අවුරුද්දක් ගත වෙලත් දරුවා ඇවිදින්නේ නැද්ද?

දරුවකු මෙලොව බිහි වූ දා සිට සෞඛ්‍ය සම්පන්නව රැක ගැනීමට සියලු දෙනා ඉතා උනන්දුවෙන් කටයුතු කරනවා. එවන් ආරක්ෂාවක් ලබාදී, නිරෝගීව ජීවත් කරවීමට වෛද්‍යවරුන් ද දැඩි වෙහෙසක නිරත වී සිටිනවා. එහෙත් දරුවා කුස පිළිසිඳ ගත් දා සිට ඔහු හෝ ඇයගේ සෞඛ්‍ය සම්බන්ධයෙන් මවක් ඕනෑකමින් කටයුතු කළ යුතුයි. ආයුර්වේදයේ දී බාල රෝග ලෙස සඳහන් කරන ළමා කාලයේ ඇතිවන රෝග සම්බන්ධයෙන් හා ඒ සඳහා ආයුර්වේද ප්‍රතිකාර ක්‍රමවේදයන් පිළිබඳ ආයුර්වේද වෛද්‍ය කිෂානි වනිගසේකර මහත්මිය දැක් වූ අදහස් මෙසේ යි.

ළමා කාලයේ ඇතිවන රෝග හඳුනා ගන්නේ කොහොම ද?

ළමා කාලයේ රෝග එනම් බාල රෝග මව්කුස පිළිසිඳගත් දා සිට ඇති විය හැකියි. ආයුර්වේදයට අනුව මෙය වර්ගීකරණය කරන්න පුළුවන්. ඒ අනුව කිරිවලින් පමණක් වැඩෙන කාලය හා කිරි සහ ආහාරවලින් වැඩෙන කාලය සඳහන් කළ හැකියි. මේ අවස්ථාවන්වලදී වැඩිහිටියන්ට වැළඳෙන ඕනෑම රෝගයක් ළමුන්ට ඇතිවීමේ හැකියාව තිබෙනවා.

දරුවන්ගෙන් දකින්න ලැබෙන රෝග මොනවා ද?

සාමාන්‍යයෙන් කුඩා දරුවකු අවුරුද්දක් ගතවීත් ඇවිදින්නේ නැතිනම් එය ආයුර්වේදයේ දී පක්ක රෝග ලෙස හඳුන්වනවා. එසේම දත් එනවිට ඇතිවන රෝග හා ඒ සම්බන්ධ අක්ෂි රෝගත් තිබෙනවා. පෝෂණ ඌනතා නිසා ද ඇතිවන රෝග දරුවන් තුළින් දකින්න ලැබෙනවා. වර්තමානයේ දී මානසික තත්ත්වයන් නිසා හා බුද්ධි වර්ධනය පිළිබඳ ගැටලු ද නිර්මාණය වී තිබෙනවා.

මේ සඳහා ප්‍රතිකාර කරන්නේ කොහොම ද?

දරුවන්ගේ බුද්ධි වර්ධන ගැටලු ඇති අවස්ථාවලදී ඔවුන්ට සුදුසු මෙන්ම අවශ්‍ය සුවිශේෂ ප්‍රතිකාර ක්‍රමයක් භාවිතා කරනවා. එසේම ළමා කාලයේ වැළඳෙන සියලු රෝග සඳහා ඉතා උසස් විශේෂ චිකිත්සා ක්‍රමෝපායන් භාවිතා කරනවා. දරුවකුට මව්කිරි දෙන කාලයේ යම් රෝගයක් ඇති වුවහොත් හෝ රෝගයක් ඇතිවීමේ අවදානමක් තිබේ නම්, ඒ මවට දෙනු ලබන විශේෂ ප්‍රතිකාර ක්‍රමයක්ද අප ක්‍රියාත්මක කර තිබෙනවා.

ඒ හරහා දරුවාට හොඳීන් ප්‍රතිකාරය ලැබෙනවා. මේ ආකාරයට ප්‍රතිකාර කිරීමේ දී සලකනු ලබන ආයුර්වේදීය චිකිත්සීය ක්‍රම එකිනෙකට වෙනස්. ඒ අනුව කළ හැකි හා නොහැකි ප්‍රතිකාර වෙන් කර තිබෙනවා.

දරුවකු නිරෝගී කර ගැනීමට මවකට පැවරෙන කාර්යය?

දරුවා යහපත් සෞඛ්‍ය සම්පන්න ලෙස තබා ගැනීමට නම් මවට ඉහළ වගකීමක් පැවරෙනවා. ඒ අනුව මාතෘ පෝෂණය හා මාතෘ ව්‍යහරණ මෙන්ම මාතෘ මානසිකත්වය ද හොඳීන් පවත්වා ගත යුතුයි.

එහිදී මව හොඳ ආහාර රටාවක් හා ඇවැතුම් පැවැතුම් ද යහපත් මානසිකත්වයක් ද දරා සිටිය යුතුයි. දරුවා ඉපදුන දා සිට ක්‍රියා කළ යුතු ආකාරය පිළිබඳව පැහැදිලි අවබෝධයක් ලබාගත යුතුයි. ඒ සඳහා මඟ පෙන්වීමක් ආයුර්වේද රෝහලෙන් සිදු කෙරෙනවා. එසේම දරුවා ට ලබා දෙන ආහාර පිළිබඳ සැලකිලිමත්වීම ද අවශ්‍යයි.

ආයුර්වේද රෝහලෙන් ළමා රෝගවලට ලබාදෙන ස්ථානය?

සාමාන්‍යයෙන් සමාජයේ ජීවත් විය යුත්තේ නිරෝගීමත් පුද්ගලයන් ය. එනිසා දරුවකු බිහි වූ දා සිට ඔවුන්ගේ යහපත් සෞඛ්‍ය වැදගත් තැනක් ගන්නවා. එනිසා දේශීය ප්‍රතිකාර හරහා නිරෝගී පුද්ගලයකු බිහි කළ හැකියි. ඒ සඳහා අප ළමුන් වෙනුවෙන් ඉතාමත් හොඳ සැලැසුම් සහගත නේවාසික ප්‍රතිකාර ද කරනවා. එනිසා ආයුර්වේද රෝහලෙන් ප්‍රතිකාර ලබන සියලු දෙනාගේ සියලු රෝග ඉතා හොඳීන් පාලනය කිරීමට අප චිකිත්සා ක්‍රමවේදයන් උපයෝගී වෙනවා.

ලබා දෙන උපදේශය කුමක් ද?

දරුවන් කෘත්‍රිම ආහාරවලින් ඈත් කිරීමට වැඩිහිටියන් කටයුතු කළ යුතුයි. පුළුවන් තරම් මව්කිරිවලින් පමණක් යැපිය යුතුයි. වැරැදි මත අනුව ප්‍රතිකාර නොකළ යුතුයි. එනිසා සුදුසුකම් ලත් වෛද්‍යවරයකුගෙන් ප්‍රතිකාර ලබා ගත යුතුයි. වර්තමානයේ දරුවන් බොහොමයක් අධිබර තත්ත්වයට පවා ලක්ව තිබෙන්නේ වැරැදි ආහාර රටාවන් නිසා ඒ පිළිබඳ නිවැරැදි අවබෝධයෙන් කටයුතු කළ යුතුයි.

උපුටා ගැනීම දිනමිණ