දරුවා කෙට්ටු වෙන්නේ විටමින් මදි නිසා නොවෙයි
දරුවන් නිතර නිතර රෝගාබාධයන්ට ලක්වන්නේත්, කෙට්ටු වන්නේත් විටමින් අඩුකම නිසා බව බොහෝ මවුවරුන් ගේ අදහසයි. ඒ නිසාම දරුවාට දෙන ආහාර වර්ග තෝරා ගැනීමටත් වඩා, හොඳ විටමින් වර්ගයක් තෝරා ගැනීමට වෛද්‍යවරුන් මුණ ගැසෙන අවස්ථා අපමණයි. විටමින් කියන්නේ මොනවා ද? කෙනෙකුගේ නිරෝගී බවට, සිරුර වැඩීමට අමතර විටමින් ගැනීම අත්‍යවශ්‍ය ද? අද ඔබ දැනුම්වත් කෙරෙන්නේ ඒ පිළිබඳවයි.
විටමින් කියන්නේ මොනවා ද?
විටමින් නමින් හැඳින්වෙන්නේ ශරීරයේ වර්ධනය සහ සෞඛ්‍ය සම්පන්න බව පවත්වාගෙන යාමට අවශ්‍ය වන අංශුමාත්‍ර ද්‍රව්‍යයන්. සමහර විටමින් රෝගාබාධ ඇති කරන විෂබීජවලින් වළක්වා ගැනීමේ ප්‍රතිශක්ති ක්‍රියාවලියට උදව් කරන අතර සමහර විටමින් ශරීරයේ එන්සයිමවල ක්‍රියාකාරිත්වයට සහාය වී ශරීරයේ ශක්තිය නිෂ්පාදනය කරනවා. තවත් සමහර විටමින් හෝමෝන වර්ග තැනීමේ ක්‍රියාවලියේ දී හා ස්නායු පද්ධතියේ ක්‍රියාකාරිත්වයේ දී ප්‍රයෝජනවත්.
නිසි පරිදි විටමින් නොලැබෙන දරුවෙකුට රෝග පැතිරීමේ ඉඩ වැඩි ද?
වැඩියි. සිරුරේ පූර්ණ වර්ධනයට, විවිධ අංශවල ක්‍රියාකාරිත්වයට විටමින් අත්‍යවශ්‍යයි. උදාහරණ ලෙස විෂබීජ ආසාදනයක දී සිරුරේ විනාශ වන සෛල අලුතෙන් වැඩෙන්නට විටමින් සී අත්‍යවශ්‍යයි. විටමින් ඒ ඌනතාව දිගින් දිගටම පැවතුණොත් අඳුරේ දී ඇස් පෙනීම සම්පූර්ණයෙන් ම නැතිව යා හැකියි. ඇස්වල කොරපොතු හෙවත් බීටෝ ලප ඇතිවිය හැකියි. මෙහි මූලික රෝග ලක්ෂණය වන්නේ ඇස්වල ඇතුළත පටලය රැලි ගැසීමයි. ඒ වගේම එවැනි දරුවන් ගේ සම මතුපිට කොරල වැනි ස්වභාවයක් ඇති වෙන්නටත් පුළුවන්.
විටමින් හා ප්‍රතිශක්තිකරණය අතර සම්බන්ධතාවක් තිබෙනවා ද?
ඔව්. ප්‍රතිශක්තිකරණ ශක්තිය කියන්නේ රෝගවලට ඔරොත්තු දීමට ඇති හැකියාව. කෙනෙක් විටමින් ඌනතාවෙන් පෙළෙනවා නම් ශරීරය දුර්වල විය හැකියි. දුර්වල සිරුරක් ඇති කෙනා ඉක්මනින් ම රෝගවලට ගොදුරු විය හැකියි. සෞඛ්‍ය සම්පන්න බවට, නිරෝගී සිරුරකට හොඳ පෝෂණයක් අත්‍යවශ්‍යයි. හොඳ පෝෂණයකට විටමින් අත්‍යවශ්‍යයි.
සමහර කුඩා දරුවන්ගේ සිරුර ඉතා කෙට්ටුයි. විටමින් ලබා දීමෙන් එවැනි දරුවන් මහත් කර ගත හැකි ද?
බොහෝ දරුවන්ගේ සිරුර කෙට්ටු වීමට හේතුව ශරීරයට අවශ්‍ය මාංශජනක ධාතු හා ශක්තිය අඩංගු ආහාර (සීනි, පිටි, තෙල්) නිසි ප්‍රමාණයට, නිසි වේලාවට නොලැබීමයි. ඇතැම් දරුවන් අතර කලාතුරකින් විටමින් ඌනතාවක් දකින්නට ලැබෙනවා. එහිදී ප්‍රමුඛතාව ගන්නේ විටමින් ‘ඒ. ඌනතාව. විටමින් දීමෙන් දරුවාගේ කෙට්ටු වීම, මලානික බව දුරු වී යන බව සිතීම අපහසුයි. කළ යුතු වන්නේ කෙට්ටු වීමට හේතුව සොයා බලා ඊට ප්‍රතිකාර කිරීමයි. යකඩ ඌනතාව නිසා ඇතිවන රක්තහීනතාව හෙවත් පාණ්ඩුවත් සමහර දරුවන් අතර දකින්නට ලැබෙනවා. ඒත් ‘යකඩ’ ඛනිජ ද්‍රව්‍යයක්. එය විටමිනයක් නොවෙයි. ඒ වගේම ‘අයඩින්’ අපේ සිරුරට අඩුවෙන් ලැබෙන ඛනිජ ද්‍රව්‍යයක්. අයඩින් ඌනතාව නිසා තයිරොයිඩ් ග්‍රන්ථියේ ක්‍රියාකාරිත්වය අඩු වී ඒ මඟින් දරුවාගේ කායික හා මානසික වර්ධනය බාල විය හැකියි.
ආහාර මඟින් ලැබෙන විටමින් වර්ග හා පෙති දියර හෝ නික්ෂේපණ වශයෙන් ගන්නා විටමින් වර්ග අතර වෙනසක් තිබෙනවා ද?
ආහාර මඟින් ලැබෙන විටමින් ස්වාභාවිකයි. ඒවා ක්ෂුද්‍ර පෝෂක ලෙස ඉතා සුළු ප්‍රමාණ වශයෙන් සිරුරට සමබරව ලැබෙනවා. එය දෛනිකව සිදුවිය යුතු අනිවාර්ය ක්‍රියාවලියක්. එහෙත් පෙති, දියර හෝ නික්ෂේපණ මඟින් ලබා දෙන විටමින් ඒ ඒ වර්ග වශයෙන් හා නියමිත ප්‍රමාණවලින් ලබා දිය හැකියි. යම් හෙයකින් විටමින් නියමිත ප්‍රමාණයට වඩා වැඩියෙන් ලැබුණොත් විවිධ අසාත්මිකතා ඇති විය හැකියි. විශේෂයෙන් ජලයේ දිය නොවන විටමින් වර්ග ප්‍රමාණය ඉක්මවා ගැනීමෙන් හිස කැක්කුම, ඔක්කාරය, වමනය ආදි තත්ත්වයන් ඇතිවෙන්නට පුළුවන්. බහුල වශයෙන් කා අතරත් පාහේ ප්‍රසිද්ධ විටමින් සී පෙති පවා ගලනාලයේ හිරවීමක් සිදු වුවත්, අමාශයේ පවා ඇසිඩ් ගතිය වැඩිවිය හැකියි. එහෙත් එය කලාතුරකින් සිදුවිය හැකි දෙයක් පමණයි. හොඳම දේ ඌනතාවය දී මිස පුරුද්දක් ලෙස විටමින් ලබා නොගැනීමයි. පෝෂ්‍යදායි සමබල ආහාර වේලකින්ම සිරුරට අවශ්‍ය විටමින් ලබාදීම වැදගත්.
ඔබ කියන්නේ විටමින් පෙති, දියර හෝ එන්නත් මඟින් ලබා ගැනීම අහිතකර බව ද?
කිසිසේත්ම නෑ. කෙනෙකුට විටමින් ඌනතාවක් තිබෙන බවට පැහැදිලි රෝග ලක්ෂණ මතුවීගෙන එනවා නම් විටමින් ඖෂධයක් ලෙස ලබාදීම ඉතාම වැදගත්. එහෙත් මෙය තීරණය කළ යුත්තේ රෝගියා හෝ රෝගියාගේ බාරකරු විසින් නොවෙයි. වෛද්‍යවරයා විසින් පමණයි.
විටමින් වර්ග ලබා දිය යුතුම වන අවස්ථා තිබෙනවා ද?
ඔව්. විශේෂයෙන් ගැබිනි මවුවරුන්ට සහ කිරි දෙන මවුවරුන්ට ආහාර වේලට අමතරව විටමින් සී, විටමින් බී වැනි විටමින් වර්ගත්, යකඩ, කැල්සියම් වැනි ඛනිජ වර්ගත් ලබාදීම සාමාන්‍ය සිරිතයි. ගර්භණී කාලයේ දී හා මවුකිරි දෙන සමයේ වැඩිපුර අවශ්‍ය වන එම විටමින් සහ ඛනිජ ලවණ සෑම මවු කෙනෙකුටම සාමාන්‍ය ආහාර වේලකින් නොලැබෙන නිසා මේ නිර්දේශය කර තිබෙනවා. ඒ වගේ ම රෝගාතුර වූ විට, ශල්‍යකර්මයකට භාජනය වූ විට, පිලිස්සුම් ඇති වූ විට, තුවාල සිදු වූ විට මෙන් ම මානසිකව පීඩනයට පත් වූ අවස්ථාවන් හි විටමින් ලබාදීමක් සිදු කෙරෙනවා. විශේෂයෙන් විටමින් සී ලබා දෙනවා. බර අඩු කර ගැනීම සඳහා ආහාර පාලනය කරන අයටත් අමතර විටමින් ලබා ගැනීම හිතකරයි. විශේෂයෙන් දවසට කැලරි 1200 ට අඩුවෙන් ආහාර ගන්නා අය ඒ ගැන සැලකිලිමත් විය යුතුයි. වයස්ගත වන විට දී ආහාර මාර්ගයේ හොඳින් ආහාර අවශෝෂණය නොවන නිසා විටමින් ලබාදීම සුදුසුයි. එහිදී විටමින් බී හා සී අමතර වශයෙන් ලබා දිය හැකියි. ඒ වගේ ම අධික ලෙස දුම්පානය කරන අයටත් විශේෂයෙන් සී විටමිනය වැඩිපුර ලබා ගැනීම අත්‍යවශ්‍යයි. දවසකට අවශ්‍ය විටමින් සී ප්‍රමාණය මෙන් 40 ක් එවැනි අයට වැඩිපුර අවශ්‍ය බව සොයාගෙන තිබෙනවා.
සමහර රෝගාබාධ සඳහා ලබාදෙන ඖෂධ වර්ග නිසා අප ගන්නා ආහාරවල විටමින් අවශෝෂණයට බාධා වෙනවා ද?
ඔව්. අප ගන්නා ප්‍රති අම්ල ඖෂධ මඟින් විටමින් අවශෝෂණය අඩාළ විය හැකිය. ප්‍රතිජීවක ඖෂධ මඟින් විටමින් බී සහ කේ අඩාළ කළ හැකියි. ඇස්ප්‍රින් ඖෂධය නිසා විටමින් කේ, බී 12 සහ සී යන විටමින්වල ක්‍රියාකාරීත්වය අඩාළ වෙන්නට පුළුවන්. ඒ උදාහරණ කිහිපයක් පමණයි. විටමින් අවශෝෂණය අඩාළ කරන්නේ යැයි ඔබට අදාළ රෝගයට ලබා දෙන ඖෂධවලින් වැළකී සිටිය නොහැකියි. එය තීරණය කළ යුතු වන්නේ වෛද්‍යවරයා විසින් පමණයි.
සමහර විටමින් වර්ග බුද්ධි වර්ධනය, මතක ශක්තිය ලබා දෙනවා කියන කතාව ඇත්තක් ද?
නැහැ. බුද්ධි වර්ධනයට බෙහෙත් නෑ. එවැනි ප්‍රකාශ මිනිසුන් රැවටීම සඳහා කරන වෙළෙඳ උපක්‍රම පමණයි. එහෙත් මතක ශක්තියට සෞඛ්‍ය සම්පන්න බව වැදගත්. සෞඛ්‍ය සම්පන්න බව ඇති වෙන්න පෝෂ්‍යදායි ආහාර ගැනීම වැදගත්. විශේෂයෙන් නිවෙසින් බැහැරව බෝඩිං නිවාසවල සිට අධ්‍යාපනය හදාරන දරුවන්ට ආහාරපාන නිසි පෝෂණයෙන් හා ප්‍රමාණවත් පරිදි නොලැබීම නිසා වෛද්‍ය උපදෙස් අනුව මල්ටි විටමිනයක් ලබා දිය හැකියි. ඒ හැර බුද්ධි වර්ධනයට හෝ මතක ශක්තිය වැඩීමට විටමින් වර්ග ලබාදීම හොඳයි කියන කතාව සත්‍යයෙන් තොරයි.
ඔබ කියන්නේ නිවැරැදි ආහාර රටාවකට හුරු වී සිටිනවා නම් අමතරව විටමින් ලබා ගැනීම අවශ්‍ය නොවන බව ද?
ඔව්. අප එදිනෙදා ගන්නා සමබල ආහාර වේලකින් අපට අවශ්‍ය සියලුම විටමින් වර්ග නිතිපතා ලබා ගන්න පුළුවන්. එළවළු, පලතුරු, පලා වර්ග, මස්, මාළු, කිරි, බිත්තර, පිරිපහදු නොකළ පිටි සහ සීනි වර්ගවලින් සිරුරට අවශ්‍ය විටමින් සියල්ල නියම ප්‍රමාණයට ලබා ගත හැකියි.
හොඳින් විටමින් ලැබෙනවානම් වයස්ගත පෙනුම වැළැක්විය හැකියි කියන කතාව ඇත්ත ද?
ඒ කතාවේ යම් සත්‍යයක් තිබෙනවා. අපගේ ශරීරයේ කෝටි සංඛ්‍යාත සෛලවල සිදුවන පරිවෘත්තීය ක්‍රියාවන් හිදී ඔක්සිකාරක හෙවත් Oxidants නමැති සෛල බිත්ති සහ න්‍යෂ්ටිය විනාශ කරන ද්‍රව්‍යයක් නිපදවෙනවා. ඒවා උදාසීන කළ හැකි ප්‍රතිඔක්සිකාරක අප ගන්න සමහර විටමිනවල අන්තර්ගතයි. විටමින් බී, සී සහ ඊ උදාහරණ ලෙස සඳහන් කළ හැකියි. වයස්ගත පෙනුම ඇති වන්නේ ඔක්සිකාරක මඟින් විවිධ සෛලවල ඇති කරනු ලබන වෙනස්කම් නිසායි. අනෙක් පැත්තෙන් ඒවා නැවැත්වීමට ප්‍රතිඔක්සිකාරක ගත යුතුයි. ප්‍රතිඔක්සිකාරක අඩංගු පෙති සහ කරල් වර්ග වෙළෙඳ පොළෙන් ලබා ගන්නට පුළුවන්. එහෙත් දිනපතා විවිධ වර්ණයන් ගෙන් යුත් එළවළු, පලතුරු, ආහාරයට එක්කර ගන්නවා නම් එසේ ප්‍රතිඔක්සිකාරක සහිත ඖෂධ ගැනීම අවශ්‍ය නැහැ. අප නිතර බොන තේවලත් ප්‍රතිඔක්සිකාරක අඩංගු වෙනවා. දොඩම්, කැරට්, පේර, නෙල්ලි, තක්කාලි සහ පලා වර්ග නිතර නිතර ආහාරයට ගැනීම තෙල්, පිටි සහ සීනි අඩුවෙන් ගැනීම, සිරුර වෙහෙසා වැඩ කිරීම හෝ ව්‍යායාම කිරීම මඟින් ඔබගේ තරුණ පෙනුම බොහෝ කාලයක් ආරක්ෂා කරගත හැකියි.
විශේෂඥ වෛද්‍ය ආරියසේන යූ. ගමගේ
සාකච්ඡා කළේ - රමණී සුබසිංහ
