හා හා පුරා කිරිකැටියා නිවෙසට ගෙනියන මුල්ම දවස අදයි
දස මසක් කුස දරා පෙරුම් පුරමින් සිය කිරිකැටියාගේ මුහුණ දකින්නට මවුපියන් සිටින්නේ නොඉවසිල්ලෙන්. දරුවා උපත ලද බව දැනගත් වහාම දරුවාගේ සමීප නෑ හිතවතුන්ද මහ ගෙදරට එකතු වෙන්නේ අලුත උපන් බිලිදා මහත් සෙනෙහසින් පිළිගැනීමටයි. ඒ වුණත් ඔබේ කිරිකැටියා නිවෙසට ගෙන එන්නට පෙර මේ කාරණා ගැන දැනුවත්ව සිටීම නම් වැදගත්.
නව සාමාජිකයකු ලෙස පවුලට එක්වන දරුවා සම්බන්ධව විශාල වගකීමක් මවුපියන් සතු වෙනවා. දරු ප්‍රසූතිය නිසා කායිකව මානසිකව පීඩාවට පත්වන මවගේ ශරීර සෞඛ්‍ය පිළිබඳ සැමියා මෙන්ම පවුලේ සියලු දෙනාම වැඩි අවධානයකින් සිටිය යුතු වෙනවා. ශරීර අපහසුව හෝමෝන වෙනස්වීම්, වේදනාව හා දරුවා වෙනුවෙන් වෙහෙසීම නිසා ඇය කායිකව හා මානසිකවත් වෙහෙසකට පත්ව සිටින මේ අවධියේදී ඇයට සෑම අයුරින්ම සහාය වීම සැමියාගේ මෙන්ම පවුලේ සැමගේම වගකීමකි.
මවගේ අපහසුතාවන් පිළිබඳ විමසිලිමත්ව කටයුතු කරමින් ඇයව සුවයෙන් තැබීමට ඔබ වඩාත් උනන්දු විය යුතු වන්නේ අලුත උපන් දරුවාගේ සෞඛ්‍ය පිරිහීමටද එය බලපෑ හැකි නිසාය. දරු ප්‍රසූතියෙන් පසුව බොහොමයක් මවුවරුන් මානසික ව්‍යාකූල තත්ත්වයකට පත් වෙනවා. මේ නිසාම ඇයට පවුලේ සියලු දෙනාගේම සහාය අවශ්‍ය වෙනවා. විශේෂයෙන්ම මව දරු ප්‍රසූතියෙන් පසු මුල් දින කිහිපය ගත කරන්නේ ඉතාම අපහසුවෙන්. මේ අවධිය ඇය වඩාත් අවධානයෙන් හා ඉවසීමෙන් ගත කිරීම වැදගත්. එමෙන්ම ඇයට ඇතිවන අපහසුතා කිසිදු පැකිළීමකින් තොරව සිය සැමියාට පැවසිය යුතුයි. එලෙස ඇගේ කාර්යයන්ට සහාය ලබා ගැනීමට ඇගේ සමීපතමයන් දැනුවත් කිරීම වැදගත් වෙනවා. දරු ප්‍රසූතිය කාන්තාවකගේ ජීවිතය වෙනස් කරන අලුත්ම අත්දැකීමක්. කායිකව හා මානසිකව අපහසුතාවට පත්වන මේ අවධිය පිළිබඳ කාන්තාවන් වන ඔබත් පොත් පත් කියවා දැනුවත් විය යුතුයි. එවිට ඇයට ඇතිවන මානසික ආතතියද ක්‍රමයෙන් අඩුවෙයි.
දරුවාගේ සෞඛ්‍ය
මවගේ මෙන්ම මෙලොව එළිය දකින අලුත උපන් බිලිදාගේ සෞඛ්‍ය පිළිබඳවත් ඔබ නිරන්තරයෙන්ම අවධානයෙන් සිටිය යුතුයි. මෙය මවගේ පළමු දරු ප්‍රසූතිය නම් මව කල්තියාම දරුවාගේ හැසිරීම, මවුකිරි දීම, දරුවා නැහැවීම හා දරුවා වඩා ගැනීම වැනි කාරණා ගැන දැන සිටිය යුතු වෙනවා. මේ සමඟම දරුවාගේ කටයුතුවලට මව වැඩිහිටියන්ගේ සහාය හා උපදෙස් ලබා ගැනීමත් වැදගත් වෙනවා. දරුවාට ඇතිවන අපහසුතාවන් ගැන මව නිරතුරුවම අවධානයෙන් සිටිමින් යම් සැකයක් ඇතිවන සෑම විටම පවුලේ වෛද්‍යවරයා හමුවී උපදෙස් පැතීමටත් සැලකිලිමත් වෙන්න.
දරු ප්‍රසූතියෙන් පසු මුල් අවධියේ මවුකිරි දීම මවට ඉතා වෙහෙසකාරි වුවත් පසු කාලීනව මවුකිරි දෙන ආකාරය හඳුනාගත් පසු ඇයට දරුවාගේ හැසිරීම් මනාව වටහා ගැනීමටත් හැකි වෙනවා. මවුකිරි දුන් පසුව නිවැරැදිව දරුවාගේ ගුඩුස් ඇරීම් ඉරියව් හඳුනා ගැනීමෙන් කිරි සිරවීමෙන් දරුවාට ඇතිවන අපහසුතා මඟහරහා ගැනීමටත් ඔබට හැකි වෙනවා.
අලුත උපන් දරුවා නිවෙසට ගෙන එනවිට සමීපතමයන් දරුවා ඇල්ලීමට හා වඩා ගැනීමට උත්සාහ කළත් දරුවාට ඉක්මනින්ම විසබීජ ශරීර ගත වීමට හැකි නිසා සෑමවිටම දෑත් සබන් දමා පිරිසුදු කර දරුවා වඩා ගැනීමට සැලකිලිමත් වන්න.
දරුවාගේ නැපි මාරු කිරීමේදී ද පිරිසුදුකමට මුල් තැනක් දීමෙන් දරුවාට ඇතිවන ආසාදන තත්ත්වයන්ද බොහෝ සෙයින් අවම කර ගැනීමට හැකියි.
නිවෙසේ සිටින වැඩිහිටි දරුවන්ට අලුත් බිලිදා පිළිබඳව ගැබිනි සමයේ සිටම පහදා දෙන්න. ඔහුට හෝ ඇයට සෙල්ලම් කිරීමට මල්ලියෙක් හෝ නංගියෙක් පවුලට එකතු වන බව ඉතාම සෙනෙහසින් කියා සිටින්න. නැත්නම් අලුත උපන් බිලිදාට පවුලේ සියලු දෙනාගේ අවධානය හිමිවීම එම පවුලේ වැඩිහිටි දරුවන් මානසිකව පීඩාවට පත් කරන්නක් විය හැකියි. මේ නිසා එම දරුවාගේ මානසිකත්වය ගොඩනැඟීම මවුපියන්ගේ විශාල වගකීමක්. අලුත උපන් බිලිදාව ආදරයෙන් පිළිගැනීමේ මානසික සූදානමක් ඇති කිරීමට පසුබිම සැලසීම වඩාත් වැදගත් වෙනවා.
අදටත් අලුත උපන් දරුවා සමඟ මව මුලින්ම යන්නේ මවගේ මහ ගෙදරටයි. බොහෝ විට මෙවැනි නිවෙස් පරණ පෙනුමක් ගන්නවා. නමුත් දරුවා නිවෙසට ගෙනයෑමට පෙර නිවෙස් හොඳින් සෝදා පිරිසුදු කිරීම කළ යුතු වෙනවා. හිරුඑළිය හොඳින් වැටෙන කදිම වාතාශ්‍රයක් සහිත කාමරයක් දරුවා සඳහා තෝරා ගන්න.
නිවෙසේ බිම සෝදා පිරිසුදු කිරීම පමණක් නොව දූවිලි සමඟ සිටින මයිටාවන්ව රැඳෙන බිත්තිද පිරිසුදු කිරීමට වගබලා ගන්න. මවුකුසේ සිට මෙලොව එළිය දකින දරුවාගේ ප්‍රතිශක්තිය මුල් අවධියේදී තරමක් අඩුවන නිසා විසබීජවලින් දරුවා ආරක්ෂා කර ගැනීමට දරුවා සිටින අවට පරිසරයත් පිරිසුදුව තබා ගැනීමට උනන්දු වන්න.
උපුටා ගැනීම මව්බිම
