පස්දෙනෙකුගෙන් යුත් පවුලකට නිරෝගීව ජීවත්වන්නට නම් දිනකට පොල් ගෙඩියක කිරි ප්‍රමාණවත්
පොල් මිල ඉහළ ගියොත් බඩට පහරක් යැයි කියන්නට ඔබ පෙළැඹෙන්නේ පොල් මිනිසාගේ ආහාරයට බද්ධව පැවතීම නිසා බැව් පුන පුනා කිව යුතු නැත. අපගේ ආහාරමය වටිනාකම් අතර මුලින්ම සිටින පොල් බොහෝ විට රෝග ඇති වන්නට සේම නැති කර ගන්නටත් ඉවහල් වේ. හදවත් රෝග ඇති කරන්නට විටෙක පොල් කිරි බලපානවා සේම තවත් විටෙක තව ප්‍රභේදයක් එය දුරු කරන්නට උදව් වෙනවා. මේ සෑම කරුණකටම වැදගත් මෙම ශාකයේ උදව්වෙන් ජීවත් වන අපට පොල් වලින් ලැබෙන ඵල ප්‍රයෝජන හා පොල් ශාකය ගැන දැනුවත් වීමකට රැස් කළ තොරතුරු වල හෙළිදරව්වයි මේ. ඒ සඳහා අපව දැනුවත් කළේ වෛද්‍යාචාරිනී වත්සලා විජේසිංහයි.
කොලෙස්ටරෝල් හා පොල්
(පැණි) මධුර රසයකින් යුක්ත පොල් අපගේ දෛනික අවශ්‍යතා සඳහා නිතර භාවිතා කරයි. ඒ අතර පොල්කිරි, පොල් මදය සම්බෝල ලෙස ප්‍රධාන වේ. ඊට අමතරව තැඹිලි වතුර, රා ආදිය ගැනිය හැකියි. පොල්වල අධිකව මේදය පවතින බැවින් ඔබ ගන්නා පොල් කිරිවල මේ මේදය සිරුරේ රුධිර නාලවල තැන්පත් වී අනවශ්‍ය මේද කොටස් බවට පත්විය හැකියි.
මේ තත්ත්වය අද බොහෝදෙනා අතර ප්‍රකට කරුණක් බවට පත්ව ඇත්තේ එවැනි රෝගීන් බොහෝ අප අතර සිටින නිසාවෙනි. ඔබ දන්නා පරිදි රුධිර නාලවල තැන්පත් වන වැඩිපුර මේද කොටස් නිසා ඔබ රෝගී විය හැකියි. එසේ ඇති වන්නේ අපගේ වැරදි හුරු පුරුදු හා වැඩිපුර පොල් කිරි සහ තෙල් අධික පිටි ආශ්‍රිත කෑම ආහාරයට ගැනීම නිසාත්ය.
ඇතැම් අයගේ ශරීරයේ ස්වභාවයෙන්ම කොලෙස්ටරෝල් නිපදවෙන නිසා එවැනි අය මේදය අඩංගු ආහාර අධිකව හා නිතර නිතර ගැනීමෙන් ශරීරයේ මේද කොටස් වැඩිවිය හැකියි. එවිට රුධිර නාල තුළ මේ මේද කොටස් වැඩිපුර තැන්පත් වීම නිසා කොලෙස්ටරෝල් වැනි රෝගී තත්ත්වයට මුහුණ පෑ හැකියි.
පොල් තෙල් අද ජනපි‍්‍රය වී ඇති නිසා එය සිරුරට අවශ්‍ය පරිදි සකසා ගත යුතුයි. නිවෙස්වල සාදන පොල්තෙල් ඉතා පිරිසිදුයි. නමුත් වෙළෙඳපළේ ඇති පොල් තෙල් වලට විවිධ තෙල් වර්ග මිශ්‍ර කර ඇති බැවින් ඉන් සිරුරට විනාශකාරී තත්ත්ව ඇති විය හැකියි. මේ නිසා පරිභෝජනය සඳහා නියම පිරිසිදු පොල් තෙල් වෙළෙඳපලේ ඇතිද යන්න සැක සහිතයි.
නිතර නිතර නිසි කළමනාකාරීත්වයක් නොමැතිව පොල් ආහාරයට ගැනීම තුළින් එසේ වුවත්, සිරුරට මේදය අත්‍යවශ්‍යය. අපි රෝගීන් නොවීමට නම් නිසි පාලනයකින් යුතුව අවශ්‍ය ප්‍රමාණයට ආහාරයට එක්කර ගැනීමට ඔබ මතක තබා ගත යුතුය. සිරුරට හිතකර වන්නේ අසංතෘප්ත මේදයයි.
නමුත් පොල්වල සිරුරට අහිතකර සංතෘප්ත මේදය අඩංගුව පැවතුණත් කොලෙස්ටරෝල් සෑදීමේ ප්‍රවණතාව අඩු කරන මධ්‍යස්ත ප්‍රමාණයේ මේද අම්ල පවතින නිසා ඔබ බිය විය යුත්තේ පොල් කිරි උකුවට හා වැඩියෙන් ගතහොත් පමණි. එසේ වුවත් පොල් සම්බෝලය ඔබගේ කොලෙස්ටරෝල් පලවා හරින ආහාරයක් බවට පත් කරගන්නට පුළුවන් බව ඔබ දන්නවා ඇති.
පොල්කිරි තරම්ම බිය උපදවා ගත යුතු නැත. පොල් සම්බෝලය තන්තු බහුලව පවතින ආහාරයක් බැවින් ආහාර දිරවීම, සිරුරේ කොලෙස්ටරෝල් පහත හෙලීම වැනි කරුණු වලින් ඉදිරියෙන් සිටී. එම තන්තු සිරුරේ කොලෙස්ටරෝල් අවම කිරීමේ යාන්ත්‍රණ ක්‍රියාවලියට බෙහෙවින් උපකාරි වේ. තන්තුමය තත්ත්වය බෙහෙවින් උදව්වන්නේ මල බද්ධය නැති කිරීමටයි.
ඔබගේ අවශ්‍යතාවයට පොල්කිරි අවශ්‍ය ලෙස ගැනීමට නම් පොල් සම්බෝලවල පවතින තන්තු ස්වභාවය පොල් කිරිවලත් රඳවා ගැනීමට කළ යුතු වන්නේ කිරි පෙරීමේදී එහි කුඩුත් සමඟ භාවිතා කිරීමයි. තරමක් රසයට හානි පැමිණුනත් ගුණාත්මක බව වැඩි කරන අතර කොලෙස්ටරෝල් ඇති කිරීම ඉන් අඩු කරයි.
එවිට පොල් සම්බෝලවල ඇති තන්තුමය තත්ත්වය කිරිවලින් ද ලබාගත හැකියි. විටමින් ඡ් තෙල්වල දිය වේ. එය පොල් සම්බෝලයේ ඇත. තෙල් අඩංගු ආහාර ගැනීමේදී එවායේ පවතින වෙනත් විටමින් වර්ග ආමාශයේදී සිරුරට අවශෝෂණය කර ගැනීමට පොල් සම්බෝලය මඟින් විශාල මෙහෙයක් සිදු කරයි.
වතුරේ දිය නොවන ඒ,ච්,ම් වැනි විටමින් වර්ගද තෙල්වල දියවන නිසා පොල් සම්බෝලයේ ඇති තෙල්වලින් දියවී සිරුරට ලබාදීම සිදු වේ. මේ නිසා කොලෙස්ටරෝල් ඇති වේ යැයි සැක උපදවා ගත යුතු නැත.
සාමාන්‍යයෙන් ඔබ දෛනිකව හොදින් පැසුණු පොල් ගෙඩියක ප්‍රමාණයක කිරි භාවිතා කරන්නේ නම් එයින් සාමාජිකයින් 5දෙනෙකුගෙන් සමන්විත පවුලකට බෙදී යන්නේ තෙල් අවම වශයෙනි. ගෙඩියකින් ලබාගත හැකි වන්නේ සාමාන්‍යයෙන් මේස හැඳි 5 ක් පමණි.
එය පස් දෙනෙකු අතර බෙදී යනවිට එක් අයෙකුට ලැබෙනුයේ තෙල් මේද හැන්දක් පමණය. එය කොලෙස්ටරෝල් ආදී රෝග බිය ඇතිකිරිමට තරම් ප්‍රමාණයක් නොවේ. මේ නිසා ඔබගේ දෛනික පරිභෝජනය මෙවැනි සාමාන්‍ය ක්‍රමවේදයකට අනුව සැකසේ නම් ඔබ බිය විය යුතු නැත.
පොල් ශාකයේ ප්‍රභේද
කුන්දිරා පොල්, නවසි, තැඹිලි, රන් තැඹිලි, ගොන් තැඹිලි සියම් පොල්, දී (කිරි) පොල්
වර්ණය අනුව
1. රතු පොල්
2. නිල් පොල්
ඖෂධ පිණිස - නවසි, තැඹිලි, රන් තැඹිලි
ඖෂධ පිණිස තෙල් සැකසීමේදී හොඳම වන්නේ රන් තැඹිලිය. නිජ භූමිය වන්නේ දකුණු ඉන්දියාවයි. ලවණ මිශ්‍ර වැලි පස් වැවීමට උදව් වේ. ලුණු මිශ්‍ර මුහුදු සුළං පොල් ගසට හිතවත්ය.
භාවිතා කරන කොටස්
මුල්, කොළ, ගෙඩියේ වතුර, මීරා, මද, තෙල්, මල්, කහකඩ හා පොල් පිත්තේ පහත කොටසේ ඇති බූව.
ප්‍රයෝජනයට ගන්නා අවස්ථා
කුරුම්බා, කලටි, පැසුණු පොල්, වියළි පොල් අහාරය සඳහා ගැනේ, කොට්ට පොල් (ගුඩු පොල්) ඖෂධ සඳහා, කොප්පරා තෙල් සඳීම සඳහා ගැනේ
පොල් ආශ්‍රිත වෙනත් ආහාර නිෂ්පාදන
මීරා, පොල් රා, පොල් පැණි, පොල් හකුරු, පොල් තෙල්, පොල් විනාකිරි, පොල් අරක්කු මේ සෑම නිෂ්පාදනයක්ම තනි තනිව හෝ විවිධ ඖෂධ එකතු කර යොදා ගැනේ. මේ හැර ගොබලු ( ලපටි ගෙඩි) ද ඖෂධ පිණිස යොදයි.
අලුත් අමු පොල් මදයේ අඩංගු රසායනික සංඝටක
- මාංශ වර්ධක ධාත ඇත.
- මේදය, ප්‍රෝටීන සංඝටක
- පොල් කිරිවල - ඇල්බියුමින් (අත්‍යවශ්‍ය පේ‍්‍රාටීනයක්)
- ටාටරික් ඇසිඩ්
- ජලය, ඛනිජ පදාර්ථ
- පොල් තෙල්වල
- රසායනික සංඝටක
- කැප්‍රලික් අම්ලය, ග්ලිසරයිඩ්, මිරිස්ටික්, පාමිටික් ස්ටිසරික් අම්ලය ඇත. හොඳින් පැසුණු පොල් ගෙඩියක මදයේ 60 - 70% ප්‍රමාණයක් තෙල් ඇත
කුරුම්බා වතුරවල (වෑවර) අඩංගු රසායනික සංඝටක
(සී.සි. 100ක)
- මාංස ජනක ධාතු - 0.62%
- ග්ලූකෝස් - 5.05%
- ක්ලෝරයිඩ් - 55%
- පොස්පේට් - ස්වල්පයක්
- ඝණ පදාර්ථ - 7.68%
- පොස්පරස් - 0.01%
- ඛනිජ පදාර්ථ - 0.4%
- කැල්සියම් - 0.02%
- ලෝහ - 0.05%
ඉහත සඳහන් පදාර්ථ හැර කුරුම්බා හා තැඹිලි වතුරේ විටමින් ඒ, ඕ, නිකොටින්, ඇසිඩ් පෙන්ටොතෙනික් ඇසිඩ් බයොටින්, රයිබොෆ්ලේවින්, ෆෝලික් ඇසිඩ් ආදියද අන්තර්ගතය.
පිරිසිදු පොල් තෙල්
ශරීරය වර්ධනය කර ශක්තිය වඩයි. වාතය නසයි. කෙස් වර්ධනය කරයි. කුෂ්ඨ රෝග නසයි. තුවාලයක් සුව කිරීමට ඇති හැකියාව ඇත. සමේ රෝගවලට සුදුසුයි. ආසාදන රෝග නසයි. ආහාරවලට පි‍්‍රයතාවක් ඇති කරයි.
පරණ පොල් තෙල්
ජලය හා වාතය මුසු නොවූ පරණ පොල් තෙල්වලින් වාතය නසයි. රත්පිත්, කුෂ්ට කැසීම් හා සමේ රෝග නසයි.
සැලකිය යුතුයි! දිරවීමට අපහසු පොල්බඩ අධිකව කෑමට ගැනීමෙන් අජීර්ණ අවස්ථා ඇතිවිය හැකියි.
උෂ්ණ ගුණැති මාළු, අච්චාරු, දෙල් වැනි ආහාර ගැනීමෙන් ඇතිවන හානි වැළැක්වීමේ ශක්තියක් පොල්වල ඇත. එසේම පොල් වාතය හා පිත සමනය කරයි.
පොල් සිරුර තුළ ක්‍රියාත්මකවන ආකාරය,
- බාහිරින් - සමේ දැවිල්ල නැති කරයි. කෙස් වඩයි. සමේ රෝග නැති කරයි. තුවාල සුව වේ.
- ආහාර මාර්ගයේදී - පිත් රෝග නසයි. පොල් වතුරෙන් කෑම රුචිය වඩයි. විෂබීජ නාශකයි. මල බද්ධයට ගුණයි.
- රුධිර ගමනයේදී - රක්ත රෝග නසයි.
- මුත්‍රා පද්ධතියේදී - මුත්‍රා රෝගවලට හොඳයි මුත්‍රා නිපදවීම වැඩි කරයි.
- ප්‍රජනන ව්‍යුහයේදී - වේදනාකාරී මාස් ශුද්ධිය නැති කරයි. පොල් මද වලින් පුරුෂ ශක්තිය වඩයි. රක්ත ප්‍රදරයට (ඔසප් අධික ලෙස පහවීම)
- ලපටි තැඹිලි මල් ඖෂධ සඳහා සුදුසුයි.
පෝෂණීය ස්වභාවය
- පොල් මද - පිත සමනය කරයි. ශීත කෑමකි. පැණි රසයෙන් යුක්තයි. ශරීර වර්ධනය කරන ගුණය ඇත. හෘදයට සිසිලස ගෙන දේ. මුත්‍රා පිරිසිදු කරයි.
- කුරුම්බා (වෑවර) ලොඳ - හෘදයට හිතකර වන අතර පිත් දැවිලි පහ කරයි. ලුණු රසයෙන් යුක්ත වේ. පිත සමනයට හොඳයි. සාමාන්‍ය උණ රෝගයට හොඳයි. ලේ පිරිසිදු කරයි. කුරුම්බා ලෙසද සැහැල්ලු ආහාරයක් වේ. මල බද්ධයට හිත කරයි. දිරවීම පහසු කරයි.
- කුරුම්බා වතුර ගුණ - සිසිලසයි, හෘදයට හිතකරයි, බඩගින්න ඇති කරයි. මල හොඳින් පිට වේ. දාහය නැති කරයි. රත්පිත්, විෂබීජ රෝගවලට, පිපාසාවට සුදුසුයි, කැරකිල්ලට සුව දෙන අතර වමනයටද සුදුසුයි. අරුචියට ගුණ දේ. මුවින් කෙළ වැගිරීම, ඉදිමුම, උදර රෝග, කුෂට, උණ, ඇස් රෝගවලට වණ, මධුමේහ යන මේවායින් පෙළෙන්නවුන්ට සුදුසුයි.
- පොල් මල් - හොඳ ඖෂධයකි. නමුත් සෙම වඩයි. රක්ත අතීසාරය හෙවත් අධි ආර්ථවය නතර කරවීමට උදව් වේ. අධි ආර්තව රෝගයේදී පොල්මල් ප්‍රශස්ත ඖෂධයක් ලෙස හඳුන්වයි. අතුරු ආබාධවලින් තොරයි. කාන්තා රෝගවලදී ප්‍රයෝජනයට ගනී. ඒ වගේම අතීසාරයට (බඩ යාම) හොඳයි. රක්ත අතීසාරයට හා අතීසාරය යන රෝග 2ට ම මෙය එකම ලෙස සකසා දුන්විට රෝග 2ම වීම මෙහි විශේෂත්වයයි.
- මේරූ කුරුම්බා ලොඳ - පිපාසය බඩගින්න වළක්වයි. ශක්තිය ලැබේ. තෙල් පදාර්ථ බහුලව ඇත. දිරවීමට අපහසුයි.
- කලටි කුරුම්බා - දිරවීමට අපහසු සෙයින් බඩගිනි අඩු අයට නොදිය යුතුයි.
උපුටා ගැනීම දිනමින
ඇපල් බොහෝ අයගේ ආදරයට, පිළිගැනීමට පාත්‍රවන පලතුරකි. නමුත් මෙතරම් පිළිගැනීමක් සහිත ඇපල් තොගයක්ම පසුගියදා මෙරට භාවිතයට තහනම් කෙරුණි. ඒ පිළිබඳ පුවත...
බතල, රසයෙන් මධුර හෙවත් පැණි රසයකින් යුක්ත වේ. ඒ නිසා ඉංගී‍්‍රසියේ ස්වීට් පොටේටෝස් නමින් හඳුන්වන අතර බතල සීනි සහිත යැයි ප්‍රකට...
තේ බොන්න කවුරුත් කැමතියි. ශ්‍රි ලාංකිකයන් බහුතරක් තමන්ගේ දවසේ වැඩ පටන් ගන්නේ උණු තේ කෝප්පයක් එක්ක. ඔබත් ඒ අතර කෙනෙක්. ලෝක...
ඔබ ගන්නා ආහාරවල පෝෂණීය බව පමණක් නොව ඒවා ගන්නා අවස්ථාව අනුවත් එහි ගුණාත්මක තත්ත්වයේ වෙනසක් ඇති විය හැකියි. විශේෂයෙන්ම රාත්‍රියෙදී ගන්නා ඇතැම් ආහාර...
මේවා මගින්ද ආහාර සුවඳවත් වෙනවා. රසවත් වෙනවා මෙන්ම ආහාර රුචියද වැඩි වෙනවා. මීට අමතරව ආහරවලට හොඳ වර්ණයක් ඇති වෙනවා. විසබීජ නැසෙනවා...
වෙරළු ගැමි ජනතාව අතර ඉතා ප්‍රචලිත පලතුරකි. මෙම ශාකය පැරණි සෑම නිවසකම දෑකිය හැකිය. අද කාන්තාවන් මෙම පලතුරට එතරම් සැලකිල්ලක් නොදෑක්වූවත්...
