දෙළුම්
ශ්‍රී ලංකාව, ඉන්දියාව, කැලිෆෝනියාව ආදී මධ්‍යධරණි ප්‍රදේශවල දක්නට ලැබෙන දෙළුම් විශාලමය පඳුරුමය ශාක වශයෙන් හෝ කුඩා ශාක වශයෙන් දැකගත හැකිය. ගසේ කටු සහිත වන අතර සාමාන්‍යයෙන් මීටර් 4-12 තරම් උසට වැඩෙන අතර පුෂ්ප දීප්තිමත් රතු පැහැයක් ගනී. දෙළුම් ගසේ ඵලය බොහෝ විට තනි තනිව හටගනු ලබන අතර සමහර අවස්ථාවලදී පොකුරට ගෙඩි 4ක් දක්වා හට ගන්නා අවස්ථා තිබේ. දෙළුම් ඵලය බීජ රාශියකින් යුක්ත වන අතර කෝණාකාරය. මාංසලමය. බීජ ආවරණයකින් යුතු වන අතර එය රතු හෝ රෝස පැහැයක් ගනී. දෙළුම් පොතු, දෙළුම් මුලේ පොතු, පුෂ්ප, පුෂ්ප අංකුර, දෙළුම් ඵලය හා දෙළුම් ඵලයේ ලෙල්ල ඖෂධීය කටයුතුවලට යොදා ගැනේ. ඵලය ප්‍රණීතවත්ය. කසටය. සිසිලාකාරය. දෙළුම් කාමෝත්ද්වීපික ශාකයක් වන අතර දෙළුම් යුෂ විශාල ඖෂධීය ගුණයකින් යුක්තය.
නාසයෙන් ලේ යනවාට
දෙළුම් මල් යුෂ නස්න කර හිසට කෙසෙල් අල යුෂ ගැල්වීම තුළින් නාසයෙන් ලේ ගැලීම සම්පූර්ණයෙන් සුව වේ. (ඇඹුල් කෙසෙල් අල හැර)
කුඩා දරුවන්ගේ සෙමට
දෙළුම් මල් තම්බා එම මල් එළු කිරෙන් අඹරා මී පැණි සමඟ මිශ්‍ර කර දරුවාට අනුභව කිරීමට දීම ගුණදායක වේ.
උණ රෝගයට
දෙළුම් යුෂ පානය කිරීමට දීම.
මුත්‍රා රෝගයට
- දෙළුම් යුෂ පානය කිරීමට දීම.
- දෙළුම් ඇට ආහාරයට ගැනීම.
මුඛ රෝගවලට (දත් නරක්වීම්, මුඛයෙන් දුගඳ හැමීම්, විදුරුමස් ආශි්‍රත රෝග)
- දෙළුම් ගෙඩියේ පොතු තැම්බූ ජලයට සින්නක්කාරම් කුඩු මිශ්‍ර කර මුඛය සේදීම.
- දෙළුම් පොතු, මූණමල් පොතු, පුවක් පොල්, පොල් මුල් තැම්බූ වතුරෙන් මුඛය සේදීම.
විස සහිත ඉදිමීමට
දෙළුම් ගෙඩියේ ලෙලි තලතෙල්වලින් අඹරා පිළියෙල කරගත් තලපය විස සහිත ඉදිමුම් ස්ථානයේ ගෑමෙන විස නැති වී ඉදිමුම් සුව වේ.
සමේ කැසීම් හා සමේ රෝග අවස්ථාවලදී
- දෙළුම් යුෂ සමේ ආලේප කිරීම ගුණදායකයි.
- දෙළුම් පොතු තැම්බූ ජලයෙන් සමේ රෝග ඇති ස්ථාන සේදීම.
- දෙළුම් කොළ තැම්බූ ජලයෙන් සේදීම.
ආහාර අරුචිය හා අජීර්ණවලට
දෙළුම් යුෂ තිරැස්සවාලු මුල් චූර්ණය සමඟ මිශ්‍ර කර එයට මී පැණි දමා පානය කිරීමෙන් අජීර්ණ සුව වී ආහාර රුචිය වඩයි.
කුඩා දරුවන්ගේ පණු රෝග සඳහා
දෙළුම් ගහේ මුල් තැම්බූ වතුරට සීනි, මී පැණි දමා පානය කිරීමට දීම.
රූ සපුව වර්ධනය වීමට
- දෙළුම්, සුදු හඳුන් උරච්චි කර ආලේප කිරීම.
- දෙළුම් යුෂ පානය කිරීම හා දෙළුම් ඇට පානය කිරීම.
- දෙළුම් යුෂ කෝමාරිකා මද සමඟ හොඳින් මිශ්‍ර කර පානය කිරීම.
දත් රෝග නැසීමට බාහිර ආලේපයක්
කුඹුරු ඇට මද, පුස් ඇට මද, කුප්පමේනිය මුල්, දෙහි ඇඹුල් හා දෙළුම් යුෂ සමව ගෙන එයින් අඹරා බාහිරෙන් ආලේප කරන්න.
මී පැණි රස දෙළුම් සහ ඇඹුල් රස දෙළුම්
දෙළුම් වර්ග දෙකකින් යුක්ත වන අතර එය රස අනුව වර්ග කර ඇත. එනම් පැණි රස දෙළුම් හා ඇඹුල් රස දෙළුම් වශයෙනි. ශරීරයේ හෝර්මෝනවල ක්‍රියාවලිය උත්තේජනය කිරීමේ ගුණය දෙළුම් සතුව පවතින අතර වා පිත් සෙම් තුන් දොස් සමනය කිරීමේ ගුණයද දෙළුම් සතුව පවතී. යම් පුද්ගලයෙක් දිනකට දෙළුම් ගෙඩි 02ක යුෂ වරින් වර පානය කිරීම හෝ දෙළුම් ගෙඩි 02ක දෙළුම් ඇට අනුභව කරන්නේ නම් ආයුෂ වැඩි වෙයි. රන්වන් පාට සිරුරක් හිමි වෙයි. ශරීරයේ අස්ථි පද්ධතිය ශක්තිමත් වෙයි. පෙණහලු ආශි්‍රත රෝග සුවපත් කරන දෙළුම් රුධිරය පිරිසුදු කර ලේ කැටි ඇතිවීම වළක්වාලයි. එම නිසා දෙළුම් ආයුෂ, වර්ණය, සැපය, බලය, ප්‍රඥාව වඩන ප්‍රබලතම ඔෟෂධයක් බව සඳහන් කළ හැකිය.
ඖෂධීය ගුණ
- පිළිකා සෛල මර්දනය කිරීමේ හැකියාවක් ඇත.
- ශරීරයේ අධික තරබාරුව අඩු කරයි.
- ශරීරයට හිතකර අධි කැලරි ප්‍රමාණයක් අඩංගුය.
- හෘදය, වකුගඩු, මොළය ආශි්‍රත රෝග පාලනය කරයි.
- ශරීරයේ ප්‍රතිශක්තිකරණ පද්ධතිය පාලනය කරයි.
- ශරීරයට හිතකර විටමින් වර්ග, යකඩ වර්ග, ඛනිජ ලවණ රාශියක් අන්තර්ගතය.
- ශරීරයේ විකෘති සෛල, අර්බුදකාරී සෛල වර්ධනය වීම වැළැක්වීමේ ගුණය ඇත.
- ලිංගික ශක්තිය වර්ධනය කරයි.
- සම අවර්ණ වීම, රැලි වැටීම වළක්වා රුව රැක දෙයි.
- හුස්ම ගැනීම පහසු කරයි.
- කෑම රුචිය වඩයි.
- දෙළුම් යුෂ ආයුර්වේදයේ ප්‍රාණජීව ඖෂධයක් ලෙස භාවිත කරයි.
- ගර්භාෂය ශක්තිමත් කර උෂ්ණත්වය පාලනය කර දරුඵල ඇති කරයි.
- කුඩා දරුවන්ගේ පණු රෝගවලට ගුණදායකයි.
- සමේ රෝග සුව කිරීමේ හැකියාව ඇත.
- ධාරණ ශක්තිය වර්ධනය කරයි.
ආයුර්වේද වෛද්‍ය රවීන් පතිරණගේආයුඔසුපෙත, වෙද මැඳුර, උඩුකාව, දෙනිපිටියසමාධි ඕබඩආරච්චිමව්බිම
