කරපිංචා
හිසකෙස් නිරෝගී කරන සත්කාරයක්.
හිසකෙස්වල ගැටලුවලට කෘත්‍රිම ආලේපන සුදුසු නැහැ. හැකි තරම් ස්වාභාවික ආහාර සහ ආලේපනවලින් හිසකෙස් සකස් කරගත හැකි නම් එය ඉතාමත් සුදුසු වනවා. කරපිංචා එයට හොඳින්ම ගැළපෙන ස්වාභාවික ප්‍රතිකාරයක්.
හානියට පත් වූ හිසකෙස් නැවැත සකස් වෙනවා.
කරපිංචා කුඩුකර තලපයක් ලෙස සකසා හිස කෙස්වල ගැල්වීමෙන් පලුදු වූ හිසකෙස් නැවැත සකස්කර ගත හැකියි. හොඳින් හිස කෙස්වල සහ හිස් කබලෙහි ගැල්වීමෙන් වඩාත් ඉහළ ප්‍රතිඵල ලබාගන්නට පුළුවන්.
හිසකෙස් අකලට පැසීම වළක්වයි.
හිසකෙස් අකලට පැසීම විවිධ හේතු මත සිදුවෙනවා. මත්පැන් හෝ දුම් පානය, ආතතිය වැනි විවිධ හේතු ඒ සඳහා බලපෑ හැකියි. නමුත් විටමින් බී අඩංගු කරපිංචා කොළ අකලට හිසකෙස් පැසීම වළක්වනවා. එයින් හිසකෙස්වල පැහැය වැඩිකර ගත හැකියි.
හිසකෙස් ගැලවී යෑම වළක්වනවා.
වැරැදි ආහාර පුරුදු නිසා හිසකෙස්වලට හානි පැමිණෙනවා. කරපිංචාවල බීටා, කැරොටීන් සහ ප්‍රෝටීන් තිබෙන නිසා හිසකෙස්වලට නිසි පෝෂණයක් ලබාගත හැකියි. ඉන් හිසකෙස් තුනී වන අතර කෙස් හැලීම වළක්වනවා.
හිසකෙස් දිගු කරනවා.
කරපිංචාවල විටමින් බී අඩංගු නිසා එය හිසකෙස් දිගු කරවීමට උපකාරී වනවා. ඉන් හිසකෙස් මුල ශක්තිමත් කරයි.
රෝග රැසකට සුවය.
හුඟක් ගෘහණියන් හිතන්නේ කරපිංචා කියන්නේ ආහාර රසවත් කිරීමට යොදාගන්නා ද්‍රව්‍යයක් පමණක් කියලයි. කරපිංචාවලින් කැඳ වගේ දේවල් හදන්නෙත් බොහෝම සුළු පිරිසක්. නමුත් කරපිංචාවලට අපිට හිතාගන්න බැරි තරම් මෙහෙයක් කරන්න පුළුවන්.
දියවැඩියාවට.
රුධිරයේ සීනි පාලනය කිරීම සඳහා කරපිංචා ඉතාම සුදුසු ඔෟෂධයක් වෙනවා. ආමාශයේ තිබෙන ඉන්සියුලීන් ග්‍රන්ථි සක්‍රිය කරවා, රුධිරයේ සීනි මට්ටම පහළ දැමීමට එයින් හැකියි.
පිළිකා රෝගයට.
පිළිකා රෝගයට ප්‍රතිකාර ලෙස කරපිංචා ආහාරයට ගත හැකියි. විශේෂයෙන් ලියුකේමියාවට, පුරස්ථි ග්‍රන්ථියේ පිළිකාවලට ඇතුළු පිළිකා රැසකට කරපිංචා හොඳ ඔෟෂධීය ප්‍රතිකාරයක් වෙනවා.
කොලෙස්ටරෝල් පාලනයට.
එල්.ඩී.එල්. කොලෙස්ටරෝල් පාලනයට කරපිංචාවලට හැකියාව පවතිනවා. ඉන්දියාව වැනි රටවල වැඩි වැඩියෙන් කරපිංචා ආහාරයට එක්කර ගන්නේද කොලෙස්ටරෝල් පාලනය සඳහායි.
රෝග ප්‍රතිකාර නිසා ඇතිවන අතුරු ආබාධ පාලනයට.
පිළිකා රෝගීන්ට ලබාදෙන විකිරණ සහ ඔෟෂධීය ප්‍රතිකාර නිසා ඇතිවන තුවාල සහ වෙනත් අතුරු ආබාධ පාලනයට කරපිංචා යොදාගත හැකියි. විශේෂයෙන් ලියුකේමියා රෝගීන් ඇටමිදුළු බද්ධ කිරීමේ ශල්‍යකර්මයට මුහුණදීමෙන් අනතුරුව නිතර කරපිංචා කැඳ පානය කිරීම ඉතාම යෝග්‍ය වනවා.
රෝගකාරී විසබීජවලින් සිරුර ආරක්‍ෂා කරයි.
විසබීජ, පුස් ආදියෙන් සහ බැක්ටීරියාවලින් සිරුර ආරක්‍ෂා කරගත හැකියි. කරපිංචා විසබීජවලට එරෙහිව ප්‍රතිඔක්සිකාරක ගුණ දක්වනවා.
අක්මාවේ ආරක්‍ෂාවට.
අක්මාවට ඇති කරන හානි රැසක් වළක්වා ගැනීමට හැකියාව පවතිනවා. කරපිංචාවල අඩංගු ටැනින් සහ කාර්බසෝල් රසායන අක්මාවේ ආරක්‍ෂාව උදෙසා ක්‍රියාකිරීම ප්‍රධාන හේතුවයි.
කුඩා දරුවන්ට අත්‍යවශ්‍යම ආහාරයක්.
කරපිංචාවල විටමින් වර්ග රැසක් අඩංගු නිසා කුඩා දරුවන්ට ඉතාම ගුණදායක ආහාරයක් ලෙස කරපිංචා පෙන්වා දෙන්න පුළුවන්. එහි අඩංගු වන විටමින් මිනරල් සහ ප්‍රතිඔක්සිකාරක ඇස්පෙනීම ලබාදීමට, උදරයේ ඇතිවන විවිධ ආබාධවලට ප්‍රතිකාර ලෙසට, අතීසාරය, පාචනය ඇතුළු රෝග සුවකිරීමට සහ අක්මාවේ රෝග රැසකට ප්‍රතිකාර ලෙස ස්නායු රෝගවලට ප්‍රතිකාර ලෙස වගේම ප්‍රතිශක්තිකරණ පද්ධතිය ශක්තිමත් කිරීමටත් හේතුවෙනවා. පුංචි දරුවන්ගේ ආහාර වේලට කරපිංචා එක් කිරීම ඉතාම සුදුසු වෙනවා. ආහාර ගැනීම ආරම්භ කළ මුල්ම කාලයේ වුවත් ගැටලුවක් නැහැ. ධාන්‍ය, එළවළු, රනිල බෝග ආදී ඕනෑම ආහාරයකට කරපිංචා එකතු කළ හැකියි. කරපිංචා පේස්ටි එකක් විදියට හදලා තේ හැන්දකින් පුංචි ප්‍රමාණයක් බබාට කන්න දෙන්න. එළවළු එක්ක කලවම් කරලත් දෙන්න පුළුවන්. කරපිංචා නිතර ආහාරයට එක්කර ගැනීමෙන් පුංචි දරුවන්ගේ ආහාරයේ පෝෂණය වැඩිකරගන්න පුළුවන්. එහි විවිධ විටමින් සහ මිනරල් වර්ග රැසක් අඩංගු වෙනවා. විටමින් සී, ඒ. ෆෝලික් ඇසිඩ්, කියොසින්, කෙඳිද කරපිංචාවල අඩංගුයි. ඇස් පෙනීම වැඩිදියුණු කිරීමට විටමින් ඒ හේතු වෙනවා. පුංචි කාලයේම දරුවන් කරපිංචා ආහාරයට හුරු කරවීමෙන් වැඩන වයසේදී දෑස්වල පෙනුම දියුණුකර ගත හැකියි. අධික කැල්සියම් ප්‍රමාණයක් අඩංගු නිසා වැඩෙන වයසේ දරුවන්ගේ අස්ථි වර්ධනයට කරපිංචා ආහාරයට ගැනීම වැදගත් වෙනවා. කරපිංචා ග්‍රෑම් 10ක කැල්සියම් මිලි ග්‍රෑම් 80ක් අඩංගු වනවා. ඒ වගේම කරපිංචාවල යකඩ අඩංගුයි. කරපිංචා ග්‍රෑම් 100ක යකඩ මිලි ග්‍රෑම් 1ක් අඩංගු වනවා. යකඩ වැඩෙන වයසේ දරුවන්ගේ රුධිරයේ හිමොග්ලෝබීන් වර්ධනය වීමට ඉතාම වැදගත්. කුඩා දරුවන්ට ඇතිවන උදරාබාධ, අතීසාර, පාචන අවස්ථාවලදීත් කරපිංචා පානය ඉතාම ගුණදායකයි. ඒ වගේම ග්‍රැස්ට්‍රයිටිස් ආබාධය වළක්වන්නත් කරපිංචාවලට පුළුවන්. ඒ වගේම ප්‍රතිඔක්සිකාරක අඩංගු වන නිසා සිරුර අභ්‍යන්තරයේ ඇතිවන තුවාල සුවවනවා. පුංචි බබාලා නිතරම විසබීජ සහ වයිරස්වලට ගොදුරු වන නිසා ප්‍රතිශක්තිකරණ පද්ධතිය හොඳ මට්ටමක තබා ගැනීම ඉතාම වැදගත්. කරපිංචා නිතර ආහාරයට ගැනීමෙන් ප්‍රතිශක්තිකරණ පද්ධතිය ශක්තිමත් වනවා.
සමේ රෝග නසන ඖෂධීය ගුණය.
සමට රූපයට හානි කරන දෑ අතර ඇක්නි, කුරුලෑ සහ දද කුෂ්ඨ ප්‍රධානයි. ඒ නිසාම රුව ලස්සනට රැක ගන්න නම් ඉහත ප්‍රශ්න විසදා ගත යුතුම වෙනවා.
ඇක්නිවලට.
කරපිංචා ස්වල්පයක් ගෙන කහ ස්වල්පයක් එක්කර අඹරා මිශ්‍රණයක් සකසන්න. එයට ජලය මඳක්ද එක්කර ගත යුතුයි. එය ඇක්නි ඇති ප්‍රදේශවල ගාන්න. විනාඩි 10කට පමණ පසුව සිසිල් වතුරෙන් සෝදාහරින්න.
කුරුලෑවලට.
කරපිංචා කුඩු ටිකක් ගෙන රෝස වතුර ස්වල්පයක් එක්කර මුහුණේ ගල්වන්න. එහිදී දෑස්වල හා අවට ගැල්වීමෙන් වැළකිය යුතුයි. ටික වේලාවකින් එය වියළී ගිය පසු හොඳින් සෝදා හරින්න.
දද සහ කුෂ්ඨවලට.
කරපිංචා කොළ ටිකක් උණුසුම් වතුරේ තම්බා එය කිරි වීදුරුවක තබා ටික වේලාවක් තබා ඉන් පසුව දද කුෂ්ඨ ඇති තැන්වල ගාන්න.
මව්බිම
