දරුවාගේ හදවතේ ස්පන්දනය අසාමාන්‍යද?

කෙසේ වෙතත් දරුවකුගේ හෘදයේ ගැටලුවක් පිළිබඳ සැක සහිත තත්ත්වයකදී ඒ පිළිබඳ සුදුසුකම් ලද වෛද්‍යවරයකු වෙතින් වෛද්‍ය උපදෙස් පැතීම ඉතා වැදගත්ය. ජීවිතයට ආදරය කරන බොහෝදෙනෙක් හදවත ගැනද සැලකිලිමත් වෙයි. හදවත සුරකින්නට නම් හදවත් රැක බලාගත යුතුයි. ඒ නිසා ජීවිතයට පණ පොවන හෘදයේ ගැටලුද වහා හඳුනා ගැනීම වැදගත්ය. විශේෂයෙන් මවුපියන්ගේ හදවත් දවන, දරුවන්ගේ හෘදයේ, “අසාමාන්‍ය හෘද ශබ්ද” එවන් ගැටලුකාරි තත්ත්ව වලින් එකකි.

හෘදයේ සාමාන්‍ය ශබ්ද :

හෘදයේ සාමාන්‍ය ශබ්ද කොටස් දෙකකි. එනම් පළමු හෘද ස්පන්දනය හා දෙවැනි හෘද ස්පන්දනය වශයෙනි. එහිදී පළමු හෘද ස්පන්දනය “ලබ්” වශයෙන්ද දෙවැනි හෘද ස්පන්දනය “ඩබ්” වශයෙන්ද හඳුන්වයි. මේ පළමු හෘද ස්පන්දනය හෙවත් “ලබ්” ශබ්දය නැඟෙන්නේ, හෘදයේ යට කුටීර හෙවත් කෝෂිකා සංකෝචනය වීමේදී, රුධිරය ආපසු හෘදයේ උඩ කුටීර හෙවත් කර්ණිකා වෙත යෑම වළක්වන ද්වී තුන්ඩ හා ත්‍රී තුන්ඩ කපාට වැසෙන විටය. මෙය පළමු හාට් සවුන්ඩ් එක නැතිනම් පළමු හෘද ස්පන්දනය වශයෙන් හඳුන්වයි. දෙවැනි හෘද ස්පන්දනය හෙවත් “ඩබ්” ශබ්දය. කෝෂිකා දෙක ලිහිල් වීමේදී මහා ධමනිවලට යවන ලද ලේ, ආපසු කෝෂිකා වෙත පැමිණීම වැළැක්වීම සඳහා අඩසඳ කපාට වැසීමේදී “ඩබ්” ශබ්දය නැඟේ. මේ තත්ත්ව දෙක සාමාන්‍ය හාට් සවුන්ඩ් එක නැතිනම් සාමාන්‍ය “හෘද ශබ්ද වශයෙන්” සලකයි. මෙම ශබ්ද වෛද්‍යවරයෙකුට වෙද නලාව ආශ්‍රයෙන් පැහැදිලිව වෙන්කර හඳුනාගත හැක.

සාමාන්‍ය ශබ්දවලට අමතරව ඇසෙන ශබ්ද හෙවත් Cardiac murmur :

ඉහත දැක්වූ සාමාන්‍ය හෘද ස්පන්දන අවස්ථා දෙකට අමතරව ඇසෙන “අසාමාන්‍ය හෘද ස්පන්දන” කාඩියැක් මර්මර් ලෙස හඳුන්වයි. මෙවැනි අසාමාන්‍ය හෘද ස්පන්දන ඇතිවීමට බලපාන ප්‍රධාන හේතු කීපයක් වේ.

Pathological murmur :

මේ යටතේ සංජානනීය රෝග තත්ත්ව, එසේත් නැතිනම් උපතින් ඇතිවන හෘද ගැටලු එනම් හෘදයේ කෝෂිකා දෙක අතර ඇති බිත්තියේ තිබෙන සිදුරු, (VSD) සහ කර්ණිකා දෙක අතර ඇති බිත්තියේ තිබෙන සිදුරු (ASD), කපාටවල අවහිරවීමක්, කපාට සිහින් වීමත්, කපාටවල කාන්දුවීම් වැනි තත්ත්ව ප්‍රධාන වශයෙන් හඳුනා ගනියි. ඊට අමතරව පසුකාලයේ ඇතිවන යම් රෝග තත්ත්ව නිසාද (එනම් රුමටික් වැනි රෝග) හෘද වස්තුවට යම් බලපෑමක් සිදුවීමෙන් හෘද කපාට අකර්මන්‍ය වීමක් විය හැකිය. එවන් තත්ත්ව, පැතලොජිකල් මර්මර් තත්ත්ව වශයෙන් සලකයි.

Functional murmur :

සිරුරේ පටකවලට රුධිරය ගමන් කිරීමට ඔක්සිජන් අවශ්‍ය වේ. නමුත් රුධිරයේ හිමොග්ලොබින්වල අඩුවක් වී දරුවකු රක්තහීනතාවයෙන් පෙළෙනඅවස්ථාවක හෘදයෙන් ලේ ගමනය වැඩි කිරීමට සිදුවෙයි. මෙසේ රක්තහීනතාවයෙන් පෙළෙන තත්ත්වයකදී ලේ ගමන ක්‍රියාවලියේ සිදුවන වෙනස්කම් නිසාද හෘදයේ අසාමාන්‍ය ශබ්ද ඇතිවෙයි. මේවා Functional murmur වශයෙන් සලකයි.

Innocent Cardiac murmur :

Innocent Cardiac murmur නැතිනම් එතරම් ගැටලුවක් නැති හෘද ශබ්ද තවත් වර්ගයකි. නමුත් මේ හෘද ශබ්ද පිළිබඳ නිගමනය කිරීමට පෙර දරුවාගේ හෘදය වස්තුවේ සෙසු තත්ත්ව පරීක්ෂා කළ යුතු වේ.මෙහිදී දරුවාගේ ක්‍රියාකාරීත්වය, හුස්ම ගැනිමේ වේගය, ළදරුවකු නම් නිල් පැහැ වනවාද, හොඳින් කිරි උරා බොන්නේද ආදී තත්ත්ව විශේෂයෙන් සැලකිල්ලට ගනියි. එහිදී වෛද්‍යවරයා විසින් වැඩිදුරටත් සිදුකරන සායනික පරීක්ෂණ තුළින් හඳුනාගන්නා අන්දමට එවන් තත්ත්ව සියල්ල සාමාන්‍ය නම් මෙවැනි Innocent Cardiac murmur ලෙස හැඳින්වෙන හෘද ශබ්ද ගැටලුවක් සේ නොසලකයි. කෙසේ වෙතත් සායනික පරීක්ෂණවලට අමතරව සුදුසුකම් ලද වෛද්‍යවරයෙකු තීරණය කරන්නේ නම් “එකෝ” පරීක්ෂණයක් සිදු කරයි. මෙවැනි එකෝ පරීක්ෂණයක් මඟින් ඉතා පැහැදිලිව Innocent Cardiac murmur තත්ත්වයක් හඳුනාගත හැක.

මෙවැනි අසාමාන්‍ය හෘද ශබ්ද සහිත දරුවකුට සාමාන්‍ය පරිදි ක්‍රියාකාරකම්වල යෙදිය හැකිද?

එකෝ පරීක්ෂණයක් තුළින් හෘදයේ ගැටලුවක් හඳුනා නොගත්තේ නම්, දරුවාගේ හෘදයේ ශබ්දයේ වෙනසක් තිබුණද හෘදයේ ව්‍යුහයේ ක්‍රියාකාරීත්වය සාමාන්‍ය දරුවකුට එදිනෙදා ක්‍රියාකාරකම්වල නිරත විය හැකි වේ. එමෙන්ම දරුවකුගේ අනාගත දිවියට Innocent Cardiac murmur තත්ත්වයෙන් කිසිදු බලපෑමක් නැති අතර බොහෝදුරට ඒවා පසුකලෙක මැකී යන නැතිනම් නොඇසෙන තත්ත්වයට පත්වීමට හැකියාව ඇත. විශේෂයෙන් ගැහැනු දරුවකුට Innocent Cardiac murmur තත්ත්වයක් නිසා විවාහ වීමට හෝ දරුවන් ලැබීමට බාධාවක් නැත. 

බොරැල්ල රිජ්වේ ළමා රෝහලේ ළමා හෘද රෝග පිලිබඳ විශේෂඥ වෛද්‍ය රුවන් මොරවක්කෝරලසාකච්ජා කලේ සමුද්‍රිකා වර්ණකුලඋපුටා ගැනීම දිනමිණ