අඩු මාසයකින් දරුවා ඉපදෙන්නේ ඇයි?
යුවතියකගේ සුභ සිහිනය මල්පල ගැන්වී ඇරැඹී යුගදිවියේ ඊළඟ වූත්, උතුම් වූත්, උත්තරීතර වූත් සිහිනය මව් පදවියයි. මේ කතා කරන්නේ ඒ උත්තරීතර මව්පදවියට සුදානම් විය යුත්තේ කෙලෙසද යන්න පිලිබඳවය. ගැබිණි සමයේදී අප වඩාත් වැඩි අවධානයක් යොමු කරමින් පෝෂ්‍යදායි ආහාර රටාවකට පුරුදුව සිටින්නේ තවත් ප්‍රාණයක් ජිවත් කරවීමේ සහ එම ප්‍රාණය නිරෝගී සෞඛ්‍ය සම්පන්න බවින් යුතුව මෙලොවට භාර කිරීමේ වගකීම ඇත්තෙත් ඒ උත්තරීතර පදවිය දරන්නට සුදානම් වෙන ඔබ අතේ බැවිනි. එමනිසා ගැබිණි සමයේදී මවකට අවශ්‍ය කරන විටමින් අවශ්‍යතාවයන් සහ ඒවායේ ඇති වැදගත් කම පිළිබඳව කතා බැහැ කරමු.
ෆෝලික් අම්ල පෙති.
දරු පිළිසිඳ ගැනීමට ප්‍රථමව සහ පිළිසිඳ ගැනීමෙන් අනතුරුව මුල් ප්‍රසව අවධියේදී හෙවත් පළමු සති 12 තුළ ලබා ගැනීමට අනුමත කරන එකම විටමින් වර්ගය මෙයයි. කළලයේ නිරෝගී වැඩීමත් මොළයේ සහ ස්නායු පද්ධතියේ පුර්ණත්වයත් උදෙසා මව විසින් මෙම විටමිනය ලබා ගැනීම ඉතාමත් යෝග්‍යයි. එසේ නොවුනහොත් උපදින දරුවාගේ මිලයේ හා ස්නායු පද්ධතියේ සංකුලතා ඇති වේ.ඇතැම් අවස්තාවක දරුවා කුස තුලම මිය යාමට මෙම සංකුලතාවයම බලපෑම් කරනු ලැබේ. එනිසා ඔබ දකින නිරෝගී දරු සිහිනය යතාර්ථයක් බවට පත්කර ගැනීමේ වගකීම ඔබ සතු වන බව වඩාත් අවධාරණය කර ගත යුතුය. ඔබ දිනපතාම ලබාගන්නා ආහාර වේල සමබල පෝෂ්‍යදායි නම් එමගින්ද ඔබට අවශ්‍ය ප්‍රමාණයට ෆෝලික් අම්ලය ශරීරයට ලැබෙන්නේය. සාමාන්‍යයෙන් දරුවෙකු පිළිසිඳ ගත් බව කාන්තාවක දැනගන්න විට කළලයට සති 6 පමණ වන බව බවත් සාමාන්‍යයෙන් මේ කාලය වෙන විට කළලයේ ස්නායු පද්ධතිය සෑදීම ආරම්භ වි හෝ එහි වර්ධනය සම්පූර්ණ වෙමින් පවතී. කළලයට සති 12 පිරෙන විට එහි මොලය හා ස්නායු පද්ධතිය සම්පුර්ණයෙන්ම වර්ධනය වි අවසාන වන්නේය. ඉහත පැහැදිලි කිරීම අනුව අප ඔබට දැනුම් දීමට උත්සාහ ගත්තේ කළලයේ මුල් අවධියේදී එහි වර්ධනය සිදු වෙන ආකාරයත් ඒ සඳහා ෆෝලික් අම්ල පෙති විවාහ පත් වූ විට හෝ ඊට පෙර ලබා ගැනීමේදී හෝ දරු පිළිසිඳ ගැනීමකට පෙර ලබා ගැනීමේ වරදක් නැත. එය නුදුරේදී සිදුවන දරු පිළිසිඳ ගැනීම සඳහා ඉතා යහපත් වන්නේය. මේ විටමින් පෙත්ත දවසකට එක බැගින් ගැනීම ප්‍රමාණවත් වේ. එහෙත් වලිප්පුව, දීර්ඝ කාලින දියවැඩියාව වැනි රෝගයන්ගෙන් පෙළෙන්නේ නම් හෝ මොළයේ හා ස්නායු ආබාධ සහිත දරුවෙකු මිට ප්‍රථම බිහිකර ඇත්නම් එවැනි මවක මෙම විටමිනය ඉහත ප්‍රමාණයට වඩා වැඩි ප්‍රමාණයක් ගත යුතුය. නමුත් විටමින් ලබා ගැනීමට ප්‍රථම ඒ සඳහා වෛද්‍යවරුන්ගේ උපදෙස් ලබා ගැනීම අනිවාර්ය වේ.
යකඩ (Iron)
ගැබිණි සමයේදී තවත් වැදගත් කමක් උසුලනු ලබන මෙම ඛනිජ සංඝටකය දරු පිළිසිඳ ගැනීමට පෙර සිටම ලබා ගැනීමට අවශ්‍ය නොවේ. ඒවා ලබා ගත යුතු වන්නේ නම් එය ඔබේ වෛද්‍යවරයා විසින් නිරක්තිය වැනි සමහර රෝගී අවස්ථාවන්හිදී පමණක් රුධිරය පරික්ෂා කිරීමකින් පසුව ලබා දේ. නමුත් නිරක්තිය බහුල ප්‍රදේශ ලෙස හදුනා ගත් ඇතැම් ප්‍රදේශ වල(තේ වතු ආශ්‍රිතව) කාන්තාවන්ට යකඩ පෙති ලබා දීම සිදු කරයි.
කැල්සියම් (Calsium)
දරුවෙකු පිළිසිඳ ගැනීමට පෙර කැල්සියම් පෙති ලබා ගත යුතු වන්නේ ශරීරයේ කැල්සියම් ප්‍රමාණය අඩු රෝගී අවස්ථා වලදී පමණි. එසේම ඔබ කැල්සියම් අඩංගු කිරි, බිත්තර, හාල්මැස්සන්, කුඩා මාළුන් වැනි දෑ ආහාරයට ගන්නේ නම් එය ප්‍රමාණවත් වේ. සමබල ආහාර වේලක් තුළ මේ සංඝටකය අඩංගු වන්නේය.
අයඩින් (Iodine)
ගර්භනී අවදියේදී අයඩින්ද ඉතාමත් අවශ්‍ය පෝෂණ සංඝටකයකි. අඩු උස සහිත (Cretinism) දරුවන් බිහි වීමටත්, දරුවාගේ මාංශ සහ අස්ථි වැඩිම ප්‍රමාද කිරීමටත් නිසි ප්‍රමාණයට අයඩින් නොලැබීම හේතු වන්නේය. එසේම උපදින දරුවා අඩු තයිරොයිඩ් ග්‍රන්ථි ක්‍රියාකාරිත්වයක් සහිතව උපදී (Neonatal Hypothyrodism)
සින්ක් ( Zinc)
රුධිරයේ අඩු සින්ක් ප්‍රමාණයක් ඇති අවස්ථාවක දරුවෙකු පිළිසිඳ ගත් විට දරුවා අඩු මාස වලින් ඉපැදීම හා කළලයේ වර්ධනය අඩු වීම සිදු වේ. නමුත් කිරි හා කිරි ආශ්‍රිත ආහාර වලින් ප්‍රමාණවත් පරිදි සින්ක් ලබා ගන්නට පුළුවන්ය. ඒ අනුව ඔබ ගර්භනී අවධියේදී කළලයට වඩා වැදගත් වන පෝෂණ සංඝටක පිළිබඳවත් එම පෝෂණ කොටස් අහිමි වීම සහ අවම වීමෙන් කළලයට වන බලපෑම පිළිබඳවත් දැනුවත් වූ නිසා ලබන සතියේදී ගර්භනී සමයේ ඔබේ අවධානය යොමු විය යුතු තවත් පැතිකඩක් පිළිබඳව විමසා බලමු.
නාරි හා ප්‍රසව විශේෂඥ වෛද්‍ය භාග්‍ය ජයසිරි
උපුටා ගැනීම දියණිය.
