නොදැනුවත්කම නිසා ගැබිනි මවට වෙන අනතුරු
ආහාර ගැනීම
වෛද්‍යවරු හැම විටකම ගැබිනි මවට නිර්දේශ කරන්නේ ස්වාභාවිකත්වය ඉස්මතු වුණු ආහාර රටාවක්. ඒ නිසා හැම විටෙකම නිවෙසේදී හදාගන්න ආහාරපාන ගැබිනි මවට සුරක්ෂිත බවක් එක් කරනවා. ඒ හැරුණු කොට “Fast Food” එහෙමත් නැත්නම් ක්ෂණික අහාර ගැබිනි මවට වගේම දරුවටත් තර්ජනයක් ඇති කරවනවා. හැම් බේකන්, චිප්ස් වර්ග, අර්ධ ලෙස තැම්බූ ආහාර වර්ග ගැබිනි මවට ඉතා ඉක්මනින් බඩේ ආසාදන, අජීර්ණ ඇති කරවන්න පුළුවන්. හැකි සෑම විටකම අපිරිසුදු අනාරක්ෂිත ස්ථානවලින් ආහාර ගැනීමෙන් වැළකී සිටිය යුතුයි. හැකි සෑම විටකම නිවෙසේ පිළියෙල වන පිරිසිදු පෝෂ්‍යදායී ආහාර ගැනීමට උනන්දු විය යුතුයි. කෘත්‍රිම බීම වර්ග පානය කිරීම තුළින්ද එහි ඇති විස රසායනිකයන් නිසා දරු ගැබට හානිදායක තත්ත්වයක් ඇති කිරීමට ඉඩකඩ ඇත. සාමාන්‍ය පුද්ගලයන්ට වඩා ගර්භණී කාලයේදී කාන්තාවන්ගේ ශරීරයේ ප්‍රතිශක්තිය ඉතා අඩුය. ඒ නිසා ඉතා පහසුවෙන්ම ආසාදන හා විස රසායන ශරීරගතවීම් සිදුවේ. එය එක එල්ලේ නොවුණද වක්‍රාකාරව පසු කාලයේදී කුසේ වැඩෙන දරුවාට බලපෑම් ඇති කළ හැකිය.
සුරතල් සතුන්ගෙන් ආරක්ෂාව
ගම්බදව ජීවත්වන ගැබිනි මවුවරුන්ට ස්වාභාවික පරිසරයෙන් පවා බොහෝ විට හානිදායක තත්ත්වයක් ඇති විය හැකිය. ගැබිනි මවුවරුන් බල්ලන් හා බළලුන් ඇති දැඩි කිරීමේදී හෝ සුරතල් කිරීමේදී වුවද වඩාත් සැලකිලිමත් විය යුත්තේ එම සතුන්ගේ හපා කෑම්වලට ලක්වීමෙන් ඇතිවන අවදානම වැඩි බැවිනි. ජලභීතිකාවට ගොදුරු වූ අයකු මියයෑමේ ප්‍රතිශතය තරමක් ඉහළය. එනිසා ගර්භණී කාලයේ බල්ලන්ගේ සපාකෑම්වලට ලක්වුණු මවුවරුන්ගේ ජීවිත අවදානමෙන් මුදවා ගැනීමට පළමුව කටයුතු කරයි. මවගේ ජීවිතයේ ආරක්ෂාව මත පමණක් කුසේ වැඩෙන දරුවාගේ ජීවිතයද ආරක්ෂා වන නිසා ප්‍රතිකාර කිරීමේදී පළමුව මවට අවධානය යොමු කරයි. සර්ප විශේෂ බොහොමයක් අප අවට පරිසරයේම ජීවත් වන්නේ උන්ද අපේ පාරිසරික පද්ධතියේම කොටසක් නිසාය. උන් මනුෂ්‍යයන් පසුපස එළවා පැමිණ දෂ්ට කිරීම් නොකළාට අපේ නොදැනුවත්කම මත සර්ප දෂ්ටනයන්ට ගොදුරු වේ. ලංකාවේ ජීවත්වන විෂ අධිකම සර්පයන්ගේ විෂට අපේ ස්නායු පද්ධතිය එක එල්ලේම අඩපණ කිරීමට හැකියාවක් ඇත. එනිසාම සර්ප දෂ්ටනයට ලක්වන ගැබිනි මවුන්ට, සාමාන්‍ය අයකුට වඩා අවදානම වැඩිය. මවගේ රුධිරය හරහා සර්ප විෂ දරුවාටත් ශරීරගත වුවහොත් ඇතිවන සංකූලතාව ඉතා අවදානම්ය. එනිසා ගැබිනි මවුවරුන් අවට පරිසරය පිළිබඳ නිරන්තරයෙන් විමසිලිමත්ව පසුවිය යුතුය.
මානසික සතුට
ලෝක සෞඛ්‍ය සංවිධානය අර්ථ දක්වන ආකාරයට සෞඛ්‍ය යනු කායික, මානසික, ආධ්‍යාත්මික හා සමාජයීය යන සිවු අංගයන්හි නිරෝගීතාවයි. මේ අංගයන් එකක් හෝ බිඳවැටෙන අයකු රෝගියකු ලෙස හැඳින්වේ. කායික සෞඛ්‍ය බිඳ වැටුණු විට එක එල්ලේම හඳුනා ගත හැකි වුවත් ඉතිරි කාරණා ත්‍රිත්වය බිඳ වැටුණු විට එය පෙන්නුම් කෙරෙනුයේ දීර්ඝ කාලීනවය. ගැබිනි මවකගේ ඉහත කී කාරණා ත්‍රිත්වය බිඳ වැටුණු විට දරුවා උපදින විටම රෝගී ලක්ෂණ පෙන්නුම් නොකළද පසුකාලීනව මානසික, සමාජයීය හා ආධ්‍යාත්මික සෞඛ්‍ය බිඳුණු අයකු බව පෙනී යයි. එනිසාම සෑම විටකම ගැබිනි මව තම මානසික සතුට නිරෝගීතාව පිළිබඳ අවධානය යොමුකිරීම කළ යුතුය. ගැබිනි මවකට තම ස්වාමියාගේ දුම්පානය වක්‍රාකාරව බලපෑම් ඇති කරන්නකි. ඇගේ කුසේ උපදින දරුවා අධි ක්‍රියාකාරි දරුවකු ලෙසට හෝ අඩු ක්‍රියාකාරි දරුවකු ලෙසට උපත ලබනුයේ මවගේ අර්ධ දුම් පානයයි. තම ස්වාමියාගේ දුම් පානය හෝ මත්පැන් පානය ගැබිනියකගේ මානසික සෞඛ්‍යයටද තර්ජනයක් ඇති කරවයි.
නින්ද ඉතා වැදගත්
දිනකට පැය 7 - 8ක නින්දක් ගැබිනි මවකට අනිවාර්යයෙන්ම ලැබිය යුත්තේ එය ඇගේ කුසේ වැඩෙන දරුවාට රුකුලක් වන බැවිනි. නිවෙසේ හෝ කාර්යාලයේ කෙතරම් වැඩ රාජකාරී තිබුණද සුව නින්දක් ලැබීම හා නිසි ව්‍යායාම් කිරීම තුළ තමන්ගේ සෞඛ්‍යයට මෙන්ම දරුවාගේ සෞඛ්‍යයටද හිතකර බලපෑමක් එල්ල කිරීමට හැකියාව ඇත. ව්‍යායාම් කිරීමේදී හිතුමනාපයට එය නොකර වෛද්‍ය උපදෙස් මත ව්‍යායාම් කිරීමෙන් ගැබිනි සමයේ ඇතිවන අවදානම් තත්ත්ව පවා මඟහරවා ගත හැකිය.
රෝග ඇතිවීමේ අවදානම
ගැබිනියකගේ ප්‍රතිශක්තිය අන් අයගේ ප්‍රතිශක්තියට වඩා අඩුවන නිසා රෝග වැලැඳීමේ අවදානම ඉතා ඉහළය. එනිසා නිතරම සෙනඟ ගැවසෙන ජනාකීර්ණ ස්ථානවලදී ගැබිනි මවට රෝග බෝවිය හැකිය. ගැබිනි මවක් රෝගයකට ගොදුරු වූ විටක වුවද ඒ සඳහා සුදුසුකම් සහිත වෛද්‍යවරයකුගෙන් පමණක් ප්‍රතිකාර ලබාගත යුත්තේ නිසි ප්‍රමිතියකින් තොරව හා ගැබිනි මවකට නුසුදුසු ඖෂධ ගැනීමෙන් ගර්භයට හානි විය හැකි නිසාය. ගැබිනි මවකට එක්ස් කිරණ එතරම් හිතකර නොවේ. එයින් කලලයේ විකෘතිතා වුවද ඇතිවිය හැකිය. ඔබ ඕනෑම අවස්ථාවකදී වෛද්‍යවරයකු හමුවන විට ඔබේ ගර්භණීභාවය පිළිබඳ කල්තියාම ඔවුන්ට දන්වන්න. ඔබට ගර්භණී කාලයේදී සංකූලතා ඇතිනම් ඒ පිළිබඳ නිරන්තරයෙන්ම සැලකිලිමත් වන්න. සුළු රුධිර වහනයකදී වුවද වෛද්‍ය උපදෙස් පැතිය යුත්තේ එයින් ඔබේ ගර්භයට ඇතිවන හානි අවම කිරීම සඳහාය. සම, මේද ස්තරය, ගර්භාෂ බිත්තිය, තරලය ආදී හැම ආරක්ෂා කිරීමට විවිධ උපක්‍රම මනුෂ්‍ය ශරීරයෙන්ම සැකසී ඇත. කුසට ඇතිවන අධික තෙරපීමක් වුවද ගැබට දරාගත හැකි වුවත්, එයින් ඇතිවන සංකූලතා එක එල්ලේම දැකගත නොහැකි වුවත් එම සංකූලතා පසු කාලයේදී වුවද දැකගත හැකිය. මෙසේ මානසික සෞඛ්‍ය බිඳ වැටීම තුළ ශරීරයේ පවතින හෝමෝන මට්ටම් වෙනස් වීම පවා දරුවාට බලපෑම් ඇති කරන බව අමතක නොකළ යුත්තකි.
වෛද්‍ය ඉන්දික සේනාරත්න
සවනි ශේෂාදි හර්ෂා
උපුටා ගැනීම මව්බිම
