රතගායට බයවෙන්න එපා

රතගාය කියන්නේ පුංචි බබාලට සෑදෙන රෝගයක්. නමුත් එය බියවීමට අවශ්‍ය දෙයක් නොවේ. උෂ්ණත්වය සහ රක්ත දෝෂය නිසා ඇතිවන තත්ත්වයක් බැවින් ප්‍රතිකාර අත්‍යවශ්‍ය වේ. බොහෝ විට මවුකුස තුළ සිටින කාලයේදීත් බබාලට රතගාය සෑදෙන අවස්ථා තිබෙනවා. ඉපදුණ දවසේ ඉඳලම හැදෙන්නත් පුළුවන්. රක්තය දූෂිත වීමෙන් තමයි මෙම රෝගය සෑදෙන්නේ. මවගේ රක්තය දූෂිත වීම නිසාත් එනවා. මෙහි ලක්ෂණ විදියට ශරීරය පුරා මතුවන රතු පැහැ බිබිළි හඳුන්වන්න පුළුවන්. පුංචි, පුංචි බිබිළි, රතු ලප එනවා. මුහුණෙන් පටන් අරගෙන බෙල්ල දක්වා ඇවිත් අත් සහ පාදවල මතුවී අධික වේදනාවද ඇතිවිය හැකියි. රක්තය දූෂිත වීම, ලේ විස වීම, ලේ නරක් වී, වලිප්පුව නිසාත් රතගාය ඇතිවේ. වලිප්පුව රෝගය සුවවන අවස්ථාවේ රතගාය ඇතිවිය හැකිය. එසේම රතගාය භයානක, ඉක්මනින් පැතිරී යන, බෝවන, මාරක රෝගයක් නොවේ. ඒ නිසා කලබල වීමට අවශ්‍ය නැහැ. බබා හොඳට නාවන්න. ඉන්පසුව ආයුර්වේද වෙදකමේ දී බහුලව යොදා ගන්නා රත කල්කය (දෙසඳුන් කල්කය එනම් කොල්ලු, වදකහ, වැල්මී, රත් සඳුන්, සුදු සඳුන් මිශ්‍ර කර සාදයි. සඳුන් වර්ග දෙකක් යොදන බැවින් දෙසඳුන් කල්කය ලෙසද රත කල්කය හඳුන්වයි) ගල්වන්න. මීට අමතරව වතුරට කලවම් කරලා නාවන්නත් පුළුවන්. ඒ ප්‍රතිකාරයෙන් සතියකට පසුව කොත්තමල්ලි ඇටයක ප්‍රමාණයක මවුකිරි සමඟ හෝ කොත්තමල්ලි තැම්බූ වතුර සමඟ බීමට දෙන්න. බොහෝ දෙනාගේ මතයක් තමයි රත කල්කය බීමට දීම සුදුසු නැහැ කියන එක. නමුත් ඒ ගැන බියවීමට අවශ්‍ය නැහැ. දරුවා ආයුර්වේද වෛද්‍යවරයකුට පෙන්වා ඒ ගැන උපදෙස් පැතීම වඩාත් යෝග්‍යයි. රත කල්කය බීමෙන් සෙම අමාරු සුව වන අතරම රක්තවාතය වැලැඳීමෙන්ද වළක්වනවා. මීට අමතරව, බබා ඉපදිලා මාසයක් විතර ගියාට පස්සේ රතගාය එනවා නම් අමුකහ, පාවට්ටා, හීන් නිදිකුම්බා තම්බලා ඇඟ සෝදන්න. ලුණුවිල තම්බා බීමට දෙන්න. ඉහත ප්‍රතිකාර දෙක ආයුර්වේද වෛද්‍ය උපදෙස් මත සිදුකිරීම ඉතාම වැදගත්. හේතුව දරුවාට ගැටලුව මතුවේද නැද්ද යන්න ගැන ආයුර්වේද වෛද්‍යවරයා හරහා දැනගත හැකිවීමයි.

ආයුර්වේද අභිමානි ආයුර්වේද වෛද්‍ය හොරණ - බැල්ලපිටිය චන්ද්‍රදාස කළුතන්ත්‍රිගේ

උපුටා ගැනීම මව්බිම