මව්කුස සිටින දරුවාගේ අංගෝපාංග හරියාකාරව පිහිටා තිඛෙනවාද?
මෙවර Meet Your Doctor වැඩසටහනට සහභාගී වූයේ ප්‍රසව හා නාරිවේද පිළිබඳ විශේෂඥ වෛද්‍ය විජිත් විද්‍යාභූෂණ මහතායි. මෙම සාකච්ඡාවේදී ගැබිනි කාන්තාවකගේ දින නිර්ණය කිරීම ඒ සම්බන්ධ සිදු කරන පරීක්ෂණ මෙන්ම විවිධ ස්කෑන් පරීක්ෂණ ද දරුවා බිහි කිරීමේදී ඇතිවන තත්ත්වයන් පිළිබඳවද විමසා බලන ලදී.
ගැබිනි මවකගේ දින ගණනය කිරීමේ පරීක්ෂණයේ වැදගත්කම පිළිබඳව පැවසුවොත්?
එම පරීක්ෂණය දින නිර්ණය කිරීමේ පරීක්ෂණය නම් වේ. සති 10 -14 අතර කාලයේදී මෙය සිදු කරනු ලැබේ. නමුත් මේ සඳහා වඩාත් සුදුසු අවසන් වරට ඔසප් වූ දින සිට 12ක් ගත වූ පසු සිදු කරන ස්කෑන් පරීක්ෂණයයි. ඕනැම ගැබිනි කාන්තාවක් සති 7,8 ක් ගත වනවිට වෛද්‍යවරයෙක් වෙත යොමු වී ස්කෑන් පරීක්ෂණයක් කර ගත යුතු අතර එමඟින් දින නිර්ණය කිරීමේ පරීක්ෂණයට නියමිත කාලයේදී සහභාගී විය හැකියි. ඒ වගේම මෙම ස්කෑන් පරීක්ෂණයෙන් දරුවාගේ ඇතැම් අංගෝපාංග නිවැරදිව සකස් වී තිබේදැයි බලාගැනීමේ හැකියාවක් ද තිබේ. ඒ වගේම දින නිර්ණය කිරිමේ පරීක්ෂණය ගර්භණීත්වයේ ප්‍රධානතම අඩිතාලම ලෙසින් ද හැඳින්විය හැකියි.
විවිධාකාර ස්කෑන් පරීක්ෂණ පිළිබඳවත් ඒවායේ වෙනස්කම් පිළිබඳවත් යම් අදහසක් පැවසුවොත්...
විශේෂයෙන් චතුර්මාන ස්කෑන් පරීක්ෂණ මඟින් කලලයේ අංග වර්ධනය නොවුණ අවස්ථා ද පැහැදිලිව හඳුනාගත හැකි වේ. ඒවා දෙමාපියන්ට පෙරදී පෙන්වාදීමේ හැකියාවක්ද ඉන් ලැබේ. මෙය ස්කෑන් පරික්ෂණයක් ලෙසින් ද හැඳින්විය හැකියි. ඒ වගේම සති 16 - 17දී සිදු කරන ස්කෑන් පරීක්ෂණයකදී සජීවි රූපයක් ලෙස දරුවාව දැකබලා ගත හැකි වේ.
දරුවා බිහිවන දිනය පිළිබඳ නිෂ්චිතව පැවසිය හැකිද?
බොහෝදෙනෙක් තමාගේ දරු ප්‍රසූතිය සිදුවන්නේ කුමන දිනක කෙසේද යන්න පිළිබඳව නිශ්චිතව දැනගැනීමට දැඩි කැමැත්තක් දක්වනවා. ඊට හේතුවද තමාගේ එදිනෙදා කටයුතු සහ කාර්යයාලීය කටයුතු නිසිලෙස සැලසුම් කර ගැනීමට එය ඉතා වැදගත් වන නිසයි. එසේ නිශ්චිතව දරුවා ප්‍රසූත වන දිනයන් ප්‍රකාශ කිරීම අපහසු කටයුත්තක්. නමුත් ඇතැම් කාන්තාවන් අපි විසින් ලබා දෙන දිනයටම දරුවා බිහිවිය යුතුම යැයි බලාපොරොත්තු වෙනවා. නමුත් දරුවා බිහිවන දිනය බොහෝ මව්වරුන්ගේ සති 37ට පසුව සිදුවන අතර 37ට අඩුවන බිහිවීම් නොමේරු දරු උපතක් ලෙසින් හඳුන්වනවා. සාමාන්‍යයෙන් සති 37ට පසුව බිහිවේ යැයි දින ලබාදෙන කාන්තාවන් දරුවා බිහිකිරීම සති 37 - 40ත් අතර සිදුකළ හැකි අතර එහි ප්‍රමාණය මුළු ගර්භණී කාන්තාවන්ගෙන් 60%කි. ඒ වගේම 15%ක් පමණ දෙනා සති 40න් පසුවද දරුවා බිහිකර හැකියි. එවැනි අවස්ථාවක දරුවාගේ පිහිටීම වෛද්‍යවරයා පරීක්ෂා කර බලන අතර නිවැරදි ලෙස හිස පහතට පිහිටා තිබේදැයි විමසා බැලෙයි. එහිදී හිස පහතට පිහිටා ඇත්නම් සාමාන්‍ය දරු ප්‍රසුතියකට යා හැකි අතර තට්ටම පහතට පිහිටා ඇත්නම් එවිට සාමාන්‍ය ලෙස දරු උපතක් සිදු කළ නොහැකි වේ. සාමාන්‍යනේ සති 37ට පසුව දරුවෙක් බිහිවන විට වෛද්‍යවරු එහිදී සාධක ගණනාවක් පිළිබඳ සැලකිලිමත් වේ. ඒ සාධක අතර දරුවාගේ බර, මවගේ උස හා දරුවා අවට තරල ප්‍රමාණය සායනික ඉතිහාසය, වයස ආදී දේ පිළිබඳ සලකා බලා සාමාන්‍ය දරු ප්‍රසූතියකට සුදුසු දැයි විමසා බැලේ. මෙහිදී දිනයක් නියමිත ලෙස ප්‍රකාශ කළ නොහැකි අතර එය ස්වභාවිකව තීරණය වන සාධකයකි. සාමාන්‍ය ප්‍රසූතියේදී ශ්ලේෂ්මල සමඟ රුධිර වහනයක් ඇතිවිය හැකි අතර ගැබ්ගෙල ඈත් වීමත් සමඟ ඒවා පිටතට පැමිණේ. ඒ සමඟම වේදනාවක් ද හටගත හැකියි. තවත් සමහරවිට කිසිදු වේදනාවක් නොමැතිව වතුර බෑගය කැඩීයාමට හැකි වේ. මෙවැනි තත්ත්වයක් තිඛෙනවා නම් ප්‍රසූත අවස්ථාවට ආසන්න බව හැඟවෙනවා. ඒ වගේම දරු ප්‍රසූතියේදී වෛද්‍යවරු විවිිධ උපකරණ භාවිතා කරන අතර ඒ සියල්ල ප්‍රසූත අවස්ථාවට මුහුණ දෙන කාන්තාවගේ පහසුවට බව මතක තබා ගත යුතු වේ.
දරුවා බිහි වීමේදී ඇතිවන ගැටලු...
දරුවා බිහිවන අවස්ථවේදී දරුවාගේ හිස පහතට පිහිටීමෙන් මවට නිසිලෙස දරුවා පිටතට තල්ලු කිරීමට නොහැකි විය හැකියි. මේ සඳහා මවට විවිධ හේතු පැවතිය හැකි වේ. මෙවැනි විටෙක වැකියුම්කප් එකක් භාවිතා කර ගැබ්ගෙල විවර වී දරුවාගේ හිස පහතට පැමිණ තිඛෙන විට දරුවා සුදුසු පීඩනයක් යොදා ඉවත් කර ගනියි.
නුවන්ති කුලරත්න
උපුටා ගැනීම දිනමිණ පුවත් පත
