නින්දේ අපහසුතා නිසා ගැබිනි මවට ඇතිවන ගැටලු

ගර්භණී සමයේ දැනෙන අපහසුතා නිසා හොඳ නින්දක් අවශ්‍යම වෙනවා. නමුත් මේ කාලයේදී සුව නින්දකට ගැටලු බොහෝමයක් මතුවිය හැකියි. එයට තිබෙන හේතු විවිධයි. ප්‍රධානම ගැටලුවක් තමයි උදරය ඉදිරියට නෙරා ඒම නිසා තමා කැමැති සුව පහසු ඉරියව්වලට නිදාගත නොහැකි වීම. හුඟක් අය මුණින් අතට හැරිලා කකුල් දෙපසට විහිදුවාගෙන වගේ විවිධ ඉරියව්වලට නිදාගන්න පුරුදු වෙලා ඉන්නවා. නමුත් ගර්භණී සමයේදී එලෙස නිදාගන්න බැහැ. මේ නිසා නින්දට බාධා මතු වනවා. ඒ වගේම සෑම ගැබිනි මවක්ම නිදාගන්නා විට දකුණු ඇළයට හැරී කකුල් මඳක් නවාගෙන නිදාගැනීම හෝ කකුල් අතර කොට්ටයක් තබා ගෙන නිදාගැනීම ඉතාම වැදගත්. මේ කාලයේදී වමනය යනවා, නිතර නිතර මුත්‍රා පිට කරන්න වෙනවා. ඒ නිසාම එක දිගට නිදාගන්න බැහැ. ඒ වගේම ගර්භණී කාලයේ ආහාර ජීර්ණය වීමේ වේගය හරිම අඩුයි. ඒ නිසා නිතර කෑම උගුරට එනවා. ගැස්ට්‍රයිටිස් තිබෙන මවකට මේ තත්ත්වය තරමක් වැඩියෙන් දැනෙන්න පුළුවන්. මේ තත්ත්වයත් නින්දට බාධාවක්. උදරය විශාල වීම නිසා ඇතිවන හුස්ම ගැනීමේ අපහසුවත් මේ කාලයේම දක්නට ලැබෙන තවත් ගැටලුවක්. අනෙක් කරුණ ලෙස ගර්භණී සමයේ දෙපාවල මස්පිඬු පෙරළීමත් වැඩිවනවා. එවිට නින්දට බාධා ඇතිවිය හැකි අතරම, දැඩි වේදනාවක්ද ඇතිවිය හැකියි. ඒ වගේම මානසික ආතතිය නින්දට බාධා කරන තවත් ගැටලුවක්. ලැබෙන දරුවා නිරෝගී වේවිද, ප්‍රසුතිය ගැටලුසහගත වේවිද වැනි සිතුවිලි නිසා මවගේ මනස ව්‍යාකූල විය හැකියි. එයද යහපත් නින්දට බාධාවක් වනවා.  

මේ ගැටලු අවම කරගෙන ගර්භණී සමයට සුව නින්දක් ලබා ගැනීම සඳහා කළ හැකි දේ තිබෙනවා. එනම් නින්දට පෙර නිදාගැනීමට කිට්ටුව තේ, කෝපි බීම වැනි පාන වර්ග ගැනීම සුදුසු නැහැ. ඉන් මුත්‍රා පිටකිරීමේ අවශ්‍යතාව වැඩිවිය හැකියි. නිදාගැනීමට පැය 2, 3කට පෙර ආහාර ගන්න. එවිට ආහාර දිරවීමට කාලය තිබෙන නිසා, ආහාර උගුරට ඒමේ ගැටලුව වළක්වාගන්න පුළුවන්. දෙපාවල මස්පිඬු පෙරළෙන විට මස්පිඬු පෙරළුණු කකුලේ, මහපට ඇඟිල්ල අනෙක් කකුලෙන් පාගා තද කිරීම, බිත්තියට හෝ ඇද විට්ටමට තබා තද කිරීම ආදියෙන් එම තත්ත්වය මඟහරවා ගත හැකියි. ගර්භණී කාලයේ ලබාදෙන කැල්සියම් පෙත්ත රාත්‍රියට ගැනීම මඟින් මෙම තත්ත්වය මඟහරවාගත හැකිය. බොහෝ දෙනෙක් සවස් කාලයට ව්‍යායාමවල නිරත වනවා. එය නින්දට බාධාවක්. එම නිසා උදෑසනට ව්‍යායාමවල නිරත වීම සුදුසුයි. ඒ වගේම නින්දට පෙර මනස සැහැල්ලුව තබාගැනීමත් සුව නින්දකට උපකාරි වනවා. ඒ වගේම නින්ද සඳහා ක්‍රමවත් කාලයක් සහ පුරුදු සකස් කරගැනීම වැදගත්. නින්දට පෙර මුත්‍රා කිරීම, සවස 6ට පමණ හොඳින් වතුර පානය කර නින්දට පෙර පාන වර්ගවලින් වැළකීම. පැණි බීම පානයෙන් වැළකීම සුව නින්දකට හේතුවනවා. එමෙන්ම දරුවා පිළිබඳ යම් මානසික ගැටලුවක් තිබෙන් නම්, ඒ පිළිබඳ වෛද්‍යවරයකු සමඟ සාකච්ඡා කර විසඳුම් ලබාගත හැකිය.

වෛද්‍ය ඉන්දික සේනාරත්න ප්‍රධාන වෛද්‍ය නිලධාරී, ප්‍රසව හා නාරිවේද ඒකකය, දඹුල්ල රෝහල
මව්බිම