දියවැඩියාවට සහ අර්ශස්‌ රෝගයට හිතකර ඇඹරැල්ලා
ඇඹරැල්ලා රසකාරක පළතුරක්‌ ලෙසත්, ප්‍රියජනක ව්‍යංජනයක්‌ විදියටත්, අතිරේක කෑම වට්‌ටෝරුවක්‌ ලෙසත්, බොහොමයක්‌ ලෙඩ රෝග උදෙසා හිතකර ඖෂධීය ගුණයක්‌ ලබා දෙන්නක්‌ ලෙසත් හැඳින්විය හැකිය.
ඇඹරැල්ලා ග්‍රෑම් 100 ක පමණ අඩංගු පෝෂණීය ගුණයන් මෙසේය.
ප්‍රොටීන් ග්‍රෑම් 12.6, ශක්‌තිය කැලරි ග්‍රෑම් 46, තෙතමනය ග්‍රෑම් 87, විටමින් සී. මිලිග්‍රෑම් 36, කැල්සියම් මිලි ග්‍රෑම් 56, පොස්‌පරස්‌ මි. ග්‍රෑ. 67, යකඩ මිලි ග්‍රෑම් .03 , කැරටීන් මයික්‍රෝ ග්‍රෑම් 205, තයමින් මයික්‍රො ග්‍රෑම් 50.
ඇඹරැල්ලා ඉදුනගෙඩි ආහාරයට ගැනීමෙන් වීර්යය වඩවයි. ශරීරයේ ඇතිවන තද බල වාත කැක්‌කුම් වේදනා සමනය කර ගැනීමට කොළ හා පොතු තම්බා බීම යෙහෙකි. මුත්‍රා ආබාධිතයන්ට මෙන්ම දියවැඩියාවෙන් පෙළෙන අයටද මෙම ඖෂධය ගුණදායකයි. ස්‌වේත, ප්‍රදර රෝගී කාන්තාවන්ටද ඇඹරැල්ලා කොළ මැල්ලුම අගනා ඔසුවකි. එපමණක්‌ නොව මුත්‍රා සහ ලේවල සීනි වැඩි අයටද හිතකරයි. ලේ අර්ශස්‌ රෝගයෙන් පෙළෙන අයටද ඇඹරැල්ලා මාළුව ගුණදායකයි. මෙය වාජීකරණ ඔසුවක්‌ ලෙසටද පිළිගැනේ. ධාතු ශක්‌තිය වඩවයි. ස්‌නායු ශක්‌තිය ඇති කරවයි. ශරීරයේ සෑදෙන කුෂ්ටවලටද හොඳයි.
මෙම මහඟු ඖෂධය ආහාරයක්‌ ලෙස ගත හැකි අවස්‌ථා බොහොමයකි. ළපටි ඵල සමයේ සිට මුහුකරා කහ පැහැගෙන ඉදුන තෙක්‌ දක්‌වා ආහාර උදෙසා සකස්‌ කර ගැනීමට පුළුවන. ඇඹරැල්ලා ගෙඩිවලින් ව්‍යංජනයට සේම ඊට බාහිරව ජෑම්, සෝස්‌, අච්චාරු, චට්නි, සලාද, සම්බෝල ආදී වශයෙන් විවිධ ආහාර රටාවලට යොදා ගත හැකිවේ.
ඇඹරැල්ලා ගෙඩියේ ප්‍රමාණය පුවක්‌ ගෙඩියකට ටිකක්‌ විශාලය. මී අඹ ගෙඩියක්‌ තරම් වේ. ඇඹරැල්ලා ගස්‌ විශාල වශයෙන්ද, මධ්‍යම ප්‍රමාණයෙන්ද, කුඩාවට ද වවා ගත හැකිය. බද්ධ කරන ලද කප්පාදු පැල කුඩා ගෙවත්තක වුව සිටුවා ගත හැකි වේ. විශාල සහ මධ්‍යම ප්‍රමාණයේ ගස්‌ සඳහා සාමාන්‍ය ඉඩ කඩක්‌ අවශ්‍ය වේ. පර්චස්‌ 20 -30 ඉඩම්වල වුව බද්ධ කරන ලද කුඩා පැළයක්‌ වවා ගත හැකිය. විශාල ගස්‌වල අතු රිකිලි විහිදී යාමට ලොකු පරාසයක්‌ අවශ්‍ය වෙයි.
ඇඹරැල්ලා ගසේ පොත්ත තරමක්‌ ඝනයි. කඳ කෙළින්ම උස යයි. අතු බෙදී විහිදේ. අඩි 03- 04 ක්‌ කෙලින්ම සිට අතු බෙදීම් සිදුවේ. ගසේ පොත්තෙන් මෙන්ම පොත්තෙන් ඇති කරවන මැලියම් ද ආයුර්වේද ඖෂධ සකස්‌ කර ගැනීමට යොදා ගැනේ.
මෙම වෘක්‍ෂය උෂ්ණාධික ප්‍රදේශවල වැවීම අඩුයි. එහෙත් දිවයිනේ ජලාශ්‍රිත ප්‍රදේශවල වැවිය හැකිය. බස්‌නාහිර, දකුණ, මධ්‍යම, සබරගමුව වැනි පළාත්වල පහසුවෙන් වැවිය හැකිය. ගස සිනිඳුයි. පත්‍ර අඟල් 02 ක්‌, 03 ක්‌ පමණ වෙයි. අතු කෙළවර පුෂ්ප හටගනී. පුෂ්ප ද්වී ලිංගිකයි. පිරමීඩාකාරය. පුෂ්ප පොකුරුවල පෙති ගිලිහී ගිය පසු ළපටි ඵල හට ගනී. ඒවා ක්‍රම ක්‍රමයෙන් ලොකු වේ. ගෙඩි කොළ පැහැය ගනී. ඉදුන විට තැඹිලි පාට වේ.
අතීසාරයට, පිත් කෝපයට, ඇඹරැල්ලා කසාය බීමෙන් සුවය ලැබේ. මේ සඳහා පොතු යොදා ගැනීම යෙහෙකි. පොතු කලං 12 කට වතුර කොප්ප 08 යොදා එක්‌ කෝප්පයකට සිඳ දෙළුම් යුෂ, මීපැණි සමග බීම හොඳයි. පළතුරක්‌ ලෙසින්ද ඉදුන ගෙඩි ආහාරයට ගත හැකිය. ඇඹරැල්ලා වාජීකරණ ගුණයක්‌ ඇතිකර, ශක්‌තිය ලබා දෙයි. වෙළෙඳපොළේ එළවළු, පළතුරු කඩ පිල්වල, පොල දිනයන්හි ඇඹරැල්ලා සුලභව විකිණීමට ඇත.
උපුටා ගැනීම දිවයින
