. එවිට වේදනාව නැතිවී යනවා. මෙහිදී රතු පැහැති එළිය සහ කෙටි තරංග ආයාමයක් ඇති ආලෝක කිරණ භාවිත වෙනවා. එසේම විවිධ ආයාමයන් සහිත ශබ්ද තරංග ද භාවිත වෙනවා. දරුවකු කුස තුළ සිටින විට එම ගර්භණී මවට ද කුස තුළ සිටින දරුවාට ද භෞත චිකිත්සක ප්‍රතිකාර ක්‍රම භාවිත කළ හැකියි. දරුවකු කුස තුළ සිටින විට එම ගර්භණී කාන්තාවගේ කුස තුළ ඉඩ ඇහිරෙනවා. එහි ප්‍රතිඵලය වන්නේ ඇයට හුස්ම ගැනීමට අපහසු වීමයි. මෙම තත්ත්වය මඟ හරවා ගැනීම සඳහා හුස්ම ගැනීමේ ක්‍රම සහිත භෞත චිකිත්සක ප්‍රතිකාර භාවිත කළ හැකියි. කුස තුළ සිටින දරුවාට පහසුවක් වෙන ආකාරයට ගර්භණී මව සිටිය යුතු ඉරියව් මෙන්ම ගර්භණී මවට සුදුසු ව්‍යායාම ද භෞත චිකිත්සාවේ ඇතුළත්. එමෙන් දරුවා ලැබෙන අවස්ථාවේදී ගර්භණී මවට පහසුවක් ගෙනදීම සඳහා උදර මාංශපේශීන් ශක්තිමත් කරන ව්‍යායාම, යෝනි මාංශපේශීන් ශක්තිමත් කරන ව්‍යායාම පවා භෞත චිකිත්සාවට ඇතුළත්. උපදින විටම දරුවාගේ ශරීරයේ යම් ගැටලු ඇතිවන අවස්ථා තිබෙනවා. ඒ, දරුවාගේ දෑත්වල දෙපාවල ඇදයන් ඇතිවීම ආදියයි. ඒ සඳහා භෞත චිකිත්සක ප්‍රතිකාර කළ විට දරුවාගේ එම අඩුපාඩුව ඉතාම පහසුවෙන් නිවැරැදි කර ගැනීමේ හැකියාව තිබෙනවා. දරුවා බිහිවන විට දරුවාගේ ගෙලෙහි මාංශපේශීන් ඇදීමකට ලක්වීමෙන් ගෙල ඇදවීම වැනි තත්ත්වයක් ඇතිවුණොත් එය ඉතා පහසුවෙන් නිවැරැදි කර ගැනීමට භෞත චිකිත්සක ප්‍රතිකාරවලට හැකියාව තිබෙනවා. මෙහිදී දරුවාගේ ගෙලට කළ යුතු ව්‍යායාම දරුවාට කිරි දිය යුතු ඉරියව්ව ආදිය මවට ඉතා හොඳින් පැහැදිලි කර දෙනවා. මෙම තත්ත්වයන් සඳහා කුඩා අවදියේදීම නිසි ප්‍රතිකාර කළේ නැතිනම්, දරුවාගේ ගෙලෙහි එම ආබාධය ජීවිත කාලය පුරාම පැවතිය හැකියි. දරුවකුට හෙම්බිරිස්සාව කැස්ස සැදී පෙණහලුවල සෙම එක්රැස් වූවොත් එය නිව්මෝනියාව වැනි තත්ත්වයක් දක්වාම වර්ධනය වීමේ හැකියාව තිබෙනවා. පෙණහලු තුළ එක්රැස්වන සෙම ශරීර‍ෙයන් ඉතාම සාර්ථකව ඉවත් කිරීමට භෞත චිකිත්සක ප්‍රතිකාර යොදාගත හැකියි. කුඩා දරුවන්ට මෙන්ම වැඩිහිටියන්ට ද මෙම ප්‍රතිකාර ඉතාම සාර්ථකව කළ හැකියි. මෙහිදී ස්වසන ව්‍යායාම, පපුවේ සහ පිටේ අදාළ ස්ථානවලට කරනු ලබන ව්‍යායාම ආදිය උපයෝගී කරගන්නවා. පපුවේ සෙම තිබෙන්නේ කුමන ස්ථානයේ දැයි එක්ස් කිරණ ඡායාරූපයක් මඟින් නිවැරැදිව හඳුනාගෙන එම ස්ථානය එල්ල කරගෙන භෞත චිකිත්සක ව්‍යායාම කළ හැකියි. මෙම ප්‍රතිකාර මඟින් පපුවේ තිබෙන සෙම ඉතාම සාර්ථකව ඉවත් කළ හැකියි. එසේම ඇදුම රෝගීන්ට ද භෞතචිකිත්සක ප්‍රතිකාර ඉතාම සාර්ථකව යොදා ගන්නවා. මෙහිදී ශරීරය සැහැල්ලු කරන පෙණහලු හොඳින් ක්‍රියාත්මක වන හුස්ම ගැනීමේ හැකියාව සහ ප්‍රමාණය වර්ධනය කරන ස්වසන ව්‍යායාම බහුලව යොදා ගන්නවා.
විශේෂයෙන්ම කාන්තාවන් මුහුණ දෙන රෝගී තත්ත්වයක් තිබෙනවා, Carpal tunnal Syndrome රෝගය යනුවෙන්. මෙහිදී අතේ මැණික් කටුව ප්‍රදේ‍ශයෙන් පටන් ගන්නා වේදනාවක් අත්ල දක්වා ගමන් කරනවා. ෙමය බොහෝවිට ඇතිවන්නේ අධිකව දෑත් වෙහෙසා වැඩ කරන අයටයි. රෙදි සේදීම, පොල් මිරිකීම වැනි අත්ලත් ඇඟිලිත් අධිකව වෙහෙසවන වැඩවල නිතර යෙදීම නිසා එම රෝගී තත්ත්වය මතුවන බව හෙළි වී තිබෙනවා. ඒ තත්ත්වය ඇතිවන්නේ අත්ලේ කානුවක් වැනි කොටසේ මාංශපේශීන් මඟින් ඇතුළතින් ඇති ස්නායුව තදවීම නිසයි. මෙය හඳුනාගත් මුල් අවස්ථාවේදී භෞත චිකිත්සක ප්‍රතිකාර ක්‍රම භාවිතා කර ප්‍රතිකාර කළ හැකියි. එසේම නිවසේ දී කිරීමට භෞත චිකිත්සක ප්‍රතිකාර ක්‍රම යොදාගත හැකියි. මෙම තත්ත්වය උග්‍ර වූවොත් ශල්‍යකර්මයක් කළ යුතු වෙනවා. කොන්දේ ඇතිවන වේදනාවත් විවිධ හේතු නිසා ඇතිවෙනවා. ඒ අතර බරපතළ හේතූන් ද තිබෙනවා. යමෙකුගේ කොන්දේ අමාරුවට හේතුව බරපතළ තත්ත්වයක් නොවන බවට වෛද්‍යවරයකු තීරණය කළහොත් බොහෝ විට ඉරියව්වල වෙනසක් සිදු කිරීමෙන් කොන්දේ වේදනාව සමනය කරගත හැකි වෙනවා. බොහෝ දෙනෙකුගේ කොන්දේ වේදනාවට එම පුද්ගලයා නිදාගන්නා ඉරියව්ව සහ ඇ‍‍ඳේ, මෙට්ටයේ ස්වභාවය බලපානවා. බොහෝ දෙනෙක් කැමති වන්නේ ඉතා හොඳින් එබෙන සුවපහසු මෙට්ටයක නිදාගැනීමටයි. කැමැත්ත එසේ වුවත් එවැනි මෙට්ටයක නිදාගැනීමෙන් ලැබෙන ප්‍රතිඵලය අමිහිරි විය හැකියි. නිදාගැනීමට වඩාත් සුදුසු වන්නේ තරමක තද ස්වභාවය ඇති ෆෝම් සහ කොහු මිශ්‍රකර සෑදූ මෙට්ටයකුයි. ඇඳ පොලු යෙදූ ඇඳක් නම්, එම පොලු නිසා මෙට්ටය රැලි වැටී ඇත්නම්, එය ද කොන්දේ වේදනාව ඇතිවීමට බලපෑ හැකියි. අප පැය හතක් අටක් පමණ දිනපතා නිදාගන්නා ඇඳ නිසි ප්‍රමිතියට තිබුණේ නැතිනම් කොන්දේ වේදනාව ඇතුළු රෝගාබාධ ගණනාවකට එය මුල්විය හැකියි. ඇඟලුම් කර්මාන්තයේ ඇතැම් සේවාවල නිරතවී සිටින්නන් මෙන්ම ආරක්ෂක සේවයේ යෙදී සිටින්නන්ට බොහෝ විට බොහෝ වේලාවක් එකදිගට සිටගෙන සිටීමට සිදුවෙනවා. එය කොන්දට මෙන්ම දෙපාවලටත් බලපෑම් ඇතිකිරීමට සමත්. එමනිසා එකදිගට දිගු වේලාවක් සිටගෙන සිටීමට සිදුවන විට කුඩා බංකුවක් භාවිතා කර පැය භාගයක් පමණ එක් පාදයක් එම බංකුව මත තබාගෙන සිටිය හැකියි. ඊළඟ පැය භාගයේ දී අනෙක් පාදය බංකුව මත තබාගෙන සිටිය හැකියි. මෙලෙස මාරුවෙන් මාරුවට පැය භාගයෙන් භාගයට පාද මාරු කිරීමෙන් සිටගෙන සිටීම නිසා පාදවලට ඇතිවන බලපෑම අඩුකර ගැනීමේ හැකියාව තිබෙනවා. මෙහිදී යොදාගන්නා බංකුව අඟල් හයකට වඩා උස්වීම සුදුසුයි.
අද පාසල් දරුවන් ද කොන්දේ අමාරුවලට ගොදුරු වී සිටිනවා. එයට හේතු වී තිබෙන්නේ එම දරුවන් දිනපතා විශාල පාසල් පොත් බෑගයක් පිටේ එල්ලාගෙන යාමයි. ඒ සඳහා සුදුසු බෑග් ද නිපදවා තිබෙනවා. එක් උරහිසකින් පමණක් පොත් බෑගය එල්ලාගෙන නොයා යුතුයි. එසේම බස්රථයේ ඉඳගන්නා විට පොත් බෑගය පිටේ තබාගෙනම වාඩිවීම නුසුදුසුයි. පොත් බෑගය උකුලට ගෙන වාඩිවීමයි සුදුසු. බොහෝ දෙනෙක් මුහුණ දෙන තවත් ගැටලුවක් වන්නේ දණහිස් සන්ධිවල ඇතිවන වේදනාවයි. එම තත්ත්වයට මුහුණ දෙන්නේ අධික බරින් යුතු, සුදු පැහැති, වයස අවුරුදු හතළිහ ඉක්මවූ අය බව හඳුනාගෙන තිබෙනවා. ඒ අතරින් වැඩි පිරිසක් කාන්තාවන්. මෙය ඇතිවන්නේ ශරීරය බර වැඩි නිසා පාදවල සන්ධිවලට අධික බරක් පැටවී සන්ධිවල අස්ථි ගෙවී යාම නිසයි. මෙය නැවැත්විය හැකි තත්ත්වයක් නොවේ. ශරීර බර අඩු කර ගැනීමෙන් මෙහිදී සහනයක් ලබාගත හැකියි. මෙහිදී පාදවල සන්ධි ආශ්‍රිත මාංශ පේශි ශක්තිමත් කිරීමට භෞත චිකිත්සක ව්‍යායාම භාවිතා කිරීමේ හැකියාව තිබෙනවා. පාදවල සන්ධිවල මෙම වේදනාව ඇති උදවිය පඩි නැඟීම, ඇනබාගෙන ඉඳගැනීම, වළ වැසිකිළි භාවිතා කිරීම ආදිය නතර කළ යුතුයි. එවැනි පුද්ගලයින්ට වඩාත් සුදුසු කොමඩ් වැසිකිළි යයි. හෘද රෝගියකු දැඩි සත්කාර ඒකකයකට ඇතුළත් කළ තැන් පටන් එම රෝගියා පුනරුත්ථාපනය කරන අවස්ථාව දක්වාම භෞත චිකිත්සක ප්‍රතිකාර ක්‍රම යොදා ගන්නවා. රෝගියා දැඩි සත්කාර ඒකකයේ තබා තිබෙන ඉරියව්ව තීරණය කිරීමට, රෝගියාගේ පපුවේ එක්රැස්වන සෙම ඉවත් කිරීමට භෞතචිකිත්සක උපදෙස් අවශ්‍ය වෙනවා. එසේම මෙවැනි රෝගියකු පුනරුත්ථාපනය වී නිවසට ගිය පසුව ඉදිරි ජීවිත කාලය හොඳින් සහ පහසුවෙන් ගත කිරීම සඳහා භෞත චිකිත්සක ප්‍රතිකාර භාවිතා කළ හැකියි. භෞත චිකිත්සක ව්‍යායාම කරන විට ඒවා නිකම්ම අතපය ඔසවන ව්‍යායාම යැයි ඇතැමෙකුට සිතෙන්නට පුළුවන්. නමුත් ඒවා නිකම්ම අතපය ඔසවන ව්‍යායාම නොවේ. එම ව්‍යායාම මඟින් ශරීරයේ අදාළ මාංශපේශිවලට මෙන්ම මොළයට ද විශාල උත්තේජනයක් ලබාදෙනවා. ක්‍රීඩා කිරීම ආරම්භ කිරීමට පෙර ශරීරය උණුසුම් කරන භෞතචිකිත්සක ව්‍යායාම මඟින් ක්‍රීඩාවේදී මාංශපේශිවලට සිදුවිය හැකි අනතුරු වළක්වා ගැනීමේ හැකියාව තිබෙනවා. ඒ නිසයි වර්තමානයේ දී පාසල්වල ක්‍රීඩා කණ්ඩායම් පවා භෞත චිකිත්සකවරයකුගේ සේවය ලබාගන්නේ. ඇතැම් භෞතචිකිත්සක ප්‍රතිකාර නුසුදුසු අයත් සිටිනවා. පිළිකා රෝගයෙන් පෙළෙන පුද්ගලයකුට Heat Therapy සුදුසු නෑ. ඒ; එම ප්‍රතිකාරය මගින් පිළිකා සෛල වර්ධනය වීමට ඉඩ ඇති නිසයි. එසේම ගර්භණී කාන්තාවන්ට කෙටි තරංග ආයාමයන් සහිත ආලෝක තරංග වලින් කෙරෙන භෞත චිකිත්සක ප්‍රතිකාර සුදුසු නෑ. ඒ නිසා භෞත චිකිත්සක ප්‍රතිකාර ලබාගැනීමට පෙර කාන්තාවක තමා ගර්භණී බව පැවසීම ඉතා වැදගත්.
උපුටා ගැනීම සිළුමිණ පුවත්පත
