සමහර ආහාර සඳහා දරුවන්ගේ අකැමැත්තත් සමබල පෝෂණයක් නොලැබීමට හේතුවක්
ඔබේ දරුවා ආහාර අරුචිය, ඉක්මනින් වෙහෙසට පත්වීම හා ක්‍රියාශීලී නොවීම වැනි ලක්ෂණවලින් යුක්තද? එය ඔබේ දරුවා ක්ෂුද්‍ර පෝෂක ඌනතාවයෙන් පෙළීමේ ලකුණක් විය හැකියි. ක්ෂුද්‍ර පෝෂක දරුවන්ගේ සිරුරේ පරිවෘත්තිය ක්‍රියාකාරිත්වය වෙනුවෙන් සුවිශේෂී කර්තව්‍යයක් ඉටු කරයි. දරුවන්ගේ නිරෝගිමත් කායික සහ මානසික වර්ධනයට බෙහෙවින් වැදගත් වන විටමින හා ඛණිජ ලවණ නියමිත ප්‍රමාණයෙන් නොලැබී යාමෙන් එසේ ක්ෂුද්‍ර පෝෂක ඌනතාව ඇති විය හැකි ය.
දරුවන්ගේ සිරුරේ පද්ධතිවල ක්‍රියාකාරිත්වය ගොඩනැඟීමට විශාල වශයෙන් දායක වන විටමින් හා ඛණිජ ලවණ සමබල පෝෂණයෙන් යුත් ආහාර වේලකින් ලබා ගැනීමේ හැකියාව පවතී. නමුත් කාර්යබහුල ජීවන රටාව හා ඇතැම් ආහාර සඳහා දරුවන් දක්වන නොකැමැත්ත යන කරුණු මුල් කරගනිමින් ඔවුන්ට අවශ්‍ය පෝෂණය නිසි ලෙස නොලැබීමත් හේතුවෙන් පෝෂණ ඌනතාවයන්ට ලක්විය හැකි ය.
මෙම ඌනතාවයන් මුල් අවදියේදීම ඉස්මතු වී නොපෙනෙන හෙයින් හඳුනාගැනීම අපහසු ය. නමුත් කල්ගත වීමේදී දරුවන් දිගින් දිගටම එම ඌනතාවයෙන් පෙළීම හේතුවෙන් සෞඛ්‍ය පරිහානියට පත්වන අතර ඌනතාවයෙන් මතුවන ලක්ෂණ දරුවන් වෙතින් පෙන්නුම් කෙරෙනු ඇත. එම නිසා දරුවන් පිළිබඳ නිරතුරු අවධානයෙන් පසුවන මවුවරුන්, ක්ෂුද්‍රපෝෂක ඌනතා පිළිබඳ නිසි ලෙස දැනුවත්ව සිටීම තුළින් දරුවන් ඊට ගොදුරු වීම වළක්වා ගැනීමේ හැකියාව පවතී. යකඩ, විටමින් හා සින්ක් ශ්‍රී ලංකාවේ දරුවන් අතර වැඩි වශයෙන් දක්නට ලැබෙන ඌනතාවේ.
යකඩ ඌනතාවය වැඩි වශයෙන් දක්නට ලැබෙන ක්ෂුද්‍ර පෝෂක ඌනතාවයි. එය යොවුන් වයසේ දරුවන් අතර දක්නට ලැබෙන දැවැන්ත මහජන සෞඛ්‍ය ගැටලුවක් බවට මේ වනවිට පත්ව ඇත. විශේෂයෙන් ම සිරුරේ පටක හා සෛල වෙත ඔක්සිජන් ප්‍රවාහනය කරනු ලබන රතු රුධිරාණුවල අඩංගු හීමොග්ලොබින් සඳහා යකඩ ඉතා වැදගත් සාධකයකි. රක්ත හීනතාවය යනු යකඩ ඌනතාවය දීර්ඝ කාලයක් පුරා පැවතීමෙන් ඇති වන තත්ත්වයකි.
විටමින් ‘ඒ’ පෙනීම සහ ප්‍රතිශක්තිකරණ පද්ධතියේ නිරෝගිමත් ක්‍රියාකාරිත්වය සඳහා හේතු‍වන අතර එය ප්‍රමාණවත් පරිදි සිරුරට නොලැබී යාමෙන් දරුවන්ට වැඩි වශයෙන් ආසාත්මිකතා හා රෝගාබාධවලට මුහුණපෑමට සිදුවනු ඇත. විටමින් ‘ඒ’ ඌනතාවය උග්‍ර අතට පත්වීම රාත්‍රි අන්ධභාවය සඳහා ද ප්‍රධානතම හේතුවකි.
ප්‍රමාණවත් පරිදි සින්ක් නොලැබීම දරුවන්ගේ කායික හා මානසික වර්ධනය අඩාල වීම හා ලිංගික පරිණත භාවය කල්ගතවීම කෙරෙහි ද බලපෑම් එල්ල කරනු ලබයි. ආහාර අරුචිය, ප්‍රතිශක්තිකරණ පද්ධතියේ ක්‍රියාකාරිත්වය අඩාල වීම, හිසකෙස් ගිලිහී යාම, පාචනය, බර අඩුවීම, තුවාල සුවවීමට කල් ගතවීම වැනි ලක්ෂණ තුළින් සින්ක් ඌනතාවය පෙන්නුම් කෙරේ.
ෆෝලික් අම්ලය කළල අවස්ථාවේ සිටම දරුවන්ගේ ශීඝ්‍ර වර්ධනය සඳහා අත්‍යවශ්‍ය සාධකයකි. ෆෝලික් ඌනතාව තනිව මතුවන්නක් නොවන අතර එය අනෙකුත් පෝෂණ ඌනතා සමඟින් ඉස්මතුවේ. ෆෝලික් ඌනතාවය දිව ආශ්‍රිත රෝගී තත්ත්වයන් ඇති කරන අතර සිරුරේ, හිසකෙස් හා නියපොතු හි වර්ණය වෙනස්වීම ඇති කරයි.
උපුටා ගැනීම සිළුමිණ
