ගර්භණි සමයේ පැපොල වැළඳුණොත්

බෝවන රෝග නිසාවෙන් දරුගැබට හානි ඇතිවන අවස්ථා මොනවාදැයි හඳුනා ගනිමු.

ගැබිනි මවකට වැළඳිය හැකි රෝග තත්ත්ව පිළිබඳ කතා බහ කිරීමේදී බහුල වශයෙන් රෝග ගණනාවක් පිළිබඳ හඳුනා ගත හැකියි. ඒ අතර රුබෙල්ලා, පැපොල, හෙපටයිට්ස් බී, H.I.V. ඒඩ්ස්, මැලේරියා වැනි රෝග මෙන්ම මේ දිනවල බහුලව දැකගත හැකි ඩෙංගු වැනි රෝග තත්ත්වද මේ අතර විශේෂත්වයක් ගනියි. කෙසේ වෙතත් ළදරු කලලයකට එසේත් නොමැති නම් ගර්භණීත්වයට හානි පැමිණ විය හැකි රෝග අවස්ථා කිහිපයක් පිළිබඳව පහත ආකාරයට පැහැදිලි කරදිය හැකියි.

ටොක්සො ප්ලැස්මෝසිස් (Toxo Plasmosis)

මෙය ප්‍රොටොසො’වා වර්ගයේ ක්ෂුද්‍ර ජීවියෙකුගේ බලපෑමක් නිසා ඇතිවන රෝගී තත්ත්වයක්. මෙම රෝය වැළඳෙන්නේ බළලුන්ගේ මළ පහ , හොඳින් නොපිසින මස් හෝ වෙනත් ආහාර නිසා වෙනි. මෙම තත්ත්වය වළක්වා ගැනීමට ගර්භණී කාලයේදී බළලුන්ගේ මළ ද්‍රව්‍ය ඉවත් කරන විට ඉතා ප්‍රවේසම්කාරීව බැහැර කිරීම හෝ එවැනි කාර්යන්ගෙන් වැළකී සිටීම ඉතා වැදගත්.

අතීතයේදී මැලේරියාව වැනි රෝග තත්ත්ව නිසාද කලලයට බලපෑම ඇති කළ ද මේ වන විට රෝග තත්ත්වය මර්දනය වී තිබෙන නිසා එම රෝග තත්ත්වය මර්දනය වී තිබෙන නිසා එම රෝග තත්ත්වය සුලබව දැකගැනීමට නොහැකි වේ.

රුබෙල්ලා (ජර්මන් සරම්ප)

මෙම රෝග තත්ත්වය පිළිබඳව බහුල වශයෙන් කතා බහට ලක් වන්නේ බහුතරයක් කාන්තාවන් මේ තත්ත්වයට මුහුණපාන නිසායි. සුළු උණක් සමඟ ඇතිවන ප්‍රතිශ්‍යා තත්ත්වය මෙන්ම සමේ ඇතිවන කුඩා බිබිලි හා සන්ධි ආශ්‍රීතව ඇතිවන වේදනාවද මෙහිදී දැකගත හැකි රෝග ලක්‍ෂණ වේ.

මුල් සති 12 තුළදී වැළඳීමෙන් කුස තුළ සිටින දරුවාට බලපෑම් ඇති කරවයි. මේ නිසා හෘදය ආශි‍්‍රත ආබාධිත තත්ත්ව, ඇස් හා සම්බන්ධ ගැටලු (ග්ලූකෝමා, ඇසේ සුද ආදී) ඇතිවීමේ ප්‍රවණතාවද ඇති කරයි. එසේ වුවත් අදාළ එන්නත ලබා ගැනීමෙන් සියයට සියයක් රෝගය ඇතිවීම වැළැක්විය විය හැකි බව මතක තබා ගත යුතුයි.

පාසැල් කාලයේදී කුඩා ගැහැණු දරුවන්ට මෙම එන්නත ලබා දුන්න ද එය ලබාගැනීමට නොහැකි වූවා නම් ඒ පිළිබඳ බියක් ඇති කර ගැනීමට අවශ්‍ය නොවේ. ඒ අනුව තමා දරුවෙක් ලබාගැනීමට බලාපොරොත්තු වෙනවා නම් පිළිසිඳ ගැනීමක් ඇතිකර කර ගැනීමට මාස 3 කට පෙර දී එම එන්නත ලබා ගැනීම වැදගත්. එම එන්නත ලබා ගෙන මාස 3කට පසුව දරු පිළිසිඳ ගැනීමක් ඇතිකර ගැනීම තුළින් දරුවාගේ නීරෝගීකම ඔබට ආරක්ෂාකරගත හැකි වේවි.

පැපොල (වැරිසෙල්ලා රෝගය)

කුඩා කාලයේදී වැළඳීම එතරම් හානිදායක නොවුණත් වැඩිහිටි වියේ දී වැළඳුණොත් විවිධ ආකාරයේ ගැටලු ඇතිකර විය හැකියි. විශේෂයෙන් ගර්භණී කාලයේදී පැපොල වැළඳුණහොත් නිව්මෝනියා තත්ත්වයක් ඇතිවීමේ අවදානමක්ද ඇතිවේ. නමුත් මේ සඳහා ද ප්‍රත්‍යක්‍ෂ එන්නත් පවතින අතර යම් අයෙකුට කුඩා කාලයේදී මෙම රෝගය නොවැළඳුණානම් ඒ සඳහා අවශ්‍ය එන්නත් ලබා ගත යුතුයි.

එසේ නොවුණ හොත් අදාළ රෝගියා ගැබිනි කාන්තාවක් නම් මවටත්, දරුගැබටත් හානි පැමිණ විය හැකියි. විශේෂයෙන් මුල් සති 26 තුළදී ළදරු කලලයට ඇතිවන අවදානම ඉහළ දමයි. මෙමඟින් ඇතිවිය හැකි බලපෑම් ලෙස දරුවාගේ සමේ කැලැල් ඇතිවීම, අත් සහ පාද වල අසාමාන්‍යතා, ඇසේ සුද මතු වීම, මෙන්ම මානසික වර්ධනය අඩාලවීමද සිදුවිය හැකියි.

මේ තත්ත්වය Fetal Varicella Syndrom ලෙස හැඳින්වේ. ඒ නිසා ගැබිනි කාන්තාවන් තමාට කුඩා කාලයේදී රෝගය නොවැළඳුනේ නම් අදාළ එන්නත ලබා ගැනීමටද රෝගය වැළඳීමේ ඉඩ කඩ ඇති තැන්වලින් ඉවත්වී සීටීමද ඉතා වැදගත් ජීවිතයේ එක්වතාවක් පමණක් වැළඳෙන මෙම රෝගය වැළඳුණු යම් අයෙක් තමා ළඟින් ආශ්‍රය කළේ යැයි සැකයක් පවතී නම් මුල් දින 10 තුළ වැළඳීම වැළැක්වීමට එන්නත් ලබා ගත යුතුයි. ඒ වගේම නිව්මෝනියා තත්ත්වය නිසා සංකූලතා ඇතිවිය හැකි අතර එම තත්ත්වය වැළැක්වීමට හැම විටම වෛද්‍ය උපදෙස් මත කටයුතු කළ යුතුයි.

පාවෝ වෛරස්

රෝගී තත්ත්වය වැළඳුණු රෝගියෙකු කසින විට, කිව්සින විට රෝගය අසාදනය වන අතර ස්වසන පද්දතිය ආශ්‍රීතව ඇති වන රෝගයක් ලෙසින් හැඳින්විය හැකිය. මෙහිදී ගර්භණී මවට සුළු වශයෙන් සන්ධි ආශි‍්‍රත වේදනාවක්ද ඇතිවේ.

එවැනි රෝගී ගැබිණි කාන්තාවන් 1/3 ක ගේ රෝග නිසා කලලයට බලපෑම් ඇතිකරවිය හැකි අතර එහිදී ඇතිවිය හැකි රෝග අවස්ථා ලෙස දරුවාගේ රුධිර සෛල නිපදවීමේ ක්‍රියාවලිය අඩපණ වීම, ඇමීනියා තත්ත්වය (රක්ත හීනතාවය) මෙන්ම ඒවායේ සංකූලතාවන් නිසා දරුවා කුස තුළම මිය යා හැකිය.

CMV  වෛරස් රෝගය

මෙම රෝගයේදී මවගේ වසා ග්‍රන්ථි ඉඳිමීමට හැකිය. මද වශයෙන් උණක් ද ඇතිවිය හැකි අතර දරුවාට ද බලපෑම් ඇතිවිය හැකියි. ඒවගේම දරුවා ඉපදීමට ඕනෑම කාලයකට පෙර රෝගය ඇතිවිය හැකියි. මේනිසා ඇතිවන ගැටලුකාරී අවස්ථා ලෙස මානසික වර්ධනය අඩුවීම, දරුවා කුස තුළ වර්ධනය අඩුවීම, බිහිරිබව ආදී ආබාධ ඇතිකරවිය හැකිය.

උපුටා ගැනීම දිනමිණ