ව්යාායාම දරුවාගේ වැඩීමට බලපානවාද?
තම දරුවා සෞඛ්‍ය සම්පන්න, රටට වැඩදායි පුරවැසියකු ලෙස සමාජගත කිරීම සෑම මවකගේම,
පියකුගේම ප්‍රාර්ථනයයි. දරුවකුගේ අධ්‍යාපනය සඳහා ඔහුගේ සෞඛ්‍ය සම්පන්න භාවය
සෘජුවම බලපෑම් එල්ල කරනු ලබනවා. කුඩා කල සිටම ක්‍රියාශීලී ජීවිතයකට හුරු කරවීම සහ ව්‍යායාම වෙත යොමු කිරීම මඟින්
දරුවකුගේ ජීවිතයට ලබාගත හැකි ප්‍රතිලාභ රාශියක්ම තිබෙනවා. දරුවන්ගේ චාලක හැකියාවන් සංවර්ධනය වන තරමට ඔහුගේ
මානසික සහ බුද්ධිමය හැකියාවන් වර්ධනය වන බව ළමා මනෝවිද්‍යාඥයන් පවා පෙන්වා දෙනු ලබන කරුණක්.
වර්තමාන සමාජයේ ඇති කාර්යබහුල ජීවන රටාව, අයහපත් ආහාර, ගති පැවතුම් හේතුවෙන් කුඩා වියේ සිටම දරුවන් ලෙඩ රෝගවලට ලක්වීමේ ප්‍රවණතාවද ඉහළ ගොස් තිබෙනවා. කුඩා කල සිටම දරුවාව ව්‍යායාම වෙත යොමු කරන්නේ නම් ලෙඩ රෝග අවම සෞඛ්‍ය සම්පන්න ජීවන රටාවක් සහ යහපත් බුද්ධි මට්ටමක් ලබා ගැනීමට දරුවාට එය රුකුලක් වෙනවා. ඔබගේ දරුවාව කුඩා කල සිටම ව්‍යායාමවලට යොමු කළ යුත්තේ ඇයි යන කරුණ මෙම ලිපියේ අන්තර්ගතයයි.
තරගකාරී අධ්‍යාපන රටාව තුළ දරුවන් පොත පතටම පමණක් සීමා කිරීමට මවුපියන් පෙලඹී තිබෙනවා. මේ නිසාම දරුවන්ට ක්‍රියාශීලී වීමට අවකාශයක් හිමි නොවීම ඉතා කනගාටුදායක කරුණක්.
අවම ක්‍රියාශීලීත්වය සහ වැරැදි ආහාර රටාවන් හේතුවෙන් අද වනවිට බොහෝමයක් දරුවන් විවිධ සෞඛ්‍ය ගැටලුවලට ගොදුරු වී තිබෙනවා. වාර්ෂිකව 2, 3, 4 ශේ්‍රණිවල දරු දැරියන් සහභාගි කරවා ගනිමින් පාසල්වල සිදු කෙරෙන වෛද්‍ය පර්යේෂණ කිහිපයක්ම තිබෙනවා. එහිදී දරුවන්ගේ උස, බර, දත්, ඇස් පෙනීම ආදී කරුණු පිළිබඳව අවධානය යොමු කරනු ලබනවා.
මෙම පර්යේෂණවලින් සනාථ වන එක් කරුණක් වන්නේ බොහෝ දරුවන් ඔවුන්ගේ වයසට වඩා අධි බරකින්, අධි වර්ධනයකින් යුක්ත වන බවයි. එවැනි දරුවන්ට සිදුවන්නේ කුඩා කල සිටම වෛද්‍ය සායන වෙත සහභාගි වීමටයි.
බොහෝ දරුවන් අධික තරබාරුව, දියවැඩියාව වැනි අයහපත් රෝගවලට ගොදුරු වෙනවා. මෙවැනි තත්ත්වයක් උද්ගත වූවාට පසු ප්‍රතිකාර කරනවාට වඩා මෙවැනි තත්ත්වයන් ඇති වීම වළක්වා ගැනීම වඩා වැදගත් වෙනවා.
කුඩා කල සිටම දරුවාව ව්‍යායාමවලට හුරු කරවීමෙන් දරුවන්් සෞඛ්‍යසම්පන්න ලෙස වැඩෙන බව වෛද්‍යවරුන් පවා පෙන්වා දෙන කරුණක්. එසේම කුඩා කල සිට ව්‍යායාම කිරීමට ඔවුන් ඇති කරගන්නා පුරුද්ද ජීවිත කාලය පුරාවට පවත්වා ගැනීමටද පහසු වෙනවා.
ප්‍රතිශක්තිකරණය වැඩි වීමට, අස්ථි සවිමත් ලෙස වැඩිවීමට, අනවශ්‍ය මේදය දහනයට ව්‍යායාම දරුවාට උපකාරී වෙනවා. එසේම හොඳ නින්දක් ලැබීමටත්, හොඳ අවධානයක් පවත්වා ගැනීමටත් ව්‍යායාම දරුවාට අත්‍යවශ්‍ය වෙනවා. ව්‍යායාමවලට මෙන්ම ක්‍රීඩාවට යොමු වීමටද දරුවාට අවකාශය සලසා දිය යුතුයි. දුවපැන සෙල්ලම් කිරීම සඳහාම ඔහුට වේලාවක් වෙන්කර දිය යුතුයි.
ඔබ දිනපතා ව්‍යායාමවල නිරත වෙනවා නම් තම දරුවන්ද එයට සහභාගි කරවා ගැනීමට ඔබට හැකියාව තිබෙනවා. ඇවිදීම, බයිසිකල් පැදීම, පිහිනීම, නර්තනය වැනි ක්‍රියාකාරකම්වලට දරුවා යොමු කළ යුතුයි. එසේම Squats, Lunges, Sit-Up and push- Ups, Skipping Jump rope වැනි ව්‍යායාමද දරුවාට සුදුසු සරල ව්‍යායාම ලෙස පෙන්වා දිය හැකියි. දරුවාට ව්‍යායාම කිරීම විනෝදජනක වන ආකාරයට දිනකට විනාඩි 30ක්වත් දරුවාව ව්‍යායාම වෙත යොමුකළ යුතුයි.
නිවෙසේ එදිනෙදා කුඩා වැඩවලට දරුවන් සහභාගි කරවා ගැනීමද ඉතා හොඳ ව්‍යායාමක් වෙනවා. එමඟින් ඔවුන්ගේ අලසකම මඟහැරී කාර්යශූර දරුවකු නිතැතින්ම බිහිවෙනවා. ව්‍යායාමවලට, ක්‍රීඩාවට හුරු වූ දරුවන් තුළ මනා පෞරුෂයක් සහ අභියෝගවලට නොබියව මුහුණදීමේ හැකියාවක්ද ඇති වෙනවා.
සෙව්වන්දි හෙට්ටිආරච්චි
මව්බිම
