වසක් විසක් කැවුණොත් පොල්කිරි පොවමින් ඉන්න එපා
දරුවෙකුට කිසියම් විස සහිත ද්‍රව්‍යයක් ගිලුණහොත් එය වැමෑරීම සඳහා ජලය, පොල්කිරි, එළකිරි යනාදී දියරමය ද්‍රව්‍ය ලබාදීම ජීවිත අනතුරකට අත වැනීමකි. වෙනදාටත් වඩා වර්තමානයේ දී දරුවන්ට විස සහිත ද්‍රව්‍ය ශරීරගත වීම වැඩි වී ඇති නිසා දෙමාපියන් ඇතුළු වැඩිහිටියන් මේ පිළිබඳව දැනුවත්ව සිටීම වඩාත් වැදගත් වේ. පොළොන්නරුව මහ රෝහලේ ළමා රෝග විශේෂඥ වෛද්‍ය උදය ද සිල්වා මහතා පවසනුයේ දරුවන්ට වස විස ශරීරගත වීම නිසා රෝහල්ගත වන සංඛ්‍යාව ඉහළ ගොස් ඇති බවය. සෙල්ලම් කිරීම සඳහා කුඩා දරුවන්ට ලබාදෙන සෙල්ලම් භාණ්ඩවල කුඩා බැටරි ගිලීමෙන් ඔවුන්ට විස ශරීරගත වීම සිදුවන එක් ආකාරයකි. මෙවැනි අවස්ථාවලදී අපේ දෙමාපියන් කලබල වී දරුවාගේ බඩට ඇතුළු වූ එම ආගන්තුක ද්‍රව්‍ය වමාර වීම සඳහා ජලය, පොල්කිරි, එළකිරි ලබාදීම සිදු කරයි. මෙය නොකළ යුතු ක්‍රියාවකි. මෙවැනි අවස්ථාවකදී දෙමාපියන් සිහි කල්පනාවෙන් යුතුව විමසිලිමත්ව ක්‍රියාකළ යුතුය. කළ යුතු හොඳම දෙය වන්නේ ළඟම ඇති රෝහලකට දරුවා රැගෙන යාමය. දරුවා ජීවත් වන පරිසරය වර්තමානයේදී වස විසවලින් පිරුණු පරිසරයක් බවට පත්ව තිබේ. දිනපතා රසායනික විස ද්‍රව්‍ය විස්සකට පමණ තම නිවසේදී දරුවා ගොදුරු වීමේ අවදානමක් පවතියි. රෙදි සෝදන කුඩු, විවිධ පිරිසුදු කාරක, එයාර් ෆ්‍රෙෂ්නර්, සුවඳ විලවුන්, නිය ආලේපන, තොල් ආලේපන එම විස ද්‍රව්‍ය අතරින් ප්‍රධාන වේ. පැරසිටමෝල් සහ භූමිතෙල් දරුවන් අතර බහුල වශයෙන් විස ශරීරගත වීමට හේතු වන බව රෝහල් දත්ත මඟින් පෙනීගොස් ඇත. සෑම නිවසකම දරුවන්ට විස වන ද්‍රව්‍ය පවතියි. විස සහිත ද්‍රව්‍ය දරුවාගේ ඇස නොගැටෙන පරිදි තැබීමෙන් ඔවුන් ආරක්ෂා කර ගත හැකිය. මී පාෂානම්, කපුරු බෝල උග්‍ර විස සහිත ද්‍රව්‍යයන් වේ. එවැනි ද්‍රව්‍යයන් දරුවාට ඇස නොගැටෙන පරිදි තැබීම දෙමාපිය වැඩිහිටි ඔබගේ වගකීමකි. ඇතැම් විටදී විස සහිත ද්‍රව්‍ය දරුවාගේ සිරුරේ තැවරේ. එවැනි විටකදී එම ස්ථානය සබන් යොදා විනාඩි දහයක් පමණ සෝදා දරුවා රෝහලට ගෙන යා යුතුය. කිසියම් විස සහිත ද්‍රව්‍යයක් දරුවාගේ මුඛය තුළ ගෑවුණහොත් එය සේදීමට හෝ ඉවත් කිරීමට උත්සාහ නොකර රෝහලකට ගෙනයාමද වැදගත්ය. එසේ කීමට හේතුවන්නේ මීට පෙර වාර්තා වූ පරිදි එක් මවක් තම දරුවාගේ දිවෙහි ගෑවුණු නිය ආලේපන ඉවත් කිරීමට ටිනර් භාවිතා කර තිබේ. ඒ හේතුවෙන් දරුවාගේ ජීවිතය අනතුරකට ලක්ව ඇත. දෙමාපියන්ගේ කලබලකාරීත්වය මත හෝ නොදැනුවත්කම නිසා මෙවැනි සිදුවීම් ද වාර්තා වන නිසා විශේෂයෙන්ම දරුවන්ට විස ශරීරගත වීමක් සිදු වුවහොත් වහාම ළඟම ඇති රෝහලට ගෙන යාම සුදුසුම තීරණය වේ.
සන්ධ්‍යා කරුණාරත්න
උපුටා ගැනීම දිනමිණ පුවත් පත
.jpg "චොක්ලට් ෆජ්")
