අනෝදාවලින් සුවය ලබා තියෙනවා
ලොකු කුඩා කවුරුත් පිනවන රසවත් පලතුරක් වන කටු අනෝදා දේශීය පලතුරු වර්ග අතර ප්‍රමුඛස්ථානයක් ගන්නා ආහාරයකි. ගුණාත්මක බවින්ද අධික පලතුරක් වන මෙය මුහුදු මට්ටමේ සිට අඩි 650ක තරම් උස් භූමියේ ගල් බොරලු සහිත පසේ වුවද රෝපණය වේ. ගැමි පරිසරවල බහුල වශයෙන් දක්නට ලැබෙන අනෝදා නාගරික පරිසරයට තරමක් දුර්ලභ පලතුරකි. කැරිබියන් දූපත් සහ මධ්‍යම අමෙරිකාව නිජබිම් කරගත් අනෝදා ලංකාවේදී විවිධ ප්‍රදේශවල ව්‍යාප්තව පවතී. රසවත්, ගුණවත් පලතුරක් ලෙස ප්‍රචලිත අනෝදා අප දේශීය වෛද්‍ය විද්‍යාවේදී ඖෂධයක් ලෙස භාවිත කරන්නේ යැයි පැවසුවහොත් ඔබ මවිත විය හැකිය. සැබැවින්ම අනෝදා යනු අප ආයුර්වේදයට අනුව රෝග රැසකට ගුණ දෙන සුවිශේෂී ඖෂධයකි. මෙම අද්විතීය ඖෂධය භාවිත කොට අප ශරීරයේ හටගන්නා බාහිර සහ අභ්‍යන්තර රෝග රැසකට සුවය ලබාදෙන ඖෂධ ආයුර්වේද වෛද්‍ය විද්‍යාවේ සඳහන් වේ. ගුණාත්මක බවින් සහ රෝග නාශක ගුණයෙන් සමන්විත අනෝදා ශාකය හරහා රෝග රැසකට ගුණදෙන විශිෂ්ට ඖෂධ නිවෙසේ සිටම සාදාගත හැකි ආකාරය පිළිබඳ "මව්බිම"ට පැවැසීමට කොළඹ විශ්වවිද්‍යාලයට අනුබද්ධ රාජගිරිය ආයුර්වේද වෛද්‍ය විද්‍යා ආයතනයේ ෙජ්‍යයෂ්ඨ කථිකාචාරිනී එස්. කේ. එම්. කේ. හැරපත්දෙණිය මහත්මිය ඉදිරිපත් වූවාය.
අපේ සමාජයේ බහුතරයක් දෙනෙක් ආස කරන රසවත් පලතුරක් තමයි කටු අනෝදා කියන්නේ. ගොඩක් දෙනෙක් අතර මේක ප්‍රචලිතයි හොඳ රසවත් පලතුරක් විදියට. නමුත් අපේ දේශීය ආයුර්වේදයට අනුව අනෝදා කියන්නේ රෝග රාශියකට සම්පූර්ණ සුවය ලබාදෙන ඉතාමත්ම ගුණාත්මක බවින් සපිරුණු ඖෂධයක්. අපේ දේශීය ආයුර්වේදය පිළිබඳ ලියැවුණු වසර දහසකටත් වඩා ඉපැරැණි ආයුර්වේද ග්‍රන්ථ කිහිපයකම මේ රෝග නාශක ගුණය ඇති විශිෂ්ට අනෝදා ඖෂධය ගැන සඳහන් වෙනවා. අපේ ආයුර්වේදයට අනුව මේ ශාකය කෘෂ්ණ බීජ, මෘදු ඵල, රාම ඵල යන නම්වලිනුත් හඳුන්වනවා. අනෝදා ගෙඩියේ බීජ කාල වර්ණයෙන් සමන්විත නිසයි මෙය "කෘෂ්ණ බීජ" කියලා හඳුන්වන්නේ. ඒ වගේම අනෝදා ගෙඩියේ පිට පොත්ත කොස් ගෙඩියක වගේ ඝනකම කටු තිබුණට ගෙඩිය ඉදුණම ඉතාමත්ම සිනිඳුයි. ඒ නිසයි මේ ඖෂධිය ශාකයට "මෘදු පල" කියල හඳුන්වන්නේ. රාමා කියන්නේ. ජනතාව ඉතාමත් ගෞරවයෙන් අදහන දෙවි කෙනෙක් දේවත්වයෙන් සලකන රාමාටත් මේ ඖෂධීය ශාකය උපමා කළ නිසයි මෙය රාම පල කියලත් හඳුන්වන්නේ.
දේශීය ආයුර්වේදයට අනුව අනෝදා වර්ග 3ක් තිබෙනවා. කටු අනෝදා, වැලි අනෝදා, සීනි අනෝදා ඒ තුනයි. අපි ආයුර්වේදයට අනුව ඖෂධ සඳහා භාවිත කරන්නේ කටු අනෝදා. සීනි අනෝදා ශීත ප්‍රදේශවල තරමක කුඩා ගෙඩියක් ලෙස හටගන්න පලතුරක්. වැලි අනෝදා කියන්නෙත් හොඳ රසවත් පලතුරක්. පොදුවේ මේ පලතුරේ හැම වර්ගයක්ම ආහාරයක් ලෙස ගන්නවා. අපි දේශීය ඖෂධ නිෂ්පාදනය සඳහා අනෝදා ගෙඩි, බීජ, ගහේ පත්‍ර, පොතු සහ මල් කියන හැම අංගයක්ම යොදා ගන්නවා. මෙම ශාකයේ පවතින පෝෂණ ගුණ ගත්තම සීනි, පොටෑසියම්, සෝඩියම්, යකඩ, මැග්නීසියම්, විටමින් ඒ, විටමින් බී, විටමින් සී වගේ පෝෂණ ගුණ රැසක් පවතිනවා. ඒ පමණක් නෙවෙයි අනෝදාවලටම ආවේණික රසායන විශේෂයක් පවතිනවා. මේ සෑම කරුණක් නිසාම මේ ශාකයේ සුවිශේෂී ඖෂධීය ගුණයක් පවතිනවා. කටු අනෝදා ශාකයේ උද්භිද විද්‍යාත්මක නාමය Annona Muricata වන අතර මෙය A. muricata
කුලයට අයත් ඖෂධීය ගුණ සපිරි පලතුරකි. මුත්‍රාශ්‍රය ආශ්‍රිත සෑම රෝගයක් සඳහාම ගුණාත්මක ඖෂධයක් වන අනෝදා තවත් රෝග රාශියකට සුවයක් ලබාදෙන අද්විතීය ඖෂධයක් බවද හැරපත්දෙණිය මහත්මිය පැවැසුවාය. මුත්‍රා ගල්, මුත්‍රා අඩස්සිය, මුත්‍රා දැවිල්ල ආදී මුත්‍රා ආසාදන සඳහාද පණු රෝගය සඳහාද, හිස්හොරි උකුණන් වඳ කිරීම සඳහාද, ලේ පිටවන අර්ශස් රෝගය ආදී තවත් රෝග රැසකටද අනෝදා හොඳ රෝග නාශක ගුණය ඇති ඖෂධයක් බවද ජේ‍යෂ්ඨ කථිකාචාරිනිය පැවැසුවාය. එවන් රෝග පීඩාවන්ගෙන් පසුවන සෑම පුද්ගලයකුටම එම රෝගය සුවකර ගැනීම සඳහා අනෝදා ශාකයෙන් ගුණාත්මක ඔෟෂධ සිය නිවෙසේ සිටම සාදාගත හැකි ආකාරය පිළිබඳ හැරපත්දෙණිය මහත්මිය අපට පැවැසුවාය.
අනෝදා කියන්නේ මුත්‍රාශ්‍රය ආශ්‍රිතව හටගන්නා සෑම මුත්‍රා රෝගයකටම සුවය ලබාදෙන ඖෂධීය ශාකයක්. මුත්‍රා දැවිල්ල, මුත්‍රා, සමඟ ලේ පිටවීම විතරක් නෙවෙයි මුත්‍රා ගල් දියකර විනාශ කිරීමේ හැකියාවකුත් අනෝදාවල තිබෙනවා. එවන් මුත්‍රා ආසාධනයකින් යම් කිසි පුද්ගලයෙක් පීඩා විඳිනවා නම් අනෝදා පලතුරක් ලෙස ආහාරයට ගැනීමෙන් වගේම අමු අනෝදා ගෙඩි වෑංජනයක් ලෙසින් සාදාගෙන (දෙල් පිසින ආකාරයට) ආහාරයට ගන්නව නම් සෑම මුත්‍රා රෝගයකටම ඒක හොඳ ප්‍රතිකාරයක්. අනෝදා වෑංජනය හොඳ රසවත් ආහාරයක් වගේම රෝග සුවකරන වටිනා ඖෂධයක්.
ඒ වගේම තමයි මුත්‍රා ගල් ඇති රෝගීන්ට තවත් වටිනා ගුණාත්මක සුප් එකක් අනෝදාවලින් හදාගන්න පුළුවන්. වෙනත් එළවළු කැබැලි සමඟ අමු අනෝදා කැබැලි කිහිපයක් එකතු කරලා ඇති ප්‍රමාණයට වතුර මිශ්‍ර කර තම්බාගෙන සතියකට අවමය දින තුනක්වත් ඒ සුප් එක අඛණ්ඩව මාසයක් පමණ පානය කරනවා නම් මුත්‍රා ගල් දියවෙලා යනවා.
තවත් කරුණක් තමයි ඇතැම් අය මුත්‍රා දැවිල්ල නිසා පීඩාවට පත්වෙලා සිටිනවා. ඒ සඳහා ගුණ දෙන කෂායක් අනෝදා කොළවළින් හදාගන්න පුළුවන්. අනෝදා කොළ දෙමිටක් විතර අරගෙන වතුර පත අටක් මිශ්‍ර කරලා පත එකට සිඳුවා දිනපතා උදේ සවස පත භාගය බැගින් සතියක් පමණ බොන්න ගන්නව නම් මුත්‍රා දැවිල්ල නැති කරගන්නම පුළුවන්. ඒ වගේම ඒක හොඳ මුත්‍රා කාරකයක්.
අනෝදා ගෙඩියේ ඇටවල සුවිශේෂී රසායනික ගුණයක් පවතිනවා. එමඟින් ශරීරයේ ඇතුළත සහ පිටත ඉන්න පරපෝෂීන් ඉවත් කිරීමේ හැකියාවක් තිබෙනවා. ඒ අනුව යමකුගේ හිසේ උකුණන් බහුලව ඉන්නව නම් එයින් මිදෙන්න හොඳ ප්‍රතිකර්මයක් මම කියන්නම්. අනෝදා ඇට ටිකක් අරගෙන සිහින් කුඩු වෙනකන් හොඳින් කොටාගෙන ඒ කුඩට ඇල්දිය ස්වල්පයක් මිශ්‍ර කරලා උකු ද්‍රාවණයක් බවට පත්කරගෙන හිසේ ආලේප කරන්න. දවසට වරක් ආලේප කරලා පැය 2ක් පමණ ඉඳලා හිස සෝදන්න. මේ ක්‍රියාවලිය දින හතක් පමණ එක දිගටම කරනවා නම් උකුණන් වඳ කරගන්න ඔබට පුළුවන්. මෙය අතුරු ආබාධ කිසිවක් නැති හොඳ දේශීය ඖෂධයක්. මේ ක්‍රමය මඟින් උකුණන් බෝවීම වළක්වා ගන්න පුළුවන් කියලා අපි පර්යේෂණ මට්ටමෙන් පවා තහවුරු කරලා තිබෙනවා.
අද සමාජයේ වෙසෙන ගොඩක් දෙනකුට පීඩාගෙන දෙන රෝගයක් තමයි රුධිරය පිටවන අර්ශස් රෝගය. එහිදී රුධිර වහනය නවතා අර්ශස් රෝගය දුරු කරන්න හොඳ කෂායක් අනෝදා කොළවලින් හදාගන්න පුළුවන්. අනෝදා කොළ ටිකක් අරගෙන ඒකට රතු ලූනුයි සුදුරුයි කලම් තුන ගාණෙ අරගෙන ඒකට වතුර කෝප්ප 8ක් එකතු කරලා පත එකට සිඳෙනතුරු තම්බා උදේට පත භාගයයි හවසට පත භාගයයි වන විදියට දින පහක් මේ කෂාය බොන්න. රුධිරය වහනය වන අර්ශස් රෝගය සුවයට ඒක හොඳ ඖෂධීය කෂායක්.
අද වනවිට කාන්තාවන්ට සේම පිරිමින්ටද හිස්හොරි ගැටලුව නිසා ගැටලුවලට මුහුණ පෑමට සිදුවේ. සමාජයෙන්ද අප්‍රසාදයට ලක්වන ඉස්හොරි කරදරයෙන් මිදීම සඳහාද අනෝදා ඇට මඟින් ඖෂධයක් සාදාගත හැකි බවද හැරපත්දෙණිය මහත්මිය පවසන්නීය. අනෝදා ඇට, අමු කහ, කොහොඹ කොළ සමඟ අඹරා හිසේ ආලේප කර පැය කිහිපයකින් හිස සෝදා හැරීමෙන් හිස්හොරි ගැටලුවෙන් අත්මිදිය හැකි බවද ජේ‍යෂ්ඨ කථිකාචාරිනිය පැවැසුවාය. එම ප්‍රතිකර්මය අඛණ්ඩව දින කිහිපයක් සිදු කිරීම මඟින් බොහෝ දෙනකුට සාර්ථක ප්‍රතිඵල ලැබුණු බවද හැරපත්දෙණිය මහත්මිය පැවැසුවාය.
මුඛය ආශ්‍රිත රෝග රැසක් සඳහාත් අනෝදා ගුණ දෙන ඖෂධයක්. විදුරු මස් දියවීම, කටේ තුවාල ඇතිවීම, වීදුරු මසින් ලේ ගැලීම් වගේ රෝගවලදී අනෝදා කොළ ග්‍රෑම් 60ක් පමණ අරගෙන අමු කහ ස්වල්පයක් ඒකට මිශ්‍රකර හොඳින් අඹරා ගන්න. හොඳින් අඹරාගත් ඒ මිශ්‍රණය තල තෙලින් කකාරා අරගෙන වීදුරු මසේත් මුඛයේ තුවාලය හටගත් ස්ථානයේත් වරින් වර ආලේප කරන්න. කිහිප විටක් මේ ආකාරයට ආලේප කිරීමෙන් වේදනා නාශක ගුණයක් ලැබී තුවාලත් සුව වෙනවා.
ඇතැම් විටදී අපි ආහාරයට ගන්නා මස් මාළු විසවීම් නිසා අජීර්ණය තත්ත්වයන් ඇති වෙනවා. එවන් අජිර්ණ තත්ත්වයකදී අනෝදා ගසේ පොතු ග්‍රෑම් 60ක් පමණ අරගෙන වතුරපත අටක් සමඟ මිශ්‍රකර එකට සිඳුවා උදේ සවස පත භාගය බැගින් බොන්න ගන්නව නම් ආහාර අජිර්ණ තත්ත්වයෙන් මිදෙන්නත් පුළුවන්.
කැස්ස පීනස වගේ රෝග සඳහා අනෝදා මල් කෂාය ඉතාමත් ගුණාත්මකයි. අනෝදා මල් මිටක් පමණ අරගෙන වතුර පත හතරක් පමණ එයට මිශ්‍ර කරලා පත එකට සිඳුවා දින තුනක් පමණ දිනපතා උදේ සවස පත භාගය බැඟින් පානය කරනවා නම් කැස්සටත් පීනසටත් ඒ කෂාය ගුණයි.
තවත් සුවිශේෂී කරුණක් තමයි අනෝදා කොළවල තිබෙනවා හොඳ නිද්‍රාකාරක ගුණයක්. නින්ද නොයන රෝගියකුට ඉක්මනින් නින්ද ලබා දීමේ නිද්‍රාකාරක රසායනික ගුණයක් මේ කොළවල අඩංගුයි. අනෝදා කොළ මඳ පවනේ වියළාගෙන හොඳින් කුඩුකරගෙන උණුවතුරින් තම්බා පෙරාගෙන තේ පානයක් වගේ සකස්කරගෙන පානය කරන්න දෙනව නම් නින්ද නොයන රෝගයටත් ඒක හොඳ විසඳුමක්. ඒ වගේම මේ පානය සතියකට දින කිහිපයක් භාවිත කරනවා නම් රුධිර පීඩනය අඩු කරන්නත් ශරීරයේ සීනි පාලනයටත් මෙය ඔෟෂධීය ගුණ සපිරි පානයක් ඒ වගේම "විශාදය" වගේ මානසික රෝග තත්ත්වයන් සමනය කරන්නත් අනෝදා කොළ වියළා සකස් කරගත්ත මේ පානයට හැකියාවක් තිබෙනවා. මෙයත් අපි පර්යේෂණ මට්ටමෙන් පවා තහවුරු කළ ඖෂධීය පානයක්.
පුද්ගල ශරීරයේ අභ්‍යන්තරයේ හටගත් රෝග සුවයට සේම ශරීරයේ බාහිරව හටගත් දද, කුෂ්ඨ, තුවාලවලටද අනේදා හොඳ වේදනා නාශක ගුණ සපිරි ඔසුවක් බවද ජේ‍යෂ්ඨ කථිකාචාරිනිය පවසන්නීය. ශරීරයේ හටගත් පැසවන ලද ගෙඩිවල සැරව ඉවත් කරන්නත් අනෝදා කොළවලින් හොඳ බෙහෙතක් හදාගන්න හැටි මම කියන්නම්. අනෝදා කොළ, අමු කහ, කැකුළු හාල් සමානව ස්වල්පය බැගින් අරගෙන හොඳින් කොටා අඹරාගන්න. ඒ ඇඹරුම් ද්‍රව්‍ය ටික අරගෙන පොල් කිරෙන් තම්බා නිවුණට පසුව පැසවූ තුවාලවල ආලේප කරන්න. ඉන්පසු එහි සැරව ඉවත් වී විසබීජ තත්ත්වය විනාශ වී ටිකෙන් ටික සුව අතට හැරේවි. ඒ වගේම තමයි කල් ගතවූ සුව නොවන තුවාලවලට අනෝදා ගසේ පොතු ස්වල්පයක් අරගෙන අමු කහ සමඟ අඹරා ඒ මිශ්‍රණය ආලේප කරන්න. දින තුනක් පමණ ආලේප කිරීමෙන් කල් ගතවූ තුවාලයක් වුණත් විසබීජ නාසනය වී එමඟින් සුවතාවක් ලැබෙනවා.
හන්දි වේදනා, හන්දිපත් ඉදිමුම වගේ බාහිර වේදනාවලටත් අනෝදා ඔෟෂධය ගුණාත්මකයි. භාගෙට පැසුණු අනෝදා ගෙඩියක් අරගෙන කැබැලිවලට කපා තල තෙල් සමඟ මිශ්‍රකර හොඳින් අඹරා ගන්න. සිහින් ලෙස ඇඹරූ ඒ ද්‍රාවණය හන්දිපත් ඉදිමුම්, වේදනා ඇති ස්ථානයේ දින කිහිපයක් ආලේප කරන්න. ඇඟ පත හටගත් වේදනා නැති කරන්න ඒක හොඳ වටිනා ඖෂධයක්.
අනෝදා වනාහි අක්මාවට ඉතාමත්ම හිතකර පලතුරක් බවත් එබැවින් සෙංගමාල රෝගීන්ට එය නිර්දේශ කළ හැකි හොඳ ඖෂධයක් බවත් වත්මන් පර්යේෂණවලින් පවා තහවුරු වී ඇති කරුණකි. ඒ පමණක් නොව ස්ත්‍රීන්ට ඇතිවන රක්තප්‍රදර, ශ්වේතප්‍රදර වැනි රෝගවලටද අනෝදා පලතුරක් ලෙස හෝ වෑංජනයක් ලෙස ආහාරයට ගැනීම ඉතාමත්ම යෝග්‍ය බවද ජේ‍යෂ්ඨ කථිකාචාරිනිය පැවැසුවාය. බිලිඳුන් සඳහා කිරි දෙන මවුවරුන්ගේ කිරි වර්ධනයටද අනෝදා පලතුර ආහාරයට ගැනීම ඉතාමත්ම යෝග්‍යය බව තහවුරු වී ඇති කරුණකි. අනෝදා කොළ, ගෙඩි, මල්, පොතුවල අඩංගු රසායනික ගුණය මඟින් මිනිස් සිරුරේ පිළිකා සෛල විනාශ කිරිමක් සිදු කරන බවද මේ වනවිට සොයාගෙන තිබේ. එබැවින් පිළිකා රෝගය සුවකිරීම සඳහාද අනෝදා අද්විතීය වටිනාකමකින් යුත් ඖෂධයක් බවද ජේ‍යෂ්ඨ කථිකාචාරිනිය පවසන්නීය.
අනෝදා ගෙඩියේ යුෂවල, කොළවල සහ පොතුවල අඩංගු රසායනික සංයුතිය පිළිකා සෛලවලට එරෙහිව කටයුතු කරනවා. ඒ නිසා අනෝදා කියන්නේ පිළිකා රෝගයටත් ගුණ දෙන වටිනා ඖෂධයක්. අග්න්‍යාශය සහ පුරස්ථ ග්‍රන්ථිය ආශ්‍රිත පිළිකා රෝගීන් රැසක් අනෝදා ඖෂධයක් ලෙසත් පලතුරක් ලෙසත්, ආහාර වට්ටෝරුවක් ලෙසත් භාවිත කිරීම නිසා සම්පූර්ණ සුවය ලැබුවා.
වියළි අනෝදාවලින් ගුණාත්මක කෝපි වගේ පානයක් හදා ගන්න හැටි මම කියන්නම්. පැසුණු අනෝදා ගෙඩියක් අරගෙන පුංචි කෑලිවලට කපා හොඳින් වියළා ගන්න. පසුව ඒක හොඳින් කුඩු කරගෙන සුළං නොවදින බඳුනකට දමාගන්න. දිනකට එක්වරක් හෝ දෙවරක් බැගින් උණුවතුර කෝප්පයකට ඒ වියළි අනෝදා කුඩු ස්වල්පය බැගින් මිශ්‍රකර දිනපතා පානය කරන්න. මුත්‍රාශ්‍රය ආශ්‍රිත රෝගවලට, ආමාශය ආශ්‍රිත රෝගවලට, පිළිකාවට, අර්ශස් අමාරුවට, පණු රෝගය ආදී රෝග රැසකට එය පොදුවේ භාවිත කළ හැකි හොඳ ඖෂධීය පානයක්.
සතියකට අවමය දින දෙකක් හෝ ඉදුණු අනෝදා පලතුරක් ලෙස ආහාරයට ගැනීමෙන් හෝ අනෝදා වෑංජනයක් ලෙස ආහාරයට ගැනීමෙන් යථෝක්ත සෑම රෝගයක්ම සුවකර ගත හැකි බවද ජේ‍යෂ්ඨ කථිකාචාරිනිය පැවැසුවාය. ආමාශගත තුවාල, අර්ශස් ආදී සෑම රෝගයක් සඳහාම ගුණය ලබාදෙන හොඳ රසවත් පලතුරු පානයක් අනෝදාවලින් සාදාගන්නා ආකාරයද හැරපත්දෙණිය මහත්මිය අවසානයේ අපට පැවැසුවාය.
මම පෙර සඳහන් කළ සෑම ශරීර අභ්‍යන්තර රෝගයකටම ගුණ දෙන රසවත් පලතුරු පානයක් අනෝදාවලින් සාදාගන්න හැටි මම ඔබට කියන්නම්. මෙය හොඳ රසවත් පලතුරු පානයක් වගේම ඔෟෂධීය ගුණ සපිරුණු ඖෂධීය පානයක්. හොඳින් ඉඳුණු අනෝදා ගෙඩියක් අරගෙන ඇට ඉවත් කරලා මදය බදුනකට දමා ගන්න. ඒකට සීනි තේ හැඳි තුනක් ලුණු තේ හැඳි දෙකක් සහ වතුර වීදුරු දෙකක් මිශ්‍ර කරලා හොඳින් මිශ්‍රකර ගන්න (බ්ලෙන්ඩර් කරන්න) මිශ්‍ර කරගත් ඒ පලතුරු පානය ඒ ලෙසටම හරි නැතිනම් අයිස්ක්‍රීම් ස්වල්පයක් සමඟ මිශ්‍ර කරලා හරි පානය කරනව නම් ඉතාමත්ම ගුණයි. මුත්‍රා රෝග, පණු රෝග ආමාශගත රෝග, අතීසාරය, මුඛාශි්‍රත රෝග, පිළිකා ආසාදන, සෙංගමාල ආදී සෑම ශරීර අභ්‍යන්තර ලෙඩකටම ඒක හොඳ ගුණාත්මක ඖෂධීය පානයක්.
අප එදිනෙදා ජීවිතයේදී රසවත් පලතුරක් ලෙස පමණක් හැඳින සිටි "කටු අනෝදා" සැබැවින්ම රෝග රැසකට සුවය සලසන දිව්‍යමය ඖෂධයක් බව ඔබට දැන් හොඳින් වැටහෙනවා ඇත.
සමිත් මධුරංග
උපුටා ගැනීම මවුබිම.
