නොමනා ජීවන රටා හේතුවෙන් දින දින වැඩිවන බෝල දරුවෝ

අද තරුණ වයස්වල පසුවන දරුවන් අතර තරබාරු බව එන්න එන්නම වැඩිවෙමින් තිබේ. විශේෂයෙන් වයස අවුරුදු විස්සට අඩු තරුණ ප්‍රජාව අතර ස්ථුලභාවය සේම බෝ නොවන රෝගවලට ගොදුරුවීමේ සම්භාවිතාවද ඉහළ ගොස් තිඛෙන බව නූතන සමීක්ෂණ වාර්තාවලින් හෙළි වී තිබේ. අතීතයේදී ඉඳහිට අපට තරුණ තරබාරු කෙනකු හමුවූවද මේ වන විට ඉතා වැඩි පිරිසක් මේ තත්ත්වයට පත්වෙමින් තිබේ. මේ ආකාරයට තරුණ දරුවන් ස්ථුලභාවයට ගොදුරුවීම නිසා සිදුවන සමේ සේම වෙනත් සෞඛ්‍ය ගැටලු මොනවාදැයි විමසා බලමු. large Baby අද දරුවන් මෙතරමකට තරබාරු බවට ගොදුරු වී තිඛෙන්නට ප්‍රධානතම හේතුක් වන්නේ ක්‍රියාශීලී ජීවිතයෙන් ඈත්වීමය. එදා පාසල් කාලසටහන්වල ශරීර සුවතාවය සඳහා වෙන්ව තිබූ කාලය, මේ වන විට බොහෝ අඩුකොට තිබේ. එසේම පාසල් කාලයෙන් පසුව වුවද අමතර පන්තිවලට සහභාගී වීමට එකතැන රැඳී සිටීම මෙම තත්ත්වය තවත් වැඩිකිරීමට හේතුවී තිබේ. එසේම වැඩිකාලයක් නිවසේ නොරැඳීම නිසා, යහපත් ආහාර රටාවකින් ඈත්වී, ක්ෂණික, ආහාර සඳහා වැඩියොමුවක් පැවැතීම ද තවත් එක් හේතුවකි. අද දරුවන් කුඩා දුරක් පවා වාහන වලින් යෑමට හුරුව තිබිමද ශරීරයට ව්‍යායාම ලැබිමට බාධා කරන්නකි. මේ සෑම සියලු දෙයක්ම අනාගත පරපුරේ අහිතකර සෞඛ්‍ය තත්ත්වයට මග පාදා දී තිබේ. සාමාන්‍යයෙන් දරුවකු ඉතාම බිලිඳු අවධියේදී දරුවාට වැඩිපුර ‍පෝෂණය ලබා දෙමින් දරුවා වැඩිපුර පිරිපුන් බවින් යුතු දරුවකු කරවීමට මව්වරු දක්වන්නේ දැඩි ආශාවකි. "දරුවා බෝල ගෙඩියක් වගෙයි" මේ ආකාරයට දරුවන් වැඩි පිරිපුන් බවකින් යුතුවීම පසුකාලීනව දරුවන් තරබාරු වීමට මගපාදන්නකි. එබැවින් දරුවන්ගේ තරබාරු බව මැඩ පැවැත්වීමට පියවර ගත යුත්තේ බිලිඳු අවධියේ සිටම නිවැරදි ආහාර රටාවකට දරුවා හුරුකරමින් පුරුදු පුහුණු කිරීම හරහාය.

අධික ලෙස පිටි සහිත ආහාර රසකැවිලි ආදියට දරුවන් හුරුවීම වැළැක්වීමද දෙමාපියන් සතු යුතුකමකි. දරුවන්ගේ දිවට ක්ෂණික ආහාරවල රස හඳුන්වාදීම නම් නොකළ යුත්තකි. අධික තෙල්, ලුණු සහිත මෙවැනි ආහාරවලට දරුවා හුරුකරවීමෙන් පසු එයින් ගලවා ගැනීම අසීරුය. දිගින් දිගටම දරුවන් එම ආහාර වර්ගම ඉල්ලීම වැළැක්වීම අසීරුය. එබැවින් දරුවන්ගේ තරබාරු බව පාලනය කරගත හැක්කේ, දරුවන් තරබාරු වූ පසුව නොව ඊට බොහෝ කලකට පෙර සිටමය. large Baby දරුවන් තරබාරු වූ පසු නැවත ආපස්සට ගැනීම ඉතා අසීරු කරුණකි. බර කිලෝ අසූවක් පමණ වූ තරුණ දරුවෙකු ගැන සිතන්න. එම අධික බර සහිත ශරීරය එහා මෙහා කරවීමට පවා අධික බලයක් යෙදවීම අවශ්‍ය වෙයි. එම ශක්තිය ලබා ගැනීම සඳහා ආහාරවලට තව තවත් වැඩිපුර යොමුවීම වැළැක්වීම අසීරුය. තරබාරු සිරුරකට කුඩා ආහාර ප්‍රමාණයක් සෑහෙන්නේ නැත. බඩගිනි නිවා ගැනීම සඳහා විශාල ආහාර ප්‍රමාණයක් ලබාගැනීම ඔවුනට සිදුවේ. එවිට සිදුවන්නේ තව තවත් තරබාරු පැත්තටම යොමුවීම පමණකි. ශරීරය තරබාරු වීම නිසා දරුවන්ගේ ක්‍රියාශීලී බව ඉබේම අඩුවෙයි. ඔවුන් හැම නිතරම එකම තැනක රැඳී සිටීමට කැමැත්තක් දක්වයි. එය ශාරීරික සේම මානසික සෞඛ්‍යයට අහිතකර ලෙස බලපාන්නකි. අධික ස්ථුලභාවයෙන් පසුවන දරුවන්ගේ මුහුණුවල වැඩිපුර කුරුළෑ මතුවීමක් දැකිය හැකිය. ගැහැනු පිරිමි භේදයකින් තොරව මෙය දැකිය හැකිය. එසේම ඉතා අඩු වයසකදී මෙම කුරුළෑ මතුවීමද තවත් ප්‍රවණාතාවයකි. එසේම තරබාරු දැරිවියන් ඉතා ඉක්මනින් වැඩිවිය පැමිණීමද සිදුවිය හැකිය. තරුණ වයස්වල දී මේ ආකාරයට තරබාරු වීම නිසා දරුඵල අහිමිවීමට සරුබව අඩුවීමට ද බොහෝ සෙයින් හේතුවෙයි. එසේම ඩිම්බ කෝෂ, ගර්භාෂ හා සම්බන්ධ ගැටලු ද බහුල විය හැකිය. අධික තරබාරුව නිසා උරහිස්වල කකුල්වල ආබාධ වැඩිවෙයි. එසේම අධික ලෙස සම ඇදී තිබිම නිසා සම මත ඉරි වැනි පැල්ලම් හට ගැනීමද දැකිය හැකිය. එසේම ශරීරයේ නැමෙන ස්ථානවලට නිසි ලෙස වාතය ගමන් නොකිරීම නිසා ඉකිලි කිහිලි වැනි තැන්වල පුස්රෝග අධික වීම ද තරාබාරු අය තුළ මතුවිය හැකි තත්ත්වයකි. එසේම සම තරමක් අඳුරු පැහැයක් ගැනීමද දැකිය හැක්කකි. විශේෂයෙන් ඛෙල්ල කිහිලි ඉකිලි වැනි තැන් අධික ලෙස අවපැහැගැන්වීමක් දැකිය හැක. අනවශ්‍ය රෝම වර්ධනය ද මෙම අය තුළ දැකිය හැකි තවත් ගැටලුවකි. අධික තරබාරුව ශාරීරික ගැටලු ඇතිකිරීමට සේම මානසික සෞඛ්‍යය තත්ත්වය කඩා වැටීමකට ද හේතුවිය හැකිය. අධික තරබාරුව නිසා කෙනෙකුගේ සමාජශීලී දිවියට බාධා පැමිණෙයි. සමාජයේ නිදහසේ දිවි ගෙවීමට බාධාවක් වන අවස්ථා ද තිබේ. අධික ලෙස තරබාරුවීම නිසා සමාජයෙන් කොන්වීම නිසා සමාජයෙන් වෙන්වී මුළුගැන්වී සිටීමට පෙළඹීමක් ද මේ අයගේ දැකිය හැකිය. මේ සියලු අහිතකර තත්ත්වයන් පිටුදැක යහපත් නිරෝගී සමාජශීලී ජීවිතයක් ගත කිරීමට නම් නිසි බර, උස සහිත ශරීරයක් පවත්වා ගැනීම ඉතා අත්‍යාවශ්‍ය වන්නකි. එසේම දරුවන් සඳහා හොඳින් කැලරි දහනය වන ආකාරයේ ව්‍යායාම පද්ධතියකට යොමු කරවීමද එතරමකට වැදගත් වෙයි.

සාකච්ඡා කළා - නිර්මලා කුමාරි සේනාරත්න
උපුටා ගැනීම ලක්බිම පුවත් පතඇසුරෙනි